ជប៉ុនក្រោយសង្គ្រាម – នៅ​ពេល​ដែល​ទម្លាក់​ដាវ​ចុះ តើ​នរណា​ទើប​ជា​អ្នក​ដែល​ខ្លាំង​ជាង​គេ?

ជប៉ុនក្រោយសង្គ្រាម – នៅពេលដែលទម្លាក់ដាវចុះ តើនរណាទើបជាអ្នកដែលខ្លាំងជាងគេ?

បន្ទាប់ពីសង្គ្រាមបានបញ្ចប់ សម័យកាលសាមូរ៉ៃបានឈានដល់ទីបញ្ចប់។ ប្រទេសជប៉ុនឈាន​ចូលសម័យ​កាល​ដែល​គ្មាន​សង្គ្រាម ដែល​អាច​ហៅ​ថា​សន្តិភាព… ប៉ុន្តែ​មនុស្ស​មួយ​ចំនួន​គិត​ថា នោះជា​ពេល​ដែល​ប្រទេស​នេះ​ត្រូវ “ដក​ចង្កូម​របស់​ខ្លួន” ។

ទោះជាយ៉ាងណា នៅក្នុងយុគសម័យដែលហាក់បីដូចជាមានសន្តិភាពនោះ បែរជាលេចវត្តមានរបស់​បុគ្គល​ដែល​មិន​ធម្មតា ដែល​មាន​កម្លាំង​លើសពី​ការ​គិត។

នេះជាតួអង្គទាំង ៣ នាក់ដែលត្រូវបានចាត់ទុកថា “ខ្លាំងបំផុត” នាសម័យកាលនោះ។

Shiota Gozo（塩田剛三）គ្រូ Aikido

ក្នុងនាមជាគ្រូ Aikido មួយរូប ប៉ុន្តែបែរជាមានមាឌតូចទៅវិញ។ លោកគឺជាគំរូដើមរបស់តួអង្គ Shibukawa Gouki ក្នុង​​រឿង​​គំនូរជីវចល​​ក្បាច់​គុន BAKI ។

ជាមួយនឹងកម្ពស់ ១៥៤ សង់ទីម៉ែត្រ និងទម្ងន់ ៤៦ គីឡូក្រាម គាត់មានមាឌតូច ដែលសូម្បី​តែ​ស្រ្តី​ក៏​អាច​នឹង​ត្រូវ​បាន​ចាត់​ទុក​ថា​មាន​មាឌ​តូច​ផង​ដែរ។

យ៉ាងណាមិញ បើទោះបីជាគាត់មានមាឌតូចក៏ដោយ លោកបែរជាអាចផ្តួលគូប្រកួតដែលមាន​មាឌ​ធំជាង​ខ្លួន។

ក្នុងនាមជាគ្រូ Aikido គាត់មិនបានប្រើកម្លាំងទាំងស្រុងដើម្បីយកឈ្នះគូប្រកួតនោះទេ ប៉ុន្តែប្រើកម្លាំងផ្ទាល់របស់ភាគីដើម្បីផ្តួលពួកគេ។ ការបង្ហាញក្បាច់គុនរបស់លោកមើលទៅ “ស្រាល” ខ្លាំង​ណាស់ ដែល​ធ្វើ​​ឲ្យ​មនុស្ស​ជា​ច្រើន​គិត​ថា​នោះ​គ្រាន់​តែ​ជា​ការ​សម្តែង​ប៉ុណ្ណោះ។

មានម្តង នៅពេលដែលប្រធានាធិបតីអាមេរិក Kennedy បានទៅទស្សនកិច្ចនៅប្រទេសជប៉ុន ហើយបានមើលឃើញផ្ទាល់ភ្នែក។ ដោយមិនជឿលើអ្វីដែលខ្លួនបានឃើញ ប្រធានាធិបតី​បាន​ឲ្យ​អង្គរក្ស​ម្នាក់​​​របស់​ខ្លួន​សាក​ល្បង​ប្រយុទ្ធ។

បើទោះបីជាមានភាពខុសគ្នាយ៉ាងខ្លាំងដូចជាមនុស្សពេញវ័យទល់នឹងកុមារក៏ដោយ ប៉ុន្តែ Shiota បាន​ផ្តួល​អង្គរក្ស​ម្នាក់​នោះក្នុង​មួយ​ប៉ប្រិច​ភ្នែក។ រឿងនេះបានធ្វើឲ្យ​ប្រធានា​ធិបតី Kennedy ភ្ញាក់​​ផ្អើល​យ៉ាង​​ខ្លាំង។

នៅពេលដែលមើល Aikido លើ YouTube អ្នកដែលមិនដឹងប្រាកដជាយល់ឃើញថាមើលទៅដូចជាកំពុងសម្តែង ប៉ុន្តែតាមពិតទៅបណ្តាលមកពីសន្លាក់ ដែលបណ្តាលឲ្យមានការឈឺចាប់យ៉ាងខ្លាំង រហូត​ដល់​ថ្នាក់​ភាគី​ខ្សោយ​ត្រូវ​បង្ខំ​ចិត្ត​ដួល។

នេះជាក្បាច់គុន​ដែល​មិន​ប្រកួតដូចជា Judo ឬ Karate នោះទេ ដូច្នេះប្រសិនបើមិនបានឆ្លងកាត់​ផ្ទាល់ ពិបាក​នឹង​ជឿ​ថា​​ខ្លាំង​​ណាស់។

កម្លាំងរបស់លោកមិនស្ថិតនៅលើសាច់ដុំនោះទេ ប៉ុន្តែស្ថិតលើបច្ចេកទេសដែលឈានដល់កម្រិតដ៏​ល្អ​ឥត​ខ្ចោះ។

ឪពុករបស់ខ្ញុំក៏ធ្លាប់ហាត់ Aikido ដែរ ហើយបើទោះបីជាមានមាឌតូចក៏ដោយ គាត់នៅតែអាចចាប់​ផ្តួល​ខ្ញុំ​បាន​យ៉ាង​ងាយ ដូច្នេះ​ខ្ញុំ​យល់​ពី​កម្លាំង​របស់​ក្បាច់​គុន​នេះ។

ដូច្នេះហើយទើបមានពាក្យពោលថា “តូចតែខ្លាំង” ។

ក្រៅពីនេះ ដោយសារតែជាក្បាច់គុនពិសេស ដូច្នេះមានស្រ្តីជាច្រើនតាមរៀន Aikido ជាពិសេសស្ត្រី​ជប៉ុន។

Kunii Zenya（国井善弥）– ដែលគ្មានគូប្រៀបនៃក្បាច់គុនជប៉ុន។

ក្នុងនាមជាគ្រូក្បាច់គុនម្នាក់ដែលតំណាងឲ្យជប៉ុនសម័យកាលក្រោយសង្គ្រាម ហើយ​ក៏​ជា​និមិត្ត​រូបនៃ​​ស្មារតី​​ក្បាច់​​គុន​​ផង​​ដែរ។

លោកទទួលយកសំណើប្រយុទ្ធជាមួយអ្នកក្បាច់គុនផ្សេងទៀត ហើយត្រូវបានចាត់ទុកថាគ្មានគូប្រៀប​អស់​មួយ​ជីវិត។

ក្រោយសង្គ្រាម ប្រទេសជប៉ុនត្រូវបានគ្រប់គ្រងដោយទីបញ្ជាការសម្ព័ន្ធមិត្ត (ហៅកាត់ថា GHQ) គ្រប់គ្រង និង​ហាម​ឃាត់​រាល់​សកម្មភាព​ក្បាច់​គុន។ ដើម្បី​បញ្ជាក់​ពី​តម្លៃ​នៃ​ក្បាច់​គុន​ជប៉ុន លោកបាន​ក្រោក​ឈរ​ប្រឈម​មុខ​នឹង​ទាហាន​អាមេរិក​នៃ​កង​កម្លាំង​កាន់​កាប់។

ដោយគ្រាន់តែមានដាវឈើមួយប៉ុណ្ណោះ គាត់ហ៊ានប្រឈមមុខ​នឹង​ទាហាន​ដែល​មាន​កាំភ្លើងក្នុង​ដៃ ហើយ​​នៅ​តែ​​អាច​​បង្ក្រាប​​ពួក​គេ​​បាន។

មិនមែននៅក្នុងរឿងព្រេងដ៏យូរលង់នោះទេ ប៉ុន្តែនៅក្នុងសម័យកាលក្រោយសង្គ្រាម។

ជា “សាមូរ៉ៃ” ម្នាក់ដែលមិនពាក់គ្រឿងសឹក ប៉ុន្តែស្មារតីមិនដែលសាបសូន្យនោះទេ ជាសាមូរ៉ៃក្រោយ​សង្គ្រាម​ម្នាក់។

Hanagata Kei（花形敬）– បិសាចដែលមានរូបរាងមនុស្ស

ប្រសិនបើតួអង្គទាំងពីរដែលបានរៀបរាប់ខាងលើបានធ្វើឲ្យមនុស្សជាច្រើនភ្ញាក់ផ្អើល ចំណែកឯវត្តមាន​របស់​តួអង្គ​ចុង​ក្រោយ​កាន់​តែ​​មិន​គួរ​ឲ្យ​ជឿជាង​នេះ​ទៅ​ទៀត។

Hanagata Kei – ជាគំរូដើមរបស់តួអង្គ Hanayama Kaoru ក្នុងរឿង BAKI ។

ប្រសិនបើនៅក្នុងរឿង anime តួអង្គ Hanayama Kaoru ជា yakuza ដ៏ខ្លាំងម្នាក់ ស្ទើរតែមិនដូច​ជា​មនុស្ស ចំណែកឯ​ក្នុង​ជីវិត​ពិត Hanagata ក៏​មិន​ខុស​គ្នា​ប៉ុន្មាន​ដែរ។

ជា yakuza ម្នាក់ដែលតែងតែប្រយុទ្ធដោយដៃទទេ ដោយមិនគិតថាគូប្រកួតមានកាំភ្លើង ឬកាំបិត​នោះ​ទេ គ្រាន់​តែ​ប្រើ​មួយ​ក្បាច់​អាច​បញ្ចប់​គ្រប់​យ៉ាង។

រស់នៅក្នុងបរិយាកាសដែលពេញទៅដោយការប្រយុទ្ធជានិច្ច ប៉ុន្តែគាត់គ្រាន់តែប្រើកណ្តាប់ដៃប៉ុណ្ណោះ ត្រឹម​ចំណុចទាំងនេះបង្ហាញថាគាត់មិនធម្មតានោះទេ។។

គេនិយាយថាមានម្តង បន្ទាប់ពីត្រូវគ្រាប់កាំភ្លើងបីគ្រាប់ គាត់នៅតែអាចធ្វើដំណើរទៅមន្ទីរពេទ្យ​បាន។ ក្រោយពេលព្យាបាលរួច នៅយប់នោះ គាត់បានចាកចេញពីមន្ទីរពេទ្យគ្រាន់តែដើម្បីទៅ​ផឹក​ស្រា​ហាក់បី​ដូច​ជា​គ្មាន​រឿង​អ្វី​កើត​ឡើង។

មិនច្បាស់ទេថាគ្រាប់កាំភ្លើងបាញ់ចំកន្លែងណានោះទេ ប៉ុន្តែមនុស្សធម្មតាត្រឹមមួយគ្រាប់អាចនឹង​សម្រាក​នៅ​មន្ទីរពេទ្យរយៈពេលយូរ។ លោកជាករណីដែលពិសេស។

មិនត្រឹមតែប៉ុណ្ណឹង លោកថែមទាំងធ្លាប់យកឈ្នះអ្នកចំបាប់ដ៏ល្បី Rikidozan ដោយប្រើដៃទទេ ហើយ​បង្ខំ​ឲ្យម្នាក់នេះសរសេរកិច្ចសន្យាលែងប្រើអំពើហិង្សា។

នៅទីបំផុត Hanagata ត្រូវក្រុម yakuza មួយក្រុមវាយឆ្មក់បន្ទាប់ពីទទួលទានអាហាររួច ត្រូវចាក់ជា​ច្រើនកាំបិត ហើយទទួលមរណភាពនៅអាយុ ៣៣ ឆ្នាំ។

ជាលទ្ធផលមួយដ៏គួរឲ្យសោកស្ដាយ ប៉ុន្តែត្រូវទទួលស្គាល់ថា វាឆ្លុះបញ្ចាំងពីខ្លឹមសារនៃជីវិតរបស់លោក។

មនុស្សបីនាក់ មានកម្លាំងខុសៗគ្នា។

បច្ចេកទេស – ស្មារតី – សមត្ថភាព។

ពួកគេមិនដែលប្រឈមមុខនឹងគ្នា ប៉ុន្តែប្រសិនបើរឿងនោះកើតឡើង… តើនរណាជាអ្នកឈ្នះ?

ប្រហែលជាមនុស្សម្នាក់ៗមានជម្រើសខុសៗគ្នា។

តើអ្នកគិតថាចំណុចខ្លាំងនៃក្បាច់គុនជាអ្វី?

Abe Kengo