ស្វែង​យល់​អំពី​ឧបករណ៍​ដែល ninja បាន​ប្រើ​ប្រាស់

ស្វែង​យល់​អំពី​ឧបករណ៍​ដែល ninja បាន​ប្រើ​ប្រាស់។

ក្នុងសម័យបច្ចុប្បន្ននេះ ដោយសារតែទទួលឥទ្ធិពលពីរឿងគំនូរជីវចល anime និងភាពយន្ត ninja តែង​តែ​ត្រូវ​បាន​គេ​ស្រមៃ​គិត​ថា​ដូច​ជា​វីរបុរស​ដ៏​ក្លាហាន។

សូម្បីតែនៅសហរដ្ឋអាមេរិក ធ្លាប់មានករណីដ៏កម្រមួយកើតឡើង ប្រព័ន្ធប្រកាសអាសន្នបន្លឺឡើង​​នៅ​ពេលដែលទទួលបានដំណឹងថា “ninja បង្ហាញខ្លួន” ហើយប្រជាជនទាំងអស់ត្រូវជម្លៀសចេញ​ពី​ផ្ទះ។

ប៉ុន្តែតាមពិតទៅ…

ពួកគេគ្រាន់តែជាមនុស្សធម្មតាប៉ុណ្ណោះ មិន​អាច​ធ្វើ​រឿង​ដែល​អស្ចារ្យ​នោះ​ទេ។ ម្យ៉ាង​វិញ​​ទៀត ជាមូល​ដ្ឋាន ninja គឺ​ជា​ចារកម្ម ដូច្នេះ​មិន​អាច​ប្រើជំនាញពិសេស ឬក្បាច់ដែលអស្ចារ្យពេក​ឡើយ។

ពិតជាគួរឲ្យសោកស្ដាយណាស់ សម្រាប់អ្នកដែលតែងតែចូលចិត្ត “ninja” ប្រហែលជាធ្វើឲ្យអ្នកទាំង​អស់​គ្នា​ខក​ចិត្ត​ហើយ។

ក្នុងខ្លឹមសារអត្តបទថ្ងៃនេះ យើងខ្ញុំសូមណែនាំឧបករណ៍ចំនួនប្រាំមួយដែល ninja បានប្រើប្រាស់។

មិនមានអ្វីពិសេសពេកនោះទេ ដូច្នេះសង្ឃឹមថាប្រិយមិត្តកុំរំពឹងទុកខ្ពស់ពេក។

ឧបករណ៍ទីមួយ៖ 打竹 (Uchitake) – បំពង់ឬស្សីបញ្ឆេះភ្លើង

នៅ​ខាងក្នុង​បំពង់​ឫស្សី​គេ​ហៅថា uchitake មានផ្ទុកថ្មសម្រាប់បង្កាត់ភ្លើង ដែកថែបបង្កាត់ភ្លើង និង​​ប្រឆេះ​​ចង្កៀង។

ទោះបីជាស្តាប់ទៅដូចជារបស់របរមានប្រយោជន៍សម្រាប់ការបោះជំរុំខាងក្រៅក៏ដោយ ប៉ុន្តែប្រសិន​​បើ​ត្រូវ​បាន​ប្រើ​ដោយ ninja របស់របរទាំងនោះបែរជាអាចបង្កគ្រោះថ្នាក់ទៅវិញ។ ព្រោះភ្លើង​ដែល​ត្រូវ​បាន​បង្កាត់​ចេញពីឧបករណ៍នេះអាចប្រើសម្រាប់បញ្ឆេះម្សៅកាំភ្លើង ឬដុតផ្ទះរបស់ភាគី។

ឧបករណ៍ទីពីរ៖ 三尺手拭 (3 shaku tenugui) – កន្សែង tenugui ប្រវែង ៣ shaku

“Shaku” គឺជាឯកតាប្រវែងរបស់ជប៉ុនកាលពីសម័យបុរាណ។ ប្រវែង ៣ shaku បើគិតតាមរង្វាស់ឯកតា​សព្វ​ថ្ងៃ​ស្មើ​នឹង ៩០,៩ សង់ទីម៉ែត្រ។

នេះគ្រាន់តែជាកន្សែងក្រណាត់ធម្មតាមួយប៉ុណ្ណោះ ដូចជាកន្សែងជូតមុខ ឬក្រណាត់​លាង​សម្អាត​ជា​ដើម។

អាចស្តាប់ទៅគួរឲ្យធុញ ប៉ុន្តែសម្រាប់ ninja នេះជាកន្សែងដែលមានប្រយោជន៍បំផុត។

ជាក់ស្តែង កន្សែងនេះអាចប្រើសម្រាប់បិទបាំងមុខ រុំរបួស រឹតកសត្រូវ ប្រើជំនួសខ្សែពួរ តម្រងទឹកកខ្វក់សម្រាប់ផឹក ខ្ចប់ថ្មសម្រាប់ធ្វើជាអាវុធ ឬធ្វើឲ្យសើមហើយវាយទៅនឹងអ្វីមួយដើម្បីបង្កើត​ជា​សំឡេង។

បើប្រៀបទៅនឹងការរំពឹងទុក សម្រាប់ ninja នេះជារបស់ដែលមានមុខងារច្រើន និងជាសម្ភារៈប្រើ​ប្រាស់​ដ៏​មាន​ប្រយោជន៍។

ឧបករណ៍ទីបី៖ 石筆 (Ishifude) – ប៊ិចថ្ម

“ប៊ិចថ្ម” ជាប្រភេទឧបករណ៍សរសេរ ឬសម្រាប់សម្គាល់មួយប្រភេទដែលផលិតចេញពីថ្មសិលាកម្ទេច​កំណរ​ទន់។ ជាទូទៅមានទម្រង់ជាបន្ទះវែង រាងស៊ីឡាំង ឬរាបស្មើអាស្រ័យលើគោលបំណងប្រើ​ប្រាស់។

និយាយ​ឲ្យ​សាមញ្ញ​ទៅប៊ិចថ្មមាន​រូបរាង និង​ពណ៌​ស្រដៀង​ទៅនឹងដីសដែលសរសេរលើ​ក្ដារខៀននៅ​តាម​ថ្នាក់​រៀន​នា​សម័យ​នេះ​ដែរ។ ហើយលក្ខណៈសម្បត្តិ​​មាន​ភាព​ស្រដៀង​គ្នា អាច​លុប​ចេញ​បាន​​បន្ទាប់​​ពី​​សរសេរ។

Ninja អាចប្រើរបស់នេះសម្រាប់ទុកសារប្រាប់មិត្តរួមក្រុម អ្នកចុងក្រោយ​នឹង​លុប​សារ​ទាំង​នោះដើម្បី​បិទ​បាំង​ដាន។ ពិត​ជា​ស័ក្តិ​សម​បំផុត​សម្រាប់​សកម្មភាព​ចារកម្ម។

ឧបករណ៍ទីបួន៖ 鈎縄 (Kaginawa) – ខ្សែទំពក់

នៅទីបំផុតក៏មានឧបករណ៍មួយដែលស័ក្តិសមសម្រាប់ ninja ដែរហើយ។

នេះជាខ្សែបន្លាវែងដែល​មាន​ទំពក់​ដែក​ភ្ជាប់​នៅខាងចុងខ្សែ។

ខ្ញុំគិតថា ប្រហែលជាប្រិយមិត្តធ្លាប់បានឃើញខ្សែប្រភេទនេះ ដែលជាទូទៅយើងតែងតែមើលឃើញ​ក្នុង​ខ្សែ​ភាព​យន្ត​សកម្មភាព។

ដោយរួមបញ្ចូលគ្នារវាងខ្សែពួរ សរសៃរបន្លា និងក្បាលទំពក់ដែក ខ្សែប្រភេទនេះមានប្រយោជន៍សម្រាប់​ឡើង​ជញ្ជាំង ឡើង​ដើម​ឈើ រុំយកអាវុធរបស់ភាគី ឬគប់ភាគីដែលប្រៀបបីដូចជាអាវុធ។

ឧបករណ៍ទីប្រាំ៖ 忍薬 (Shinobigusuri) – ថ្នាំរបស់ ninja

ថ្នាំរបស់ ninja ត្រង់ចំណុចនេះមិនមែនជាថ្នាំដែល ninja ធ្វើ ឬប្រភេទថ្នាំពិសេសណាមួយឡើយ។ នោះ​គ្រាន់​តែ​ជា​ប្រភេទ​ថ្នាំ​ធម្មតា និងអាហារដែលត្រូវបាន ninja យក​តាម​ខ្លួន​ប៉ុណ្ណោះ។

ជាក់ស្តែងគឺថ្នាំដែលបញ្ឈប់ការហូរឈាម ថ្នាំបន្សាបជាតិពុល ថ្នាំក្រពះ និងស្បៀងអាហារយកតាមខ្លួន​ទុក​សម្រាប់​ករណី​ត្រូវ​លាក់​ខ្លួន ឬ​ចាំ​វាយ​ឆ្មក់​ក្នុង​​រយៈ​​ពេល​​យូរ ដោយ​មិន​អាច​ចេញ​ទៅ​ក្រៅបាន។

ទោះជាយ៉ាងណា នៅពេលខ្លះ ninja ក៏យកថ្នាំពុលតាមដែរ ដើម្បីបំពុលសត្រូវក្នុងស្ថានភាពមួយចំនួន។

ឧបករណ៍ទីប្រាំមួយ៖ 編笠 (Amigasa) – មួកត្បាញ

Amigasa គឺជាប្រភេទមួកប្រពៃណីជប៉ុន ដោយធ្វើឡើងតាមរយៈការត្បាញស្មៅស្ងួត ចំបើង ឬឫស្សីតូច។ មួក​ត្បាញ​នេះ​មាន​រាង​ស្រដៀង​គ្នា​ទៅ​នឹង​មួក​ស្លឹក​ត្នោត​របស់​កម្ពុជា​ដែរ ដូច្នេះក៏អាច​ហៅ​មួក​ត្បាញ​ថា “មួក​ស្លឹក​របស់​ជប៉ុន” ផង​ដែរ។

និយាយពីមុខងារ មិនត្រឹមតែប្រើសម្រាប់ពាក់ប៉ុណ្ណោះទេ មួកត្បាញត្រូវបានរចនាឡើងជាពិសេស​សម្រាប់​បិទ​បាំង​មុខ ក្រៅពីនេះថែមទាំងអាចប្រើសម្រាប់ដាក់របស់របរ សម្រាប់អង្គុយ និង​ធ្វើ​ជា​ខ្នើយ​ផង​ដែរ

ប្រហែលជាប្រិយមិត្តឆ្ងល់ថា ហេតុអ្វីបានជាមិនមានដាវ ឬព្រួញសម្រាប់គប់ក្នុងបញ្ជីឧបករណ៍ទាំង​នេះ ព្រោះ​ព្រួញ​សម្រាប់​គប់​ត្រូវ​បាន​គេ​ចាត់ទុក​ជា​​ប្រភេទ​​អាវុធ​​ដែល​​ផ្សារ​ភ្ជាប់​នឹង​រូបភាពរបស់ ninja ។

តាមពិតទៅ ninja យកដាវ និងព្រួញសម្រាប់គប់តាមនៅពេលដែលគិតទុកមុនថាមានការប្រយុទ្ធជាមួយសត្រូវប៉ុណ្ណោះ។ ដែល​ជា​ទូទៅ​យក​តែ​របស់​របរ​ទាំង​ប្រាំ​មួយ​មុខ​ខាង​លើ​ជា​ចម្បងប៉ុណ្ណោះ។

លើកលែងតែថ្នាំពុល ក្រៅពីនេះរបស់របរផ្សេងទៀតដែល ninja ប្រើប្រាស់ ក្នុងចំណោមនោះសុទ្ធ​តែ​អាច​រក​ទិញបានយ៉ាងងាយនៅតាមដងផ្លូវ។ ផ្ទុយ​ទៅ​វិញ ninja បែរជាប្រើប្រាស់របស់​របរ​ធម្មតា​ទាំង​​នោះ​សម្រាប់​បំពេញ​បេសកកម្ម​របស់​ខ្លួន​ទៅវិញ។

ប្រហែលជាដោយសារតែ ninja មួយរូបមានលក្ខណៈសាមញ្ញពេកហើយ ហើយដោយសារតែ “លក្ខណៈ​សាមញ្ញ” នេះ នៅពេលដែលត្រូវបានផលិតឡើងវិញក្នុងសិល្បៈ និងជាពិសេសក្នុងខ្សែភាព​យន្ត ទើបគេបន្ថែមចំណុចជាច្រើនដើម្បី​ធ្វើ​ឲ្យរូបភាព​របស់ ninja កាន់​តែ​លេច​ធ្លោ និង​បន្សល់​ទុក​នូវ​​ចំណាប់​​អារម្មណ៍​​ក្នុង​​ចិត្ត​​ទស្សនិក​​ជន។

Abe Kengo