មុខម្ហូបក្នុង​រឿង​គំនូរ​ជីវចល anime ដែល​ត្រូវ​បាន​បង្ហាញ​ឡើង​វិញ​ក្នុង​ជីវិត​ពិត

មុខម្ហូបក្នុងរឿងគំនូរជីវចល anime ដែលត្រូវបានបង្ហាញឡើងវិញក្នុងជីវិតពិត។

ប្រសិនបើអ្នកចូលចិត្តមើលរឿង anime ជប៉ុន ប្រិយមិត្តទាំងអស់គ្នាប្រហែលជាធ្លាប់បានមើលរឿង anime ដែលផលិតដោយ Studio Ghibli ។

​ក្នុងរឿងគំនូរជីវចលរបស់ពួកគេច្រើនតែមានឈុតឆាកបរិភោគអាហារ ហើយមុខម្ហូបនីមួយៗត្រូវ​បាន​គូរយ៉ាងឆ្ងាញ់ពិសារដូចជាកំពុងធុំក្លិនឈ្ងុយតាម​រយៈ​អេក្រង់។ ជន​ជាតិ​ជប៉ុន​ហៅ​ថា Ghibli飯（じぶりめし）- ដែល​មាន​ន័យ​ថា ‘អាហារ Ghibli’ ។

ហើយអ្វីដែលគួរឲ្យចាប់អារម្មណ៍គឺ… ក្នុងនោះមានមុខម្ហូបមួយចំនួនយើងអាចធ្វើដោយខ្លួនឯងបាន។

ចាប់ផ្តើមពីកម្រិតដែលងាយបំផុត (Howl’s Moving Castle) 

ឈុតឆាកស៊ុតចៀន និងសាច់ជ្រូកបេខិន – យ៉ាងសាមញ្ញប៉ុណ្ណោះ ប៉ុន្តែបែរជាធ្វើឲ្យយើងចងចាំមិន​ភ្លេច។

ដោយគ្រាន់តែប្រើគ្រឿងផ្សំងាយៗ យើងអាចចម្អិនមុខម្ហូប “ក្នុងរឿងគំនូវជីវចល” នេះនៅផ្ទះបាន។

មើលទៅដូចជាងាយពេកហើយ… ប៉ុន្តែចំណុចដ៏សាមញ្ញនោះបែរជាធ្វើឲ្យមុខម្ហូបកាន់តែពិសេស។

បន្ទាប់មក ដំឡើងកម្រិតពិបាកបន្តិចជាមួយនឹងរឿង Spirited Away ។

ក្នុងរឿងនេះ ឪពុកម្តាយរបស់ Chihiro (តួអង្គឯកក្នុងរឿង) នៅពេលដែលវង្វេងក្នុងទីក្រុងដែលគេបោះបង់ចោល ពួកគេធុំក្លិនអាហារដ៏ឈ្ងុយឆ្ងាញ់ភាយចេញពីហាងមួយ។ ទោះបីជាមិនឃើញម្ចាស់ហាងក៏ដោយ ឪពុកម្តាយរបស់ Chihiro នៅតែសម្រេចចិត្តអង្គុយចុះបរិភោគ​អាហារ​នោះ ហើយ​បន្ទាប់​មក​បាន​ប្រែ​ក្លាយ​ទៅ​ជា​ជ្រូក។

ក្នុងជីវិតពិត មុខម្ហូបនេះត្រូវបានគេចាត់ទុកថាមានពិតក្នុងម្ហូបអាហាររបស់តៃវ៉ាន់។

រសជាតិ​នេះ​ត្រូវ​បាន​ពណ៌នា​ថា​ស្រដៀង​នឹងគាវ​បង្គាដែល​រុំ​ក្នុង​ស្រទាប់ gelatin ​ទន់​ឆ្ងាញ់។

ស្តាប់ទៅពិតជាគួរឲ្យចង់បរិភោគរហូតដល់ថ្នាក់ ទោះបីក្លាយជាជ្រូកក៏ចង់ហូបដែរ។

បន្ទាប់មក គឺ​កម្រិត​ដែល​ចម្លែក​ជាង​នេះ​បន្តិច​រឿង Nausicaä of the Valley of the Wind ។

សត្វល្អិតយក្សដ៏គួរឲ្យខ្លាចក្នុងរឿង – ដែលស្មានតែមិនអាចបរិភោគបានបែរជាអាច “ធ្វើឡើង​វិញ” តាម​របៀប​ដ៏​គួរ​ឲ្យ​ភ្ញាក់​ផ្អើល​បំផុត។

មីឆាដាក់នៅខាងក្រោម ផ្នែកខាងលើគឺស៊ុតចៀនដែលមានដាក់ពណ៌ និង​ត្រូវ​បាន​កាត់​យ៉ាងច្នៃ​ប្រឌិត ភ្នែក​ធ្វើ​ពី​ប៉េងប៉ោះឆឺរី។

អ្នកដែលខ្លាចសត្វល្អិតមើលឃើញមុខម្ហូបនេះប្រហែលជាមានអារម្មណ៍វិលមុខ ចង់ក្អួត ប៉ុន្តែពិត​ជា​ត្រូវ​ទទួលស្គាល់ថាកម្រិត​ច្នៃ​ប្រឌិត​គ្មាន​អ្វី​ប្រៀប​​បាន​​នោះ​​ទេ។

មិនត្រឹមតែប៉ុណ្ណឹង…

​មុខម្ហូបប្រពៃណីជប៉ុន – oden – ថែមទាំងត្រូវបានធ្វើឲ្យទៅជារូបរាង Totoro ដ៏គួរឲ្យស្រលាញ់។

ឥឡូវនេះអាហារមិនត្រឹមតែសម្រាប់បរិភោគប៉ុណ្ណោះទេ ថែម​ទាំង​ជា​មធ្យោបាយ​ដើម្បី​ចូល​ទៅកាន់​ពិភព​របស់ anime ផង​ដែរ។

ជាចុងក្រោយ ខ្ញុំ​សូម​ណែ​នាំ​រឿង​ដែល​នាំ​មក​នូវ​អារម្មណ៍​ភ័យ​រន្ធត់ ដែលត្រូវបានបំផុសគំនិតដោយរឿង  anime ដ៏​ល្បី Tokyo Ghoul ។

ក្នុងរឿងនេះ Ghoul គឺ​ជា​សត្វ​ដែល​មាន​រូប​រាង​ស្រដៀង​នឹង​មនុស្ស ប៉ុន្តែ​ដើម្បីរក្សាជីវិត​លុះ​ត្រា​តែស៊ី​សាច់​មនុស្ស។

ដោយផ្អែកលើគំនិតនោះ ភោជនីយដ្ឋានលំដាប់ខ្ពស់មួយ​កន្លែង​បាន​​ធ្វើ​​ឡើង​​​វិញ “ម៉ឺនុយ​មុខ​ម្ហូបរបស់ Ghoul” បានបើកដំណើរការក្នុងរយៈពេលកំណត់។ នៅទីនោះ ភ្ញៀវអាច​រីក​រាយ​នឹងបរិយាកាស​​ក្នុង ‘ភោជនីយ​ដ្ឋាន​សាច់​មនុស្ស’ នៅ​ខាង​ក្រៅ​ពិភព anime ។

ដែលសំណួរត្រូវបានលើកឡើងថា… តើអាហារទាំងនោះពិតជាសាច់មនុស្សមែនទេ?

ជាការពិតណាស់ គ្រឿងផ្សំទាំងនោះមិនមែនជាសាច់មនុស្សពិតនោះទេ ប៉ុន្តែគ្រាន់តែត្រូវបានចម្អិនឲ្យមើលទៅដូចប៉ុណ្ណោះ។

ទោះបីជាមើលទៅមុខម្ហូបទាំងនេះគួរឲ្យខ្លាចបន្តិចក៏ដោយ ប៉ុន្តែអារម្មណ៍ “ចូលតួ” ក្លាយជា “ខ្មោច​ស្រែក​ឃ្លាន” ក្នុង​ពេល​បរិភោគ​អាហារ​បែរ​ជា​​ធ្វើ​​ឲ្យ​​មនុស្ស​​ជា​​ច្រើន​​ចង់​​សាក​​ល្បង។

មនុស្សគ្រប់រូបរីករាយនឹងរឿង anime តាមបែបដោយឡែករបស់ខ្លួន។

ក្នុងចំណោមនោះហាក់បីដូចជាការសាកល្បងចម្អិនមុខម្ហូបក្នុងរឿង និង​បង្ហាញ​លម្អិត​មុខ​ម្ហូបទាំង​នោះ​ក៏​ជា​មធ្យោបាយ​ពិសេស​មួយ​ដែរ។

Abe Kengo