ការពិតទាក់ទងនឹងព័ត៌មាន៖ “ជប៉ុនអាចបំពាក់អាវុធនុយក្លេអ៊ែរក្នុងរយៈពេលត្រឹមតែ ១៥ នាទី”

ថ្ងៃចន្ទ 18/05/2026 | 18:07 ល្ងាច

ការពិតទាក់ទងនឹងព័ត៌មាន៖ “ជប៉ុនអាចបំពាក់អាវុធនុយក្លេអ៊ែរក្នុងរយៈពេលត្រឹមតែ ១៥ នាទី” ។

អាវុធនុយក្លេអ៊ែរ – ជាប្រភេទអាវុធប្រល័យលោកដែលមានកម្លាំងផ្លិចបំផ្លាញយ៉ាងខ្លាំង។

កាលពីមុន មានតែសហរដ្ឋអាមេរិក និងសហភាពសូវៀតប៉ុណ្ណោះដែលមានអាវុធនុយក្លេអ៊ែរ ប៉ុន្តែក្រោយមក បារាំង ចិន ឥណ្ឌា… សុទ្ធតែអាចផលិតបាន។

សព្វថ្ងៃនេះ សូម្បីតែសង្គ្រាមដែលកំពុងបន្តពាក់ព័ន្ធនឹងអុីរ៉ង់ មូលហេតុចម្បងក៏បណ្តាលមកពីបញ្ហាអភិវឌ្ឍអាវុធនុយក្លេអ៊ែរផងដែរ។

នៅតំបន់អាស៊ី កូរ៉េខាងជើងក៏កំពុងមានអាវុធនុយក្លេអ៊ែរផងដែរ។ ទោះបីជាសមត្ថភាពយោធាក្រៅពីនុយក្លេអ៊ែររបស់ពួកគេហួសសម័យក៏ដោយ ពួកគេនៅតែប្រើប្រាស់អាវុធនុយក្លេអ៊ែរដើម្បីដាក់សម្ពាធលើប្រទេសជប៉ុន និងកូរ៉េខាងត្បូង។

ក្នុងបរិបទនេះ តើនឹងមានអ្វីកើតឡើងប្រសិនបើជប៉ុនសម្រេចចិត្តបំពាក់អាវុធនុយក្លេអ៊ែរ?

ជាក់ស្តែង ការវិភាគមួយចំនួនបានបង្ហាញថា ក្នុងករណីចាំបាច់ត្រូវប្រើអាវុធនុយក្លេអ៊ែរ ជប៉ុនគ្រាន់តែចំណាយពេលបំពាក់អាវុធត្រឹមតែ ១៥ នាទីប៉ុណ្ណោះ។

ទោះជាយ៉ាងណា ចំណុចនេះមិនមានន័យថាជប៉ុនបានត្រៀមអាវុធនុយក្លេអ៊ែរទុកមុនដោយសម្ងាត់នោះទេ។ ហើយគំនិតដែលថា ជប៉ុនជាប្រទេសដែលអាចសាងសង់រោងចក្រថាមពលនុយក្លេអ៊ែរបាន ដោយគ្រាន់តែផ្ទេរបច្ចេកវិទ្យាប៉ុណ្ណោះ តាមពិតទៅក៏មិនត្រូវនោះដែរ។

ទោះបីជាសុទ្ធតែផ្អែកលើប្រតិកម្មបំបែកនុយក្លេអ៊ែរក៏ដោយ ប៉ុន្តែប្រសិទ្ធភាពទាំងពីរខុសគ្នាទាំងស្រុង។ មិនត្រឹមតែប៉ុណ្ណឹង ប្រទេសនោះថែមទាំងត្រូវមានបច្ចេកវិទ្យាដាក់នៅលើមីស៊ីល និងបាញ់ទៅកាន់គោលដៅ។ ប្រសិនបើជប៉ុនអភិវឌ្ឍដោយផ្ទាល់ ពួកគេបង្ខំចិត្តត្រូវធ្វើការពិសោធ ហើយដំណើរការនេះត្រូវចំណាយពេលយ៉ាងហោចណាស់ប៉ុន្មានឆ្នាំ។

ដូច្នេះតើជប៉ុនអាចធ្វើអ្វីបានខ្លះក្នុងរយៈពេល ១៥ នាទី?

ចម្លើយពិតជាសាមញ្ញណាស់៖ គ្រាន់តែទិញដោយផ្ទាល់ពីយោធាសហរដ្ឋអាមេរិកដែលកំពុងឈរជើងនៅប្រទេសជប៉ុន នៅពេលនោះអាវុធនឹងត្រូវបានដាក់ពង្រាយភ្លាមៗ។

ជាដំណោះស្រាយដែលរហ័ស ជាក់ស្តែង និងមានប្រសិទ្ធភាព។

អាវុធនុយក្លេអ៊ែរ នៅពេលដែលប្រើប្រាស់ប្រាកដជាប្រឈមមុខនឹងការរិះគន់យ៉ាងខ្លាំង។ ទោះបីជាទទួលបានជ័យជម្នះក្នុងសង្គ្រាមក៏ដោយ បន្ទាប់មកការគ្រប់គ្រងប្រទេសនឹងជួបការលំបាក។ ដូច្នេះហើយ គ្មាននរណាម្នាក់ចង់ប្រើអាវុធនុយក្លេអ៊ែរនោះទេ រួមទាំងសហរដ្ឋអាមេរិកផងដែរ។

ជប៉ុនជាប្រទេសដែលកំពុងស្ថិតក្នុងគោលដៅបាញ់មីស៊ីលនុយក្លេអ៊ែររបស់ប្រទេសរុស្ស៊ី ចិន និងកូរ៉េខាងជើង។ សហរដ្ឋអាមេរិកបន្តវត្តមានយោធានៅក្នុងប្រទេសជប៉ុនដើម្បីការពារប្រទេសនេះ ប៉ុន្តែពួកគេមិនចង់ព្រោះតែជប៉ុនប្រើប្រាស់អាវុធនុយក្លេអ៊ែរ ហើយធ្វើឲ្យពិភពលោកទាំងមូលក្លាយជាសត្រូវនោះទេ។

ដូច្នេះចំពោះសហរដ្ឋអាមេរិក ការដែលទុកឲ្យជប៉ុនមានអាវុធនុយក្លេអ៊ែរ និងបើកការបាញ់ប្រហារដើម្បីការពារប្រទេសរបស់ខ្លួនងាយស្រួលជាង។

ដូច្នេះហើយ គេនិយាយថា កិច្ចព្រមព្រៀងទិញលក់បែបនេះនឹងត្រូវបានបង្កើតឡើងយ៉ាងឆាប់រហ័ស។

យោងតាមច្បាប់របស់ប្រទេសជប៉ុនបច្ចុប្បន្ន សូម្បីតែយោធាសហរដ្ឋអាមេរិកក៏ត្រូវហាមឃាត់យកអាវុធនុយក្លេអ៊ែរចូលប្រទេសនេះផងដែរ។ ទោះជាយ៉ាងណា ភាគីជប៉ុនបែរជាមិនមានសិទ្ធិត្រួតពិនិត្យផ្នែកខាងក្នុងមូលដ្ឋានយោធាសហរដ្ឋអាមេរិកនោះទេ។ ក្នុងស្ថានភាពបែបនេះ តើអ្នកណានឹងជឿថាយោធាសហរដ្ឋអាមេរិកមិនយកអាវុធនុយក្លេអ៊ែរចូលទៅក្នុងប្រទេសជប៉ុន?

អាវុធនុយក្លេអ៊ែរត្រូវបានបម្រុងទុកសម្រាប់ការវាយប្រហារសងសឹក ដូច្នេះការដាក់ពង្រាយកាន់តែច្រើនកន្លែងនៅលើពិភពលោកកាន់តែមានប្រយោជន៍។ ដូច្នេះហើយ ការដែលអះអាងថា សហរដ្ឋអាមេរិកមិនបានយកអាវុធនុយក្លេអ៊ែរចូលជប៉ុន – ជាកន្លែងដែលពួកគេកំពុងដាក់ពង្រាយកងកម្លាំងយោធារហូតដល់ទៅ ៥៥.០០០ នាក់ – ទើបមិនសមហេតុផល។

យោងតាមច្បាប់ ជប៉ុនជាប្រទេសដែលមិនមានយោធា។

ដំបូងឡើយ ច្បាប់នេះត្រូវបានអនុម័តក្រោយសង្គ្រាមដោយផ្អែកលើគោលការណ៍ដែលថាសហរដ្ឋអាមេរិកនឹងការពារប្រទេសជប៉ុនទាំងមូល។ ទោះជាយ៉ាងណា ក្រោយមក ដោយសារតែគោលបំណងពីភាគីសហរដ្ឋអាមេរិកចង់ឲ្យជប៉ុនការពារខ្លួនឯងបានខ្លះ កងកម្លាំងការពារខ្លួនត្រូវបានបង្កើតឡើង។ បើតាមជាក់ស្តែង ច្បាស់ណាស់នេះជាកងទ័ព ប៉ុន្តែបើផ្អែកលើច្បាប់ ប្រទេសជប៉ុននៅតែជាប្រទេសដែលមិនអាចមានកងទ័ពបានឡើយ។

ទាំងបញ្ហានុយក្លេអ៊ែរ និងរឿងរ៉ាវទាក់ទងនឹងយោធាជប៉ុននាពេលបច្ចុប្បន្នសុទ្ធតែកំពុងស្ថិតក្នុងស្ថានភាពភាពជាក់ស្តែង និងច្បាប់មិនស៊ីសង្វាក់គ្នា។

ពីមុនរហូតមកដល់ពេលនេះ បញ្ហាទាំងពីរនេះមិនត្រឹមតែមិនបានធ្វើវិសោធនកម្មច្បាប់ប៉ុណ្ណោះទេ សូម្បីតែការលើកមកពិភាក្សាក៏ត្រូវបានចាត់ទុកថាជារឿងហាមឃាត់នៅក្នុងប្រទេសនេះផងដែរ។ ទោះជាយ៉ាងណា បច្ចុប្បន្ននាយករដ្ឋមន្ត្រី Takaichi កំពុងតែព្យាយាមនាំយកការជជែកដេញដោលទាំងនេះដាក់លើតុចរចា។

ជប៉ុនជាប្រទេសតែមួយគត់នៅលើពិភពលោកធ្លាប់ទទួលរងការវាយប្រហារដោយគ្រាប់បែកបរមាណូ។ អារម្មណ៍របស់ជនរងគ្រោះដែលរងផលប៉ះពាល់ដោយសារគ្រាប់បែកបរមាណូនៅទីក្រុង Hiroshima, Nagasaki ក៏ដូចជាក្រុមគ្រួសាររបស់ពួកគេពិតជាសំខាន់ខ្លាំងណាស់។ ប៉ុន្តែទន្ទឹមនឹងនោះ ជប៉ុនក៏ត្រូវបង្កើតប្រព័ន្ធមួយដើម្បីការពារប្រទេសផងដែរ។

មុននឹងពិចារណាទៅលើរឿងកាន់កាប់ ឬមិនកាន់កាប់ ខ្ញុំគិតថា យើងគួរតែចាប់ផ្តើមដោយបើកការជជែកពិភាក្សាទាក់ទងនឹងបញ្ហានេះ។

តើប្រិយមិត្តមានទស្សនៈយ៉ាងណាចំពោះបញ្ហានេះ?

Abe Kengo