ឈុតឆាក​ក្នុង​រឿង anime “Sound of the Sky” ត្រូវ​​បាន​​រក​​ឃើញ​​ដោយ Otaku

ឈុតឆាកក្នុងរឿង anime “Sound of the Sky” ត្រូវ​​បាន​​រក​​ឃើញ​​ដោយ Otaku ។

រឿងពិតដែលបានកើតឡើងនៅឆ្នាំ ២០១២ ក្នុងទីក្រុងមួយដែលកំពុងទទួលរងស្ថានភាពចំនួនប្រជាជន​ធ្លាក់​ចុះ​នៅ​ប្រទេស​អេស្ប៉ាញ។ ចូរ​យើង​តាម​ដាន​ទាំង​អស់​គ្នា!

• “Otaku ជប៉ុនពិតជាធ្វើឲ្យយើងទាំងអស់គ្នាភ្ញាក់ផ្អើលយ៉ាងខ្លាំង” ។

នោះជាពាក្យសម្តីរបស់​អភិបាលក្រុង Cuenca ជា​ទីក្រុង​អាណានិគម​ដែល​ត្រូវ​បាន​ថែរក្សា​នៅប្រទេស​​អេស្ប៉ាញ ដែល​ត្រូវ​​បាន​​ទទួលស្គាល់​ដោយ​អង្គការ​យូណេស្កូ​ ជា​តំបន់​បេតិកភណ្ឌ​ពិភព​លោក។

កន្លែងនេះមានចម្ងាយជាង ១០,០០០ គីឡូម៉ែត្រពីប្រទេសជប៉ុន ហើយមិនមានជើងហោះហើរត្រង់​នោះ​ទេ។ ដូច្នេះហើយ ហេតុអ្វីបានជា otaku ជប៉ុនបែរជានិយាយបែបនេះ?

នៅឆ្នាំ ២០១២ ភ្ញៀវទេសចរណ៍ជប៉ុនមួយចំនួនធំបានសម្រុកទៅកាន់ Cuenca ។

ទោះបីជាត្រូវបានទទួលស្គាល់ជាបេតិកភណ្ឌពិភពលោកក៏ដោយ ប៉ុន្តែមុននោះ ទីក្រុងនេះស្ទើរតែគ្មាននរណាចាប់អារម្មណ៍នោះទេ។ ខណៈពេលដែលទីក្រុងផ្សេងទៀតនៅក្នុងប្រទេសអេស្ប៉ាញដូច​ជា​ទីក្រុង Madrid ទទួលបានភ្ញៀវទេសចរណ៍ចំនួន ៧,៣ លាននាក់ក្នុងមួយឆ្នាំ Barcelona មានចំនួន ៧,២ លាននាក់ និងទីក្រុង Cuenca មានភ្ញៀវទេសចរណ៍ត្រឹមតែ ៣៧០,០០០ នាក់ប៉ុណ្ណោះ។ ក្នុង​ចំណោមនោះ ភ្ញៀវទេសចរណ៍អន្តរជាតិមានចំនួនប្រហែល ១០% ប៉ុណ្ណោះ។ សណ្ឋាគារ និងភោជនីយ​ដ្ឋាន​សុទ្ធ​តែ​ប្រឈម​នឹង​ហានិភ័យក្ស័យធន។

ទោះបីជាមានភាពស្រស់ស្អាតតាមបែបមជ្ឈិមសម័យក៏ដោយ ផ្ទះដែលត្រូវបានសាងសង់នៅលើច្រាំងថ្ម ទេសភាពដែលសក្តិសមជាបេតិកភណ្ឌ​ពិភព​លោក… គ្មាននរណាម្នាក់មកទស្សនាឡើយ។ ជាពិសេសនៅរដូវរងា មនុស្សដើរនៅតាមដងផ្លូវសុទ្ធតែជាអ្នកស្រុក ដែលជាទិដ្ឋភាពដ៏អាប់អួរ។

ហើយភ្លាមៗនោះ ភ្ញៀវទេសចរណ៍ជប៉ុនជាច្រើននាក់បានទៅកាន់ទីនោះ ដែលធ្វើឲ្យប្រជាជនក្នុងតំបន់មានការភ្ញាក់ផ្អើលយ៉ាងខ្លាំង។

តាមពិតទៅ មុនពេលដែលមនុស្សគ្រប់គ្នាសម្រុកទៅកាន់ Cuenca នៅប្រទេសជប៉ុនកើតមានការជជែកវែកញែកយ៉ាងក្តៅគគុកមួយ។

រឿងភាគ anime ដែលមានចំណងជើងថា “Sora no Woto” (Sound of the Sky) ត្រូវបានចាក់ផ្សាយលើកដំបូងក្នុងឆ្នាំ ២០១០ ដែល​និយាយ​ពី​ពិភព​ស្រមើ​ស្រមៃ​ក្រោយ​សង្គ្រាម ស្រាប់តែទទួលបានការចាប់អារម្មណ៍ឡើងវិញ ព្រោះតែបរិបទដ៏ស្រស់ស្អាត។

ដោយមានការចាប់អារម្មណ៍យ៉ាងខ្លាំងចំពោះទេសភាពក្នុងរឿង ក្រុម otaku ជប៉ុនបានចាប់ផ្តើមរៀបចំផែនការស្វែងរក ដើម្បីបញ្ជាក់ថាតើទេសភាពនោះពិតជាត្រូវបានថតចេញពីទីតាំងពិតឬអត់។

ជាមួយនឹងជំនាញ​ស្វែងរកយ៉ាងប៉ិនប្រសប់ ពួកគេ​បាន​រក​ឃើញ​ទីតាំងដែល​មាន​ទេសភាព​ស្រដៀង​​គ្នា​​នៅ​ទីក្រុង Cuenca យ៉ាង​​ឆាប់​​រហ័ស។

ដោយប្រៀបធៀបបរិបទក្នុងរឿង anime ជាមួយនឹងរូបភាពពិតនៅទីក្រុង Cuenca ពួកគេបាន​រក​ឃើញ​ភាព​ស្រដៀង​គ្នា​ជា​ច្រើន ហើយបានឈានទៅដល់ការសន្និដ្ឋានចុងក្រោយ។

បន្ទាប់ពីទីតាំងពិតប្រាកដត្រូវបានកំណត់ហើយ ក្រុម otaku រំភើបយ៉ាងខ្លាំង ហើយបានប្តេជ្ញាចិត្តទៅកាន់ទីនោះ ដោយគយគន់ទេសភាពដ៏អាថ៌កំបាំងនៃទីក្រុង Cuenca ដែលជាដែនដីបរិសុទ្ធ​ត្រូវ​បាន​បង្ហាញ​តាម​រយៈ​រឿង anime ។

ត្រឹមតែប៉ុន្មានសប្តាហ៍ក្រោយមកប៉ុណ្ណោះ ពួកគេបានទៅដល់ Cuenca ។

ប្រជាជននៅ Cuenca មានការភ្ញាក់ផ្អើលយ៉ាងខ្លាំងចំពោះចំនួនភ្ញៀវទេសចរណ៍។ ពួកគេនិយាយ​តៗ​គ្នា ប៉ុន្តែគ្មាន​នរណា​ម្នាក់​យល់​ពី​មូល​ហេតុ​នៃ​ការ​ផ្លាស់​ប្តូរ​នេះ​ឡើយ។

ក្រៅពីមានការភ្ញាក់ផ្អើល ប្រជាជនភាគច្រើនថែមទាំងមានការព្រួយបារម្ភ។ ពួកគេមានការព្រួយ​បារម្ភថា ប្រសិនបើភ្ញៀវទេសចរណ៍អាស៊ីមួយចំនួនធំដែលមានអាកប្បកិរិយាមិនល្អសម្រុក​មក​លេង នឹង​បង្ក​បញ្ហា ការ​រំខាន​ដល់​ទឹក​ដី​ដ៏ស្រស់ស្អាតនេះ។

ក្រោយមក ភាពគួរសមរបស់ភ្ញៀវទេសចរណ៍ជប៉ុនបែរជាធ្វើឲ្យពួកគេមានការភ្ញាក់ផ្អើលយ៉ាងខ្លាំង។

មិនត្រឹមតែមិននិយាយខ្លាំងៗបង្កសំឡេងរំខានប៉ុណ្ណោះទេ ភ្ញៀវទេសចរណ៍ជប៉ុនតែងតែគោរពតាមច្បាប់ មានអាកប្បកិរិយាគួរសម និងថែមទាំងនិយាយស្វាគមន៍គ្នាទៅវិញទៅមកជាភាសា​អេស្ប៉ាញ​ដែលពួកគេបានរៀនទៀតផង។ ក្រុម otaku ទាំងនេះបានបន្សល់ទុកអារម្មណ៍យ៉ាងពិសេស​ក្នុង​​ក្រសែ​ភ្នែក​របស់​ប្រជាជន​មូល​ដ្ឋាន។

ក្នុងព្រះវិហារ ជាកន្លែងដែលស្ងប់ស្ងាត់ ពួកគេប្រាកដជាមិនបង្កសំឡេងរំខាន ហើយប្រសិន​បើថត​រូប​ក៏​នឹង​បិទ​សំឡេង​កាមេរ៉ា​នៅ​លើ​ទូរស័ព្ទ​ផង​ដែរ។

នៅភោជនីយដ្ឋាន ពួកគេទទួលទានអាហារដោយមានរបៀបរៀបរយ ជាមួយនឹងទឹកមុខរួសរាយរាក់ទាក់ និងស្នាមញញឹម។ មុនពេលចាកចេញ ពួកគេនិយាយពាក្យអរគុណជាភាសាអេស្ប៉ាញ និង​បាន​ទុកលុយទឹកតែទៀតផង។

ដំបូងអ្នកស្រុកមានការព្រួយបារម្ភ ប៉ុន្តែយូរៗទៅអ្នកស្រុកចាប់ផ្តើមចាប់អារម្មណ៍នឹងសុជីវធម៌របស់ភ្ញៀវទេសចរណ៍ជប៉ុន។

ហើយអព្ភូតហេតុនៅតែបន្តកើតឡើង។

នៅពេលដែលត្រឡប់ទៅជប៉ុនវិញ ក្រុម otaku បានចែករំលែកភាពអស្ចារ្យនៃទីក្រុង Cuenca ដែល​ធ្វើឲ្យចំនួនភ្ញៀវទេសចរណ៍កាន់តែច្រើនឡើង។ ដំបូងឡើយ ចំនួនភ្ញៀវទេសចរណ៍ជប៉ុនមកកាន់​ទី​នេះស្ទើរតែស្មើសូន្យ ប៉ុន្តែឥឡូវនេះចាប់ផ្តើមកើនឡើងជាលំដាប់។

ជាមធ្យម ភ្ញៀវទេសចរណ៍ជប៉ុនម្នាក់ៗចំណាយរហូតដល់ ២៣០ អឺរ៉ូ ច្រើនជាងចាប់ពី ២ ទៅ ៣ ដង​នៃ​ចំនួនប្រាក់ដែលភ្ញៀវទេសចរណ៍មកពីកន្លែងផ្សេងទៀត ដែល​ធ្វើ​ឲ្យ​សេដ្ឋកិច្ច​ក្នុង​​ស្រុក​​ត្រូវបាន​ស្តារ​ឡើង​វិញ។

រដ្ឋាភិបាល Cuenca បានចាប់ផ្តើមធ្វើផែនទីណែនាំជាភាសាជប៉ុន បណ្តុះបណ្តាលបុគ្គលិកឲ្យចេះ​និយាយ​ភាសា​ជប៉ុន ហើយទីក្រុងទាំងមូលកាន់តែមានភាពរួសរាយរាក់ទាក់ចំពោះភ្ញៀវទេស​ចរណ៍​ជប៉ុន​បន្តិច​ម្តងៗ។

ផ្តើមចេញពីរឿង anime ដែលមិនសូវមានអ្នកស្គាល់ ឥឡូវនេះបានផ្លាស់ប្តូរទីក្រុងទាំងមូល។

នៅឆ្នាំ ២០១៥ ក្រុមប្រឹក្សាក្រុង Cuenca បានផ្តល់រង្វាន់ពិសេសដល់ ANIPLEX ដែលជាក្រុមហ៊ុនផលិត​ខ្សែ​ភាព​យន្ត​គំនូរ​ជីវចល​នេះ។ នេះជា​ព្រឹត្តិ​ការណ៍​ដ៏​កម្រ​កើត​មាន។

ចាប់តាំងពីពេលនោះមក ទំនាក់ទំនងរវាង Cuenca និងជប៉ុនកាន់តែស៊ីជម្រៅ។ នៅឆ្នាំ ២០២២ ពិធីបុណ្យតាមបែបជប៉ុនត្រូវបាន​ប្រារព្ធ​​ធ្វើ​​ឡើង​នៅ​​​មុខ​​​វិហារ​​​នៃ​​​ទីក្រុង Cuenca ដោយមានវត្តមាន​របស់​ឯកអគ្គរដ្ឋ​ទូត​ជប៉ុន​​ប្រចាំ​​ប្រទេស​​អេស្ប៉ាញ។

ទោះបីជាជាង ១០ ឆ្នាំបានកន្លងផុតទៅចាប់តាំងពីពេលដែលព្រឹត្តិការណ៍ដ៏គួរឲ្យភ្ញាក់ផ្អើលនេះកើត​ឡើងក៏ដោយ ប៉ុន្តែ​ប្រជាជន​ទាំង​មូលនៃទីក្រុង Cuenca នៅតែគោរពស្រលាញ់ប្រទេសជប៉ុន ហើយ​អភិបាលក្រុង Cuenca ក៏បាននិយាយផងដែរថា លោកសង្ឃឹម​ថា​នឹង​បន្ត​រក្សា​មិត្ត​ភាព​នេះ​នា​ពេល​អនាគត។

ក្តីស្រលាញ់ដ៏បរិសុទ្ធរបស់ក្រុម otaku ចំពោះវប្បធម៌ជប៉ុនបង្កើតបានជាអព្ភូតហេតុសម្រាប់ទីក្រុង​​ដាច់​ស្រយាល​ដែល​នៅ​ឆ្ងាយ​ពី​ប្រទេស​ជប៉ុន។

រូបភាពរបស់ otaku ធ្លាប់ត្រូវបានគេចាត់ទុកថាជាមនុស្សដែលនៅផ្ទះពេញមួយថ្ងៃមើល anime លេង​ហ្គេម ឥឡូវ​នេះ​បាន​ផ្លាស់​ប្តូរ​ហើយ។

រឿងរ៉ាវដ៏អស្ចារ្យដែលនិយាយពីមិត្តភាពដ៏ស្រស់ស្អាត គួរឲ្យគោរពកើតចេញពីចំណុចដែលតូច​តាច​បំផុត។

Abe Kengo