ម៉ឺនុយដែល​មិន​ចំណាយ​ប្រាក់​មាន​តែ​នៅ McDonald’s ប្រទេស​ជប៉ុន​ប៉ុណ្ណោះ

ម៉ឺនុយដែលមិនចំណាយប្រាក់មានតែនៅ McDonald’s ប្រទេសជប៉ុនប៉ុណ្ណោះ។

McDonald’s គឺជាខ្សែសង្វាក់ហាងលក់អាហាររហ័សទាន់ចិត្តនៅសហរដ្ឋអាមេរិក ហើយបច្ចុប្បន្នយីហោមានវត្តមាននៅទូទាំងពិភពលោក។ ប្រទេសនីមួយៗមានមុខម្ហូបពិសេសដោយឡែក ដែល​សម​ស្រប​ទៅ​នឹងវប្បធម៌ក្នុងស្រុក។ យ៉ាងណាមិញ ដោយឡែកនៅហាង McDonald’s ក្នុងប្រទេស​ជប៉ុន​ធ្លាប់​មាន “ម៉ឺនុយ” ពិសេស​​មួយ​​ដែល​​ត្រូវ​​បាន​ដាក់​បញ្ចូល​ជា​មួយ​នឹង​តម្លៃ ០ យ៉េន។

ម៉ឺនុយ​ដែល​មិន​ចំណាយ​ប្រាក់​នោះ​គឺ​ជា​ផលិត​ផល​ដែល​បង្កើត​ឡើង​ដោយ​ស្មារតី​រួស​រាយ​រាក់​ទាក់ចំពោះ​​ភ្ញៀវ​​របស់​​ប្រជាជន​​ជប៉ុន។

តើវាជាអ្វី? ហើយវាត្រូវបានបង្កើតឡើងដោយផ្នត់គំនិតយ៉ាងណា? ចូរយើងស្វែងយល់តាម​រយៈ​ខ្លឹម​សារ​អត្តបទ​ខាង​ក្រោម។

មិនមែនហាំប៊ឺហ្គឺ ដំឡូងបំពង ឬទឹកក្រូចនោះទេ ប៉ុន្តែម៉ឺនុយពិសេសនោះគឺជា… ស្នាមញញឹម។

ត្រូវហើយ នៅតាមហាង McDonald ក្នុងប្រទេសជប៉ុន ភ្ញៀវអាចបញ្ជាទិញ “ស្នាមញញឹម 0 យ៉េន” ។

មនុស្សជាច្រើនយល់ឃើញថា នេះជាការបំផុសគំនិតមកពីសហរដ្ឋអាមេរិក ព្រោះ McDonald’s ល្បី​ថា​មាន​គុណ​ភាព និង​រចនាប័ទ្ម​សេវាកម្ម​ស៊ី​សង្វាក់​គ្នា​​នៅ​​ទូទាំង​ពិភព​លោក។

ប៉ុន្តែជាក់ស្តែងផ្ទុយទៅវិញ។

គំនិតនេះមានប្រភពមកពីបុគ្គលិកម្នាក់ដែលធ្វើការនៅហាង McDonald’s មួយកន្លែងនៅ Osaka ។ ដោយ​ផ្តួច​ផ្តើម​ពី​គំនិតតូចមួយ វា​បាន​ក្លាយ​ជា​លក្ខណៈ​ពិសេស​ដ៏ល្បី​មួយ​របស់ McDonald’s ជប៉ុន។

ហើយរហូតមកដល់សព្វថ្ងៃនេះ McDonald’s នៅសហរដ្ឋអាមេរិកមិនមានជម្រើស “Smile 0$” នៅ​លើ​ម៉ឺនុយ​នោះ​ទេ។

ថ្វីត្បិតតែ ត្រូវបានសរសេរយ៉ាងច្បាស់នៅលើម៉ឺនុយក៏ដោយ ប៉ុន្តែទោះបីជាភ្ញៀវមិនហៅម៉ឺនុយនេះ បុគ្គលិក​នៅ​តែញញឹមយ៉ាងកក់ក្តៅ។ ស្នាមញញឹមតែងតែមានជានិច្ច ហើយអតិថិជនទាំងអស់សុទ្ធ​តែ​អាច​ទទួល​បាន​ដោយ​មិន​ចាំ​បាច់​ស្នើ​សុំ​នោះ​ទេ។

គោលបំណងនៃផ្នត់គំនិតនេះដើម្បីបង្ហាញថា ភាពរួសរាយរាក់ទាក់ និងសេវាកម្មបម្រើយ៉ាងយកចិត្ត​ទុក​ដាក់​របស់​បុគ្គលិក​ក៏​ជាផ្នែក​មួយ​នៃ​បទ​ពិសោធន៍​របស់​អតិថិជន​ផង​ដែរ។

ទោះជាយ៉ាងណា គួរឲ្យស្តាយក្នុងការកែប្រែបទប្បញ្ញត្តិថ្មី នៅឆ្នាំ ២០២៤ ឃ្លាដែលថា “Smile 0 យ៉េន” ត្រូវ​បាន​ដក​ចេញ​ពី​ម៉ឺនុយ​ជា​ផ្លូវការ។

មូលហេតុមួយក្នុងចំណោមនោះគឺថា McDonald’s ជប៉ុនបានអនុម័តគោលនយោបាយថ្មីពីក្រុមហ៊ុន​មេ​ជា​មួយនឹង​ពាក្យ​ស្លោក​ថា “Work with your style” – ចូរ​ធ្វើ​ការ​តាម​រចនាប័ទ្ម​របស់​ខ្លួន។

ជំនួសដោយការដែលតម្រូវឲ្យបុគ្គលិកញញឹមជានិច្ច ក្រុមហ៊ុន​ចង់​ឲ្យ​មនុស្ស​គ្រប់គ្នា​អាច​បង្ហាញពីខ្លួន​ឯង។

ក្រៅពីនេះ បច្ចុប្បន្នភ្ញៀវជាច្រើនបញ្ជាទិញតាមរយៈម៉ាស៊ីនបញ្ជាទិញដោយស្វ័យប្រវត្តិ ដូច្នេះ​ឳកាស​​ប្រាស្រ័យ​ទាក់​ទង​រវាង​បុគ្គលិក និង​អតិថិជន​ក៏​កាត់​បន្ថយ​ផង​ដែរ។

ក្នុងពេលជាមួយគ្នានេះ យុវជនជាច្រើននៅប្រទេសជប៉ុនក៏យល់ឃើញថា ស្នាមញញឹមដែលបង្ខិតបង្ខំ​ពេល​ខ្លះ​ធ្វើ​ឲ្យ​ពួក​គេ​អារម្មណ៍​ទើស​ទាល់។

នៅពេលដែល McDonald’s ជប៉ុនដាក់បញ្ចូលស្នាមញញឹម ០ យ៉េនក្នុងម៉ឺនុយ ពួកគេបានប្រឈម​មុខ​នឹង​ការ​តវ៉ា​ជា​ច្រើន​នៅ​តាម​បណ្តាហាង McDonald’s នៅជុំវិញពិភពលោក។

មានមតិយោបល់មួយ​ចំនួន​យល់​ឃើញ​ថា៖ ប្រសិន​បើ​ស្នាម​ញញឹម ០ យ៉េន តើ​នោះ​មាន​​ន័យ​ថា​ស្នាមញញឹមគ្មានតម្លៃ​ទេមែនទេ?

ទន្ទឹមនឹងនោះ មតិយោបល់មួយចំនួនពីបណ្តាប្រទេសនៅអឺរ៉ុប ដូចជាបារាំង ឬអាល្លឺម៉ង់បានលើកឡើងថា៖ “អ្វីដែលសំខាន់បំផុតគឺបំពេញការងារឲ្យបានល្អ មិនមែនដាក់ស្នាមញញឹមក្នុងម៉ឺនុយ​មុខ​ម្ហូប​នោះ​ទេ” ។

តាមពិតទៅ គំនិតដើមមិនមានបំណងបង្កឲ្យមានការជជែកវែកញែកដ៏ស្មុគស្មាញបែបនេះឡើយ។ ប៉ុន្តែគ្រាន់តែផ្តើមចេញពីគោលបំណងចង់ឲ្យភ្ញៀវទទួលបានបទពិសោធន៍ដ៏ល្អបំផុតនៅ​ពេល​ដែល​ទៅ​កាន់​ហាង McDonald’s ប៉ុណ្ណោះ។

ប្រសិនបើអតិថិជនពេញចិត្តនៅពេលដែលប្រើប្រាស់សេវាកម្មនេះ បុគ្គលិកបម្រើសេវកម្មក៏នឹងមាន​អារម្មណ៍ថាធូរចិត្តនៅពេលដែលធ្វើការផងដែរ។

ប្រសិនបើស្នាមញញឹមអាចធ្វើឲ្យការសន្ទនាយ៉ាងខ្លីរវាងអ្នកលក់ និងអ្នកទិញកាន់តែមានភាពស្និទ្ធ​ស្នាល​ជាង​មុន ច្បាស់ណាស់នោះជារឿងដែលគួរតែធ្វើ។

ការដែលមានចេតនាដាក់បញ្ចូលស្នាមញញឹមក្នុងម៉ឺនុយសមហេតុផល ឬអត់នោះអាស្រ័យលើផ្នត់គំនិតរបស់មនុស្សម្នាក់ៗ។ ប៉ុន្តែមិនអាចប្រកែក​បាន​ទេ​ថា “ស្នាមញញឹម ០ យ៉េន” បាន​ក្លាយ​​ជាយុទ្ធនាការ​ផ្សព្វ​ផ្សាយ​ដ៏​ជោគជ័យ​បំផុត​របស់ McDonald’s ជប៉ុន ហើយ​តែង​តែ​ត្រូវ​បានរំលឹក​​ដល់​​អស់​​រយៈ​​ពេល​​ជា​ច្រើន​​ឆ្នាំ។

ថ្វីត្បិតតែ ត្រូវបានដកចេញពីម៉ឺនុយផ្លូវការក៏ដោយ “ស្នាមញញឹម ០ យ៉េន” តាមពិតទៅ មិនទាន់ត្រូវបានលុបចោលទាំងស្រុងនោះទេ។ ស្នាមញញឹមនោះត្រូវបានរក្សាទុកដូចជា “មុខម្ហូបសម្ងាត់” សម្រាប់អ្នកដែលស្រលាញ់ចូលចិត្ត McDonald’s ជប៉ុន។

នៅតាមបញ្ជរគិតលុយជាច្រើនដែលមានបុគ្គលិកបម្រើសេវាកម្ម ប៊ូតុង “Smile ០ យ៉េន” នៅតែត្រូវ​បានរក្សាទុកក្នុងប្រព័ន្ធបញ្ជាទិញដែលប្រៀបបីដូចជាអនុស្សាវរីយ៍នៃអតីតកាល។

ស្នាមញញឹមមិនមែនជាអ្វីដែលអាចបង្ខំបាននោះទេ។ ស្នាមញញឹមដែលបង្ខំពេលខ្លះអាចធ្វើឲ្យមនុស្ស​នៅចំពោះមុខមានអារម្មណ៍មិនស្រួលចិត្តជាជាងអារម្មណ៍សប្បាយចិត្តទៅទៀត។ ប៉ុន្តែនៅ​ពេលដែលវាផ្តើមចេញពីចិត្ត វាបែរជាមានកម្លាំងអាចផ្សារភ្ជាប់មនុស្ស និងមនុស្ស ទោះបីជា​រយៈ​ពេល​ជួប​គ្នា​ត្រឹម​ប៉ុន្មាន​នាទី​ក៏​ដោយ។

ប្រហែលនោះទើបជាអត្តន័យពិតប្រាកដរបស់ “ស្នាមញញឹម ០ យ៉េន” ដែល​បាន​បង្ហាញ​ដល់​យើងទាំង​អស់​​គ្នា។

ការដាក់បញ្ចូលស្នាមញញឹមនៅក្នុងម៉ឺនុយប្រៀបបីដូចជាការរំលឹក ដើម្បីកុំឲ្យយើងបំភ្លេចវាដោយចៃដន្យ។

ពេលខ្លះ អ្វីដែលធ្វើឲ្យអ្នកដទៃចងចាំអ្នក មិនមែនជាផលិតផលដែលអ្នកលក់នោះទេ ប៉ុន្តែជាអារម្មណ៍​រីក​រាយ​ដែល​អ្នក​នាំ​មក។

ហើយក្នុងករណីជាច្រើន ស្នាមញញឹមដ៏ស្មោះត្រង់ជាមធ្យោបាយដែលងាយស្រួលបំផុតដើម្បីសម្រេច​បាន​នូវ​គោល​ដៅ​នោះ។

ដោយគ្រាន់តែញញឹម អ្នកដទៃសប្បាយរីករាយ សូម្បីតែខ្លួនអ្នកក៏មានអារម្មណ៍សប្បាយចិត្តផង​ដែរ។

ខ្ញុំជឿថា ប្រិយមិត្តទាំងអស់គ្នាអាចអនុវត្តចំណុចនេះក្នុងអាជីវកម្ម និងសូម្បីតែជីវិតផ្ទាល់ខ្លួនរបស់​អ្នក​ផង​ដែរ។

ខ្ញុំផ្ទាល់ក៏បានអនុវត្ត និងទទួលបានជោគជ័យ។

ដូច្នេះហើយ សូមកុំកំណាញ់ស្នាមញញឹម ផ្ទុយទៅវិញ ចូរ​ញញឹម​ឲ្យ​បាន​ច្រើន​ជា​រៀង​រាល់​ថ្ងៃ!

Abe Kengo