ការ​អភិវឌ្ឍ​នៃ​សេវាកម្ម​ដឹក​ជញ្ជូន​ដល់​ផ្ទះនៅ​ប្រទេស​ជប៉ុននា​​ពេល​​បច្ចុប្បន្ន និង​អតីត​កាល

ការអភិវឌ្ឍនៃសេវាកម្មដឹកជញ្ជូនដល់ផ្ទះ​នៅ​ប្រទេស​ជប៉ុន​នា​ពេល​បច្ចុប្បន្ន និងអតីត​កាល។

ស្រដៀងនឹងប្រទេសជប៉ុនដែរ បច្ចុប្បន្ននេះ ការទិញទំនិញអនឡាញក៏កំពុងអភិវឌ្ឍយ៉ាងឆាប់រហ័ស​នៅ​ក្នុង​ប្រទេស​កម្ពុជា​ផង​ដែរ។

ចូរយើងក្រឡេកមកមើលប្រព័ន្ធដឹកជញ្ជូនដែលមានការអភិវឌ្ឍខ្ពស់របស់ជប៉ុនតាមរយៈខ្លឹមសារអត្តបទ​ខាង​ក្រោម។

ជាដំបូង ត្រូវនិយាយពីល្បឿនដឹកជញ្ជូនទំនិញពិតជាលឿនមិនគួរឲ្យជឿនោះទេ។

គេហទំព័រលក់ទំនិញអនឡាញសំខាន់ៗនៅក្នុងប្រទេសជប៉ុនគឺ Amazon របស់សហរដ្ឋអាមេរិក និង Rakuten របស់​ជប៉ុន។

ក្រៅពី Hokkaido, Okinawa និងកោះដាច់ស្រយាលមួយចំនួនទៀត តំបន់ផ្សេងទៀតនៅប្រទេស​ជប៉ុន​សុទ្ធ​តែ​សម្រេច​បាន​ល្បឿន​នេះ។

ជាទូទៅ កញ្ចប់ទំនិញនឹងទៅដល់កន្លែងក្នុងរយៈពេលយ៉ាងយូរ ៣ ថ្ងៃ។

ដើម្បីធ្វើបានដូច្នេះ ពួកគេបានសាងសង់មជ្ឈមណ្ឌលគ្រប់គ្រងធនធាននៅទូទាំងប្រទេស​ជប៉ុន។

មិនត្រឹមតែប៉ុណ្ណឹង អ្វីដែលកាន់តែពិសេសជាងនេះទៅទៀតត្រង់ថា អាចកំណត់ពេលវេលាដឹកជញ្ជូន​ទំនិញ​លម្អិត រួមទាំងកាលបរិច្ឆេទ។ អតិថិជនអាចកំណត់ពេលវេលាដឹកជញ្ជូនក្នុងរយៈពេល ២-៣ ម៉ោង (ចាប់​ពី​ម៉ោង​ប៉ុន្មាន​ដល់​ម៉ោង​ប៉ុន្មាន)។

ម្យ៉ាងវិញទៀត ការចំណាយពេលវេលានៅផ្ទះដើម្បីរង់ចាំទទួលទំនិញត្រូវបានកាត់បន្ថយ។

ប្រសិនបើអតិថិជនទិញមិនអាចទទួលទំនិញ បុគ្គលិកដឹកជញ្ជូននឹងទុកក្រដាសជូនដំណឹង។

គ្រាន់តែទូរស័ព្ទ ឬចូលទៅកាន់ URL ដែលកត់ចំណាំនៅលើនោះ ដើម្បីកំណត់ពេលវេលាដឹកជញ្ជូន​ទំនិញ​ឡើង​វិញ​បាន​យ៉ាង​ងាយ​ស្រួល។

ទម្រង់នៃការទទួលទំនិញក៏មានភាពបត់បែនផងដែរ។

អតិថិជនអាចស្នើឲ្យបុគ្គលិកដឹកជញ្ជូនទុកកញ្ចប់ទំនិញនៅមុខផ្ទះ។ ម្យ៉ាងវិញទៀត អាចកំណត់ការទទួលទំនិញនៅហាងលក់ទំនិញដែលនៅក្បែរនោះ។

នៅពេលនេះ ការដែលទៅកាន់ហាងដើម្បីទិញទំនិញដោយផ្ទាល់លែងចាំបាច់ទៀតហើយ ដូច្នេះជីវិត​កាន់​តែ​មាន​ភាព​ងាយ​ស្រួល។

ដូច្នេះតើប្រទេសជប៉ុនកាលពីអតីតកាលមានលក្ខណៈបែបណា?

ប្រហែលជា ២០០ ឆ្នាំមុន នៅសម័យ Edo ជាសម័យកាលដែលនៅមានវត្តមានរបស់សាមូរ៉ៃ ការ​ដឹក​ជញ្ជូន​នៅ​ជប៉ុន​មាន​ភាព​ស្មុគ​ស្មាញ​ណាស់។

នៅពេលនោះ សេវាកម្មដឹកជញ្ជូនទំនិញត្រូវបានទទួលខុសត្រូវដោយ “hikyaku” – ជាបុគ្គលដែលលើក​ទំនិញ ហើយ​រត់​ទៅ​ប្រគល់​ទំនិញ។

សម្រាប់ចម្ងាយផ្លូវដែលជិត មានសេវាកម្មមួយហៅថា “machi hikyaku” ។ ប៉ុន្តែនេះជាវិធីសាស្រ្តី​ដឹក​ជញ្ជូន​ដែល​មាន​ហានិ​ភ័យ​ខ្ពស់។

កញ្ចប់ដែលមានតម្លៃថោកបំផុតមានតម្លៃប្រហែល ៥០០ យ៉េនបច្ចុប្បន្ន ដោយធានាការដឹកជញ្ជូន​ក្នុងរយៈពេល ១០ ថ្ងៃ។ តម្លៃសមរម្យ ប៉ុន្តែនិយាយពីពេលវេលាដឹកជញ្ជូនស្ទើរតែមិនដែលសម្រេច​ដូច​សន្យា​ឡើយ។

ហាក់បីដូចជាពួកគេប្រើវិធីសាស្ត្រដាក់បញ្ចូលទំនិញ ដែលមានន័យថាប្រមូលទំនិញក្នុងតំបន់តែមួយ ហើយដឹកជញ្ជូនក្នុងពេលតែមួយ ដូច្នេះរង់ចាំចាប់ពី ២០ ថ្ងៃទៅមួយខែទើបទទួលបានទំនិញ​ក៏​ជា​រឿង​ធម្មតា​ដែរ។

ការប្រមូលផ្តុំទំនិញអាចបណ្តាលឲ្យមានការភាន់ច្រឡំ និងបាត់បង់ទំនិញ។ មិនមានការធានា ហើយ​នៅ​ពេល​ដែល​ទំនិញ​បាត់ ក៏​មិន​ទទួល​បាន​សំណង​នោះ​ដែរ។

ជម្រើសដែលមានតម្លៃថ្លៃជាងបន្តិចគឺកញ្ចប់តម្លៃ ៣.៣០០ យ៉េន ដែលត្រូវបានគេរំពឹងថាដឹកជញ្ជូន​ក្នុង​រយៈ​ពេល ៦ ថ្ងៃ។

ប៉ុន្តែជាក់ស្តែងនៅតែត្រូវចំណាយពេលពី ៩-១០ ថ្ងៃ។

ហើយបន្ទាប់មក ប្រហែល ១២០ ឆ្នាំមុន នៅចុងសម័យ Edo សេវាកម្មដឹកជញ្ជូនរហ័សបានចាប់ផ្តើម​ដំណើរ​ការ​ជា​ផ្លូវ​ការ។

ទោះបីជាទំនិញនឹងត្រូវបានដឹកជញ្ជូនក្នុងរយៈពេល ៣ ថ្ងៃក៏ដោយ ប៉ុន្តែតម្លៃខ្ពស់រហូតដល់ទៅ ១.១៦០.០០០ យ៉េន តម្លៃនេះរួមបញ្ចូលទាំងការធានារ៉ាប់រងការបាត់បង់ ជាទម្រង់នៃការធានាដែល​មិន​ធ្លាប់មានពីមុនមក។ ទោះជាយ៉ាងណា សេវាកម្មនេះនៅតែថ្លៃខ្លាំងណាស់។

ជាមួយនឹងការចំណាយខ្ពស់បែបនេះ ជាការពិតណាស់ កញ្ចប់ទំនិញនឹងត្រូវបានដឹកជញ្ជូនទាន់ពេល​វេលា។

ទន្ទឹមនឹងនោះ នៅមានសេវាកម្មដឹកជញ្ជូនលំដាប់ខ្ពស់ជាងនេះទៅទៀត។ ប៉ុន្តែសេវាកម្មនេះសម្រាប់​តែ​រដ្ឋាភិបាល​ប៉ុណ្ណោះ។

ឯកសារដែលត្រូវដឹកជញ្ជូនមានសារៈសំខាន់ខ្លាំងណាស់ ដូច្នេះល្បឿនគឺជាអាទិភាពចម្បង។

ចម្ងាយពីប្រាសាទ Edo (បច្ចុប្បន្នគឺ Tokyo) ទៅកាន់ទីក្រុង Kyoto គឺ ៥០០ គីឡូម៉ែត្រ ដែលមានតំបន់ភ្នំជាច្រើន ប៉ុន្តែក្រោមទម្រង់រត់បញ្ជូនបន្ត ការ​ដឹក​ជញ្ជូន​ត្រូវ​បាន​បញ្ចប់​ក្នុង​រយៈ​ពេល​ត្រឹម​តែ ៦០ ម៉ោង​ប៉ុណ្ណោះ។ នៅសម័យនោះ ល្បឿននេះលឿនជាងសេវាកម្មដឹកជញ្ជូនឯកជនផ្សេង​ទៀត។

ដោយឆ្លងកាត់សម័យកាលបែបនេះ ប្រទេសជប៉ុនសព្វថ្ងៃនេះសម្រេចបាននូវសេវាកម្មដឹកជញ្ជូនយ៉ាង​ងាយ​ស្រួលដែលអ្នក​ណា​ក៏​អាច​ប្រើ​ប្រាស់​បាន ដូច​ដែល​ខ្ញុំ​បាន​លើក​ឡើង​មុន​នោះ។

សង្ឃឹមថានៅថ្ងៃណាមួយ កម្ពុជាអាចបង្កើតប្រព័ន្ធដឹកជញ្ជូនដែលមានគុណភាពដូចជាប្រទេស​ជប៉ុន ដើម្បី​ធ្វើ​ឲ្យ​ជីវិត​នៅ​សម័យ​បច្ចុប្បន្ន​កាន់​តែ​មាន​ភាព​ងាយ​ស្រួល។

Abe Kengo