ធាតុពិតនៃជំនាញលាក់ខ្លួនក្រោមទឹករបស់ ninja

ធាតុពិតនៃជំនាញលាក់ខ្លួនក្រោមទឹករបស់ ninja ។

Ninja ដែលមានសមត្ថភាពមិនធម្មតាដូចជាក្នុងរឿង Naruto ប្រហែលគ្រាន់តែជាការស្រមើ​ស្រមៃ។ ប៉ុន្តែ​នៅ​ក្នុង​ប្រវត្តិ​សាស្ត្រ​ជប៉ុន ninja ពិត​ជា​ធ្លាប់​មាន​មែន។

ពួកគេមិនបញ្ចេញក្បាច់ដែលអស្ចារ្យនោះទេ ប៉ុន្តែផ្ទុយទៅវិញប្រើជំនាញលាក់ខ្លួននៅកន្លែងងងឹតដើម្បីយកដំណឹង ឬធ្វើឃាត។ ជំនាញដែលល្បីបំផុតក្នុងចំណោមនោះគឺ Suiton no jutsu – Water Release (ជំនាញបញ្ចេញទឹក) ។

គេ​និយាយ​ថា Ninja បាន​ប្រើ​បំពង់​ឫស្សី​ដើម្បី​លាក់​ខ្លួន​នៅ​ក្រោម​ទឹកក្នុងរយៈពេលវែង។

ដូច្នេះធាតុពិតនៃជំនាញនេះយ៉ាងណា? ចូរយើងពិនិត្យមើលលទ្ធផលនៃការស្រាវជ្រាវនាសម័យនេះ។

ប្រាសាទបុរាណរបស់ជប៉ុនច្រើនតែមានប៉មថ្មខ្ពស់ៗ និងហ៊ុំព័ទ្ធដោយប្រឡាយទឹកដើម្បីការពារការ​ឈ្លាន​ពាន។ ប្រសិនបើហែលលើផ្ទៃទឹក ninja ងាយនឹងត្រូវគេប្រទះឃើញ ដូច្នេះការធ្វើចលនាដោយ​គ្មាន​សំឡេង​ក្រោម​ទឹក​ត្រូវ​បានចាត់ទុកជាមធ្យោបាយដែលល្អបំផុត។

ដើម្បីធ្វើបានដូច្នេះ ninja ត្រូវប្រើ “ជំនាញបញ្ចេញទឹក” ។

នោះជាវិធីសាស្រ្តប្រើបំពង់ឫស្សីដែលស្រដៀងនឹងបំពង់បឺត ចុងម្ខាងដាក់នៅលើផ្ទៃ​ទឹក​ដើម្បីដក​ដង្ហើម បន្ទាប់​មក​ចូល​ទៅ​ជិត​គោល​ដៅ​យ៉ាង​ស្ងៀម​ស្ងាត់។

ស្តាប់ទៅដូចជាងាយស្រួល សមហេតុផល យ៉ាងណាមិញ ការស្រាវជ្រាវនាសម័យនេះបានបង្ហាញថា ចំណុច​នេះ​ស្ទើរ​តែ​មិន​អាច​ទៅ​រួច​នោះ​ទេ។

បញ្ហាទីមួយគឺ៖ សម្ពាធទឹក

គ្រាន់តែជ្រមុជក្រោមទឹក រាងកាយរងនឹងសម្ពាធ។ ហើយជ្រមុជកាន់តែជ្រៅ សម្ពាធកាន់តែធំ។

ដើម្បីដកដង្ហើម ប្រហោងទ្រូងត្រូវពង្រីក។ ប៉ុន្តែនៅពេលដែលនៅក្រោមទឹក សម្ពាធនឹងសង្កត់ទៅ​លើ​ដើម​ទ្រូង។

ដោយគ្រាន់តែនៅ​ជម្រៅ​ប្រហែលជា ៥០ សង់ទីម៉ែត្រ​ប៉ុណ្ណោះ ដើមទ្រូងត្រូវ​ទ្រាំនឹង​កម្លាំង​ដែល​មាន​​ទម្ងន់​​ប្រហែល ៥០ គីឡូក្រាម។

នេះជាកម្រិតដែលមនុស្សធម្មតាពិបាកនឹងទ្រាំបាន ទោះបីជាត្រូវបានហ្វឹកហាត់​ដូចជា ninja ក៏​ដោយ។ 

បញ្ហាទីពីរគឺ៖ ខ្យល់នៅក្នុងបំពង់ឫស្សី

ទោះបីជាយើងមិនគិតពីសម្ពាធទឹកក៏ដោយ នៅតែមានបញ្ហាដែលគ្រោះថ្នាក់ជាងនេះទៅទៀត។

បំពង់ឫស្សីកាន់តែវែង ខ្យល់នៅខាងក្នុងកាន់តែពិបាកចរាចរណ៍នឹងខាងក្រៅ។ នៅពេលដែលដក​ដង្ហើម​ចេញ ឧស្ម័ន CO₂ នឹងប្រមូលផ្តុំបន្តិចម្តងៗក្នុងបំពង់។

លទ្ធផលអ្នកជ្រមុជទឹកនឹងធ្លាក់ក្នុងស្ថានភាពខ្វះអុកស៊ីសែន មិនអាចដកដង្ហើមធម្មតាបាន។

ហើយប្រសិនបើអូសបន្លាយរយៈពេលវែង អាចបណ្តាលឲ្យបាត់បង់ស្មារតី… រហូតដល់ថ្នាក់ស្លាប់។

នៅសម័យបច្ចុប្បន្ន ការជ្រមុជទឹកដោយប្រើបំពង់ (snorkeling) អាចធ្វើទៅបានដោយសារតែអ្នក​​ជ្រមុជ​នៅ​ក្រោម​ផ្ទៃ​ទឹក​មិន​ជ្រៅ (សម្ពាធ​ទាប) ហើយ​បំពង់​ជ្រមុជ​ទឹក​ខ្លី ដែលបង្កើតបានជាខ្យល់​ដក​ដង្ហើម​​ខ្លាំង​​ធ្វើ​ឲ្យ​មាន​ខ្យល់​ចេញ​ចូល។

ប៉ុន្តែប្រសិនបើអនុវត្តវិធីសាស្រ្តនេះ មួយផ្នែកនៃរាងកាយអ្នកជ្រមុជទឹកនឹងអណ្តែតលើផ្ទៃទឹក សម្រាប់ ninja នឹងធ្វើឲ្យប៉ះពាល់ដល់សកម្មភាពសម្ងាត់។ អាចនិយាយបានថា លាក់ខ្លួនបែបនេះមិន​អាច​ទៅ​រួច​នោះ​ទេ។

គួរឲ្យស្តាយណាស់ដែលត្រូវនិយាយថា សមត្ថភាពដូចជាការកោះហៅភ្លើង ឬបំបែកភាគរបស់ ninja តាមពិតទៅមានតែក្នុងរឿង anime ប៉ុណ្ណោះ។ ធាតុពិតរបស់ ninja ពេលខ្លះមិនគួរឲ្យជក់ចិត្តដូច​ក្នុង​ភាព​យន្ត​នោះ​ទេ ប៉ុន្តែ​ទាំង​នោះ​ជា​ការ​ពិត​ដែលផ្អែកលើវិទ្យាសាស្ត្រ។

ក្នុងចំណោមជំនាញដែលត្រូវបានបង្ហាញនៅក្នុងរឿង Naruto អ្វីដែលជាក់ស្តែងបំផុតប្រហែលជា “ជំនាញល្បួង” – Oiroke no jutsu ។

ទោះបីជាមានភាពខុសគ្នាបន្តិចបន្តួចក្នុងប្រវត្តិសាស្ត្រ ដូចជាតួអង្គឯកប្រែកាយទៅជាស្ត្រីដូចក្នុង​រឿង Nuruto ចំណែកឯ ninja ស្រី (ដែលហៅថា Kunoichi) ជាទូទៅបំពេញបេសកកម្មល្បួង ដើម្បី​បង្វែរ​ដាន​ភាគី ឬ​ប្រមូល​ព័ត៌មាន​សម្ងាត់។

ប្រភពដើមនៃពាក្យ Kunoichi នេះក៏គួរឱ្យចាប់អារម្មណ៍ណាស់ដែរ។

ក្នុងភាសាជប៉ុន អក្សរ “ស្រី” (女) ត្រូវបានបង្កើតឡើងដោយបន្ទាត់បីស្រដៀងគ្នាទៅនឹងតួអក្សរ “ku” (く) ក្នុង Hiragana អក្សរ “no” (ノ) ក្នុង Katakana “មួយ” (一 – ichi) ក្នុង​អក្សារ​ហាន។

ដូច្នេះមានន័យថាស្ត្រីគ្រប់រូបសុទ្ធតែជា Kunoichi មែនទេ?

ទោះបីជាមិនមានសមត្ថភាពបំបាំងកាយដ៏ល្អឥតខ្ចោះដូចដែលបានឃើញក្នុងភាពយន្តក៏ដោយ ប៉ុន្តែ​ចំណុច​នោះ​មិន​ធ្វើ​ឲ្យ ninja បាត់​បង់​លក្ខណៈ​ពិសេស​នោះ​ទេ។

ព្រោះអ្វីដែលធ្វើឲ្យពួកគេគួរឲ្យខ្លាចមិនមែនជាសមត្ថភាពដ៏អស្ចារ្យនោះទេ ប៉ុន្តែជាការអត់ធ្មត់ ជំនាញ​សង្កេតមើល និងរបៀបដែលពួកគេប្រើប្រាស់អ្វីដែលសាមញ្ញបំផុត ដើម្បីសម្រេចបាន​គោល​ដៅ។

មិនត្រូវការវេទមន្តនោះទេ ហើយក៏មិនចាំបាច់លាក់ខ្លួនក្រោមទឹករាប់ម៉ោងដែរ… គ្រាន់តែគ្មាននរណា​ដឹង​ថាពួក​គេ​កំពុង​នៅ​ទី​នោះ – គ្រប់​គ្រាន់​ហើយ។

ប្រហែលជា ninja មិនមែនជាអ្នកដែលលាក់ខ្លួនក្រោមទឹកនោះទេ ប៉ុន្តែជាអ្នកដែលតែងតែបង្ហាញ​ខ្លួន​នៅ​ចំពោះ​មុខ… បែរ​ជា​គ្មាន​អ្នក​មើល​ឃើញ។

Abe Kengo