Riku-Ryu” – ជាដៃគូរាំ​ដ៏​ល្អ​ឥត​ខ្ចោះ​ដែល​បាន​យក​ឈ្នះ​មេ​ដាយ​មាស​ក្នុងកីឡា​អូឡាំពិក​រដូវរងា

“Riku-Ryu” – ជា​ដៃ​គូ​រាំដ៏​ល្អ​ឥត​ខ្ចោះ​ដែល​បាន​យក​ឈ្នះ​មេដាយមាស​​ក្នុង​កីឡា​អូឡាំពិក​រដូវរងា។

ថ្មីៗនេះ ក្នុងព្រឹត្តិការណ៍អូឡាំពិករដូវរងាដែលបានប្រារព្ធឡើងនៅទីក្រុង Milan (ប្រទេសអុីតាលី) ការប្រកួតជិះស្គីលើទឹកកកជាគូរួមមាន Miura Riku និង Kihara Ryuichi បានយកឈ្នះមេដាយមាសដ៏អស្ចារ្យ។

អ្នកទាំងពីរត្រូវបានប្រព័ន្ធផ្សព្វផ្សាយជប៉ុនហៅឈ្មោះពួកគេយ៉ាងគួរឲ្យស្រលាញ់ថា “Riku-Ryu” ។ បន្ទាប់ពីទទួលបានជ័យជម្នះ អត្តពលិកទាំងពីរនាក់នេះកាន់តែល្បីឈ្មោះ និងទទួលបានការចាប់អារម្មណ៍យ៉ាងច្រើនពីអ្នកគាំទ្រ។

យើងនឹងស្វែងយល់បន្ថែមអំពីអត្តពលិកទាំងពីរនាក់នេះ និងរឿងរ៉ាវដ៏គួរឲ្យស្រលាញ់របស់ពួកគេតាមរយៈខ្លឹមសារអត្តបទខាងក្រោម។

Riku តែងតែបានបីជានិច្ច

ក្នុងការសម្តែងជិះស្គីលើទឹកកករបស់ពួកគេ មានចលនាលើកបីដៃគូសម្តែង។ ប៉ុន្តែចំពោះ Riku មិនត្រឹមតែក្នុងអំឡុងពេលសម្តែងប៉ុណ្ណោះទេ សូម្បី​តែ​ធម្មតា​នាង​តែង​តែ​ត្រូវ​បាន Ryuichi បីជានិច្ច។

បន្ទាប់ពីការប្រកួតបញ្ចប់ សូម្បីតែនៅពេលដែលឡើងវេទិកាដើម្បីទទួលមេដាយ ទិដ្ឋភាពដែលនាងត្រូវបានលើកបីស្ទើរតែធ្វើឲ្យបេះដូងរបស់ទស្សនិកជន “រំភើប” យ៉ាងខ្លាំង។

ឮថា Riku ងាយនឹងជំពប់ជើងណាស់ ដូច្នេះដើម្បីជៀសវាងរបួស Ryuichi តែងតែបីនាងដូច្នេះ។

សកម្មភាពស្របគ្នាយ៉ាងខ្លាំង

ប្រសិនបើចាប់អារម្មណ៍នឹងឃើញថា Riku និង Ryuichi តែងតែមានកាយវិការស្របគ្នាដ៏គួរឲ្យភ្ញាក់ផ្អើល។ ឧទាហរណ៍ដូចជានៅពេលដែលម្នាក់ប៉ះមេដាយ ម្នាក់​ទៀត​នឹង​ប៉ះ​ក្នុង​ពេល​តែ​​មួយ។ ឬ​​នៅ​​ពេល​​ដែល​​ម្នាក់​​យក​​ដៃ​​ស្ទាប​​សក់ ម្នាក់ទៀតក៏ធ្វើដូចគ្នាដែរ។

ក្នុងការជិះស្គីលើទឹកកក សកម្មភាពស្របគ្នាពិត​ជា​សំខាន់​ខ្លាំង​ណាស់។ ប៉ុន្តែ​ទោះ​បី​ជា​ពួក​គេ​មិនសម្តែង​ក៏​ដោយ កម្រិត​សកម្មភាព “sync” របស់​ពួក​គេ​នៅ​តែ​ធ្វើ​ឲ្យ​អ្នក​ទាំង​អស់​គ្នា​ភ្ញាក់​ផ្អើល។

អំឡុងពេលសម្តែង នៅពេលដែលបំបែកគ្នាបង្វិល ល្បឿនបង្វិលរបស់ពួកគេដូចគ្នាបេះបិទ ចំណុច​នេះ​បាន​រួម​ចំណែក​ជួយ​ឲ្យ​ពួក​គេ​ទទួល​បាន​ពិន្ទុ​ខ្ពស់។

សកម្មភាពស្របគ្នាបែបនេះមិនអាចធ្វើបាននោះទេប្រសិនបើមិនមានទំនាក់ទំនងយូរអង្វែង។

យកឈ្នះបរាជ័យ

ក្នុងការប្រកួតជិះស្គីលើទឹកកកជាគូ អត្តពលិកនឹងសម្តែងវិញ្ញាសាចំនួនពីររួមមាន៖ ការសម្តែងខ្លី (SP) និងការសម្តែងសេរី (FS) ពិន្ទុសរុបទាំងពីរលើកនឹងកំណត់ចំណាត់ថ្នាក់។

ក្នុងអំឡុងពេលសម្តែងខ្លី Riku-Ryu បានធ្វើខុស ដូច្នេះឱកាសឡើងវេទិកាហាក់បីដូចជាបានរលាយបាត់ទៅហើយ។

Riku បានយំព្រោះតែសម្ពាធ និងអារម្មណ៍សោកស្ដាយ។ នៅពេលនោះ Ryuichi បានឱបនាងយ៉ាង​ណែន ហើយ​ព្យាយាម​លួង​លោម​នាង។

ដូច្នេះហើយ Riku បានពង្រឹងស្មារតីឡើងវិញ ហើយពួកគេបានបញ្ចប់ការសម្តែង FS យ៉ាងល្អឥតខ្ចោះ។

ប្រហែលជាដោយសារតែការលើកទឹកចិត្តនោះហើយដែលបានជួយឲ្យពួកគេសម្រេចបាននូវអព្ភូតហេតុ​នេះ។

សកម្មភាពតូចៗពោរពេញដោយក្តីស្រលាញ់

នៅពេលដែលទទួលទានអាហារជាមួយគ្នា ប្រសិនបើមើលឃើញមាត់របស់ភាគីជាប់អាហារ ម្នាក់ទៀតនឹងជូតចេញ។ មិនត្រឹមតែប៉ុណ្ណឹង ពួក​គេ​ទាំង​ពីរ​តែង​តែ​បង្ហាញ​ខ្លួនជា​មួយ​នឹង​ស្នាមញញឹម​យ៉ាង​ស្រស់​នៅ​លើ​មុខ។

ដោយសារតែចំណុចដ៏គួរឲ្យស្រលាញ់ និងភាពរួសរាយរាក់ទាក់ទាំងនេះក្នុងជីវិតប្រចាំថ្ងៃ ដែលបាន​ជួយ​ធ្វើ​ឲ្យ Riku-Ryu ទទួល​បាន​ការ​ចាប់​អារម្មណ៍ និងការស្រលាញ់គាំទ្រពីសាធារណជន។

ទោះបីជាពួកគេចុះសម្រុងគ្នាយ៉ាងណាក៏ដោយ នៅពេលខ្លះពួកគេក៏ខ្វែងគំនិតគ្នាដែរ។ ប៉ុន្តែសម្រាប់​មនុស្ស​នៅ​ជុំវិញ ភាពតានតឹងរបស់ពួកគេមិនខុសអ្វីពី “ប្តីប្រពន្ធឈ្លោះប្រកែកគ្នា” នោះទេ – ប៉ុន្មាន​នាទី​មុន​ខឹង ប៉ុន្មាន​នាទី​ក្រោយ​ត្រូវ​គ្នា។

បន្ទាប់ពីនិយាយរឿងក្នុងចិត្ត អ្នក​ទាំង​ពីរ​​ផ្សះផ្សា​គ្នា​យ៉ាង​ឆាប់​រហ័ស ហើយស្និទ្ធស្នាលគ្នាឡើងវិញ។

តើ Riku-Ryu ជាគូស្នេហ៍ដែលកំពុងស្រលាញ់គ្នាមែនទេ?

នៅប្រទេសជប៉ុន ទំនាក់ទំនងស្នេហាច្រើនតែត្រូវបានរក្សាសម្ងាត់ ហើយការដែលមិនសាកសួរស៊ីជម្រៅពេកក៏ជាសុជីវធម៌ផងដែរ។

ក្នុងពិភពអ្នកសម្តែងស្គីលើទឹកកក មានដៃគូជាច្រើនកំពុងស្រលាញ់គ្នា ឬខ្លះទៀតជាប្តីប្រពន្ធ។

ដោយឡែកចំពោះ Riku- Ryu មិន​ថា​ភាព​ស៊ី​សង្វាក់​គ្នា​នៅ​លើ​ឆាក និង​សកម្មភាព​ស្និទ្ធ​ស្នាល​ក្នុងជីវិត​ប្រចាំ​ថ្ងៃ ជៀស​មិន​ផុត​ទេ​ដែល​មនុស្ស​ជា​ច្រើន​សួរ​ថា តើពួកគេកំពុង​ស្រលាញ់​គ្នាមែនទេ?

យោងតាមការចេញផ្សាយពីប្រព័ន្ធផ្សព្វផ្សាយអាមេរិក ទោះបីជាបានបង្ហាញពីភាពស្និទ្ធស្នាលគ្នាយ៉ាង​ណា ប៉ុន្តែ Riku-Ryu មិន​មែន​ជា​គូស្នេហ៍ ឬ​ជា​ប្តី​ប្រពន្ធ​នោះ​ទេ។

ពួកគេជាមិត្តរួមក្រុមដែលបានតស៊ូជាមួយគ្នាអស់រយៈពេល ៧ ឆ្នាំ។

មុនពេលប្រកួត ពួកគេតែងតែលេងហ្គេមជាមួយគ្នា ដើម្បីពង្រឹងស្មារតីមុនពេលដែលឡើង​ឆាក។

បច្ចុប្បន្ន Riku មានអាយុ ២៤ ឆ្នាំ ចំណែកឯ Ryuichi មានអាយុ ៣៣ ឆ្នាំ អាយុរបស់អ្នកទាំងពីរខុស​គ្នា ៩ ឆ្នាំ។

តើអនាគតពួកគេអាចនឹងក្លាយជាគូស្នេហ៍ពិតប្រាកដដែរទេ? នេះជាអ្វីដែលគ្មាននរណាម្នាក់អាច​​ទាយ​ដឹង​មុន​នោះ​ទេ។ ប៉ុន្តែក្នុងក្រសែភ្នែករបស់​សាធារណ​ជន និងជាពិសេសអ្នកគាំទ្ររបស់ពួក​គេ ពួក​គេ​គឺ​ជា “គូស្នេហ៍​ដ៏​ល្អ​ឥត​ខ្ចោះ” ។

គំរូគូស្នេហ៍ដ៏ល្អឥតខ្ចោះ

អ្នកអត្ថាធិប្បាយស្គីលើទឹកកកម្នាក់ធ្លាប់បាននិយាយថា៖

– “នេះជាដៃគូរាំដែលអ្នកជិះស្គីលើទឹកកកគ្រប់រូបគួរតែយកតម្រាប់តាម” ។

ប៉ុន្តែមិនត្រឹមតែប៉ុណ្ណឹង ខ្ញុំផ្ទាល់គិតថាពួកគេក៏ជាគំរូសម្រាប់គូស្នេហ៍ និងប្តីប្រពន្ធនៅលើពិភព​លោក​ផង​ដែរ។

ការឈ្នះមេដាយមាស​នៅ​កីឡា​អូឡាំពិក​មិន​មែន​ជា​រឿង​ងាយ​ស្រួល​នោះ​ទេ។ ការ​ដែល​សម្រេចបាន​ជ័យ​ជម្នះ​​ដូច​សព្វ​ថ្ងៃ​នេះគឺជាដំណើរការនៃការខិតខំប្រឹងប្រែង ហ្វឹកហាត់យ៉ាងលំបាក។ ក្នុងអំឡុង​ពេល​ហ្វឹក​ហាត់ ប្រឈម​មុខ​នឹង​សម្ពាធ​យ៉ាង​ខ្លាំង ខ្ញុំប្រាកដ​ថា ពួក​គេ​អាច​នឹងមិនចុះសម្រុងជាច្រើនដង។ ប៉ុន្តែការយកឈ្នះលើឧបសគ្គទាំងអស់ ពួក​គេ​បាន​រក្សា​ទំនាក់​ទំនង​ដ៏ល្អនោះ ហើយ​រួម​គ្នា​បង្កើត​អព្ភូត​ហេតុ​ទាំង​នេះ។

ជាថ្មីម្តងទៀត ខ្ញុំសូមអបអរសាទរដោយស្មោះចំពោះជ័យជម្នះដ៏គួរឲ្យមានមោទនភាពរបស់អ្នកទាំង​ពីរ។

ជាគំរូដ៏ល្អដែលគួរតែទទួលបានការកោតសរសើរ ហើយក៏ជាកម្លាំងចិត្តសម្រាប់មនុស្ស​ជា​ច្រើនដែល​កំពុង​ខិត​ខំ​ក្នុង​ជីវិត​ដើម្បី​សម្រេច​ក្តី​ស្រមៃ។

Abe Kengo