របៀបដែលជនជាតិជប៉ុនតបតដោយភាពស្ងៀមស្ងាត់

ថ្ងៃសុក្រ 09/01/2026 | 17:58 ល្ងាច

របៀបដែលជនជាតិជប៉ុនតបតដោយភាពស្ងៀមស្ងាត់។

ប្រជាជនជប៉ុនត្រូវបានគេស្គាល់ថាធម្មតាជាមនុស្សសុភាពរាបសារ។ ប៉ុន្តែតើប្រិយមិត្តដឹងទេថា ដើម្បីតបតទៅនឹងអ្នកដែលមិនគោរពបទប្បញ្ញត្តិ ច្បាប់ទម្លាប់ ពួកគេអាចនឹងក្លាយជាមនុស្សដែលសោះកក្រោះគួរឲ្យខ្លាចដែរទេ?

ឧទាហរណ៍ដូចជានៅលើរថភ្លើងនៅជប៉ុន ជាកន្លែងដែលធម្មតាត្រូវបានរក្សាភាពស្ងៀមស្ងាត់ ប្រសិនបើមានជនបរទេសនិយាយទូរស័ព្ទខ្លាំងៗ។ ក្នុងករណីបែបនេះ កម្រមានអ្នកបញ្ចេញមតិមិនពេញចិត្តខ្លាំងណាស់ ប៉ុន្តែពួកគេនឹងសម្លឹងមើលម្នាក់នោះដោយក្រសែភ្នែកសោះកក្រោះ មិនចូលចិត្តយ៉ាងខ្លាំង។

ការសម្លឹងមើលបែបនោះបង្កើតបានជាសម្ពាធយ៉ាងខ្លាំង រហូតដល់ថ្នាក់ធ្វើឲ្យភាគីមានអារម្មណ៍ថាមិនអាចនៅទីនោះបន្តទៀត។

នោះហើយជារបៀបដែលជនជាតិជប៉ុនបង្ហាញពីកំហឹងដោយភាពស្ងៀមស្ងាត់។

ប្រិយមិត្តប្រហែលជាគិតថាឲ្យតែកុំខ្វល់ទៅបានហើយ ប៉ុន្តែប្រសិនបើយើងឆ្លងកាត់ផ្ទាល់ អ្នកទាំងអស់គ្នានឹងយល់។ មានអារម្មណ៍ពិបាកទ្រាំ និងសម្ពាធយ៉ាងខ្លាំង ជាបរិយាកាសដែលធ្វើឲ្យអ្នកដទៃចង់ចាកចេញភ្លាមៗ។

យុទ្ធសាស្ត្រនេះក៏កំពុងត្រូវបានប្រើប្រាស់ក្នុងពិភពនយោបាយសព្វថ្ងៃនេះផងដែរ។

បច្ចុប្បន្ននេះ ទំនាក់ទំនងរវាងចិន និងជប៉ុនកាន់តែអាក្រក់ទៅៗ។ រដ្ឋាភិបាលចិនបានចេញសេចក្តីថ្លែងការណ៍រិះគន់ជប៉ុនជាបន្តបន្ទាប់ ផ្សព្វផ្សាយពាក្យចចាមអារ៉ាមដើម្បីបង្កាច់បង្ខូចប្រទេសជប៉ុនគ្រប់ទីកន្លែង។ ទន្ទឹមនឹងនោះ ជប៉ុនតែងតែរក្សាឥរិយាបថស្ងប់ស្ងាត់។

ប្រទេសចិនបានចេញបម្រាមជាបន្តបន្ទាប់លើការនាំចូលអាហារសមុទ្ររបស់ជប៉ុន ដោយអំពាវនាវឲ្យកាត់បន្ថយការធ្វើដំណើរទៅកាន់ប្រទេសជប៉ុន ក្នុងគោលបំណងដាក់សម្ពាធ។

ជាការឆ្លើយតបទៅនឹងសកម្មភាពទាំងនោះ ប្រទេសជប៉ុនមិនបានជំទាស់អ្វីទាំងអស់។

ប្រសិនបើប្រទេសចិនមិននាំចូលនឹងលក់ទៅឲ្យប្រទេសផ្សេងទៀត ប្រសិនបើភ្ញៀវទេសចរណ៍ចិនមិនមកលេងនឹងទទួលស្វាគមន៍ភ្ញៀវទេសចរណ៍ដែលមកពីប្រទេសផ្សេងទៀត។ ជប៉ុនគ្រាន់តែឆ្លើយតបដោយស្ងៀមស្ងាត់តាមរបៀបនេះប៉ុណ្ណោះ។

ប្រទេសចិនក៏បានលើកឡើងពីការហាមឃាត់ការនាំចេញរ៉ែដីកម្រផងដែរ។

រ៉ែដីកម្រគឺជាវត្ថុធាតុដើមដែលមិនអាចខ្វះបានក្នុងឧបករណ៍អេឡិចត្រូនិក ថ្ម ម៉ាស៊ីនជាដើម។

ហើយប្រទេសចិនយល់ឃើញថា ចំណុចនេះនឹងបង្កការខូចខាតយ៉ាងធ្ងន់ធ្ងរដល់វិស័យឧស្សាហកម្មជប៉ុន។

ទោះជាយ៉ាងណា ដោយសារតែប្រទេសចិនធ្លាប់បានដាក់ចេញការហាមឃាត់ស្រដៀងគ្នានេះពីមុនមក ដូច្នេះជប៉ុនបានរៀបចំការឆ្លើយតបអស់រយៈពេលជាង ១០ ឆ្នាំមកហើយ។ វិធានការទប់ទល់ជាក់ស្តែងរួមមានការនាំចូលពីប្រទេសដទៃទៀត និងការអភិវឌ្ឍបច្ចេកវិទ្យាថ្មីដែលមិនត្រូវការប្រើប្រាស់រ៉ែដីកម្រ។ ក្រៅពីនេះ ប្រទេសជប៉ុនក៏កំពុងធ្វើប្រតិបត្តិការរុករករ៉ែដីកម្រក្រោមបាត់សមុទ្រជ្រៅក្នុងដែនទឹករបស់ខ្លួន។

ដោយមិនវាយប្រហារ ឬរិះគន់ភាគីម្ខាងទៀតនោះទេ ជប៉ុនគ្រាន់តែបន្តអ្វីដែលខ្លួនអាចធ្វើបានដោយស្ងៀមស្ងាត់ប៉ុណ្ណោះ។

មិនបិទការសន្ទនានោះទេ តែងតែរក្សាឆន្ទៈក្នុងការទំនាក់ទំនង ហើយក៏មិនមិនត្អូញត្អែរ មិនស្របតាម ឬប្រតិកម្មចំពោះការញុះញង់នោះឡើយ។

អាចនិយាយបានថា នោះជាការដែលមិនអើពើលក្ខណៈទ្រង់ទ្រាយធំ។

ក្នុងបរិបទនោះ អាជីវកម្មជប៉ុនកាន់តែច្រើនឡើងៗកំពុងដកខ្លួនចេញពីប្រទេសចិន។

ជាងនេះទៅទៀត គ្រឿងចក្រសំខាន់ៗសម្រាប់ការផលិតសឺមីកុងឌុចទ័រ – ជាវិស័យដែលជប៉ុនកាន់កាប់ចំណែកទីផ្សារយ៉ាងធំ – គឺជា “សន្លឹកបៀដ៏មានឥទ្ធិពលបំផុត” ។ ប្រសិនបើប្រទេសជប៉ុនហាមឃាត់ការនាំចេញ ឧស្សាហកម្មចិនអាចនឹងរងការខូចខាតយ៉ាងធ្ងន់ធ្ងរ។

យ៉ាងណាមិញ ជប៉ុនមិនបានធ្វើសេចក្ដីថ្លែងការណ៍ណាមួយទាក់ទងនឹងចំណុចនេះនោះទេ។

ទន្ទឹមនឹងនោះ ប្រទេសចិនថែមទាំងប្រើប្រាស់ “ការទូតខ្លាឃ្មុំផេនដា” ដើម្បីដាក់សម្ពាធផងដែរ។

ដូចដែលអ្នកទាំងអស់គ្នាបានដឹងហើយថា ខ្លាឃ្មុំផេនដាជាប្រភេទសត្វពិសេស ដែលមានតែនៅក្នុងប្រទេសចិនប៉ុណ្ណោះ។ ប្រទេសជប៉ុនដាក់តាំងបង្ហាញខ្លាឃ្មុំផេនដាក្នុងសួនសត្វរបស់ខ្លួនក្រោមទម្រង់ខ្ចីពីប្រទេសចិន។

ភាគីចិនបានប្រកាសថា៖

“ការដែលខ្លាឃ្មុំផេនដាបាត់ពីប្រទេសជប៉ុន គឺជាកំហុសរបស់រដ្ឋាភិបាលជប៉ុន!”

ប៉ុន្តែរដ្ឋាភិបាលជប៉ុនមិនឆ្លើយតបអ្វីទាំងអស់។

បើទោះបីជាមានការគំរាមកំហែងជាច្រើនត្រូវបានដាក់ចេញក៏ដោយ រដ្ឋាភិបាលជប៉ុនមិនបានឆ្លើយតបនោះទេ បង្កើតសម្ពាធដោយស្ងៀមស្ងាត់ប៉ុណ្ណោះ។

គ្រាន់តែធ្វើអ្វីដែលខ្លួនយល់ថាត្រូវ ហើយមិនឆ្លើយតបចំពោះការញុះញង់ណាមួយរបស់ភាគីនោះទេ។ តាមរបៀបនេះ ជម្លោះនឹងមិនអាចកើតឡើងបានទេ។

ផ្ទុយទៅវិញ ប្រសិនបើប្រទេសចិនបង្កជម្លោះនឹងអាមេរិក សហរដ្ឋអាមេរិកប្រហែលជាបានចាត់វិធានការឆ្លើយតបយ៉ាងខ្លាំងក្លាទៅហើយ ប៉ុន្តែសម្រាប់ជប៉ុនបែរជាមិនមានប្រតិកម្មអ្វីទាំងអស់។ ហើយប្រហែលជាប្រទេសចិនឥឡូវនេះកំពុងតែមានអារម្មណ៍អន្ទះសារយ៉ាងខ្លាំង ដោយសារតែភាពស្ងៀមស្ងាត់នេះ។

តើស្ថានភាពតានតឹងបច្ចុប្បន្នរវាងជប៉ុន និងចិននឹងទៅជាយ៉ាងណា ហើយតើអ្វីអាចនឹងកើតឡើងនៅពេលអនាគត?

ពេលខ្លះ ភាពស្ងប់ស្ងាត់គឺជាអ្វីដែលគួរឲ្យភ័យខ្លាចបំផុត ហើយនោះជាអ្វីដែលយើងអាចនឹងមើលឃើញតាមរយៈរដ្ឋាភិបាលជប៉ុន និងប្រជាជនជប៉ុន។

មានសុជីវធម៌មិនមានន័យថាមិនចេះខឹងនោះទេ។ ក្នុងជីវិតនេះ យើងម្នាក់ៗសុទ្ធតែមានដែនកំណត់រៀងៗខ្លួន។ ដូច្នេះចូរយើងខិតខំប្រឹងប្រែងរស់នៅជាមួយគ្នាដោយសន្តិភាព ហើយកុំរំលងដែនកំណត់ទាំងនោះ។

Abe Kengo