ការពិតនៅពីក្រោយពាក្យ “ស្នេហាអមតៈ” ដែលគេហៅថាពេជ្រ

ថ្ងៃព្រហស្បតិ៍ 26/03/2026 | 18:20 ល្ងាច

ការពិតនៅពីក្រោយពាក្យ “ស្នេហាអមតៈ” ដែលគេហៅថាពេជ្រ។

ប្រសិនបើអ្នកស្រលាញ់ចូលចិត្តពេជ្រ ឬកំពុងតែស្ទាក់ស្ទើរមិនដឹងថាគួរទិញគ្រឿងអលង្ការពេជ្រដែរឬទេ ដូច្នេះមានរឿងមួយដែលអ្នកគួរតែដឹង។ ពេជ្រមិនត្រឹមតែជាតំណាងនៃសេចក្តីស្រឡាញ់ប៉ុណ្ណោះទេ ថែមទាំងជាការ “បោកប្រាស់ទីផ្សារ” ដ៏អស្ចារ្យបំផុតក្នុងប្រវត្តិសាស្ត្រផងដែរ។

នៅពីក្រោយយុទ្ធសាស្ត្រទីផ្សារនេះគឺជា De Beers – ជាសាជីវកម្មពេជ្រពហុប្រទេសឈានមុខគេនៅលើពិភពលោក។

De Beers ធ្លាប់កាន់កាប់ទីផ្សារពេជ្រដែលមិនទាន់កែច្នៃទូទាំងពិភពលោកចំនួន ៨០-៩០% រហូតដល់ថ្នាក់ពេលខ្លះស្ទើរតែផ្តាច់មុខទាំងស្រុង។

សម្រាប់ពួកគេ ធ្វើយ៉ាងណាអាចលក់ពេជ្រក្នុងតម្លៃខ្ពស់បំផុតគឺជាគន្លឹះនៃការរីកចម្រើនរបស់សាជីវកម្ម។

ជាក់ស្តែង យុទ្ធសាស្ត្ររបស់ពួកគេគឺធ្វើយ៉ាងណាឲ្យពិភពលោកទាំងមូលជឿថា ពេជ្រជាអ្វីដែលមិនអាចខ្វះបានក្នុងស្នេហា។

គ្រាន់តែជាប្រយោគជ្រុលនិយម ប៉ុន្តែបែរជាទទួលបានប្រសិទ្ធភាពដ៏មិនគួរឲ្យជឿ៖

“ស្នេហាដែលមិនមានពេជ្រ គឺជាស្នេហាក្លែងក្លាយ។”

ដូច្នេះមិនខុសអ្វីពីនិយាយថា៖ “ស្នេហាអាចយកប្រាក់ទៅទិញនោះទេ” ។

ខ្លឹមសារនេះត្រូវបានជម្រុញតាមរយៈខ្សែភាពយន្ត តារាល្បីៗ និងការផ្សាយពាណិជ្ជកម្មយ៉ាងទូលំទូលាយ។

ជាពិសេសគឺនៅក្នុងរោងកុន – ជាកន្លែងដែលគូស្នេហ៍កំពុងណាត់ជួបគ្នា ហើយអារម្មណ៍កំពុងកើនឡើងយ៉ាងខ្លាំង… គ្រាន់តែការផ្សាយពាណិជ្ជកម្មរបស់ De Beers ចាក់ផ្សាយរយៈពេល ១៥ វិនាទីប៉ុណ្ណោះ ក៏អាចធ្វើឲ្យបុរសចំនួនរាប់លាននាក់ចាប់ផ្តើមមានអារម្មណ៍… មានសម្ពាធ។

លទ្ធផលចិញ្ចៀនអាពាហ៍ពិពាហ៍ដែលមានពេជ្របានក្លាយជាស្តង់ដារ។

លើសពីនេះ នៅសម័យនោះជប៉ុនកំពុងស្ថិតក្នុងដំណាក់កាលសេដ្ឋកិច្ចអភិវឌ្ឍយ៉ាងខ្លាំង ដូច្នេះបានក្លាយជាគោលដៅចម្បង។

ហើយគំនិតដែលថាចិញ្ចៀនអាពាហ៍ពិពាហ៍គួរតែមានតម្លៃស្មើប្រាក់ខែបីខែត្រូវបានបញ្ចូលក្នុងគំនិតរបស់មនុស្សគ្រប់គ្នា។

“ចិញ្ចៀនរៀបការមួយស្មើនឹងប្រាក់ខែបីខែ” ។

ជាពាក្យស្លោកដ៏អស្ចារ្យមួយ!

នៅពេលដែលឮប្រយោគនេះ បុរសនឹងគិតគូរក្នុងចិត្តដោយផ្អែកលើប្រាក់ខែរបស់ពួកគេ។

មនុស្សធម្មតានឹងគិតដល់ចំនួនដែលសមល្មម ចំណែកឯអ្នកមាននឹងគិតដល់ចំនួនដែលច្រើន។

អតិថិជនកំណត់តម្លៃដោយផ្ទាល់ ហើយបង្កើនការចំណាយរបស់ខ្លួន។

នេះជាចំណុចកំពូលនៃចិត្តវិទ្យាក្នុងទីផ្សារ។

តាមពិតទៅ ធម្មតាពេជ្រមិនកម្ររហូតដល់ថ្នាក់ដូចជាការគិតនោះទេ។

គ្រាន់តែជីកយករ៉ែនៅប្រទេសរុស្ស៊ី ឬអាហ្វ្រិកអាចរកឃើញយ៉ាងច្រើន។

ប៉ុន្តែដើម្បីបង្កើនតម្លៃ ពួកគេមានចេតនារឹតត្បិតប្រភពផ្គត់ផ្គង់។

ដើម្បីធ្វើបានដូច្នេះ De Beers បានគ្រប់គ្រងទីផ្សារពេជ្រឆៅ។ នៅពេលដែលរកឃើញអណ្តូងរ៉ែថ្មី ពួកគេហ៊ានចំណាយប្រាក់យ៉ាងច្រើនដើម្បីទិញយក។

លទ្ធផលស្ទើរតែមិនមានពេជ្រមួយគ្រាប់ណាអាចចេញលក់នៅលើទីផ្សារដោយមិនឆ្លងកាត់ De Beers នោះឡើយ។

ប្រហែលជា ៥០ ឆ្នាំបានកន្លងផុតទៅចាប់តាំងពីពេលដែលមានយុទ្ធសាស្រ្តទីផ្សារនេះ។ ឥឡូវនេះ គ្រប់យ៉ាងចាប់ផ្តើមផ្លាស់ប្តូរ។ បច្ចុប្បន្នពេជ្រសិប្បនិម្មិតបានឈានដល់កម្រិតគុណភាពខ្ពស់យ៉ាងខ្លាំង។

ជាមូលដ្ឋាន ពេជ្រគ្រាន់តែជាកាបូន មិនមែនជាធាតុដ៏កម្រនោះទេ។

ដើមឡើយ ពេជ្រសិប្បនិម្មិតមានជាយូរមកហើយ ប៉ុន្តែដោយសារតែពណ៌មិនស្អាត ដូច្នេះភាគច្រើនត្រូវបានប្រើសម្រាប់គោលបំណងឧស្សាហកម្ម។ ហើយឥឡូវនេះ គុណភាពបានឈានដល់កម្រិតដែលសូម្បីតែអ្នកជំនាញក៏ពិបាកបែងចែកនឹងពេជ្រធម្មជាតិដែរ។

ទន្ទឹមនឹងគុណភាពខ្ពស់បែរជាមានតម្លៃថោក សូម្បីតែប្រភេទដែលមានលំដាប់ខ្ពស់ក៏មានតម្លៃប្រហែលមួយភាគដប់ប៉ុណ្ណោះបើប្រៀបនឹងតម្លៃពេជ្រធម្មជាតិ។

តាមរបៀបនេះ “និមិត្តរូបនៃសេចក្តីស្រឡាញ់” ឥឡូវនេះបានក្លាយជារបស់ដែលអាចផលិតយ៉ាងច្រើនក្នុងរោងចក្រ។

ស្តាប់ទៅដូចជាលែងមានអារម្មណ៍រ៉ូមែនទិកទៅហើយ មែនទេប្រិយមិត្តទាំងអស់គ្នា?

ប្រឈមនឹងចំណុចនេះ De Beers បង្ខំចិត្តត្រូវសម្របខ្លួន។ ពួកគេបានបង្កើតម៉ាក Lightbox – ពេជ្រសិប្បនិម្មិតលំដាប់ខ្ពស់។

អ្វីដែលហួសចិត្តនោះគឺ ពីមុនពួកគេតែងតែបដិសេធពេជ្រសិប្បនិម្មិតព្រោះខ្លាចប៉ះពាល់ដល់ការលក់ពេជ្រធម្មជាតិ។ ប៉ុន្តែឥឡូវនេះ ពួកគេបែរជាឈានជើងចូលទីផ្សារនេះ។

ផលិតផលមិនត្រឹមតែមានពណ៌សប៉ុណ្ណោះទេ ថែមទាំងមានពណ៌ផ្កាឈូក និងពណ៌ខៀវទៀតផង។ ពណ៌ទាំងនេះកម្រមានណាស់នៅក្នុងធម្មជាតិ ប៉ុន្តែបែរជាអាចផលិតបានច្រើននៅក្នុងបន្ទប់ពិសោធន៍។

តើ De Beers អាចនឹងមានគោលបំណងគ្របដណ្ដប់ទីផ្សារពេជ្រសិប្បនិម្មិតដែរទេ?

តាមពិតទៅ កាបូន – សមាសធាតុដែលបង្កើតពេជ្រ – គឺជាធាតុទូទៅទាំងនៅលើផែនដី និងក្នុងលំហអាកាស។

គេថែមទាំងនិយាយថា នៅលើភពដូចជាភពអ៊ុយរ៉ានុស ឬភពណិបទូន គ្រីស្តាល់ពេជ្រធ្លាក់ចុះដូចជាភ្លៀងទឹកកក។

នៅទីនោះ ពេជ្រប្រៀបបីដូចជាគ្រួសធម្មតាប៉ុណ្ណោះ។

ប៉ុន្តែចម្ងាយពីផែនដីទៅកាន់ភពណិបទូនគឺប្រហែល ៤,៥ ពាន់លានគីឡូម៉ែត្រ។

នរណាទៅដឹងនៅថ្ងៃណាមួយ យើងប្រហែលជាឮការផ្សាយពាណិជ្ជកម្មដូចជា៖

“គ្រីស្តាល់នៃសេចក្ដីស្រឡាញ់ឆ្លងកាត់ចម្ងាយ ៤,៥ ពាន់លានគីឡូម៉ែត្រ”

ហើយទន្ទឹមនឹងនោះ ពេជ្រត្រូវបានលក់ក្នុងតម្លៃខ្ពស់យ៉ាងខ្លាំងក៏ថាបាន។

Abe Kengo