“ដង្កូវក្នុងពោះ” ការបង្ហូរឈាម – នៅ​ពេល​ដែល​ភាព​ស្មោះ​ត្រង់​ប្រែ​ទៅ​ជា​កំហឹង

“ដង្កូវក្នុងពោះ” ការ​បង្ហូរ​ឈាម – នៅ​ពេល​ដែល​ភាព​ស្មោះ​ត្រង់​ប្រែ​ទៅ​ជា​កំហឹង។

ក្នុងភាសាជប៉ុនមានសុភាសិតដ៏ចម្លែកមួយគឺ “腹の虫” ដែលយើងអាចបកប្រែថា “ដង្កូវ​ក្នុង​ពោះ” ។

នៅពេលដែលនរណាម្នាក់មិនអាចគ្រប់គ្រងកំហឹងដែលកំពុងពុះកញ្ជ្រោល ជនជាតិជប៉ុនតែង​តែ​និយាយ​ថា៖ “腹の虫がおさまらない” “ដង្កូវ​ក្នុងពោះមិនព្រមនៅស្ងៀម” ។

នៅពេលដែលស្តាប់ឮដូច្នេះ មនុស្សគ្រប់គ្នាប្រាកដជាឆ្ងល់ថា “ដង្កូវ” នោះមានរូបរាងដូចម្តេច?

ប្រវត្តិសាស្ត្រជប៉ុនធ្លាប់កត់ត្រារឿងរ៉ាវនិយាយពីអ្នកចម្បាំងសាមូរ៉ៃម្នាក់ដែលត្រូវបានគេចាត់ទុក​ថា​បាន​វះ​ពោះ​ខ្លួន​ឯង គ្រាន់តែដើម្បីយក “ដង្កូវ” នោះចេញមកឲ្យមនុស្សគ្រប់គ្នាមើលឃើញ។

ក្នុងខ្លឹមសារអត្តបទថ្ងៃនេះ យើងនឹងលាតត្រដាងរឿងរ៉ាវដែលនិយាយពីអ្នកចម្បាំងរូបនោះ និងអាថ៌កំបាំងនៃ “ដង្កូវ” ក្នុងពោះរបស់គាត់។

សាមូរ៉ៃដែលបានរំលឹកដល់នោះមានឈ្មោះថា Niwa Nagahide ។ លោកជាអ្នកចម្បាំងស្មោះត្រង់ម្នាក់​ដែលស្ថិតនៅក្រោមការដឹកនាំរបស់ Oda Nobunaga – ជាស្តេចត្រាញ់ដែលឈានជិតដល់ការបង្រួប​បង្រួម​ប្រទេស​ជប៉ុន។

Nagahide ក៏ជាអ្នកដែលបានត្រួតពិនិត្យការសាងសង់ប្រាសាទ Azuchi ដោយផ្ទាល់ ជាប្រាសាទដែលរឹងមាំ និង​អស្ចារ្យ​បំផុត​របស់ Nobunaga ។

នៅឆ្នាំ ១៥៧៦ Nobunaga បានប្រគល់ភារកិច្ចសំខាន់ឲ្យ Nagahide គ្រប់គ្រងការសាងសង់ប្រាសាទ Azuchi ។ ទោះជាយ៉ាងណា ការទាមទាររបស់ស្តេចត្រាញ់ម្នាក់នេះបែរជាលើសពីស្តង់​ដារ​ធម្មតា​នា​សម័យ​នោះ។

គេ​និយាយ​ថា Nobunaga បាន​បញ្ជា​ឲ្យ​ Nagahide ហ៊ុមព័ទ្ធ​ភ្នំ​ទាំងមូល​ដោយ​​ជញ្ជាំង​ថ្ម។

ជាទូទៅ ដើម្បីទប់ទល់នឹងការវាយប្រហារ ប្រាសាទជប៉ុននឹងសាងសង់គ្រឹះរឹងមាំដោយប្រើថ្មដែលដាក់ត្រួតលើគ្នា ដែលហៅថា Ishigaki (ជញ្ជាំងថ្ម) ។

ប៉ុន្តែការសាងសង់ជញ្ជាំងថ្មហ៊ុមព័ទ្ធជុំវិញភ្នំធំទាំងមូលជារឿងដែលមិនធ្លាប់មានពីមុនមកក្នុងប្រវត្តិ​សាស្ត្រ។

ដោយប្រឈមមុខនឹងបញ្ហាដែលហាក់បីដូចជាមិនអាចទៅរួចនេះ Nagahide ស្រាប់តែនឹកឃើញដល់​ជញ្ជាំង​ថ្ម​ដែលនៅសេសសល់បន្ទាប់ពីភ្លើងឆេះនៅលើភ្នំ Hiei ។

លោកបាននិយាយទៅកាន់ខ្លួនឯងថា៖ “អ្នកដែលបានសាងសង់ស្ថាបត្យកម្មនោះប្រាកដជាអាចធ្វើរឿងនេះបាន!”

ភ្លាមៗនោះ លោកបានប្រមូលផ្តុំក្រុមសិប្បករជំនាញ និងធ្វើឲ្យបញ្ជារបស់ម្ចាស់ក្លាយទៅជាការពិត។

មិនត្រឹមតែប៉ុណ្ណឹង Nobunaga បន្តទាមទារឲ្យ Nagahide ត្រូវសាងសង់យ៉ាងណាធ្វើឲ្យផ្នែកខាងក្នុងប្រាសាទមានទីធ្លាកណ្តាលអគារ។

ទីធ្លាកណ្តាលអគារគឺជា​ចន្លោះ​ស្ថាបត្យកម្ម​ដែល​តភ្ជាប់រវាងជាន់នីមួយៗក្នុងអគារ។ ការរចនានេះ​ធ្វើ​​ឲ្យ​ពន្លឺ និង​ខ្យល់ចេញចូលបានល្អ និយាយពីសោភ័ណភាពមើលទៅស្អាត ប៉ុន្តែបើនិយាយពីស្ថាបត្យកម្ម ការសាងសង់បែបនេះទាមទារឲ្យមានការគិតគូរច្បាស់លាស់ដូចជាការ​រចនា​រចនាសម្ព័ន្ធ​​ដើម្បី​ធានា​បាន​នូវ​សុវត្ថិភាព​ដាច់ខាត។

ដោយប្រឈមមុខនឹងបញ្ហានេះ Nagahide នៅតែមិនរាថយ។ នៅទីបំផុត គាត់បានរចនាទីធ្លាកណ្តាល​ដែល​ចាប់ពីក្រោមដីរហូតដល់ជាន់ទីបីនៃ​ប្រាសាទ​ដោយ​ជោគ​ជ័យ។

គួរឲ្យស្តាយ ប្រាសាទ Azuchi ត្រូវបានឆេះអស់ ហើយលែងមានរហូតមកដល់សព្វថ្ងៃ កូនចៅជំនាន់​ក្រោយ​គ្រាន់​តែ​អាច​ស្រមៃមើលពីភាពអស្ចារ្យរបស់ប្រាសាទតាមរយៈកំណត់ត្រាប្រវត្តិសាស្ត្រប៉ុណ្ណោះ។

Nagahide ជាមនុស្សម្នាក់ដែលមានចិត្តមុតមាំ តែងតែខំប្រឹងសម្រេចគ្រប់កិច្ចការ នៅទីបំផុត បែរជាធ្លាក់ក្នុងកំហឹងក្រោមស្ថានភាពក្រោយពេលដែល Nobunaga ទទួលមរណភាព។

Nobunaga ត្រូវក្បត់ដោយអ្នកក្រោមបង្គាប់ម្នាក់មានឈ្មោះថា Akechi Mitsuhide ហើយស្លាប់មុន​ពេលដែលប្រទេសបង្រួបបង្រួម។ អ្នក​ដែល​ចាប់​យក​ឱកាស​នេះ​ ហើយ​ឈាន​ដល់​ចំណុច​កំពូល​នៃ​​អំណាច​​ជំនួស​​តំណែង Nobunaga នោះគឺ Toyotomi Hideyoshi ។

មានទ្រឹស្តីជាច្រើនបានបង្ហាញថា ការបះបោររបស់ Mitsuhide មិនមែនជាទង្វើបុគ្គលនោះទេ ប៉ុន្តែ​មាន​ការ​លូក​ដៃ​របស់ Hideyoshi នៅ​ពី​ក្រោយ។

ដោយមើលឃើញទិដ្ឋភាព Hideyoshi គ្រប់គ្រង និងធ្វើឲ្យអំណាចរបស់ត្រកូល Oda ក្លាយជាឧបករណ៍​បម្រើ​ដល់​អំណាច​របស់​ខ្លួន Nagahide បានធ្លាក់ក្នុងស្ថានភាពអាក់អន់ចិត្តយ៉ាងខ្លាំង ដោយ​មិន​អាច​ទ្រាំ​បាន។

ក្រោមកំហឹងយ៉ាងខ្លាំង លោកបានស្រែកឡើងថា៖

_ “ទោះជាយ៉ាងណា ដង្កូវក្នុងពោះរបស់យើងមិនព្រមនៅស្ងៀមនោះទេ!!”

និយាយរួច Nagahide បានដកដាវវះពោះរបស់ខ្លួន។ ក្នុងស្ថានភាពឈឺចាប់យ៉ាងខ្លាំង លោកបានប្រើ​ដៃ​ទទេ​ទាញ​យក​របស់​ចម្លែក​ចេញ​ពី​ពោះ​របស់​ខ្លួន។

គេនិយាយតៗគ្នាថា របស់នោះមានរូបរាងចម្លែកដូចជាអណ្តើកមួយក្បាល ប៉ុន្តែបែរជាមានចំពុះ​ដូច​​បក្សី។

មុនពេលទទួលមរណភាព លោកបានបញ្ជាឲ្យអ្នកក្រោមបង្គាប់យក “ដង្កូវ” ដែលប្រឡាក់ដោយ​ឈាម​នោះ​បញ្ជូន​ទៅ​ឲ្យ Hideyoshi ។

សព្វថ្ងៃនេះ មនុស្សជាច្រើនក្នុងចំណោមយើងទាំងអស់គ្នាតែងតែចាត់ទុកពិធី Seppuku (វះពោះធ្វើអត្តឃាត) ជាទង្វើអវិជ្ជមាន។ ប៉ុន្តែអ្វីដែលធ្វើឲ្យរឿងរបស់ Niwa Nagahide មានលក្ខណៈពិសេស​មិនមែនជាការស្លាប់នោះទេ។ ប៉ុន្តែជាកំហឹងដែលលោកយកតាមខ្លួនរហូតដល់នាទីចុងក្រោយ។

ការមិនពេញចិត្តនឹងស្ថានភាព

ការអាក់អន់ចិត្តនៅពេលដែលបានឃើញមរតករបស់ម្ចាស់ខ្លួនត្រូវបានអ្នកដទៃដណ្តើមយក។

ជាមួយអារម្មណ៍ដែលមិនអាចទ្រាំបាននឹងកំហឹងដែលកំពុងកើតឡើងនៅចំពោះមុខ។

អារម្មណ៍ទាំងអស់នោះបានតាមលោករហូតដល់នាទីចុងក្រោយ។

អ្វីដែលគាត់បានទាញយកចេញពីពោះរបស់ខ្លួនបន្ទាប់ពីវះពោះ គ្មាននរណាដឹងថានោះជាអ្វីឲ្យប្រាកដ​នោះទេ។ ប៉ុន្តែសកម្មភាពនោះបានធ្វើឲ្យរឿងរ៉ាវរបស់ Nagahide ក្លាយជារឿងដ៏ចម្លែក និង​គួរ​ឲ្យ​ខ្លាច​បំផុតនៅក្នុងប្រវត្តិសាស្ត្រសាមូរ៉ៃ។

ព្រោះគាត់មិនត្រឹមតែចង់ស្លាប់ប៉ុណ្ណោះទេ ប៉ុន្តែលោកថែមទាំងចង់ឲ្យពិភពលោកមើលឃើញពីកំហឹង​ដែល​កំពុង​លេប​ត្របាក់​គាត់​ផង​ដែរ។

ទោះបីជាការពិត ឬគ្រាន់តែជារឿងព្រេងនិទាន រឿងនេះនៅតែធ្វើឲ្យយើងទាំងអស់គ្នាភ័យរន្ធត់ នៅ​ពេលដែលគិតដល់ការតាំងចិត្តរបស់សាមូរ៉ៃម្នាក់ឈានដល់កម្រិតកំពូល នៅពេលដែលភាពស្មោះ​ត្រង់ កិត្តិ​យស និង​កំហឹង​រួម​បញ្ចូល​គ្នា។

Abe Kengo