តួអាក្រក់នៅលើសង្វៀន វីរបុរសក្នុងជីវិតពិត

តួអាក្រក់នៅលើសង្វៀន វីរបុរសក្នុងជីវិតពិត។

ក្នុងខ្លឹមសារអត្តបទនៅថ្ងៃនេះ JAPO សូមណែនាំដល់ប្រិយមិត្តអ្នកអានរឿងរ៉ាវនិយាយពីសកម្មភាពដ៏ក្លាហានរបស់តារាសម្តែងម្នាក់ដែល​តែងតែ​ដើរតួ​ជា​មនុស្ស​អាក្រក់នៅជប៉ុន ជាសកម្មភាព​ដែល​ធ្វើឲ្យមនុស្សគ្រប់គ្នាសុទ្ធតែកោតសរសើរ។

ប្រហែលជាប្រិយមិត្តទាំងអស់គ្នាធ្លាប់បានមើលការសម្តែងចំបាប់អាជីព (Professional Wrestling) មែន​ទេ?

សម្រាប់ប្រិយមិត្តដែលមិនទាន់ដឹង ចំបាប់អាជីពគឺជាកីឡាដ៏ពិសេសមួយ ខុសពីក្បាច់គុន ឬកីឡាប្រយុទ្ធធម្មតាផ្សេងទៀត។ ការប្រកួតត្រូវបានរៀបចំតាមសាច់រឿង និងសម្តែងដើម្បីនាំ​មក​នូវ​អារម្មណ៍​រំភើប​សម្រាប់​ទស្សនិក​ជន។

ក្នុងពិភពនោះ ការយកឈ្នះមិនមែនជាអ្វីៗទាំងអស់នោះទេ។ អ្វីដែលសំខាន់បំផុតគឺធ្វើយ៉ាងណាឲ្យការប្រកួតមានភាពទាក់ទាញតាមដែលអាចធ្វើទៅបាន ដើម្បីទាក់ទាញអារម្មណ៍របស់ទស្សនិក​ជន។ ដូច្នេះហើយ អ្នកចំបាប់ដែលដើរតួជាតួអង្គអាក្រក់ (Heel) តែងតែជាផ្នែកមួយដែល​មិន​អាច​ខ្វះ​បាន។

តួអង្គសំខាន់នៅថ្ងៃនេះគឺ Great-O-Khan គាត់ជាអ្នកចំបាប់តួអាក្រក់មួយរូប ដែលជា “មនុស្សអាក្រក់” ដ៏​ល្បី​ឈ្មោះ​ខាង​វិស័យ​អ្នក​ចំបាប់​ជប៉ុន។

នៅលើសង្វៀន គាត់ល្បីថាមានភាពឃោរឃៅ។ ជាមនុស្សម្នាក់ដែលតែងតែលេងខូចនៅពេលដែលអាជ្ញាកណ្តាលមិនចាប់អារម្មណ៍ ធ្វើទារុណកម្មគូប្រកួតរហូតដល់ទីបញ្ចប់ ដែលធ្វើឲ្យទស្សនិក​ជន​ទាំង​អស់​ភ័យ​រន្ធត់​ព្រោះ​តែ​ភាព​ឃោរ​ឃៅ​របស់​គាត់។

ប៉ុន្តែបន្ទាប់មកទើបគេដឹងថា… នៅពីក្រោយរូបរាងដ៏គួរឲ្យខ្លាចនោះគឺជាវីរបុរសពិតប្រាកដមួយ​រូប។

នៅថ្ងៃមួយ តាមផ្លូវដែលមានមនុស្សជាច្រើនដើរឆ្លងកាត់ មានក្មេងស្រីម្នាក់ស្រាប់តែត្រូវបុរសស្រវឹង​ស្រា​ម្នាក់​ចាប់​ទាញ​ដៃ។

• “ទៅតាមអញ!” 

បុរសម្នាក់នោះស្រែកខ្លាំងៗ ហើយព្យាយាមអូសក្មេងស្រីទៅ។

ភ្លាមៗនោះ Great-O-Khan ដើរឆ្លងកាត់ដោយចៃដន្យ។ នៅលើដៃរបស់គាត់កំពុងកាន់​នំផេន​ខេក​ដែល​ទើប​នឹង​ទិញ​ជា​កាដូ​សម្រាប់​ខ្លួន​ឯង។ មានមនុស្សតិចណាស់ដែលដឹងថា តាម​ពិត​ទៅ អ្នកចំបាប់ដ៏គួរឲ្យខ្លាចរូបនេះ ជាមនុស្សម្នាក់ដែលចូលចិត្តរបស់ផ្អែម។

នៅពេលដែលក្រសែភ្នែករបស់គាត់មើលឃើញក្មេងស្រីកំពុងស្រែកយំ​ព្រោះតែខ្លាច បុរសម្នាក់ដែល​មាន​កម្ពស់ ១.៨៨ ម៉ែត្រ ទម្ងន់ ១១០ គីឡូក្រាម ដែលមានរហស្សនាមថា​អ្នក​ចំបាប់តួអាក្រក់​បំផុតរបស់ជប៉ុន បានសាកសួរដោយសំឡេងដ៏គួរសមបំផុតថា៖

• “អ្នកទាំងពីរជាឪពុកកូនមែនទេ?”

ក្មេងស្រីភ័យរន្ធត់ព្រោះតែខ្លាច ថែមទាំងប្រើកម្លាំងស្រែកយ៉ាងខ្លាំងថា៖

• “មិនមែនទេ!!”

ក្មេងស្រីម្នាក់នោះនិយាយចប់ Great-O-Khan ស្រាប់តែស្ទុះទៅដល់ភ្លាម។

ដៃឆ្វេងរបស់គាត់កាន់យ៉ាងណែនដើម្បីការពារនំផេនខេកដែលខ្លួនចូលចិត្ត ចំណែកឯដៃម្ខាងទៀត​ចាប់បុរសមាឌធំម្នាក់នោះ។

មិនយូរប៉ុន្មាន ប៉ូលីសបានមកដល់។ យ៉ាងណាមិញ ដោយសារតែរូបរាងដ៏គួរឲ្យខ្លាចរបស់ Great-O-Khan ប៉ូលីសបានយល់ច្រឡំថា គាត់ជាអ្នកបង្កបញ្ហា ដូច្នេះបានស្ទុះទៅចាប់មនុស្សច្រឡំ។ ជាការ​ពិត​ណាស់ មុខ​មាត់​ដ៏​កាច​សាហាវ​យ៉ាង​នេះ ពិបាកនឹងបន្ទោសពួកគេណាស់។

ទោះជាយ៉ាងណា នៅទីបំផុតជនល្មើសត្រូវបានចាប់ខ្លួនដោយជោគជ័យ។

ដោយឃើញថាក្មេងស្រីនៅតែភ័យខ្លាច Great-O-Khan ក៏ជូននំផេនខេកដែលខ្លួនចូលចិត្តទៅឲ្យក្មេងស្រីម្នាក់នោះ រួចនិយាយដោយសំឡេងយ៉ាងកក់ក្តៅថា៖

• “ញ៉ាំរបស់ផ្អែមនឹងមានអារម្មណ៍ថាមានសុភមង្គលជាងមុន ប្អូនញ៉ាំទៅ កុំក្រែងចិត្ត!”

ប៉ុន្មានថ្ងៃក្រោយមក នៅពេលដែលប្រព័ន្ធផ្សព្វផ្សាយសម្ភាសន៍ពីហេតុការណ៍នោះ គាត់គ្រាន់តែនិយាយ​ដោយ​សុភាព​ថា៖

• “មនុស្សដែលក្លាហានបំផុត​គឺ​ជា​ក្មេង​ស្រី​ម្នាក់នោះ ជាមនុស្សដែលហានស្រែករកជំនួយ។”

ប៉ុន្មានថ្ងៃក្រោយមក គាត់ទទួលបានលិខិតថ្លែងអំណរគុណពីប៉ូលីសចំពោះទង្វើដ៏ក្លាហាន ហើយបានក្លាយជា “វីរបុរសពិត” ក្នុងក្រសែភ្នែករបស់សាធារណជន។

យ៉ាងណាមិញ នៅយប់ដែលគាត់បានទទួលសំបុត្រថ្លែងអំណរគុណ Great-O-Khan បែរជាយកសំបុត្រ​នោះឡើងសង្វៀន។ គាត់លើកបង្ហាញនៅចំពោះមុខគូប្រកួត ហើយស្រែកគ្រហឹមតាមស្ទីល​តួអាក្រក់​របស់​ខ្លួន​ថា៖

• “រវាងអញ និងឯង តើអ្នកណាជាសម្ព័ន្ធមិត្តពិតនៃយុត្តិធម៌?”

នៅ​ពេល​នោះទស្សនិកជន​បាន​ស្រែក​ហ៊ោ​កញ្ជ្រៀវ​យ៉ាងខ្លាំង។

នៅលើសង្វៀន Great-O-Khan គឺតំណាងឲ្យតួអាក្រក់ដែលឃោរឃៅម្នាក់ ហានធ្វើគ្រប់យ៉ាងដើម្បី​ឲ្យ​ទស្សនិក​ជន​ស្អប់​ខ្លួន។ ប៉ុន្តែនៅពេលដែលចុះពីសង្វៀន គាត់​បែរ​ជា​ក្លាយ​ជា​មនុស្ស​ម្នាក់ដែល​ខុស​​គ្នា​ទាំង​ស្រុង​ចូលចិត្តរបស់ដ៏គួរឲ្យស្រលាញ់ដូចជា anime របស់ផ្អែម និងតែងតែជួយដល់នរណា​ដែល​កំពុង​ជួប​គ្រោះ​ថ្នាក់។

ប្រហែលជា នោះទើបជាព្រំដែនពិតប្រាកដរវាងតួសម្តែង និងបុគ្គលិកលក្ខណៈ។

ទោះបីជារឿងរ៉ាវដ៏ក្លាហាននោះមានមនុស្សជាច្រើនបានដឹងក៏ដោយ Great-O-Khan នៅតែមិនផ្លាស់ប្តូររបៀបសម្តែងរបស់ខ្លួននៅលើសង្វៀន។ គាត់បានបន្តដើរតួជាមនុស្សអាក្រក់ ព្រោះនោះជា​ការ​ងារ​ដែល​គាត់​បាន​ជ្រើស​រើស។ ដោយសារភាពខុសគ្នារវាងតួអង្គនៅលើសង្វៀន និងបុគ្គលិក​លក្ខណៈ​ពិត បានធ្វើឲ្យគាត់ទទួលបានការគោរពកាន់តែច្រើនពីអ្នកគាំទ្រ។

វីរបុរសពិតប្រាកដដែលមិនត្រូវការអាវធំ ហើយក៏មិនត្រូវការពាក្យសរសើរនោះដែរ។ គ្រាន់តែនៅពេលដែលនរណាម្នាក់ជួបគ្រោះថ្នាក់ ពួកគេហានចេញមុខដោយមិនស្ទាក់ស្ទើរ។

មានវីរបុរសមួយចំនួនទទួលបានការកោតសរសើរពីពិភពលោកទាំងមូល។ ហើយក៏មានវីរបុរសមួយ​ចំនួន​គ្រាន់តែជួយនរណាម្នាក់ដោយស្ងៀមស្ងាត់ពេលដែលគេកំពុងអស់សង្ឃឹមបំផុតប៉ុណ្ណោះ​។ សង្ឃឹម​ថា យើង​ទាំង​អស់​គ្នា​អាច​ក្លាយ​ជា​វីរបុរស​បែប​នេះ ទោះបីជាម្តងក្នុងជីវិតក៏​ដោយ។

Abe Kengo