ពិត​ទេ​ដែល​ថា​សន្តិភាព​ពិភព​លោក​ត្រូវ​បាន​ផ្សារ​ភ្ជាប់​ដោយ​កីឡា​បេស្បល និង​តួអង្គ “Minions” នៅ​​ជប៉ុន

ពិត​ទេ​ដែល​ថា​សន្តិភាព​ពិភព​លោក​ត្រូវ​បាន​ផ្សារ​ភ្ជាប់​ដោយ​កីឡា​បេស្បល និង​តួអង្គ “Minions” នៅ​​ជប៉ុន។

ស្រដៀងនឹង World Cup ខាងបាល់ទាត់​ដែរ ការប្រកួតកីឡាបេស្បលពិភពលោក World Baseball Classic (WBC) មិនត្រឹមតែស្វែង​រក​ប្រទេស​ដែល​ខ្លាំង​បំផុត​ខាង​កីឡា​បេស្បល​ប៉ុណ្ណោះទេ ថែម​ទាំង​ជា​កន្លែង​សម្រាប់​ចែក​រំលែក​រឿង​រ៉ាវ​ដ៏​​រំភើប​ចិត្ត​​ដែល​​លើស​​ពី​​កីឡា​​នេះ​​ទៅ​​ទៀត។

នៅទីនេះ គេមិនត្រឹមតែនិយាយពីជ័យជម្នះ ឬបរាជ័យប៉ុណ្ណោះទេ ថែមទាំងរំលឹកដល់ទឹកចិត្តដ៏ល្អ ការគោរពគ្នារវាងប្រទេស និងប្រទេស ហើយលើកនេះថែមទាំងមាន “Minions” ក្នុងជីវិតពិតផងដែរ។ 

នៅពេលដែលទង់ជាតិមិនអាចបង្ហាញ… ប៉ុន្តែនៅតែទទួលបានការគោរព

តៃវ៉ាន់តែងតែស្ថិតក្រោមស្ថានភាពតានតឹង មិនត្រូវបានទទួលស្គាល់ថាជាប្រទេសមួយពេញ​លេញ​នោះ​ទេ ប៉ុន្តែក៏​មិន​អាច​ចាត់​ទុក​ជា​ផ្នែក​មួយ​នៃ​ប្រទេស​ចិន​នោះ​ដែរ។

ដូច្នេះហើយ ពួកគេត្រូវបង្ខំចិត្តប្រកួតដោយប្រើឈ្មោះថា “Chinese Taipei” មិនអាចកាន់ទង់​ជាតិ​ពេលចេញទៅទីលាននោះទេ។ សម្រាប់អត្តពលិកដែលបំពាក់លើខ្លួនមោទនភាពជាតិ នោះជា​ការ​សោកស្ដាយ​​ដែល​មិន​អាច​និយាយ​ចេញ​បាន។

ទោះជាយ៉ាងណា នៅពេលដែលប្រកួតជាមួយនឹងក្រុមតៃវ៉ាន់ ក្រុមឆែកបានធ្វើរឿងមួយដែលធ្វើឲ្យពិភពលោកទាំងមូលភ្ញាក់ផ្អើល។ ពួកគេបាននាំយកទង់ជាតិតៃវ៉ាន់ចេញទៅកាន់ទីលាន។

ត្រឹមសកម្មភាពតូចមួយ ប៉ុន្តែបង្ហាញពីការគោរពយ៉ាងខ្លាំងចំពោះគូប្រកួត។ ហើយភ្លាមៗនោះ សកម្មភាពនេះទទួលបានការសរសើរយ៉ាងច្រើន។

ផ្ទុយទៅវិញ រដ្ឋាភិបាលចិន ដែលតែងតែចាត់ទុកតៃវ៉ាន់ជាផ្នែកមួយនៃប្រទេសចិនបានបង្ហាញការ​ប្រឆាំង​យ៉ាង​ខ្លាំង។

ការដែលអ្នកតំណាងម្នាក់មកពីតៃវ៉ាន់ធ្វើដំណើរទៅកាន់ប្រទេសជប៉ុនដើម្បីទស្សនាការប្រកួត ទោះ​បីជាទៅមើលលក្ខណៈ​បុគ្គល​ក៏​ដោយ ក៏​អាច​នឹង​ទទួល​ការ​រិះ​គន់​ផង​ដែរ។

រដ្ឋាភិបាលជប៉ុនរក្សាគោលជំហរស្មើភាពដោយបញ្ជាក់ថា នេះគ្រាន់តែជាការធ្វើដំណើរលក្ខណៈបុគ្គល ដូច្នេះ​មិនទទួលបានការអន្តរាគមន៍ ឬជំនួយអ្វីពីរដ្ឋនោះឡើយ។

រវាងសកម្មភាពរបស់កីឡាករឆែក និង​ប្រតិកម្ម​យ៉ាង​តឹង​រ៉ឹង​ពី​នយោបាយ។ តើនរណា​ទើប​ជា​​អ្នក​ដែល​​យល់​​ពី​​អារម្មណ៍​​របស់​​ប្រជាជន​​តៃវ៉ាន់?

មនុស្សធម្មតាបង្កើតបានជាអព្ភូតហេតុ

នៅប្រទេសជប៉ុន ជាកន្លែងដែលប្រព្រឹត្តការប្រកួត WBC ស្តង់​តែងតែ​ពេញ​ទៅដោយ​អ្នកគាំទ្រ​ក្រុម​ម្ចាស់ផ្ទះ។

ប៉ុន្តែចំណុចដ៏គួរឲ្យភ្ញាក់ផ្អើលគឺចំនួនអ្នកគាំទ្រក្រុមឆែកក៏ច្រើនមិនស្ទើរនោះដេរ។

មុននោះ ប្រជាជនជប៉ុនជាច្រើនថែមទាំងមិនដឹងថាសាធារណរដ្ឋឆែកស្ថិតនៅកន្លែងណាលើផែនទីនោះទេ ដូច្នេះតើចំណុចអ្វីដែលធ្វើឲ្យពួកគេចូលចិត្តក្រុមជម្រើសជាតិឆែកបែបនេះ?

តាមពិតទៅ ក្រុមជម្រើសជាតិឆែកមានលក្ខណៈពិសេសមួយដែលក្រុមដទៃទៀតមិនមាន។

មិនដូចជាក្រុមដទៃទៀតដែលប្រមូលផ្តុំទៅដោយតារាអាជីពនោះទេ កីឡាករឆែកទាំងអស់សុទ្ធតែមានមុខរបររៀងៗខ្លួន។ ពួក​គេ​គ្រាន់​តែ​លេង​កីឡា​បេស្បល​នៅ​ពេល​យប់ ឬ​ថ្ងៃ​​ឈប់​សម្រាក​​ប៉ុណ្ណោះ។

គ្មានភាពទាក់ទាញ គ្មានកេរ្តិ៍ឈ្មោះ មានតែការតស៊ូ និងការខិតខំប្រឹងប្រែងឥតឈប់ឈរ។

ហើយដោយសារតែស្មារតីនោះបានធ្វើឲ្យប្រជាជនជប៉ុនរំភើបចិត្តយ៉ាងខ្លាំង។

អ្នកបោះបាល់ (pitcher) ជនជាតិឆែកម្នាក់ ជាអ្នកដែលបានប្រកាសថានឹងចូលនិវត្តន៍ក្រោយការប្រកួត WBC លើកនេះ មិនមែនជាអ្នកបោះដ៏ខ្លាំងម្នាក់ដូចជា Shohei Ohtani នោះទេ ហើយ​ក៏​មិន​មែន​ជា​អ្នក​វាយ​ដ៏​ឆ្នើម​ម្នាក់​នោះ​ដែរ។

យ៉ាងណាមិញ នៅពេលដែលគាត់ចេញពីទីលាន អ្នកទស្សនាស្ទើរតែទាំងអស់ក្នុងចំណោមមនុស្ស ៤ ម៉ឺន​នាក់​បាន​ក្រោក​ឈរ ដោយទះដៃ និងលើកទឹកចិត្តគាត់យ៉ាងខ្លាំង។

កីឡាករដែលមិនមាននរណាម្នាក់ស្គាល់ ប្រកួតឆ្ងាយពីស្រុកកំណើត ប៉ុន្តែបែរជាទទួលបានការលើក​ទឹក​ចិត្ត​យ៉ាង​កក់​ក្តៅ​ដូច្នេះ។

ប្រហែលនោះជាពេលវេលាដែលអត្តពលិកគ្រប់រូបស្រមៃចង់បានក្នុងជីវិតរបស់ខ្លួន។

ហើយបន្ទាប់មក… “Minions” បានបង្ហាញខ្លួន។

ក្នុងអំឡុងពេលអត្ថាធិប្បាយការប្រកួត WBC អ្នកអត្ថាធិប្បាយជនជាតិអាមេរិកម្នាក់ស្រាប់តែស្រែក​ឡើង​យ៉ាង​រំភើប​ថា៖

“នៅប្រទេសជប៉ុន… មាន Minions ពិតមែន!!”

នៅពេលនោះ នៅលើអេក្រង់គឺជារូបភាពប្អូនៗថ្នាក់មត្តេយ្យជប៉ុន ពាក់​មួក​ពណ៌​លឿង​ដូច​គ្នា អង្គុយ​យ៉ាង​មាន​របៀប​នៅ​លើ​កៅអី។

មិនរត់លេង មិនបង្កសំឡេងរំខាន ប្អូនៗទស្សនាការប្រកួតយ៉ាងយកចិត្តទុក​ដាក់ និងគាំទ្រក្រុម​ឆែក​ដោយ​ភាព​ម៉ឺង​ម៉ាត់។

រូបភាព​នោះ​ធ្វើ​ឲ្យ​យើង​គ្រប់​គ្នាស្រមៃគិតភ្លាមដល់ Minions ដ៏គួរឲ្យស្រលាញ់។

ការប្រៀបធៀបដ៏គួរឲ្យចាប់អារម្មណ៍នេះត្រូវបានចែករំលែកយ៉ាងឆាប់រហ័សនៅជុំវិញពិភពលោក ហើយថែមទាំងក្លាយជាប្រធានបទដែលត្រូវបានគេលើកមកនិយាយច្រើនជាងការប្រកួតរវាងអូស្ត្រាលី និងឆែកទៅទៀត។

ត្រឹមទិដ្ឋភាពតូចមួយ… ប៉ុន្តែបានធ្វើឲ្យពិភពលោកទាំងមូលសើចញញឹម។

ការប្រកួត WBC មិនត្រឹមតែជាកីឡាប៉ុណ្ណោះទេ យើងមើលឃើញពីការគោរពរវាងប្រទេស និងប្រទេស ការ​យោគ​យល់​គ្នា ការលើកទឹកចិត្តសម្រាប់បុគ្គលដែលខិតខំប្រឹងប្រែង មិនថាពួកគេជា​នរណា និងពេលវេលា​ដ៏​កក់​ក្តៅ​ដែល​​ធ្វើ​ឲ្យ​ពិភព​លោក​កាន់​តែ​ស្និទ្ធ​ស្នាល​គ្នា។

ប្រហែលជាសន្តិភាពមិនមែនជាអ្វីដែលឆ្ងាយពេកនោះទេ។

នៅពេលខ្លះ វាផ្តើមចេញពីសកម្មភាពដែលតូចបំផុត ដូចជាសកម្មភាពដែលមនុស្សធ្វើដាក់គ្នាទៅ​វិញ​ទៅ​មក​នៅ​លើ​ទីលាន​បាល់​ទាត់​ជា​ដើម។

Abe Kengo