មេរៀនជីវិតដែលដកស្រង់ចេញពីការបង្កើតហ្គេម Super Mario Brothers

មេរៀនជីវិតដែលដកស្រង់ចេញពីការបង្កើតហ្គេម Super Mario Brothers ។

Super Mario Brothers – ឬយើងហៅកាត់ថា Game Mario – គឺជា​ហ្គេម​វីដេអូ​ដ៏​ល្បី​ឈ្មោះរបស់​ក្រុមហ៊ុន Nintendo ។

នៅក្នុងហ្គេមនេះ តួអង្គសំខាន់គឺ Mario – ជាបុរសម្នាក់ដែលស្លៀកពាក់ឈុតពណ៌ក្រហមទៅ​ជួយ​សង្គ្រោះ​ព្រះ​នាង។ អំឡុងពេលធ្វើដំណើរ ដើម្បី​ជួយ​សង្គ្រោះ​ព្រះ​នាង តួអង្គ Mario ត្រូវឆ្លងកាត់​ឧបសគ្គ កម្ចាត់សត្វចម្លែក ប្រមូលយកកាក់មាស និងសុីផ្សិតដើម្បីបង្កើនកម្លាំង។ ទោះ​បីជា​អ្នក​មិន​ធ្លាប់​លេង​ហ្គេម​នេះ​ក៏​ដោយ ខ្ញុំ​ប្រាកដ​ថា​មាន​មនុស្ស​ជា​ច្រើន​ស្គាល់​ហ្គេម​ដ៏​​ល្បី​​នេះ។

Game Mario គឺជា series ហ្គេមដែលមានច្រើនកំណែ ប៉ុន្តែកំណែដែលលក់ដាច់បំផុតគឺកំណែដំបូង។

នៅប្រទេសជប៉ុន កំណែនេះត្រូវបានដាក់សម្រាប់ឧបករណ៍ដែលមានឈ្មោះថា Family Computer (កំណែអន្តរជាតិ៖ NES) ជាមួយនឹងការលក់សរុបចំនួន ៤០.០២៤.០០០ ច្បាប់។ 

ហ្គេមចេញផ្សាយនៅឆ្នាំ ១៩៨៣ នៅពេលដែលដំណើរការម៉ាស៊ីនហ្គេមមានកម្រិតនៅឡើយ។ ក្នុងលក្ខខណ្ឌ​មាន​កម្រិត​បែប​នេះ​បែរ​ជា​អាច​បង្កើត​បាន​ហ្គេម​ដ៏​ល្បី​ឈ្មោះ ពិតជាអស្ចារ្យណាស់។

ចូរយើងមកស្វែងយល់អំពីបច្ចេកទេស​ដ៏​លេចធ្លោរបស់ហ្គេម​តាម​រយៈ​ខ្លឹម​សារ​អត្តបទ​ខាងក្រោមទាំង​អស់​គ្នា។

ចំណុចដំបូងដែលត្រូវលើកឡើងគឺសមត្ថភាពដែលអាចផ្ទុកបាន។

ហ្គេម Mario ប្រើប្រាស់ទំហំត្រឹមតែ ៤០KB ប៉ុណ្ណោះ។

មនុស្សជាច្រើនប្រហែលជាមិនសូវស្គាល់ឯកតា KB នោះទេ។ និយាយឲ្យសាមញ្ញ រូបថតមួយសន្លឹកដែលថតដោយស្មាតហ្វូនទំនើបសព្វថ្ងៃ (អាស្រ័យ​លើ​ទូរស័ព្ទ) មាន​ទំហំ​ជា​មធ្យម​ប្រហែល ២MB ក្នុង​មួយ​រូប​ភាព។

ខណៈពេលដែល ២MB ស្មើនឹង ២.០៤៨KB ។

ដែលមានន័យថា ហ្គេមដ៏ល្បីនេះត្រូវបានបង្កើតឡើងដោយប្រើទំហំត្រឹមតែ ១/៥០ នៃរូបថតមួយសន្លឹក​ដែល​យើង​ថត​ប៉ុណ្ណោះ។

បន្ទាប់មកគឺការរចនាឆ្លាតវៃដើម្បីសន្សំសំចៃទិន្នន័យ។

តួអង្គ Mario ត្រូវបានរចនាឡើងពាក់មួកពណ៌ក្រហម អៀមខោជើងវែង និងអាវពណ៌ក្រហម ដោយ​មើល​ទៅ​ងាយ​ស្រួល​កត់​សម្គាល់​ព្រោះ​ពណ៌​តែ​មួយ។

ក្រៅពីនេះ ពពក និងភ្នំនៅផ្ទៃខាងក្រោយ តាមពិតទៅគឺជារូបភាពតែមួយដែលត្រូវបានប្តូរពណ៌ ហើយ​ប្រើ​ឡើង​វិញ។

បច្ចេកទេសប្រើប្រាស់ឡើងវិញទាំងនេះត្រូវបានយកមកអនុវត្តជាច្រើនដង ប៉ុន្តែអ្នកលេងមិនដឹង​នោះ​ទេ។

ឥទ្ធិពលសំឡេងក៏ដូចគ្នាដែរ។

សំឡេងនៅពេលដែល Mario កាន់តែធំឡើង និងនៅពេលដែលត្រូវអ្វីម្យ៉ាងហើយរួញតូច មានសំឡេង​ដូច​គ្នា​បេះ​បិទ​ទៅ​នឹង​សំឡេង​នៅ​ពេល​ដែល​ដើរ​ចូល និងធ្វើចលនាក្នុងបំពង់។

មានសំឡេងមួយចំនួនគ្រាន់តែផ្លាស់ប្តូរល្បឿនគឺបង្កើតបានជាអារម្មណ៍ខុសគ្នាទៅហើយ។

Mario គឺជាហ្គេមដែលពិបាកទៅដល់ទីខ្លាំងណាស់ ប៉ុន្តែប្រហែលជាអ្នកដែលចំណាយពេលច្រើនបំផុតគឺជាក្រុមអភិវឌ្ឍហ្គេម។

អ្វីដែលគួរឲ្យភ្ញាក់ផ្អើលជាងនេះទៅទៀតនោះគឺថា ទោះបីជាគ្មានការណែនាំអ្វីទាំងអស់ក៏ដោយ ប៉ុន្តែ​នរណា​ក៏​ដឹង​ពី​របៀប​លេងដែរ។

ហ្គេមចាប់ផ្តើមនៅកម្រិត ១-១ ។

ម៉ាសុីនលេងហ្គេមនៅសម័យនោះមានតែប៊ូតុងស្វែងរកទិស​សញ្ញាបូកមួយ ប៊ូតុង A ចំនួនពីរ និង B ប៉ុណ្ណោះ។

សព្វថ្ងៃនេះ ជាទូទៅនៅក្នុងហ្គេមតែងតែមានការណែនាំសាច់រឿង និងបង្រៀនលេងហ្គេម ប៉ុន្តែកាលពីមុន ដោយសារតែទំហំផ្ទុកមានកំណត់ ដូច្នេះ​ក្នុង​ហ្គេម Mario មិន​មាន​ចំណុច​ទាំង​នេះឡើយ។

ដូច្នេះហើយ វគ្គ ១-១ ត្រូវបានរចនាឡើងដើម្បីឲ្យអ្នកទាំងអស់គ្នាអាចរៀនពីរបៀបលេងហ្គេមដោយ​ផ្ទាល់។

ចំពោះការរចនារបៀបលេង តួអង្គបង្ហាញខ្លួននៅខាងឆ្វេងអេក្រង់ មុខបែរទៅខាងស្តាំ។ ក្នុងស្ថានភាពបែបនេះគ្រប់គ្នានឹងបញ្ជាតួអង្គទៅខាងស្តាំដោយមិនចាំបាច់គិត។ ហើយបន្ទាប់មកនឹងយល់ភ្លាមៗថា នេះជាហ្គេមដែលផ្តោតលើការផ្លាស់ទីតួអង្គឆ្ពោះទៅមុខ។

បន្ទាប់មក ផ្សិតដែលមានទឹកមុខកាចសាហាវបានបង្ហាញខ្លួន។ គ្រាន់តែឃើញភ្លាមដឹងថានោះជា​សត្រូវ​ទៅ​ហើយ។ ប្រសិនបើបន្ត​ដើរ​ទៅ​មុខ​​បែប​នេះ​នឹង​ប៉ះ​សត្រូវ ដូច្នេះ​ដោយ​មិន​ដឹង​ខ្លួន អ្នកលេង​នឹង​ដឹងថាខ្លួនត្រូវធ្វើអ្វីម្យ៉ាង។

មានប៊ូតុងតែពីរប៉ុណ្ណោះ ដូច្នេះអ្នកនឹងសាកល្បងចុចប៊ូតុងទាំងពីរ។ ហើយនៅទីបំផុតក៏ទទួលបានជោគជ័យ ដែលជួយឲ្យតួអង្គអាចលោតឡើងរំលងសត្រូវ។ ចាប់ពីពេលនេះទៅ អ្នកលេងចាប់​ផ្តើម​រៀន​ពី​របៀប​កម្ចាត់​សត្រូវ។

បន្តទៅមុខទៀត អ្នកនឹងឃើញគូបភ្លឺចែងចាំងដែលមានសញ្ញា “?” នៅលើនោះ។ មនុស្សគ្រប់គ្នានឹងគិតថា ប្រាកដជាមានអ្វីម្យ៉ាងក្នុងនោះ។ ព្រោះតែដឹងពីរបៀបលោត អ្នកលេងនឹងព្យាយាម​លោត​ឡើង​ដើម្បី​ប៉ះ​រូប​គូប​នោះ។ នៅ​ពេល​នោះ មាន​កាក់ ឬ​របស់​របរ​ដូច​ជា​ផ្សិត​ធំ​ចេញ​មក។

ផ្សិតនេះខិតមកជិត ប៉ុន្តែមើលទៅមិនគួរឲ្យខ្លាចដូចផ្សិតមុនៗទេ ដូច្នេះអ្នកលេងនឹងសន្មត​ថា​វា​មិន​មែនជាសត្រូវនោះទេ ដូច្នេះមិនចាំបាច់ព្យាយាមរំលងឡើយ។ ហើយជាការពិតណាស់ នៅ​ពេល​ដែល​ប៉ះ​ផ្សិត​នោះ កម្លាំង​របស់ Mario ស្រាប់​តែ​កើន​ឡើង។

ដូច្នេះ ដោយគ្រាន់តែលេងវគ្គ ១-១ អ្នកលេងនឹងយល់ពីរបៀបលេងមូលដ្ឋានដោយមិនចាំបាច់មានការពន្យល់អ្វីឡើយ។

នៅសម័យនោះ ប្រសិនបើម៉ាស៊ីនហ្គេមខ្លាំងល្មម ប្រហែលជាពួកគេ – ក្រុមអ្នកផលិត – មិនចាំ​បាច់​គិត​ច្រើន​ដល់​ថ្នាក់​នេះ​នោះ​ទេ។

ប៉ុន្តែដោយសារតែដែនកំណត់ទាំងនោះហើយ ដែលជាការផ្តួចផ្តើមនូវគំនិតថ្មីៗ ហើយធ្វើឲ្យហ្គេមនេះក្លាយ​ជា​ហ្គេម​ដែល​ពេញ​និយម​មានអ្នកចូល​ចិត្ត​ច្រើន។

➡️មេរៀនជីវិត៖

សារនេះសូមផ្ញើទៅកាន់ប្រិយមិត្តដែលកំពុងមានអារម្មណ៍បាក់ទឹកចិត្តក្នុងជីវិតដោយសារតែការលំបាក និងបញ្ហា។

ជីវិតពោរពេញដោយកង្វល់ ហើយពេលខ្លះគ្រប់យ៉ាងមិនដូចបំណង។ ប៉ុន្តែមិនថាយើងព្រួយបារម្ភ ឬត្អូញត្អែរប៉ុណ្ណាទេ ក៏មិនអាចផ្លាស់ប្តូរអ្វីបានដែរ។ អ្វីដែលត្រូវពិចារណាគឺថា អំឡុងពេលដ៏លំបាកបែប​នេះ តើ​យើង​អាច​ធ្វើ​អ្វី​បាន?

ប្រហែលជា Super Mario Brothers គឺជាឧទាហរណ៍ដ៏សំខាន់មួយដែលជួយឲ្យយើងយល់អំពីសារនេះ។ ផ្លាស់ប្តូរជីវិតតាមរយៈការគិតអំពីអ្វីដែលអ្នកអាចធ្វើបាននៅពេលប្រឈមមុខនឹងដែនកំណត់។

សូម​កុំ​ភ្លេច​ថា “ដែក​ត្រូវ​បាន​លត់​នៅ​ក្នុង​ភ្លើង” – សម្ពាធ​កាន់​តែ​ច្រើន កាន់​តែ​រីក​ចម្រើន។ បើប្រៀប​ធៀប​ទៅ​នឹង​ផ្លូវ​ដែល​រលូន ការ​លំបាក និង​​​បញ្ហា​​​ប្រឈម​​គឺ​​ជា​​ឱកាស​​សម្រាប់​អ្នករីក​ចម្រើន​ជាង​អ្នក​ដទៃ។

Abe Kengo