“ពិធីបុណ្យឆបោកនៅនិទាឃរដូវ” – ធាតុ​ពិត​នៃ​ផ្កា​សាគូរ៉ា​ដែល​មនុស្ស​គ្រប់​គ្នា​ស្រលាញ់​ចូល​ចិត្ត

“ពិធីបុណ្យ​ឆបោក​នៅ​និទាឃរដូវ” – ធាតុ​ពិត​នៃ​ផ្កា​សាគូរ៉ា​ដែល​មនុស្ស​គ្រប់​គ្នា​ស្រលាញ់​ចូល​ចិត្ត។

ជារៀងរាល់រដូវផ្ការីក ប្រទេសជប៉ុនឈានចូល “រដូវផ្កាសាគូរ៉ា” មិនត្រឹមតែមើលឃើញនៅលើដើម​ឈើ​ប៉ុណ្ណោះ​ទេ ថែម​ទាំង​ធ្លាក់​មក​លើ​ធ្នើរ​ដាក់​ទំនិញ​ផង​ដែរ។ ដូច្នេះហើយ ផលិតផលជាច្រើនប្រភេទ​ដូច​ជា​ភេសជ្ជៈ នំបង្អែម និងគ្រឿងសម្អាងដែលប្រើឈ្មោះថា “ក្លិនផ្កាសាគូរ៉ា” ឬ “រសជាតិផ្កា​សាគូរ៉ា” ចាប់ផ្តើមត្រូវបានផលិតក្នុងបរិមាណមានកំណត់។

សូម្បីតែម៉ាកល្បីៗដូចជា Starbucks ឬ KitKat ក៏មិននៅស្ងៀមនោះដែរ ដែលបង្ហាញពីផលិត​ផល​ពណ៌​ផ្កា​ឈូកដ៏​ទាក់​ទាញរបស់ខ្លួន ស្អាតរហូតដល់ថ្នាក់គ្រាន់តែឃើញក៏ចង់ទិញដែរ។

យ៉ាងណាមិញ តើអ្នកទាំងអស់គ្នាធ្លាប់ឆ្ងល់ទេថា៖

• “តើរសជាតិរបស់សាគូរ៉ាជាអ្វីឲ្យប្រាកដ?”

មានរសជាតិប្រៃបន្តិច លាយជាមួយរសជាតិផ្អែម និងល្វីងដូចជាវ៉ានីឡា ជារសជាតិដែលប្លែកដូចរដូវផ្ការីក។ ប៉ុន្តែមានចំណុចដ៏គួរឲ្យចាប់អារម្មណ៍មួយត្រង់ថា ភាគច្រើនយើងមិនធ្លាប់ភ្លក់រសជាតិផ្កាសាគូរ៉ាពិតប្រាកដនោះទេ។

ដូច្នេះតើរសជាតិដែលគេហៅថា “រសជាតិសាគូរ៉ា” នោះគឺជារសជាតិពិតរបស់ផ្កាមែនទេ?

ចម្លើយគឺថា៖

ត្រូវ… ហើយក៏មិនត្រូវទាំងស្រុងនោះដែរ។

ពណ៌ផ្កាឈូកស្រាលស្រទន់នោះធ្វើឲ្យយើងគិតទៅដល់ផ្កាសាគូរ៉ា ហើយជឿថា​វា​ត្រូវ​បាន​ផលិត​ឡើង​ពី​​ត្របក​​ផ្កា។ ប៉ុន្តែ​តាម​ពិត​ទៅ វា​គ្រាន់​តែ​ជា​ពណ៌​ប៉ុណ្ណោះ។

រសជាតិ​ពិសេស​ដែលយើងទទួលបានបែរជាមិនមែនមកពីផ្កានោះទេ ប៉ុន្តែ​មកពី​ស្លឹក​។

អ្វីដែលបង្កើតបានជា “រសជាតិសាគូរ៉ា” គឺជាសារធាតុដែលគេហៅថា Coumarin ដែលមានក្នុងស្លឹកផ្កាសាគូរ៉ា។ មិនត្រឹមតែអាហារប៉ុណ្ណោះទេ សូម្បីតែទឹកអប់ដែលមានក្លិនសាគូរ៉ាក៏ត្រូវបានផលិត​ឡើង​ដោយ​ប្រើ​គ្រឿង​ផ្សំ​នេះ​ផង​ដែរ។

តាមពិតទៅ ផ្កាសាគូរ៉ាពិត ទោះបីជានៅពេលដែលកំពុងរីកក៏ដោយ ក៏ស្ទើរតែមិនមានក្លិនច្បាស់លាស់​នោះ​ទេ។

ស្លឹកស្រស់ក៏ដូច្នេះដែរ។

លុះត្រាតែស្លឹកត្រូវបានត្រាំក្នុងអំបិល ទើបសារធាតុ Coumarin ត្រូវបានបញ្ចេញ ដែលបង្កើតបាន​ជា​ក្លិន​ក្រអូប​ដែល​យើង​តែង​តែ​ហៅ​ថា “ក្លិន​សាគូរ៉ា”។

នេះជាមូលហេតុដែលផលិតផលទាំងនេះច្រើនតែមានរសជាតិប្រៃបន្តិច។

ប៉ុន្តែមិនត្រឹមតែប៉ុណ្ណឹងនោះទេ។

ជាទូទៅផលិតផលដែលមានផ្កាសាគូរ៉ាលក់ច្រើនចាប់ពីខែមីនាដល់ខែមេសា ជារដូវផ្កាសាគូរ៉ារីក។ ទន្ទឹមនឹងនោះ ស្លឹកផ្កាសាគូរ៉ាដែលប្រើជាគ្រឿងផ្សំសំខាន់បែរជាត្រូវបានប្រមូលផលបន្ទាប់ពីផ្កាស្រពោន ពោល​គឺ​ខែ​ឧសភា។

ជាក់ស្តែងណាស់ នេះជាចំណុចដែលមិនស៊ីសង្វាក់គ្នាទាក់ទងនឹងពេលវេលា។

យ៉ាងណាមិញ យើងបែរជារីករាយនឹងរស​ជាតិ​ដែល​មិន​មាន​ក្នុង​ត្របក​ និងស្លឹកផ្កាសាគូរ៉ាស្រស់ ហើយ​ងក់​ក្បាល​និយាយ​ថា៖

“អូ! ក្លិនផ្កាសាគូរ៉ាពិតជាក្រអូបណាស់ ជាក្លិននៃនិទាឃរដូវ…”

តាមពិតទៅ… យើងកំពុងតែត្រូវបោកបញ្ឆោតដោយពណ៌ផ្កាឈូកដែលស្រដៀងនឹងផ្កាសាគូរ៉ា​មែន​ដែរ​ទេ?

ចំណុចដែលគួរឲ្យភ្ញាក់ផ្អើលមួយទៀតត្រង់ថា។

មិនដូចជាអ្វីដែលយើងស្រមៃនោះទេ ផ្កាសាគូរ៉ាដ៏ស្រស់ស្អាតដែលយើងតែងតែឃើញ ឬ​គិត​ដល់គឺ​ជា​សាគូរ៉ា​​ដែល​​មាន​​ឈ្មោះ​​ថា Somei Yoshino ។ ការចម្រាញ់យកសារធាតុ Coumarin ចេញពីស្លឹកដើម​សាគូរ៉ា​នេះ​ពិត​ជា​ពិបាក​ខ្លាំង​ណាស់។ ដូច្នេះគេយកពូជដើមសាគូរ៉ាព្រៃមួយប្រភេទដែលមានឈ្មោះថា Oshima Zakura សម្រាប់ជំនួស។

សរុបទៅ នេះជា “ការបោកបញ្ឆោត” ដែលមិននឹកស្មាន។

គេបង្កើតរសជាតិ និងក្លិនដែលអ្នកមិនធ្លាប់ដឹងពីមុនមក ប៉ុន្តែបែរជាធ្វើឲ្យអ្នក​គិត​ដល់ទិដ្ឋភាព​​ផ្កា​​សាគូរ៉ា​​កំពុង​​រីក។ ទាំង​ដែល​ក្លិន​នោះ​មិន​មែន​មក​ពី​ផ្កា​ដែល​កំពុង​រីក​នោះ​ទេ។

បើហៅថា “ជាការបោកប្រាស់” ហាក់បីដូចជាបំផ្លើសពេក ប៉ុន្តែច្បាស់ណាស់វាធ្វើឲ្យយើងគិតស្រមើ​ស្រមៃ​ដោយ​ខ្លួន​ឯង ថែម​ទាំង​ត្រូវបានលក់ក្រោមទម្រង់ “ផលិតផលមានកំណត់តាមរដូវ” ទៀត​ផង។

ខណៈពេលដែលជាក់ស្តែង ស្លឹកសាគូរ៉ាប្រៃអាចប្រើបានពេញមួយឆ្នាំ។

ហើយអ្វីដែលគួរឲ្យភ្ញាក់ផ្អើលគឺ យុទ្ធសាស្ត្រនេះមិនមែនជាយុទ្ធសាស្រ្តថ្មីនោះទេ។

ចាប់តាំងពីឆ្នាំ ១៦៨៣ មក Sakura mochi – ដែលជាប្រភេទនំ mochi ពណ៌ផ្កាឈូករុំដោយស្លឹកផ្កាសាគូរ៉ាប្រៃ – ក៏ធ្លាប់ជាអាហារដ៏ពេញនិយមផងដែរ។

ជាង ៣០០ ឆ្នាំបានកន្លងផុតទៅ ប៉ុន្តែវិធីសាស្រ្តលក់បែបនេះនៅតែទាក់ទាញ និងមានប្រសិទ្ធភាព​រហូត​មក​ដល់​សព្វ​ថ្ងៃ​នេះ។

អ្នកដែលរកឃើញវិធីសាស្រ្តនេះពិតជាអ្នកជំនាញផ្នែកទីផ្សារម្នាក់មែន។

Abe Kengo