រសជាតិពិសេសនៃប្រភេទសាច់គោ wagyu នីមួយៗ

រសជាតិពិសេសនៃប្រភេទសាច់គោ wagyu នីមួយៗ។

ទោះបីជាពេញនិយមនៅតាមបណ្តាប្រទេសជាច្រើន ប៉ុន្តែតើអ្នកទាំងអស់គ្នាដឹងទេថា តាមពិតទៅ wagyu មាន​ច្រើន​ប្រភេទ​ខុសៗ​គ្នា​ដែរ​ទេ?

មិនមែនមានតែសាច់គោ Kobe ទើបជា wagyu នោះទេ។

អាស្រ័យលើទីកន្លែងនាំចេញ វិធីសាស្រ្តចិញ្ចឹមមានភាពខុសគ្នា ពូជគោក៏ខុសគ្នាដែរ ដូច្នេះរស​ជាតិ​មាន​ភាព​ខុស​គ្នា​យ៉ាង​ច្បាស់។

តើរស់ជាតិសាច់ wagyu មួយណាដែលប្រិយមិត្តទាំងអស់គ្នាចូលចិត្ត និងចង់ភ្លក់?

ម្យ៉ាងវិញទៀត ខ្ញុំសូមចែករំលែកអំពីរបៀបបរិភោគសាច់ដែលមានគុណភាពខ្ពស់ក្នុងតម្លៃសមរម្យ ដូច្នេះ​សូម​តាម​ដាន​រហូត​ដល់​ចប់​ទាំង​អស់​គ្នា។

សាច់គោ Kobe

ប្រភេទ​សាច់​គោ wagyu ដែលល្បីបំផុតនៅលើពិភពលោកគឺ​សាច់គោ Kobe ។

សរសៃរខ្លាញ់ពណ៌សដែលលាយឡំជាមួយនឹងសាច់ពណ៌ក្រហម មិនត្រឹមតែឆ្ងាញ់ ថែមទាំងរក្សាបាន​នូវ​រស​ជាតិ​ឆ្ងាញ់​របស់​សាច់​ផង​ដែរ។

សាច់គោ Kobe សមនឹងបរិភោគបែបតាម steak ខ្លាំងណាស់។

សាច់គោ Omi

បើប្រៀបធៀបទៅនឹងសាច់គោ Kobe សាច់គោ Omi មានខ្លាញ់ច្រើនជាង។

រសជាតិសាច់ឈ្ងុយឆ្ងាញ់ សាកសមនឹងបរិភោគតាមបែប yakiniku ឬ sukiyaki ។

សាច់គោ Matsusaka

សាច់គោប្រភេទនេះមានខ្លាញ់ច្រើនជាងសាច់គោ Omi ទៅទៀត ដែលធ្វើឲ្យអ្នកបរិភោគមានអារម្មណ៍​ថា​សាច់​ហាក់​បី​ដូច​ជា​រលាយ​ក្នុង​មាត់។

នៅពេលដែលអាំង គួរតែអាំងស្រទាប់ខាងក្រៅបន្តិចប៉ុណ្ណោះ មិនគួរអាំងឆ្អិនពេកនោះទេ ដូច្នេះសាច់​នឹង​លែង​មាន​រស់​ជាតិ​ឆ្ងាញ់។

សាច់គោ Hida

ដោយសារតែត្រូវបានចិញ្ចឹមនៅក្នុងបរិស្ថានធម្មជាតិ ចិញ្ចឹមដោយប្រើទឹកស្អាត ត្រជាក់ និងចំណី​ភាគច្រើនជាចំបើងស្រូវ សាច់គោ Hida មាន​រស​ជាតិ​ឆ្ងាញ់​តាម​បែប​ធម្មជាតិ និងត្រូវបានចាត់ទុក​ជា​ប្រភេទ​សាច់​លំដាប់​ខ្ពស់។

សាច់គោ Maesawa

ត្រូវបានប្រៀបប្រដូចទៅនឹងស្នាដៃសិល្បៈ សាច់គោ Maesawa ធ្លាប់បានយកឈ្នះរង្វាន់ខ្ពស់បំផុតចំនួន​ប្រាំ​មួយ​ដង​ក្នុង​ការ​ប្រកួត​នៅ​ប្រទេស​ជប៉ុន។

ពូជគោប្រភេទនេះត្រូវបានចិញ្ចឹមនៅខេត្ត Iwate មិនត្រឹមតែគុណភាពសាច់ ជាតិខ្លាញ់ និងរស​ជាតិ​សុទ្ធ​តែ​ត្រូវ​បាន​វាយ​តម្លៃ​ថា​មាន​គុណ​ភាព​ខ្ពស់។

ទោះបីជាមានប្រវត្តិចិញ្ចឹមសត្វខ្លីជាងបើប្រៀបធៀបទៅនឹងតំបន់ផ្សេងទៀត ប៉ុន្តែច្បាស់ណាស់នេះជាសមិទ្ធផលដ៏គួរឲ្យកោតសរសើរ ដែលបានមកពីការខិតខំប្រឹងប្រែង ការចិញ្ចឹមសត្វរបស់កសិករ​នៅ​តំបន់​នេះ។

ក្រៅពីប្រភេទសាច់ដែលបានរៀបរាប់ខាងលើ នៅមានប្រភេទសាច់ wagyu ជាច្រើនផ្សេងទៀតដូច​ជា Miyazaki, Saga, Yonezawa, Sendai…។

ក្រៅពីប្រទេសជប៉ុន សាច់គោ wagyu ក៏ត្រូវបានផលិតនៅក្នុងប្រទេសមួយចំនួនទៀតផងដែរ។

ចាប់តាំងពីទសវត្សរ៍ឆ្នាំ ១៩៩០ អំប្រ៊ីយ៉ុងគោ wagyu ត្រូវបានបញ្ជូនទៅប្រទេសអូស្ត្រាលីតាម​រយៈ​សហរដ្ឋ​អាមេរិក។

ទោះបីជាមានហ្សែនដូចគ្នាក៏ដោយ ប៉ុន្តែដោយសារបរិស្ថាន និងវិធីសាស្រ្តចិញ្ចឹមមានភាពខុសគ្នា ដូច្នេះ​គុណ​ភាព និងរសជាតិនៅតែខុសគ្នាយ៉ាងច្បាស់។

ហើយចុងក្រោយ គឺជាគន្លឹះដ៏មានប្រយោជន៍មួយចំនួនសម្រាប់ប្រិយមិត្តទាំងអស់គ្នាដែលចូលចិត្តទទួលទានសាច់គោ wagyu ។

នៅប្រទេសជប៉ុនបរិមាណគោ wagyu ដែល​ត្រូវ​បាន​អនុញ្ញាត​នាំ​ចេញ​ពី​ជា​រៀង​រាល់ឆ្នាំមានកំណត់។

ដូច្នេះហើយ មានសត្វគោជាច្រើនក្បាលត្រូវបានចិញ្ចឹមតាមស្តង់ដារ ប៉ុន្តែមិនត្រូវបានដាក់ស្លាកសញ្ញា​ផ្លូវ​ការ​នោះ​ទេ បន្ទាប់​មក​ត្រូវ​បាន​លក់​នៅ​លើ​ទីផ្សារ​ក្នុង​តម្លៃ​ទាប​ជាង។

ឧទាហរណ៍៖ សាច់គោដែលចិញ្ចឹមតាមស្តង់ដារ Maesawa អាចនឹងត្រូវបានលក់ដោយប្រើឈ្មោះថា Esashi beef, Iwate Minami beef, ឬ Iwate Oshu beef ។

ទោះបីជាមិនមានឈ្មោះយីហោក៏ដោយ ប៉ុន្តែគុណភាពនៅតែមានកម្រិតខ្ពស់ មិនខុសអ្វីពីសាច់ដែល​មាន​ម៉ាក​យីហោ​នោះ​ទេ។

ប្រសិនបើទៅលេងប្រទេសជប៉ុន អ្នកទាំងអស់គ្នាអាចសាកល្បងស្វែងរកប្រភេទទាំងនេះនៅតាម​ហាង yakiniku ក្នុង​តំបន់ ហើយ​រីក​រាយ​ជា​មួយ​នឹង​អាហារ​ដ៏​ឈ្ងុយ​ឆ្ងាញ់។

Abe Kengo