ឈ្មួញ​មរណៈ Yamada Asaemon ដែល​ជា​អ្នក​ចាត់​ចំណាត់​ថ្នាក់​ដាវ​ជប៉ុន

ឈ្មួញមរណៈ Yamada Asaemon ដែលជាអ្នកចាត់ចំណាត់ថ្នាក់ដាវជប៉ុន។

នៅពេលដែលនិយាយពីសាមូរ៉ៃ មនុស្សគ្រប់គ្នាតែងតែគិតដល់ទិដ្ឋភាព​ដាវ​ជប៉ុនសៀតនៅ​ចំហៀង​​ខ្លួន។

ដាវជប៉ុនត្រូវបានចាត់ទុកដូចជាដួងព្រលឹងរបស់សាមូរ៉ៃ ហើយជាការពិតណាស់ មនុស្សគ្រប់គ្នាសុទ្ធ​តែ​ចង់​បាន​ដាវ​ល្អ។

យ៉ាងណាមិញ តើធ្វើយ៉ាងណាទើបជាដាវល្អ?

ដាវល្អគឺជាដាវដែលជាប់ចំណាត់ថ្នាក់ខ្ពស់ ហើយអ្នកដែលកំណត់ចំណាត់ថ្នាក់នោះគឺជាតួអង្គក្នុងរឿង​នេះ – Yamada Asaemon ។ ថែមទាំងត្រូវបានហៅថា ឈ្មួញមរណៈ ឬឈ្មួញនៃសេចក្តីស្លាប់។

ពួកគេជាមន្ត្រីរាជការរបស់ Shogunate ដែលមានជំនាញកាត់ក្បាលឧក្រិដ្ឋជន

ត្រកូល Yamada ទទួលតួនាទីជា otameshi goyo ពោលជាអ្នកកាត់ក្បាលឧក្រិដ្ឋជនដែលត្រូវបាន​កាត់​ទោសប្រហារជីវិត។

នៅជប៉ុនសម័យ Edo (ក្រោយឆ្នាំ ១៦០០) ជាសម័យកាលដែលសាមូរ៉ៃគ្រប់គ្រង និងមានសន្តិ​ភាព។ នៅសម័យកាលនោះ គ្មាននរណាម្នាក់សម្លាប់មនុស្សច្រើនជាង Yamada Asaemon នោះ​ទេ។

Yamada Asaemon មិនមែនជាឈ្មោះរបស់មនុស្សម្នាក់នោះទេ។ នោះជាឈ្មោះចាស់ព្រឹទ្ធាចារ្យត្រកូល Yamada ដែលបានបន្តពីមួយជំនាន់ទៅមួយជំនាន់អស់រយៈពេលជិត ២០០ ឆ្នាំ។ ក្នុងអំឡុងពេលនោះ មនុស្សម្នាក់ក្នុងចំណោមនោះត្រូវបានគេចាត់ទុកថាបានកាត់ក្បាលមនុស្សជាង ៦.០០០ នាក់។

ការងារដែលមិនមានអ្នកធ្វើច្រើន ប្រាក់ខែ​កាន់តែខ្ពស់ ប្រហែលពី ៣ ទៅ ៤ ម៉ឺន koku (ឯកតារង្វាស់សម្រាប់អង្ករ)។

អង្ករមួយ koku ស្មើនឹងបរិមាណអង្ករដែលមនុស្សម្នាក់បរិភោគក្នុងមួយឆ្នាំ នោះមានន័យថា ពួក​គេ​ទទួលបានអង្ករគ្រប់សម្រាប់​ចញ្ចឹម​មនុស្ស​ពី ៣០.០០០ ទៅ ៤០.០០០ នាក់។

នៅសម័យនោះ តម្លៃអង្ករដូចជាតម្លៃរូបិយប័ណ្ណដែរ អាចប្តូរអង្ករយកប្រាក់ ឬប្រើអង្ករប្តូរយករបស់​របរ​ផ្សេង​ទៀត។ ជាមួយនឹងចំនួនទឹកប្រាក់នេះ ពួកគេបានក្លាយជាអ្នកមានទ្រព្យសម្បត្តិយ៉ាង​ច្រើន។

ការពិសោធន៍លើរាងកាយអ្នកទោស

បន្ទាប់ពីប្រហារជីវិត ត្រកូល Yamada ថែមទាំងមានសិទ្ធិយកសាកសពអ្នកទោសទៅផ្ទះដើម្បីធ្វើការ​ស្រាវ​ជ្រាវ​ផង​ដែរ។

ដោយគេជឿថា ចំពោះការងារនេះ ការយល់ដឹងអំពីរចនាសម្ព័ន្ធរាងកាយរបស់មនុស្សពិតជាសំខាន់​ខ្លាំង​ណាស់ ពួកគេវិភាគ និងស្រាវជ្រាវយ៉ាងប្រុងប្រយ័ត្ន បន្ទាប់មកបន្តដោយសម្ងាត់ទៅឲ្យ​កូន​ចៅពីរបៀបកាត់ក្បាលមនុស្សដែលមាន​ប្រសិទ្ធភាព​បំផុត។

ការងារនេះត្រូវបានធ្វើឡើងនៅផ្ទះ ជាកន្លែងដែលមានកុមារ ដើម្បីឲ្យពួកគេស៉ាំបន្តិចម្តងៗ សង្កេតមើល និងរៀនសូត្រតាម។ កូនចៅក្នុងត្រកូលសុទ្ធតែធំដឹងក្តីក្រោមទិដ្ឋភាពទាំងនោះ ដើម្បី​បន្ត​កេរ្តិ៍​ឈ្មោះ​របស់ “Yamada Asaemon” ។

ចាត់ចំណាត់ថ្នាក់ដាវជប៉ុនដោយសាកសពមនុស្ស

ដោយសារតែមានសិទ្ធិយកសាកសពរបស់អ្នកទោស ពួកគេចាប់ផ្តើម​រៀបចំ​ផែនការ​អាជីវកម្ម​ដើម្បីរកប្រាក់តាមរយៈសាកសពទាំងនោះ។

ដោយមានបទពិសោធន៍កាត់ក្បាលរបស់មនុស្សជាច្រើន ពួកគេកាន់តែដឹងច្បាស់អំពីប្រភេទ​ដាវ​ជប៉ុន​នា​សម័យ​នោះ។ ពួកគេប្រើសាកសពរបស់អ្នកទោសដើម្បីសាកល្បងកម្រិតមុតស្រួចរបស់​ដាវ​នីមួយៗ ហើយចាប់ផ្តើមចាត់ចំណាត់ថ្នាក់ដាវជប៉ុន។

ប្រសិនបើប្រិយមិត្តធ្លាប់មើលរឿង anime One Piece ប្រាកដជាដឹង ក្នុងរឿងមានឈុតឆាកដាវត្រូវបានចាត់ចំណាត់ថ្នាក់ “Wazamono” ។ តាមពិតទៅក្នុងជីវិតជាក់ស្តែង នោះគឺជាកម្រិតដាវជប៉ុនដែលត្រូវបានចាត់ចំណាត់ថ្នាក់ដោយ Yamada Asaemon តាមរយៈការសាកល្បងដាវនៅ​លើ​សាក​សព។

ដាវដែលមានចំណាត់ថ្នាក់កាន់តែខ្ពស់ តម្លៃកាន់តែថ្លៃ។ ដូច្នេះហើយ អ្នកលត់ដាវ និងសាមូរ៉ៃដែលមានដាវជប៉ុន បានចាប់ផ្តើមទៅរកពួកគេដើម្បីត្រួតពិនិត្យ។ ថ្លៃ​ត្រួត​ពិនិត្យ​ច្រើន​ជាង​ប្រាក់​​ខែ​​ដែល​​ពួក​​គេ​​ទទួល​​បាន​​ពី Shogunate ទៅ​​ទៀត។

ផលិតថ្នាំពីសរីរាង្គមនុស្សសម្រាប់លក់

ដោយសារតែមានជំនាញខាងឱសថ Yamada Asaemon ថែមទាំងបានផលិតថ្នាំសម្រាប់លក់។ យ៉ាង​ណា​មិញ រឿង​ដែល​គួរ​ឲ្យរន្ធត់​ត្រង់​ថា គ្រឿងផ្សំដែលប្រើសម្រាប់ផលិតថ្នាំមិនមែនបានមក​ពី​ឱសថនោះទេ ប៉ុន្តែជាសរីរាង្គដែលយកចេញពីសាកសពរបស់អ្នកទោស។ ជាក់ស្តែងមានដូចជាខួរក្បាល ថ្លើម ថង់​ទឹក​ប្រមាត់ ឬ​សរីរាង្គ​ផ្សេង​ទៀត។

គេនិយាយថា ថ្នាំទាំងនេះមានប្រសិទ្ធភាពយ៉ាងខ្លាំង និងត្រូវបានមនុស្សជាច្រើនរកទិញ ដែលនាំ​មកនូវប្រាក់ចំណេញយ៉ាងច្រើនសម្រាប់ត្រកូល Yamada Asaemon ។

ម្រាមដៃមនុស្សក៏ត្រូវបានលក់ផងដែរ

នៅសម័យនោះ មានស្រ្តីពេស្យាមួយចំនួនបានលង់ស្រលាញ់ភ្ញៀវដែលគេងជាមួយនឹងខ្លួន។ ពួកគេថ្ពក់ដៃគ្នាសន្យារៀបការ ប៉ុន្តែតាមពិតទៅ បុរស​ដែល​មក​កន្លែង​ទាំង​នេះ​ភាគ​ច្រើន​គ្រាន់​តែនិយាយ​កុហកឲ្យសប្បាយប៉ុណ្ណោះ។ បន្ទាប់ពីសប្បាយ និងសន្យា បុរសទាំងនោះចាប់ផ្តើមគេចពីពួក​គេ បាត់​ខ្លួន និង​មិន​ត្រឡប់​មក​វិញ​ទៀត​ឡើយ។

ដោយមិនឃើញ​គូស្នេហ៍ត្រឡប់​មក​វិញ ស្រ្តីទាំងនេះសម្រេចចិត្ត​កាត់​ម្រាមដៃ​កូន​របស់ខ្លួនផ្ញើទៅ​ដល់ផ្ទះរបស់បុរសនោះ ដើម្បីរំលឹកពីពាក្យសន្យា។ ប៉ុន្តែជាក់ស្តែង មិនមែន​គ្រប់គ្នា​សុទ្ធតែ​មាន​ភាព​ក្លាហាន​កាត់​​ម្រាម​ដៃ​​របស់​​ខ្លួន​នោះ​ទេ ដូច្នេះ​ពួកគេ​ទិញ​ម្រាមដៃ​កូន​ពី​សាកសព​ដែលត្រកូល Yamada Asaemon លក់ ហើយ​ផ្ញើ​ទៅ​ឲ្យ​មនុស្ស​ក្បត់​ស្នេហ៍។

លក់បន្តសាកសពរបស់អ្នកទោស

មិនត្រឹមតែម្រាមដៃប៉ុណ្ណោះទេ សូម្បីតែសាកសពក៏ត្រូវបានលក់ទៅឲ្យអ្នកដែលមានតម្រូវការប្រើប្រាស់ផងដែរ។ ហើយអ្នកដែលមានតម្រូវការគឺជាអ្នកដែលចង់សាកល្បងដាវ។ ពួកគេទិញសាក​សព​របស់​អ្នក​ទោស ហើយកាត់ទៅលើសាច់របស់មនុស្ស ដើម្បី​ពិនិត្យ​មើល​ថា​ដាវ​មុត​ស្រួច​ប៉ុណ្ណា។

ទោះបីជាគួរឲ្យខ្លាចបន្តិចមែន ពួកគេនៅតែធ្វើពិធីបួងសួងសម្រាប់ជនរងគ្រោះ

ទោះបីជាត្រូវបានគេហៅថា “ឈ្មួញនៃសេចក្តីស្លាប់” ក៏ដោយ ត្រកូល Yamada បែរជាផ្តោតសំខាន់​ទៅ​លើ​ពិធី​បួង​សួង​សម្រាប់​អ្នក​ស្លាប់។ នេះជាចំណុចផ្ទុយគ្នាដ៏ចម្លែកមួយដែលអ្នកដទៃពិបាក​នឹង​យល់​ខ្លាំង​ណាស់។

អាថ៌កំបាំងនៅពីក្រោយដាវជប៉ុនលំដាប់ខ្ពស់

ប្រហែលជាប្រិយមិត្តអ្នកអានដែលជាបុរសៗប្រាកដជាធ្លាប់ប្រាថ្នា​ចង់​បាន​ដាវ​ជប៉ុន​មុតស្រួច ដែល​​បង្ហាញ​​ពី​​ភាព​​អស្ចារ្យ​​របស់​​បុរស។

អ្នកទាំងអស់គ្នាអាចក្លាយជាម្ចាស់របស់ដាវ​ទាំង​នោះ ប៉ុន្តែ​សូម​កុំ​ភ្លេច​ថា ដាវ​ជប៉ុន​ដែល​មានគុណ​ភាព​ខ្ពស់ ប្រហែល​ជា​ធ្លាប់​ប្រើ​សម្រាប់​សម្លាប់​មនុស្ស​ជា​ច្រើន ឬ​ត្រូវ​បាន​សាក​ល្បង​ដោយកាត់​ទៅ​លើ​សាក​សព​មនុស្ស។

ដូច្នេះហើយ ដាវទាំងនោះអាចនឹងផ្ទុកទៅដោយកំហឹង ឬការចងចាំដ៏គួរឲ្យខ្លាចបំផុត។

Abe Kengo