អត្តន័យ​ពិត​ប្រាកដ​នៃ​ទង់​ជាតិ​ជប៉ុន

អត្តន័យពិតប្រាកដនៃទង់ជាតិជប៉ុន។

ដោយគ្រាន់តែមានរង្វង់មូលពណ៌ក្រហមដ៏ស្រស់នៅលើផ្ទៃក្រណាត់ពណ៌ស ទង់ជាតិជប៉ុនមានការរចនាយ៉ាងសាមញ្ញាបំផុត។ គេជឿថា ទង់ជាតិព្រះអាទិត្យពណ៌ក្រហមនោះចាប់​ផ្តើម​ត្រូវ​បានប្រើ​ប្រាស់​នៅ​ពាក់​កណ្តាល​ចុង​ក្រោយ​នៃ​ទសវត្សរ៍ទី ៧០០ ។

ជាទូទៅ រង្វង់មូលពណ៌ក្រហមត្រូវបានគេស្គាល់ថាជានិមិត្តរូបនៃព្រះអាទិត្យកំពុងរះ សច្ចភាព និងសន្តិភាព។ យ៉ាងណាមិញ ប្រសិនបើមានតែប៉ុណ្ណឹង យើងនឹងមើលរំលងផ្នត់គំនិតដ៏អស្ចារ្យរបស់​ប្រជាជន​ជប៉ុន។

នៅពីក្រោយរូបភាពដ៏សាមញ្ញនោះ តាមពិតទៅបង្កប់ទៅដោយទ្រឹស្ដីដែលនិយាយពីប្រភពដើមដ៏ស្រស់​ស្អាត ហើយ​​នោះ​​ជា​​រឿង​រ៉ាវ​​ដែល​បង្ហាញ​ពី​ស្មារតី​របស់​ជប៉ុន ដែល​ខ្ញុំ​ឲ្យ​តម្លៃ​បំផុត​ផងដែរ។

ទ្រឹស្តីនេះចាត់ទុកទង់ជាតិដូចជាកញ្ចក់ដែលឆ្លុះបញ្ចាំងពីទស្សនៈពិភពលោករបស់ប្រជាជនជប៉ុន។

តាំងពីសម័យបុរាណកាល ទឹកដីជប៉ុនមានជំនឿដ៏ពិសិដ្ឋមួយថា អ្វីៗទាំងអស់នៅលើលោកនេះ មិនត្រឹមតែមនុស្សប៉ុណ្ណោះទេ សូម្បីតែសត្វ រុក្ខជាតិ ទន្លេ ភ្នំ និងមហាសមុទ្រជាដើម គ្រប់​យ៉ាងស្ថិត​នៅ​ក្នុង​ព្រះ​ទ័យ​របស់​អាទិទេព។

អាចនិយាយបានថា យើង​ទាំង​អស់​គ្នា ជាមួយនឹងពិភពលោកដែលនៅជុំវិញ សុទ្ធតែកំពុងត្រូវបាន​ការ​ពារ​ក្នុង​រង្វង់​ដៃ​របស់​អាទិទេព។

ក្នុងភាសាជប៉ុន ទារកទើបនឹងកើតត្រូវបានគេហៅថា Akachan (赤ちゃん) ឬបើតាមភាសាបុរាណហៅថា Akago (赤子) ។ មនុស្សយើង តាមពិតទៅកំពុងស្ថិតនៅក្នុងផ្ទៃម្តាយអាទិទេព។ ហើយ​អាទិទេព​ត្រូវបានចាត់ទុកដូចជាអ្នកម្តាយដ៏អស្ចារ្យដែលកំពុងចិញ្ចឹមបីបាច់​ជីវិត​ទាំង​អស់នៅ​លើ​ពិភព​លោក។

យោងតាមទ្រឹស្ដីនេះ ផ្ទៃពណ៌សនៅលើទង់ជាតិតំណាងឲ្យវត្តមានរបស់អាទិទេពដែលមានបេះដូងបរិសុទ្ធ។ ចំណែកឯរង្វង់មូលពណ៌ក្រហមនៅចំកណ្តាលតំណាងឲ្យពិភពលោកទាំងមូលរបស់យើង ដូចជាទារកដែលកំពុងត្រូវបានចិញ្ចឹមបីបាច់នៅក្នុងផ្ទៃម្តាយ។

ក្នុងរាងកាយរបស់មនុស្ស កោសិកាត្រូវបានបង្កើតឡើងឥតឈប់ឈរ ស្លាប់ហើយកើតឡើងវិញ – ជា​វដ្ត​ជីវិត​ជា​បន្ត​បន្ទាប់ ជីវិត​របស់​យើង​ក៏​វិវត្តន៍​ទៅ​ស្រដៀង​គ្នា​ដែរ។

ចូរស្រមៃគិត ប្រសិនបើមានកោសិកាមួយដំណើរការខុសប្រក្រតី ហើយប្រែក្លាយជាអាត្មានិយម ដោយ​ដឹង​តែ​ពី​ស្រូប​យក​សារធាតុ​ចិញ្ចឹម​ទាំងអស់សម្រាប់ខ្លួននឹងទៅជាយ៉ាងណា? កោសិកានោះនឹងក្លាយជាកោសិកាមហារីក – ជា​ជំងឺ​ដែល​បំផ្លាញ​រាង​កាយ ដែលយើងត្រូវបង្ខំចិត្តកាត់ចោល។

មនុស្សក៏ដូច្នេះដែរ យើងមិនអាចរស់នៅដើម្បីតែខ្លួនឯងនោះទេ។ ចូរគិតពីមនុស្សជាតិ សត្វលោក ធម្មជាតិ និងសកលលោកដ៏ធំទូលាយនេះ ដើម្បីដឹងពីរបៀបពឹងផ្អែក និងជួយគ្នាទៅវិញទៅ​មក។

មិនត្រឹមតែប៉ុណ្ណឹង រង្វង់មូលពណ៌ក្រហមនោះថែមទាំងបង្កប់អត្តន័យយ៉ាងជ្រាលជ្រៅមួយផង​ដែរ។

រូបភាពរង្វង់មូលពោលគឺរង្វង់មូល ក្នុងភាសាជប៉ុនរង្វង់មូលអានថា Wa សូរស្រដៀងនឹងពាក្យ “សន្តិភាព” (ក៏​អាន​ថា Wa ផង​ដែរ) ។

ក្នុងន័យ “សន្តិភាព” “ភាពចុះសម្រុងគ្នា” ។

ដូច្នេះហើយ រង្វង់មូលនោះក៏ជានិមិត្តរូបនៃភាពចុះសម្រុងគ្នា រួបរួមចិត្ត រស់រានមានជីវិតជាមួយគ្នា រីក​ចម្រើន​ជា​មួយ​គ្នា។

យើងទាំងអស់គ្នា មិនថាមនុស្សលោក ឬសត្វមានជីវិតនោះទេ សុទ្ធតែជាកូនរបស់អាទិទេព។

មនុស្សម្នាក់ៗកើតមកសុទ្ធតែមានបេសកកម្មដោយឡែកពីគ្នា ហើយភារកិច្ចរបស់យើងគឺរស់នៅប្រកប​ដោយ​ភាព​ចុះ​សម្រុង​គ្នា ភ្ជាប់ទំនាក់ទំនងជាមួយពិភពលោកនៅជុំវិញ។

ទារកទើបនឹងកើតម្នាក់ គឺជាកំណប់ទ្រព្យនៃសមត្ថភាពដែលគ្មានដែនកំណត់ កុមារម្នាក់នោះអាច​នឹង​ធំដឹងក្តី ហើយក្លាយជានរណាម្នាក់។

យើងទាំងអស់គ្នា ទោះបីជាចាស់ទៅតាមពេលវេលាក៏ដោយ ប៉ុន្តែក្នុងក្រសែភ្នែករបស់អាទិទេព យើងនៅតែជាក្មេងដែលពោរពេញទៅដោយសក្តានុពលជារៀងរហូត។

ក្រមសីលធម៌ដែលបង្កប់នៅពីក្រោយទង់ជាតិគឺជាពាក្យដែលរំលឹកដល់យើងទាំងអស់គ្នាឲ្យរស់​នៅ​ដើម្បី​សម្រេច​បាន និង​បញ្ចេញ​សក្តានុពល​ដ៏​អស្ចារ្យនោះ។

ប្រហែលជាទ្រឹស្តីនេះមិនមែនជាប្រភពដើមពិតប្រាកដនៃទង់ជាតិជប៉ុននោះទេ។ ហើយប្រហែលនោះ​គ្រាន់តែជាទ្រឹស្តីដែលបង្កើតឡើងដោយមនុស្សជំនាន់ក្រោយប៉ុណ្ណោះ។ ប៉ុន្តែពេលខ្លះ អ្វីដែលធ្វើ​ឲ្យនិមិត្តរូបមួយ​សម​នឹង​ទទួលបានការគោរពមិនមែនមកពី​វា​ត្រូវ ឬ​ខុស​ទាំង​ស្រុង​នោះ​ទេ ប៉ុន្តែ​ជា​​តម្លៃ​ដ៏​ស្រស់​ស្អាត​​ដែល​មនុស្ស​ដាក់​បញ្ចូល។

ប្រសិនបើយើងសម្លឹងមើលទង់ជាតិជប៉ុនដោយផ្នត់គំនិតបែបនេះ ការរចនាដែលសាមញ្ញបំផុតស្រាប់តែប្រែជាស្និទ្ធស្នាល កក់ក្តៅ និងគួរឲ្យស្រលាញ់ចូលចិត្ត។

ជនជាតិជប៉ុនមានសុភាសិតដ៏ល្បីមួយពោលថា “យកភាពចុះសម្រុងគ្នាជាគោល” ។

សុភាសិតនេះមានន័យថា “គ្មានអ្វីប្រសើរជាងការរស់នៅចុះសម្រុងជាមួយមនុស្សគ្រប់គ្នា យោគយល់​គ្នា​ទៅ​វិញ​ទៅ​មក មិន​បង្កឲ្យមានជម្លោះ និងវិវាទនោះទេ” ។

សព្វថ្ងៃនេះ ពិភពលោករបស់យើងកំពុងឈានចូលដំណាក់កាលចលាចល និងអស្ថិរភាពយ៉ាងខ្លាំង​។ សង្គ្រាមផ្ទុះឡើងគ្រប់ទីកន្លែង ហើយមិនមែនជារឿងកម្រនោះទេ ដែលយើងមើលឃើញមនុស្ស​អាត្មានិយម បន់ប៉ង និងធ្វើបាបអ្នកដទៃព្រោះតែផលប្រយោជន៍ផ្ទាល់ខ្លួន។

ក្នុងចំណោមព្យុះភ្លៀងទាំងនោះ ចូរយើងក្រឡេកទៅមើលទង់ជាតិ Hinomaru ជាមួយនឹងការ​បួង​សួងសុំសន្តិភាព​ដល់​ពិភព​លោក។

ទោះបីនោះមិនមែនជាទង់ជាតិរបស់អ្នកទាំងអស់គ្នាក៏ដោយ ប៉ុន្តែប្រសិនបើជាទង់ជាតិដែលអាច​រំលឹក​ឲ្យយើងគិតដល់សន្តិភាព ការអាណិតអាសូរ និងការផ្សារភ្ជាប់សត្វលោកទាំងអស់ នោះជារឿង​ដែល​មាន​​អត្ថន័យ និង​​មានតម្លៃ​យ៉ាង​ខ្លាំង។

ហើយខ្ញុំជឿថា ប្រិយមិត្តប្រាកដជាយល់ពីមូលហេតុហេតុអ្វីបានជាប្រជាជនជប៉ុនបែរជាឲ្យតម្លៃ និង​ការ​ពារ​ទង់​ជាតិ​នេះ​អស់​រយៈ​ពេលរាប់ពាន់ឆ្នាំ ប្រៀបដូចជានិមិត្តរូបដ៏ពិសិដ្ឋដែលផ្សារភ្ជាប់មនុស្ស​ជាតិ​ឆ្ពោះ​ទៅ​រក​ពិភព​លោក​ដែល​សន្តិភាព។

Abe Kengo