Tsushima – កោះដែលធ្លាប់ពោរពេញ​ទៅ​ដោយ​ការ​បង្ហូរ​ឈាម និង​រឿង​រ៉ាវ​ស្តារ​ឡើង​វិញ​​ដោយ​ផ្អែក​​លើ​​ហ្គេម​​មួយ

Tsushima – កោះដែលធ្លាប់ពោរពេញទៅដោយការបង្ហូរឈាម និងរឿងរ៉ាវស្តារឡើងវិញ​ដោយផ្អែក​​លើ​ហ្គេម​មួយ។

ប្រសិនបើអ្នកចូលចិត្តលេងហ្គេម តើអ្នកធ្លាប់លេងហ្គេម Ghost of Tsushima – ដែលជាហ្គេមដ៏ពេញ​និយម​បំផុត​នៅ​លើ​ម៉ាសុីន PlayStation និង​កុំព្យូទ័រ (តាម​រយៈ​កម្ម​វិធី Steam) ដែរ​ទេ?

នេះជាហ្គេមមួយក្នុងចំណោមហ្គេមសាមូរ៉ៃដែលល្បីឈ្មោះនៅលើពិភពលោកនារយៈពេលប៉ុន្មានឆ្នាំមក​នេះ។ ទោះជាយ៉ាងណា មនុស្សតិចណាស់ដែលដឹងថា មិនត្រឹមតែនាំមកនូវការកម្សាន្តប៉ុណ្ណោះទេ ហ្គេម​នេះ​ថែមទាំងបានរួមចំណែកការពារបេតិកភណ្ឌដ៏មានតម្លៃរបស់ជប៉ុនផងដែរ។

នៅថ្ងៃនេះ ចូរយើងស្វែងយល់អំពី Ghost of Tsushima និងរឿងរ៉ាវនៅពីក្រោយភាពជោគជ័យរបស់​ហ្គេម​មួយ​នេះ។

បរិបទរបស់ហ្គេម Ghost of Tsushima គឺនៅលើកោះ Tsushima ស្ថិតនៅចន្លោះកោះ Kyushu របស់​ជប៉ុន និង​ឧបទ្វីប​កូរ៉េ។

នេះមិនត្រឹមតែជាកោះដ៏ស្រស់ស្អាតមួយប៉ុណ្ណោះទេ ថែមទាំងជាកន្លែងដែលកត់សម្គាល់ប្រវត្តិ​សាស្ត្រ​ដ៏​ឈឺ​ចាប់​បំផុត​របស់​ជប៉ុន​ផង​ដែរ។

ក្នុងប្រវត្តិសាស្ត្រ នៅពេលដែលចក្រភពម៉ុងហ្គោលចាប់ផ្តើម​ការ​ដណ្តើម​យក​ប្រទេសជប៉ុន Tsushima បាន​​ក្លាយ​​ជា​​គោល​​ដៅ​​ដំបូង​របស់​កង​​ទ័ព។

នៅឆ្នាំ ១២៧៤ កងទ័ពម៉ុងហ្គោលស្រាប់តែឡើងលើកោះ សម្លាប់ជនស៊ីវិលមិនថាប្រុសស្រី ឬកុមារនោះទេ។ មនុស្សដែលនៅរស់ត្រូវចាប់ធ្វើ​ជា​ឈ្លើយ​សឹក។

ប្រាំពីរឆ្នាំក្រោយមក នៅឆ្នាំ ១២៨១ កងទ័ពម៉ុងហ្គោលបន្តឈ្លានពានប្រទេសជប៉ុនម្តងទៀត ហើយ Tsushima បានក្លាយជាកន្លែងរងគ្រោះនៃសង្គ្រាមម្តងទៀត។

នៅក្នុងហ្គេម Ghost of Tsushima អ្នកលេងនឹងដើរតួជាសាមូរ៉ៃប្រយុទ្ធនឹងកងទ័ពម៉ុងហ្គោល ដើម្បី​ការពារ​មាតុភូមិ និងប្រជាជនរបស់ខ្លួន។ ថ្វីត្បិត​តែ ធាតុ​ផ្សំ​គ្រាន់​តែ​ជា​ការ​ប្រឌិត ហ្គេមនៅ​តែ​ត្រូវ​បាន​បង្កើតឡើងដោយផ្អែកលើបរិបទប្រវត្តិសាស្ត្រដែលមានពិត។

អ្វីដែលធ្វើឲ្យមនុស្សជាច្រើនភ្ញាក់ផ្អើលនោះគឺថា Ghost of Tsushima មិនមែនជាផលិតផលរបស់ក្រុម​ហ៊ុន​ជប៉ុន​នោះ​ទេ។ នេះជាផលិតផលដែលត្រូវបានបង្កើតឡើងដោយ Sucker Punch Productions ដែលជាក្រុមហ៊ុនហ្គេមរបស់អាមេរិក។

ទោះជាយ៉ាងណា ក្រុមអភិវឌ្ឍបានធ្វើការស្រាវជ្រាវយ៉ាងហ្មត់ចត់ចំពោះប្រវត្តិសាស្ត្រ វប្បធម៌ និងស្មារតី​របស់ Bushido ជប៉ុន។ ដូចជាទេសភាពធម្មជាតិ ស្ថាបត្យកម្ម សម្លៀកបំពាក់ និងការរស់​នៅ​ប្រចាំថ្ងៃ​របស់​ប្រជាជន គ្រប់យ៉ាងសុទ្ធតែត្រូវបានបង្ហាញឡើងវិញយ៉ាងជាក់ស្តែងបំផុត។

ទេសភាពដ៏ស្រស់ស្អាតនៅក្នុងហ្គេមរស់រវើករហូតដល់ថ្នាក់អ្នកលេងមានអារម្មណ៍ដូចជាកំពុង​ឈរ​នៅ​កណ្តាល​ទេសភាព​ធម្មជាតិ​ពិតៗ ថែមទាំងមានអារម្មណ៍ថាខ្យល់បក់កាត់វាលស្មៅទៀតផង។

ប្រហែលជាដោយសារតែក្តីស្រលាញ់ពិសេសចំពោះវប្បធម៌ជប៉ុន ទើបអ្នកដែលផលិតហ្គេមបានបង្កើត​ស្នាដៃដ៏លេចធ្លោបែបនេះ។

ហ្គេម Ghost of Tsushima បានទាក់ទាញអ្នកលេងនៅលើពិភពលោក ហើយរហូតមកដល់បច្ចុប្បន្ន ហ្គេម​នេះ​បាន​លក់​ចេញជាង ១៣ លានច្បាប់។

ក្នុងហ្គេមមានកន្លែងមួយត្រូវបានបំផុសគំនិតយកតាមប្រាសាទ Watatsumi ជាកន្លែងមួយក្នុងចំណោម​ក​ន្លែង​ដែល​ល្បី​ឈ្មោះ​របស់ Tsushima ។

ទោះបីជាត្រូវបានប្តូរឈ្មោះទៅជាប្រាសាទ Kumohi នៅក្នុងហ្គេមក៏ដោយ រូបភាពរបស់ប្រាសាទហាក់បីដូចជាត្រូវបានធ្វើឡើងវិញយ៉ាងល្អឥតខ្ចោះ ដែលបន្សល់ទុកនូវចំណាប់អារម្មណ៍យ៉ាងជ្រាល​ជ្រៅ​ដល់​អ្នក​លេង​ហ្គេម​ជា​ច្រើន។

ជាពិសេស ច្រកទ្វារ torii នៅកណ្តាលសមុទ្របានក្លាយជារូបភាពតំណាងមួយក្នុងចំណោមនោះរបស់​ហ្គេម។

យ៉ាងណាមិញ គួរឲ្យស្តាយត្រឹមប៉ុន្មានខែប៉ុណ្ណោះ បន្ទាប់ពីហ្គេម Ghost of Tsushima ចេញលក់ ព្យុះ​ដ៏​ធំ​មួយ​បាន​វាយ​ប្រហារ Tsushima ។

ហ្គេមទើបតែចេញផ្សាយនៅថ្ងៃទី ១៧ ខែកក្កដា ឆ្នាំ ២០២០ ហើយបន្ទាប់មកនៅខែកញ្ញា ឆ្នាំដដែល​នោះ ច្រកទ្វារ torii ល្បីឈ្មោះនៃប្រាសាទ Watatsumi រលំទាំងស្រុងដោយសារតែព្យុះ។

ដើម្បីជួសជុលប្រាសាទឡើងវិញ – ដែលជាទ្រព្យសម្បត្តិវប្បធម៌ និងជាកន្លែងទេសចរណ៍ដ៏សំខាន់ក្នុង​តំបន់ – យុទ្ធនាការ​រៃអង្គាស​ថវិកា​សហគមន៍​មួយ​ត្រូវ​បាន​រៀប​ចំឡើង។

ត្រឹមរយៈពេលបីថ្ងៃប៉ុណ្ណោះ ប្រាក់រៃអង្គាសបានរហូតដល់ទៅ ៤,៥ លានយ៉េន។ នៅទីបំផុត មនុស្សជាង ២០០០ នាក់បានចូលរួម​វិភាគ​ទាន​សរុប​ជាង ២៧ លាន​យ៉េន ដែល​លើស​ពី​គោល​ដៅ​ដំបូងឆ្ងាយ​ណាស់។

ក្នុងចំណោមអ្នកចូលរួម មានអ្នកលេងហ្គេមបរទេសជាច្រើនដែលធ្លាប់ចូលចិត្តហ្គេម Ghost of Tsushima ។ ដោយសារតែក្តីស្រលាញ់ចំពោះហ្គេមបានជម្រុញឲ្យពួកគេជួយការពារទីតាំងដែលមាន​​ពិត ដែល​បាន​បំផុត​គំនិត​ដល់​ហ្គេម​មួយ​នេះ។

អាចនិយាយបានថា វីដេអូហ្គេមបានក្លាយជាស្ពាននាំពិភពលោកខិតកាន់តែជិតប្រវត្តិសាស្ត្រ និង​​វប្បធម៌​​ជប៉ុន។

ដោយសារតែឥទ្ធិពលរបស់ Ghost of Tsushima ចំនួនភ្ញៀវទេសចរណ៍ដែលមកលេងកោះនេះកាន់​តែ​ច្រើន​ឡើង​គួរ​ឲ្យ​កត់​សម្គាល់​នា​ប៉ុន្មាន​ឆ្នាំ​ថ្មីៗ​នេះ។

នេះ​ជា​ដំណឹង​ល្អ​សម្រាប់​សេដ្ឋកិច្ច​ក្នុង​ស្រុក ប៉ុន្តែទន្ទឹមនឹងនោះក៏នាំមកនូវបញ្ហាមិនរំពឹងទុកមួយ​​​ចំនួន​​ផង​​ដែរ។

ភ្ញៀវទេសចរណ៍ដែលខ្វះការយល់ដឹងមួយចំនួនបានចោលសំរាម ដែលបណ្តាលឲ្យប៉ះពាល់ដល់ទេស​ភាព​​ធម្មជាតិ និង​​តំបន់​​ប្រវត្តិ​សាស្ត្រ​នៅ​លើ​កោះ។

Tsushima មិនត្រឹមតែជាគោលដៅទេសចរណ៍ដ៏ស្រស់ស្អាតប៉ុណ្ណោះទេ។ ទីនេះថែមទាំងជាកន្លែងសម្រាកដ៏ពិសិដ្ឋរបស់ជនរងគ្រោះដែលបានពលីជីវិតក្នុងការប្រយុទ្ធរាប់រយឆ្នាំមុនផងដែរ។

ដូច្នេះហើយ ភ្ញៀវទេសចរណ៍ម្នាក់ៗដែលមកដល់ទីនេះ មិនត្រឹមតែជាអ្នកមកទស្សនាប៉ុណ្ណោះទេ ថែម​ទាំង​ជាអ្នកដែលកំពុងជ្រុលជ្រាបប្រវត្តិសាស្ត្ររបស់ជប៉ុនផងដែរ។

Tsushima ជាកោះមួយដែលមានទាំងសម្រស់ធម្មជាតិ និងការចងចាំដ៏ឈឺចាប់នៃប្រវត្តិសាស្ត្រ។ ការ​ដែល​មាន​មនុស្សកាន់តែច្រើនស្គាល់កន្លែងនេះគឺដោយសារតែ Ghost of Tsushima ជារឿងដែល​ល្អ ព្រោះ​វា​ជួយឲ្យរឿង​រ៉ាវ​កាល​ពី​អតីតកាល​ត្រូវ​បាន​រំលឹក​ឡើង​វិញ។

ប៉ុន្តែដើម្បីឲ្យសម្រស់ទាំងនោះត្រូវបានថែរក្សាសម្រាប់មនុស្សជំនាន់ក្រោយ ក្តីស្រលាញ់តែមួយមុខមិនគ្រប់គ្រាន់នោះទេ។ អ្វីដែលសំខាន់ជាងនេះទៅទៀតគឺការគោរពចំពោះប្រវត្តិសាស្ត្រ វប្បធម៌ និង​បរិស្ថាន​កន្លែង​ដែល​យើង​ទៅ​លេង។

ប្រសិនបើអ្នកជាមនុស្សដែលចូលចិត្តប្រវត្តិសាស្ត្រជប៉ុន ឬវប្បធម៌សាមូរ៉ៃ Ghost of Tsushima ជាហ្គេម​ដែល​ប្រិយ​មិត្ត​គួរ​តែ​លេង​យ៉ាង​ហោច​ណាស់​ម្តង។

Abe Kengo