មិត្តភាពដែលធំជាងរបាំងការទូតរវាងជប៉ុន និងតៃវ៉ាន់

ថ្ងៃសៅរ៍ 16/05/2026 | 12:32 ល្ងាច

មិត្តភាពដែលធំជាងរបាំងការទូតរវាងជប៉ុន និងតៃវ៉ាន់។

ប្រទេសជប៉ុន និងតៃវ៉ាន់មិនមានទំនាក់ទំនងការទូតជាផ្លូវការនោះទេ ដោយសារតែវត្តមានរបស់ប្រទេសចិន។ យ៉ាងណាមិញ រវាងប្រទេសទាំងពីរនេះនៅតែមានមិត្តភាពយ៉ាងជ្រាលជ្រៅ។

នៅថ្ងៃទី ២១ ខែកញ្ញា ឆ្នាំ ១៩៩៩ រញ្ជួយដីដ៏ធំមួយបានកើតឡើងនៅតៃវ៉ាន់។ ទីក្រុងត្រូវបំផ្លិចបំផ្លាញ មនុស្សជាច្រើនត្រូវកប់នៅក្រោមគំនរបាក់បែក។

អគារជាង ៨ ម៉ឺនខ្នងបានដួលរលំទាំងស្រុង ការបញ្ជាក់ពីអ្នកនៅរស់រានមានជីវិតប្រៀបដូចជារឿងដែលអស់សង្ឃឹម ហើយសូម្បីតែការរុករកសាកសពរបស់អ្នកស្លាប់ក្នុងគំនរបាក់បែកក៏ជាបញ្ហាប្រឈមដ៏លំបាកមួយដែរ។

និយាយពីរញ្ជួយដីគឺនិយាយពីប្រទេសជប៉ុន ដោយសារតែមូលហេតុនេះក្រុមជួយសង្គ្រោះរបស់ជប៉ុន (កងកម្លាំងស្វ័យការពារជប៉ុន) ត្រូវបានគេចាត់ទុកថាមានជំនាញឈានមុខគេលើពិភពលោកក្នុងការឆ្លើយតបនឹងគ្រោះមហន្តរាយ។

បន្ទាប់ពីរញ្ជួយដីបានកើតឡើងនៅតៃវ៉ាន់ ពួកគេបានចេញដំណើរភ្លាម ហើយទៅដល់កន្លែងកើតហេតុក្រោយរយៈពេល ១៦ ម៉ោងប៉ុណ្ណោះ។ ក្រុមជួយសង្គ្រោះក៏បានប្រមូលផ្តុំគ្រប់គ្រាន់ក្នុងរយៈពេលពីរបីម៉ោងផងដែរ។

សមាជិកសរុបចំនួន ១៤៥ នាក់បានចូលរួម មិនត្រឹមតែក្រុមជួយសង្គ្រោះប៉ុណ្ណោះទេ ថែមទាំងមានប៉ូលីស អ្នកពន្លត់អគ្គីភ័យ និងកងកម្លាំងការពារដែនសមុទ្រផងដែរ។

ទោះបីជាមានក្រុមជួយសង្គ្រោះជាច្រើនមកពីបណ្តាប្រទេសផ្សេងទៀតក៏ដោយ ប៉ុន្តែក្នុងចំណោមនោះ ស្មារតីបំពេញការងាររបស់កងកម្លាំងជប៉ុនត្រូវបានគេចាត់ទុកថាអស្ចារ្យបំផុត។

ក្នុងស្ថានភាពយ៉ាងលំបាក នៅពេលដែលក្តីសង្ឃឹមរកឃើញអ្នកនៅរស់រានមានជីវិតប្រៀបដូចជាការប្រកួតប្រជែងនឹងពេលវេលា កងកម្លាំងជប៉ុនបានខិតខំប្រឹងប្រែងអស់ពីសមត្ថភាព បំពេញការងារជាបន្តបន្ទាប់ ស្ទើរតែមិនសម្រាកនោះទេ។

ប្រជាជនតៃវ៉ាន់បានឃើញដោយផ្ទាល់ភ្នែកទិដ្ឋភាពកងកម្លាំងជប៉ុនបញ្ជូនសាកសពចេញពីគំនរបាក់បែកយ៉ាងប្រុងប្រយ័ត្ន។ ពួកគេបានគ្របភួយនៅលើសាកសព ហើយសមាជិកកងកម្លាំងទាំងអស់ឈរគោរពវិញ្ញាណក្ខន្ធយ៉ាងស្ងៀមស្ងាត់។

ក្រោយមក រូបភាពនៃកងកម្លាំងជួយសង្គ្រោះរបស់ជប៉ុនបំពេញតួនាទីថែមទាំងត្រូវបានបោះពុម្ពនៅលើសំបុត្ររំលឹកអនុស្សារីយ៍របស់តៃវ៉ាន់ផងដែរ។

ពេលវេលាបានកន្លងផុតទៅ រហូតដល់ថ្ងៃទី ១១ ខែមីនា ឆ្នាំ ២០១១ ។

គ្រោះថ្នាក់រញ្ជួយដី និងរលកយក្សដ៏រន្ធត់បានកើតឡើង បំផ្លាញតំបន់ Tohoku របស់ជប៉ុន។

ទោះបីជាជប៉ុនជាប្រទេសដែលតែងតែកើតមានរញ្ជួយដីញឹកញាប់ក៏ដោយ ប៉ុន្តែខូចខាតលើកនេះត្រូវបានចាត់ទុកថាធ្ងន់ធ្ងរបំផុតក្នុងប្រវត្តិសាស្ត្រ។

ក្រោយពេលទទួលបានដំណឹងដ៏អាក្រក់នេះ តៃវ៉ាន់បានចាត់វិធានការភ្លាមៗ។ ពួកគេបានបញ្ជូនក្រុមជួយសង្គ្រោះទៅកាន់ប្រទេសជប៉ុននៅថ្ងៃដដែលនោះ។ ទោះជាយ៉ាងណា ដោយសារតែស្ថានភាពនៅជប៉ុននាពេលនោះមានភាពវឹកវរយ៉ាងខ្លាំង រដ្ឋាភិបាលជប៉ុនបានស្នើឲ្យពួកគេរង់ចាំបន្ថែម។ ទោះបីជាយ៉ាងនេះក្តី ក្រុមជួយសង្គ្រោះតៃវ៉ាន់នៅតែត្រៀមខ្លួនរួចរាល់ ហើយបន្ទាប់ពីការរង់ចាំរយៈពេលពីរថ្ងៃ ពួកគេបានទៅដល់ប្រទេសជប៉ុន។

បន្ទាប់ពីត្រូវបានអនុញ្ញាតឲ្យចូលប្រទេស ពួកគេបានខិតខំប្រឹងប្រែងទៅលើការជួយសង្គ្រោះ ដោយប្តេជ្ញាថានឹងសងគុណដែលជប៉ុនបានធ្វើចំពោះខ្លួន។

មិនត្រឹមតែប៉ុណ្ណឹង នៅតៃវ៉ាន់ កម្មវិធីទូរទស្សន៍សប្បុរសធម៌រៃអង្គាសថវិកាសម្រាប់ជប៉ុនត្រូវបានចាក់ផ្សាយ។ ចំនួនទឹកប្រាក់ដែលបានរៃអង្គាសទៅដល់ ៣,៣ ពាន់លានយ៉េន ដែលចាក់ផ្សាយត្រឹមរយៈពេល ៣ ម៉ោងប៉ុណ្ណោះ។

ក្រោយមកសកម្មភាពរៃអង្គាសថវិកានៅតែបន្តផ្សព្វផ្សាយ ដែលធ្វើឲ្យចំនួនទឹកប្រាក់សរុបឡើងដល់ ២៦,៣ ពាន់លានយ៉េន។ ក្នុងចំណោមប្រទេសជាច្រើនដែលបានបញ្ជូនជំនួយទៅកាន់ប្រទេសជប៉ុន តៃវ៉ាន់ជាប្រទេសផ្តល់ជំនួយធំបំផុត។

សម្រាប់ការប្រៀបធៀប សហរដ្ឋអាមេរិកបានផ្តល់ថវិកាសរុបចំនួន ៧៥ ពាន់លានយ៉េនក្នុងរយៈពេលប្រាំឆ្នាំតាមរយៈបណ្តាញរដ្ឋាភិបាល ប៉ុន្តែដោយសារតៃវ៉ាន់មានប្រជាជនត្រឹមតែ ២៣ លាននាក់ ចំនួនទឹកប្រាក់ដែលពួកគេបានផ្តល់ឲ្យជប៉ុនក្នុងមនុស្សម្នាក់គឺច្រើនលើសលប់។

ទន្ទឹមនឹងនោះ ប្រទេសចិនដែលមានប្រជាជនយ៉ាងច្រើនសន្ធឹកសន្ធាប់បានចូលរួមត្រឹមតែ ៩០០ លានយ៉េនប៉ុណ្ណោះ។ ប្រទេសកូរ៉េខាងត្បូងរៃអង្គាសប្រាក់បានចំនួន ៣,២ ពាន់លានយ៉េន ប៉ុន្តែហាក់បីដូចជាអង្គភាពប្រមូលប្រាក់បានឆ្លៀតឳកាសកេងចំណេញ ដែលចំនួនទឹកប្រាក់ជាក់ស្តែងទៅដល់ប្រទេសជប៉ុនគឺតិចណាស់។

បន្ទាប់ពីហេតុការណ៍នោះ ទំនាក់ទំនងដ៏កក់ក្តៅរវាងតៃវ៉ាន់ និងជប៉ុននៅតែបន្តរហូតមកដល់សព្វថ្ងៃនេះ។

ជាពិសេស នៅឆ្នាំ ២០២១ នៅពេលដែលប្រទេសចិនបានឈប់នាំចូលម្នាស់តៃវ៉ាន់ ដែលបណ្តាលឲ្យប្រទេសនេះបាត់បង់ទីផ្សារនាំចេញ ៩០% ប្រជាជនទូទាំងប្រទេសជប៉ុនបានប្រមូលផ្តុំគ្នាទិញម្នាស់តៃវ៉ាន់ដើម្បីគាំទ្រ។

ស្រដៀងគ្នានេះដែរ នៅពេលដែលបរិយាកាសរំពឹងថាជប៉ុននឹងផ្លាស់ប្តូរក្រោមការដឹកនាំរបស់នាយករដ្ឋមន្ត្រី Takaichi ប្រជាជនតៃវ៉ាន់រួមគ្នាអបអរសាទរផងដែរ។

ទោះបីជាមិនមានទំនាក់ទំនងការទូតជាផ្លូវការក៏ដោយ ប៉ុន្តែទំនាក់ទំនងរវាងជប៉ុន និងតៃវ៉ាន់នៅតែរឹងមាំ និងកក់ក្តៅ ដោយមិនគិតពីឧបសគ្គនយោបាយឡើយ។

តែងតែជួយគ្នាទៅវិញទៅមកក្នុងគ្រាលំបាក មិនត្រឹមតែមានសារៈសំខាន់ក្នុងការបង្កើតទំនាក់ទំនងរវាងបណ្តាប្រទេសប៉ុណ្ណោះទេ ប៉ុន្តែនោះប្រហែលជាខ្លឹមសារដ៏ស្រស់ស្អាតបំផុតរវាងទំនាក់ទំនងមនុស្ស និងមនុស្ស។

Abe Kengo