ពាក្យ​សម្តី​ដ៏​រំជួល​ចិត្ត​​របស់​​​លោក​​នាយក​រដ្ឋមន្ត្រី​ដែល​បញ្ចប់​ការ​សិក្សា​ត្រឹម​បឋម​សិក្សា

ពាក្យ​សម្តី​ដ៏​រំជួល​ចិត្ត​​របស់​​​លោក​​នាយក​រដ្ឋមន្ត្រី​ដែល​បញ្ចប់​ការ​សិក្សា​ត្រឹម​បឋម​សិក្សា។

នៅពេលដែលរំលឹកដល់​រឿង​នយោបាយ មនុស្សជាច្រើនប្រាកដជាគិតភ្លាមដល់បុគ្គលដែលឆ្នើមមាន​ការ​អប់រំ​ខ្ពស់ សញ្ញាបត្រ​មាន​កេរ្តិ៍ឈ្មោះ។

ទោះជាយ៉ាងណានៅប្រទេសជប៉ុន ធ្លាប់មានបុគ្គលម្នាក់រៀនត្រឹមបឋមសិក្សាប៉ុណ្ណោះ – ប៉ុន្តែបែរ​ជា​អាច​ឡើង​កាន់​តំណែង​ជា​នាយក​រដ្ឋមន្ត្រី។

នោះគឺជាលោក Tanaka Kakuei – 田中角栄 ។

លោកមិននិយាយពាក្យពេចន៍ដ៏អស្ចារ្យនោះទេ ប៉ុន្តែអ្វីដែលលោកបន្សល់ទុកគ្រាន់តែជាពាក្យពេចន៍​សាមញ្ញៗ​ប៉ុណ្ណោះ… ប៉ុន្តែ​អាន​កាន់​តែ​ច្រើន កាន់​តែ​ជ្រុល​ជ្រាប​ក្នុង​ចិត្ត។

លោក Tanaka Kakuei កើត និងធំដឹងក្តីនៅ Niigata – ដែលជាតំបន់ជនបទក្រីក្រ ត្រជាក់ និង​គ្រប​ដណ្តប់​ដោយ​ព្រិល។

គ្រួសារប្រកបរបរចិញ្ចឹមត្រីគល់រាំង គោ ប៉ុន្តែជីវភាពនៅតែលំបាក។

ឪពុកម្តាយរបស់លោកត្រូវធ្វើការយ៉ាងនឿយហត់ទាំងថ្ងៃទាំងយប់ ដូច្នេះលោកធំដឹងក្តីតាមរយៈការ​មើល​ថែទាំ​របស់​ជីដូន។

ទោះបីជាគាត់រៀនពូកែ ហើយចូលចិត្តរៀនសូត្រក៏ដោយ ប៉ុន្តែដោយសារជីវភាព លោកត្រូវឈប់រៀន​តាំង​ពី​ក្មេង។

បន្ទាប់ពីបញ្ចប់បឋមសិក្សា លោកបានទៅកាន់ទីក្រុង Tokyo ហើយចាប់ផ្តើមជីវិតការងារដោយប្រើ​កម្លាំង​យ៉ាង​លំបាក។

ទោះជាយ៉ាងណា ពេលវេលាដ៏លំបាកទាំងនោះបានផ្តល់មេរៀនសម្រាប់លោក។

ដោយចាប់ផ្តើមពីកម្មករម្នាក់ លោកបានបង្កើតក្រុមហ៊ុនសំណង់ផ្ទាល់ខ្លួន ហើយងើបឈរឡើងបន្តិច​ម្តងៗ។

លោកថែមទាំងបានពង្រីកអាជីវកម្មទៅកាន់ប្រទេសកូរ៉េ (ដែលពេលនោះជាផ្នែកមួយនៃប្រទេស​ជប៉ុន) ប៉ុន្តែមុនពេលដែលសង្គ្រាម​បាន​បញ្ចប់ លោក​បាន​សម្រេច​ចិត្ត​នាំ​យក​ទ្រព្យ​សម្បត្តិ​ទាំងអស់​ត្រឡប់​ទៅ​ប្រទេស​វិញ។

ក្រោយសង្គ្រាម ឳកាសមួយបានមកដល់ នៅពេលដែលលោកត្រូវបានអ្នកស្គាល់គ្នាដែលជាទីប្រឹក្សា​ក្នុង​ក្រុម​ហ៊ុន​ណែនាំ​ឲ្យ​ដើរ​ផ្លូវ​នយោបាយ។

ហើយនៅទីបំផុត លោកបានឡើងកាន់តំណែងដែលខ្ពស់បំផុតក្នុងពិភពនយោបាយ – ក្លាយជានាយក​រដ្ឋមន្ត្រី​ជប៉ុន។

លោកធ្លាប់បន្សល់​ទុក​នូវ​សម្រង់​ពាក្យសម្ដី​ល្បីៗ​ជាច្រើន។ ពាក្យ​សម្ដី​ដែលលោកបន្សល់ទុក​មិនមែន​ជា​ទ្រឹស្ដី​ដ៏​ជ្រាវជ្រៅនោះទេ ប៉ុន្តែជាមេរៀនជីវិតរបស់ខ្លួន។ ក្នុង​ចំណោម​សម្រង់ពាក្យសម្តីទាំង​នោះ​មាន​ដូចជា៖

• “បើអ្នកចង់ឲ្យអ្នកដទៃធ្វើសកម្មភាព ជាដំបូងយើងត្រូវធ្វើសកម្មភាពមុន” ។
• “និយាយថា ‘មិន’ ត្រូវការភាពក្លាហាន។ ប៉ុន្តែចំណុចនោះពេលខ្លះបែរជាធ្វើឲ្យអ្នកដទៃទុក​ចិត្ត​អ្នក​កាន់​តែ​ខ្លាំង។ ការបង្ហាញច្បាស់ឆន្ទៈរបស់ខ្លួន មិនយូរមិនឆាប់នឹងជួយឲ្យអ្នកទទួល​បានភាពជឿទុកចិត្ត” ។
• “មិនចាំបាច់ប្រញាប់ប្រញាល់នោះទេ។ ប្រសិនបើមានសមត្ថភាព សំណាងល្អប្រាកដជាមក​ដល់” ។
• “រឿងដែលមិនសប្បាយ ចូរបំភ្លេចភ្លាមក្នុងថ្ងៃនេះ។ ព្រួយបារម្ភអំពីរឿងដែលខ្លួនមិនអាចផ្លាស់​ប្តូរ​បាន​គឺ​គ្មាន​ន័យ​នោះ​ទេ” ។
• “ប្រសិនបើសន្យាត្រូវតែរក្សាពាក្យសម្តី! ធ្វើមិនបានកុំសន្យា។
  ប្រាក់ដែលបានជំពាក់កុំភ្លេចសង ចំណែកឯប្រាក់ដែលឲ្យខ្ចីចូរបំភ្លេចទៅចុះ” ។

ក្រៅពីនេះ លោកថែមទាំងមានគោលការណ៍ជីវិតដ៏ពិសេសមួយផងដែរ។

ទោះបីជាភាគីជានរណា លោកនៅតែព្យាយាមជួបពួកគេយ៉ាងហោចណាស់ម្តង។

ដោយមិនគិតពីឋានៈរបស់មនុស្សម្នាក់ខ្ពស់ប៉ុណ្ណា លោកតែងតែរក្សាអាកប្បកិរិយាដូចគ្នា។

មិនត្រឹមតែប៉ុណ្ណឹង សម្រាប់មនុស្សដែលខ្លួនមិនចូលចិត្ត លោកបែរជាចូលទៅជិតដើម្បីរាប់អានធ្វើ​ជា​មិត្ត… ហើយ​ធ្វើ​ឲ្យ​ពួក​គេ​ក្លាយ​ជា​សម្ព័ន្ធ​មិត្ត។

អ្វីដែលលោកបានធ្វើស្តាប់ទៅហាក់បីដូចជាសាមញ្ញណាស់។ ប៉ុន្តែ “ភាពសាមញ្ញនោះ” បែរជាពិបាក​អនុវត្ត​​ទៅ​វិញ។

មិនមានប្រាក់។

មិនមានការអប់រំខ្ពស់។

មិនចាប់ផ្តើមពីចំណុចដែលល្អបំផុត

យ៉ាងណាមិញ លោកនៅតែឈានដល់ចំណុចកំពូល។

ប្រហែលជាអ្វីដែលលោកចង់បានច្បាស់ណាស់គឺ៖

មិនសំខាន់ថាយើងចាប់ផ្តើមពីណានោះទេ ប៉ុន្តែសំខាន់ត្រង់ថាយើងធ្វើសកម្មភាពយ៉ាងណា។

សង្ឃឹមថា បន្ទាប់ពីស្តាប់សម្រង់ពាក្យសម្ដីល្បីៗរបស់លោក យើងម្នាក់ៗអាចគិតពិចារណាឡើងវិញ ហើយ​ចាត់​ទុក​វា​ដូច​ជា​មេរៀន ដើម្បី​ជួយ​ឲ្យ​យើង​ដើរ​បាន​កាន់​តែ​មាន​ទំនុកចិត្តលើដំណើរជីវិត។

Abe Kengo