ក្រុមតន្រ្តី Aerosmith ស្ទើរតែរំសាយក្រុមព្រោះតែនំត្រី taiyaki

ក្រុមតន្រ្តី Aerosmith ស្ទើរតែរំសាយក្រុមព្រោះតែនំត្រី taiyaki ។

ក្រុមតន្រ្តីរ៉ុកដ៏ល្បីល្បាញលើពិភពលោក Aerosmith ធ្លាប់ត្រូវបានមនុស្សជាច្រើនស្គាល់ដោយ​សារ​បទចម្រៀងក្នុងខ្សែភាព​យន្ត​ដ៏​ល្បី​ឈ្មោះ Armageddon ។ ប៉ុន្តែនរណាទៅដឹងថា ក្រុមតន្រ្តីនេះស្ទើរ​តែ​បែក​បាក់​ក្រុម​ព្រោះ​តែ… នំ taiyaki របស់ជប៉ុន។

Steven Tyler – ដែលជាអ្នកចម្រៀងនាំមុខក្រុមតន្រ្តីនេះ – ជាមនុស្សម្នាក់ដែលចូលចិត្តជប៉ុនយ៉ាង​ខ្លាំង។

ក្នុងចំណោមដំណើរកម្សាន្តទៅសម្តែងនៅជុំវិញពិភពលោក លោកតែងតែដាក់បញ្ចូលជប៉ុនក្នុងកាល​វិភាគ ហើយថែមទាំងទៅលេងកម្សាន្តជាលក្ខណៈបុគ្គលទៀតផង។

លោកពិតជាចូលចិត្តម្ហូបជប៉ុនដូចជា sushi, tempura, ramen… និងជាពិសេសគឺនំត្រី taiyaki ។

Taiyaki ជាប្រភេទនំដែលមានសំបកធ្វើពីម្សៅស្រូវសាលី ស្នូលខាងក្នុងមានសណ្តែកក្រហមត្រូវបានចម្អិនផ្អែម។ នំមានរូបរាងដូចជាត្រី មើលទៅពិតជាឆ្ងាញ់ខ្លាំងណាស់។

រឿងហេតុបានកើតឡើងក្នុងបន្ទប់រង់ចាំមុនពេលដែលការសម្តែងនៅប្រទេសជប៉ុនចាប់ផ្តើម។

មុនពេលឡើងឆាក Steven Tyler បានរៀបចំនំ taiyaki មួយសម្រាប់ខ្លួនឯងដាក់ក្នុងបន្ទប់ ដោយ​​គ្រោង​ថា​នឹង​ហូប​ដើម្បី​យក​ស្មារតីមុនពេលសម្តែង។

ប៉ុន្តែ… នំបែរជាបាត់ទៅវិញ។ មាននរណាម្នាក់បានលួចហូបនំ។

Steven Tyler ខឹងយ៉ាងខ្លាំង ហើយស្រែកថា៖

• “តើនរណាជាអ្នកហូបនំរបស់ខ្ញុំ?”

ដំណើរការស្វែងរក “អ្នកដែលហូប” បានចាប់ផ្តើម។ មិនត្រឹមតែសមាជិកក្រុម​តន្រ្តី​ប៉ុណ្ណោះ​ទេ សូម្បី​​​តែ​​បុគ្គលិក​​ទាំង​​អស់​​ដែល​​មាន​​ទាក់​​ទង​​សុទ្ធ​​តែ​​ត្រូវ​សង្ស័យ។

បរិយាកាសក្នុងបន្ទប់ហាក់បីដូចជាស្ងប់ស្ងាត់ អ្នកដែលបានហូបក៏មិនហ៊ានចេញមុខទទួលនោះដែរ ដោយសារតែស្ថានភាពតានតឹងពេកហើយ។

រហូតដល់ថ្នាក់នៅពេលនោះ បរិយាកាសហាក់បីដូចជាក្រុមតន្រ្តីនេះហៀបនឹងបែកបាក់ទៅហើយ។ ដោយមិនអាចចាប់ផ្តើមការសម្តែងក្នុងស្ថានភាពដូច្នេះនោះទេ។

ក្នុងអំឡុងពេលដែលគ្រប់យ៉ាងហាក់បីដូចជាបាត់បង់ បុគ្គលិកម្នាក់ដែលមានគំនិតរហ័សរហួនបាន​ទាក់​ទង​ជា​បន្ទាន់​ទៅ​កាន់​ក្រុម​ហ៊ុន​ផលិត taiyaki នៅ​ប្រទេស​ជប៉ុន​ដើម្បី​សុំ​ជំនួយ។

នៅពេលដែលបានដឹងពីស្ថានភាព ភ្លាមៗនោះភាគីក្រុមហ៊ុន​ផលិត​នំ​ taiyaki បាន​យល់ព្រម​ផ្ញើ​នំ​មួយ​​ចំនួន​​ធំ​​ជា​​អំណោយ។

Steven Tyler ដែលកំពុងខឹងយ៉ាងខ្លាំង បានយកចំណុចនោះជាកម្លាំងចិត្ត ញញឹម ហើយបញ្ចប់ការសម្តែងយ៉ាងអស្ចារ្យបំផុត។

ហើយបន្ទាប់ពីការសម្តែងបញ្ចប់ អ្វីដែលកំពុងរង់ចាំលោកនៅក្នុងបន្ទប់គឺនំ taiyaki ក្តៅទើបតែចម្អិន​ហើយ​ថ្មីៗ។

ដូច្នេះហើយ… នៅទីបំផុតស្ថានភាពដែលស្ទើរតែរំសាយក្រុមត្រូវបានដោះស្រាយ។

អ្នកដែលបានហូបនំរបស់អ្នកដទៃដោយមិនបានសុំការ​អនុញ្ញាត​ពិត​ជា​មិន​ត្រឹម​ត្រូវ​នោះទេ។ ប៉ុន្តែទន្ទឹមនឹងនោះយើងក៏មើលឃើញថា ប្រសិន​បើ​មិន​មាន​ម្នាក់​នោះ យើង​មិន​ដឹង​ទេ​ថា Steven Tyler បែរ​​​ជា​​ចូល​​ចិត្ត​​នំ taiyaki ដូច្នេះ​​នោះ​​ទេ។

ប្រសិនបើមានឳកាសទៅលេងប្រទេសជប៉ុន សង្ឃឹម​ថា​ប្រិយ​មិត្ត​ទាំង​អស់​អាច​ភ្លក់​នំ​ដែល​លោក Steven Tyler ចូល​ចិត្ត។

Abe Kengo