ហេតុអ្វីបានជា Anpanman សុខ​ចិត្ត​ធ្វើ​ឲ្យ​ខ្លួន​ឯង​ចុះ​ខ្សោយ​ដើម្បី​ជួយ​សង្គ្រោះ​អ្នក​ដទៃ?

ហេតុអ្វីបានជា Anpanman សុខ​ចិត្ត​ធ្វើ​ឲ្យ​ខ្លួន​ឯង​ចុះ​ខ្សោយ​ដើម្បី​ជួយ​សង្គ្រោះ​អ្នក​ដទៃ?

ខ្សែភាពយន្តគំនូរជីវចលនិយាយពីវីរបុរសសម្រាប់កុមារត្រូវបានផលិតឡើងនៅទូទាំងពិភព​លោក ហើយជាទូទៅសុទ្ធតែធ្វើតាមលំនាំដូចជា តួអង្គឯកមាន​កម្លាំង​ខ្លាំង​ក្លា ឆន្ទៈ​មុត​មាំ និងប្រយុទ្ធ​រហូត​ដល់​ទី​បញ្ចប់​ដើម្បី​ការ​ពារ​យុត្តិធម៌។

យ៉ាងណាមិញ នៅប្រទេសជប៉ុនបែរជានិយាយពីវីរបុរសដែលខុសគ្នាទាំងស្រុង នោះគឺជា Anpanman ។ ជា​វីរបុរស​ម្នាក់​ដែលតែងតែលះបង់ខ្លួនឯង ហើយទន្ទឹមនឹងនោះបានដាក់ចេញនូវ​សំណួរទស្សនវិជ្ជាយ៉ាងស៊ីជម្រៅសម្រាប់កុមារ។ ទោះបីជាពេលខ្លះពិបាកយល់ក៏ដោយ Anpanman នៅ​តែ​ជា​តួអង្គ​ប្រឌិត​ដ៏​ពេញនិយមបំផុតអស់រយៈពេលជាច្រើនជំនាន់។

នៅថ្ងៃនេះ ចូរយើងស្វែងយល់អំពី Anpanman និងរឿងពិតដ៏សោកសៅដែលបង្កើតបានជាតួអង្គ​ដ៏​អស្ចារ្យ​ម្នាក់​នេះ។

បទចម្រៀងប្រធានបទមានអត្ថន័យទស្សនវិជ្ជាយ៉ាងជ្រាលជ្រៅ

ទោះបីជាស្នាដៃសម្រាប់កុមារ ប្រធានបទដែលទាក់ទងនឹង Anpanman បែរជាមានន័យយ៉ាងជ្រាលជ្រៅបំផុត។

“តើយើងកើតមកដើម្បីអ្វី ហើយរស់នៅព្រោះតែអ្វី?”

នោះជាសំណួរដែលខ្សែភាពយន្តនេះបានសួរទៅកាន់កុមារដែលទើបនឹងចេះដើរ។ ជាសំណួរដែលហាក់បីដូចជាពិបាកពេកសម្រាប់ក្មេងតូចៗ ព្រោះនេះជាបញ្ហាស្នូលនៃទស្សនវិជ្ជាដែលសូម្បីតែមនុស្សពេញវ័យក៏ប្រហែលជាមិនអាចរកឃើញចម្លើយបានដែរ។

ប៉ុន្តែ Anpanman បែរជាហ៊ានលើកជាសំណួរនេះទាំងដែលប្អូនៗនៅតូចនៅឡើយ។

លះបង់ខ្លួនឯងដើម្បីជួយសង្គ្រោះអ្នកដទៃ

ដូចដែលឈ្មោះបានបង្ហាញ Anpanman ជាវីរបុរសម្នាក់ដែលមានទម្រង់មុខធ្វើពីនំ Anpan – ជាប្រភេទនំប៉័ងស្នូលសណ្តែកដែលល្បីឈ្មោះរបស់ជប៉ុន។

ដោយសារតែមុខធ្វើពីនំ ដូច្នេះប្រសិនបើសើម តួអង្គនឹងបាត់បង់កម្លាំងខ្លាំង។

មនុស្សពេញវ័យជាច្រើនប្រហែលជាគិតថា “ប្រសិនបើដូច្នោះមែន គ្រាន់តែពាក់មួកសុវត្ថិភាពទៅបានហើយ” ប៉ុន្តែបើនិយាយបែបនេះ លែងជារឿងទៀតហើយ។

ក្នុងវគ្គនីមួយៗ ច្រើនតែមានក្មេងៗយំព្រោះតែឃ្លាន Anpanman មានសមត្ថភាពហោះហើរលើមេឃ ដូច្នេះអាចបីក្មេងៗទាំងនោះ ហើយ​ជូន​ប្អូនៗ​ត្រឡប់​ទៅ​ផ្ទះ។ មិនត្រឹមតែប៉ុណ្ណឹង តួអង្គនេះថែមទាំងមិនអាចធ្វើមិនដឹងថា ប្អូនៗកំពុងតែឃ្លាននោះទេ។ ដូច្នេះហើយ គាត់បានបេះមុខរបស់ខ្លួនមួយផ្នែកឲ្យប្អូនៗញ៉ាំ។

ដោយសារតែមុខគ្រាន់តែជានំស្នូលសណ្តែកក្រហម ដូច្នេះឈុតនេះមិនមានអារម្មណ៍គួរឲ្យខ្លាចនោះទេ។ ទោះជាយ៉ាងណា នៅពេលដែលមុខបាត់មួយចំណែក កម្លាំងប្រយុទ្ធរបស់ Anpanman ក៏ត្រូវបានថយចុះយ៉ាងច្រើនផងដែរ។

គាត់គួរតែសន្សំកម្លាំង ប្រើកម្លាំងទាំងអស់ដើម្បីកម្ចាត់ពួកមនុស្សអាក្រក់ជាមុនសិនចាំឲ្យប្អូនៗញ៉ាំ ដូច្នេះប្រសើរជាង។ ទោះជាយ៉ាងណា Anpanman តែងតែគិតគូរពីមនុស្សដែលខ្វះខាតមុន គាត់សុខចិត្តលះបង់មុខរបស់ខ្លួន ដោយមិនបារម្ភថាកម្លាំងប្រយុទ្ធរបស់ខ្លួននឹងចុះខ្សោយនោះទេ។

ប្រហែលជានៅលើលោកនេះកម្រមានវីរបុរសដែលព្រមលះបង់ខ្លួនឯង ហើយធ្វើឲ្យខ្លួនឯងចុះខ្សោយដើម្បីជួយសង្គ្រោះអ្នកដទៃបែបនេះណាស់។

កម្លាំងពិតតែមួយគត់គឺក្ដីស្រឡាញ់ និងភាពក្លាហាន

វីរបុរសដូចជា Superman ឬ Batman តែងតែមានសមត្ថភាពលើសពីមនុស្សធម្មតា ប៉ុន្តែ Anpanman មិនដូច្នេះនោះទេ។ របស់តែមួយគត់ដែលគាត់មានគឺក្ដីស្រឡាញ់ និងភាពក្លាហាន។

យើងអាចមើលឃើញយ៉ាងច្បាស់ពីខ្លឹមសារដែលខ្សែភាពយន្តនេះចង់បង្ហាញគឺ៖ “ដោយគ្រាន់តែមានក្តីស្រលាញ់ និងភាពក្លាហាន នរណាក៏អាចក្លាយជាវីរបុរសបានដែរ ទោះបីជាគ្មានសមត្ថភាពពិសេសអ្វីក៏ដោយ” ។

ជាស្នាដៃដែលកើតចេញពីសង្គ្រាម

តាមពិតទៅ ស្នាដៃដែលពិសេសនេះត្រូវ​បាន​បង្កើត​ឡើង​ដោយ​វិចិត្រករ Yanase Takashi ហើយ​វា​កើត​ចេញ​ពី​បទពិសោធន៍​ដ៏​ឈឺចាប់ផ្ទាល់របស់លោកនាសម័យសង្គ្រាម។

គាត់ផ្ទាល់ធ្លាប់ឆ្លងកាត់ការចងចាំដ៏គួរឲ្យរន្ធត់នៃសង្គ្រាម ថែមទាំងបានបាត់បង់ប្អូនប្រុសនៅសមរភូមិទៀតផង។ បន្ទាប់ពីសង្គ្រាមបានបញ្ចប់ ស្រុកកំណើតរបស់គាត់បន្តទទួលរងរញ្ជួយដីដ៏ធំ ដែលបានសម្លាប់មនុស្សជាច្រើន និងធ្វើឲ្យពួកគេបាត់បង់ផ្ទះសម្បែង។

ដោយសារតែបទពិសោធន៍ទាំងនោះ លោកបានសន្និដ្ឋានថា៖

“បើប្រៀបទៅនឹងពាក្យអរូបីនិយាយពីយុត្តិធម៌ ការបំពេញក្រពះទទេគឺសំខាន់ជាងច្រើនណាស់” ។

ដោយសារតែគំនិតនេះ គាត់មានជំនឿយ៉ាងមុតមាំថា សកម្មភាពលើកដៃចែកអាហារដល់អ្នកដែលកំពុងឃ្លានទើបជា “យុត្តិធម៌ពិតប្រាកដ” ។

នៅឆ្នាំ ២០១១ តំបន់ Tohoku នៃប្រទេសជប៉ុនបានទទួលរងការបំផ្លិចបំផ្លាញយ៉ាងធ្ងន់ធ្ងរ ដោយសារតែរញ្ជួយដី និងរលកយក្សស៊ូណាមិ។

ក្នុងបរិបទដែលមនុស្សជាច្រើនត្រូវស្នាក់នៅកន្លែងជម្លៀសខ្លួន និងភាពអស់សង្ឃឹមនៅពេលដែលគិតដល់អនាគត បទចម្រៀងដែលត្រូវបានចាក់ផ្សាយច្រើនបំផុតគឺបទចម្រៀងប្រធានបទរបស់ Anpanman ។

“តើយើងកើតមកព្រោះតែអ្វី? ហើយយើងរស់នៅដើម្បីអ្វី?”

“ប្រសិនបើជីវិតត្រូវបញ្ចប់ទាំងដែលមិនដឹងអ្វីទាំងអស់ រឿងនោះពិតជាគួរឲ្យសោកស្តាយណាស់” ។

នោះជាទំនុកច្រៀងដែលហាក់បីដូចជាសម្រាប់កុមារ ប៉ុន្តែបែរជាធ្វើឲ្យបេះដូងរបស់មនុស្សពេញវ័យរំភើបចិត្តពេលកំពុងអស់សង្ឃឹម។

ចំណុចសំខាន់ដែលកំណត់អត្តសញ្ញាណរបស់ជនជាតិជប៉ុនមិនមែនស្ថិតលើ ADN ឬភាពខុសគ្នាពីកំណើតនោះទេ។

ប៉ុន្តែប្រហែលជាត្រូវបានកំណត់ដោយចំណុចដូចជា តាំងពីក្មេងពួកគេធំដឹងក្តីជាមួយនឹងរឿងរ៉ាវស្រដៀងគ្នានឹងរឿង Anpanman ។ ជារឿងរ៉ាវដែលបានបង្រៀនថា ចិត្តល្អសំខាន់ជាងកម្លាំងខ្លាំង ពេលខ្លះការដែលជួយអ្នកដទៃមានន័យថាព្រមលះបង់ខ្លួនឯង ហើយនរណាក៏អាចក្លាយជាវីរបុរសបានដែរ ប្រសិនបើចេះស្រលាញ់ និងមានភាពក្លាហានគ្រប់គ្រាន់។

ដូច្នេះហើយ ប្រសិនបើមានឱកាស អ្នកទាំងអស់គ្នាគួរតែមើលរឿង Anpanman យ៉ាងហោចណាស់​ម្តង។

ហើយកុំចាត់ទុករឿងនេះគ្រាន់តែជារឿងគំនូរជីវចលសម្រាប់កុមារ។ ចូរយើងស្វែងយល់អំពីទស្សនៈជីវិតដែលបង្កប់នៅពីក្រោយរឿង និងទំនុកចម្រៀង។

ប្រហែលជាអ្នកទាំងអស់គ្នានឹងយល់ហេតុអ្វីបានជាតួអង្គដែលមានមុខធ្វើពីនំស្នូលសណ្តែកក្រហម​បែរ​ជា​អាច​ក្លាយ​ជា​និមិត្តរូបនៃទឹកចិត្តអាណិតអាសូរ និងទទួលបានក្តីស្រលាញ់ពីប្រជា​ជន​ជប៉ុន​​ជា​ច្រើន​​ជំនាន់។

Abe Kengo