តើអ្វីដែលជនជាតិជប៉ុនខ្លាចជាជាងរញ្ជួយដីទៅទៀត?

ថ្ងៃសុក្រ 26/12/2025 | 16:37 ល្ងាច

តើអ្វីដែលជនជាតិជប៉ុនខ្លាចជាជាងរញ្ជួយដីទៅទៀត?

ជប៉ុនជាប្រទេសដែលតែងតែកើតមានរញ្ជួយដីញឹកញាប់។ ប្រសិនបើរាប់ទាំងរញ្ជួយដីតូចអាចនិយាយបានថា នៅប្រទេសជប៉ុនគ្មានកន្លែងណាដែលមិនធ្លាប់កើតមានរញ្ជួយដីនោះទេ។

ដោយសារតែរញ្ជួយដីកើតឡើងញឹកញាប់ ដូច្នេះទើបវិធានការណ៍ទប់ស្កាត់ដូចជាលំនៅដ្ឋាន ផ្លូវថ្នល់ និងមធ្យោបាយដឹកជញ្ជូនសុទ្ធតែត្រូវបានត្រៀមយ៉ាងយកចិត្តទុកដាក់បំផុត។

ប្រជាជនជប៉ុនស្ទើរតែមិនមានប្រតិកម្មអ្វីចំពោះរញ្ជួយដីបន្តិចបន្តួចនោះទេ។

សូម្បីតែពេលដែលផ្ទះរង្គោះរង្គើក៏ដោយ ពួកគេគ្រាន់តែនិយាយថា៖ “តើផ្ទះកំពុងតែរង្គោះរង្គើមែនទេ?”

មានភាពស្ងប់ស្ងាត់រហូតដល់ថ្នាក់ធ្វើឲ្យជនបរទេសមានអារម្មណ៍ភ្ញាក់ផ្អើល។

នៅឆ្នាំ ២០២៥ នៅប្រទេសមីយ៉ាន់ម៉ាកើតមានរញ្ជួយដីខ្លាំង។

មិនត្រឹមតែប្រទេសមីយ៉ាន់ម៉ាប៉ុណ្ណោះទេ សូម្បីតែទីក្រុងបាងកក (ប្រទេសថៃ) ក៏កើតមានរញ្ជួយដីខ្លាំង ហើយស្ថិតក្នុងស្ថានភាពវឹកវរផងដែរ។

ទោះជាយ៉ាងណា ជនជាតិជប៉ុនដែលកំពុងមានវត្តមាននៅទីនោះបែរជាមានសភាពស្ងប់ស្ងាត់ទៅវិញ។

ត្រូវហើយ សូម្បីតែរញ្ជួយដីក៏មិនអាចធ្វើឲ្យជនជាតិជប៉ុនភ័យខ្លាចនោះដែរ។ ក្លាហានយ៉ាងនេះ ប៉ុន្តែមានរឿងមួយបែរជាធ្វើឲ្យពួកគេរត់ភ្លាមៗទៅវិញ។

ដែលនោះគឺជា… ភ្លៀង។

ប្រសិនបើអ្នកកំពុងតែនៅខាងក្រៅ ស្រាប់តែមេឃធ្លាក់ភ្លៀងបន្តិច តើអ្នកទាំងអស់គ្នានឹងធ្វើយ៉ាងណា?

មនុស្សជាច្រើនប្រហែលជាមិនខ្វល់នោះទេ ហើយបន្តដំណើរទៅមុខទៀត មែនទេ? ព្រោះភ្លៀងធ្លាក់បន្តិចបន្តួចប៉ុណ្ណោះ។

ប៉ុន្តែប្រជាជនជប៉ុនបែរជាខុសគ្នាទៅវិញ គ្រាន់តែភ្លៀងរលឹមប៉ុណ្ណោះ ជនជាតិជប៉ុនរត់ទៅហើយ ទាំងដែលរញ្ជូយដីកើតឡើងមិនរត់ផង។

ការព្យាករណ៍អាកាសធាតុនៅប្រទេសជប៉ុនមានកម្រិតត្រឹមត្រូវខ្ពស់ ហើយជាទូទៅគឺត្រូវ។ ហើយបើទោះបីជាអត្រាមេឃភ្លៀងត្រឹម ០% ក៏ដោយ នៅតែមានមនុស្សជាច្រើនយកឆ័ត្រតាមដាក់ក្នុងការបូប។

នៅតាមទីក្រុង ក្នុងហាងលក់ទំនិញតែងតែមានលក់ឆ័ត្រប្លាស្ទិកដែលប្រើម្តង។

ហើយគ្រាន់តែមេឃចាប់ផ្តើមរលឹមបន្តិច នោះប្រជាជនជប៉ុននឹងភ័យស្លន់ស្លោរត់ភ្លាមៗ។

ខ្ញុំក៏ជាជនជាតិជប៉ុនដែរ ប៉ុន្តែខ្ញុំមិនដូចជាជនជាតិជប៉ុនដទៃទៀតឡើយ ខ្ញុំបែរជាស្អប់កាន់ឆ័ត្រ។ ដូច្នេះជាទូទៅខ្ញុំមិនខ្វល់ពីភ្លៀងនោះទេ ហើយបន្តដំណើរទៅមុខទៀត សើមបន្តិចក៏មិនអីដែរ។

មិនខ្លាចរញ្ជួយដី បែរជាខ្លាចភ្លៀងមែនទេ? ពិតជាគួរឲ្យចាប់អារម្មណ៍ និងធ្វើឲ្យអ្នកដទៃឆ្ងល់ចំពោះប្រទេសនេះខ្លាំងណាស់។

មានសម្មតិកម្មជាច្រើនត្រូវបានលើកឡើង ក្នុងនោះមានអ្នកខ្លះយល់ថា ដោយសារតែជនជាតិជប៉ុនស្លៀកពាក់ស្អាតបាតចេញទៅក្រៅ ដូច្នេះពួកគេច្បាស់ជាមិនចង់ឲ្យសម្លៀកបំពាក់ ឬសក់សើមនោះទេ។

ប៉ុន្តែតាមពិតទៅ ខ្ញុំឃើញថា សូម្បីតែអ្នកដែលមិនស្លៀកពាក់ស្អាត ឬសមរម្យក៏ដោយ នៅតែខ្លាចភ្លៀងដូចអ្នកដទៃទៀតដែរ។

បែរជាមានសម្មតិកម្មផ្សេងទៀតបង្ហាញថា ចំណុចនេះដោយសារតែរងឥទ្ធិពលពី anime ។

ក្នុងរឿង anime ជប៉ុន នៅពេលដែលត្រូវទឹកភ្លៀង អត្រាកើតជំងឺផ្តាសាយ ហើយដួលសន្លប់មានកម្រិតខ្ពស់។

តាមពិតទៅ មិនមែនមានន័យថាជនជាតិជប៉ុនខ្លាចផ្តាសាយខ្លាំងដូច្នេះនោះទេ ប៉ុន្តែក្នុងរឿង anime មានឈុតឆាកបែបនេះ ដូច្នេះយ៉ាងហោចណាស់មនុស្សនឹងទទួលរងឥទ្ធិពលនេះ។

ពិតជាចម្លែកណាស់ នៅពេលដែលប្រជាជនជប៉ុនភាគច្រើនមានទំនុកចិត្តលើសមត្ថភាពទប់ទល់នឹងរញ្ជួយដី ប៉ុន្តែបែរជាខ្លាចភ្លៀង។

ចុះអ្នកទាំងអស់គ្នាវិញ?

រវាងភ្លៀង និងរញ្ជួយដី តើមួយណាធ្វើឲ្យអ្នកទាំងអស់គ្នាខ្លាចជាង?

Abe Kengo