តើតួអង្គ Muzan Kibutsuji ក្នុងរឿង Demon Slayer មានក្នុងជីវិតពិតដែរទេ?

ថ្ងៃព្រហស្បតិ៍ 27/11/2025 | 20:25 ល្ងាច

សម្រាប់អ្នកដែលចូលចិត្តរឿង anime ជប៉ុនប្រហែលជា Kimetsu no Yaiba – អ្នកប្រហារបិសាច “Demon Slayer” – គឺជារឿង anime ដែលល្បី និងពេញនិយមយ៉ាងខ្លាំង។

នៅពេលដែលតាមដានរឿងនេះ យើងដឹងថាតួអង្គកំណាចក្នុងរឿងនេះគឺ Muzan Kibutsuji ។ ប៉ុន្តែតើអ្នកទាំងអស់គ្នាដឹងទេថាតួអង្គម្នាក់នេះត្រូវបានបំផុសគំនិតដោយតួអង្គដែលមានពិតក្នុងប្រវត្តិសាស្រ្ត ឬអាចនិយាយបានថា ក្នុងរឿងព្រេងនិទានជប៉ុនដែរទេ?

ក្នុងខ្លឹមសារអត្តបទថ្ងៃនេះ យើងនឹងនិយាយអំពីតួអង្គ Shuten Doji ដែលត្រូវបានគេចាត់ទុកដូចជាគំរូដើមរបស់ Muzan Kibutsuji ។

Shuten Doji បង្ហាញខ្លួនក្នុងរឿងតាំងពីសតវត្សរ៍ទី ១៤ ។ ខ្ញុំនឹងនិយាយតាំងពីដើមមកថា Shuten Doji ក៏ជាបិសាចដែរ ថែមទាំងត្រូវបានពណ៌នាថាជាបិសាចដែលខ្លាំងបំផុតទៀតផង។

ប្រសិនបើពិតជាបិសាចមែន យើងនឹងសង្ស័យពីវត្តមានពិតរបស់តួអង្គម្នាក់នេះ។ ទោះជាយ៉ាងណា ជាមួយនឹងការបង្ហាញខ្លួនក្នុងរឿងជាច្រើនខុសៗគ្នា គេមិនដឹងថា តើតួអង្គនោះជាបិសាចពិត ឬគ្រាន់តែជាតំណាងនៃមនុស្សដែលឃោរឃៅណាម្នាក់នោះទេ។

ទីកន្លែងដែល Shuten Doji កើតត្រូវបានគេនិយាយថាគឺភ្នំ Oe ដែលស្ថិតនៅភាគខាងជើងទីក្រុង Kyoto សព្វថ្ងៃ។ តួអង្គម្នាក់នេះគឺជាមេរបស់បិសាចមួយក្រុម។

ប្រសិនបើយើងសន្និដ្ឋានតាមទ្រឹស្តីសម្មតិកម្មដែលថា Shuten Doji គឺជាមេដឹកនាំម្នាក់ ដែលដឹកនាំក្រុមចោរប្លន់ដ៏កាចសាហាវ ប្រព្រឹត្តអំពើឃោរឃៅដែលមិនខុសអ្វីពីបិសាចនោះទេ នោះវត្តមានរបស់តួអង្គនឹងមានលក្ខណៈជាក់ស្តែង។

នៅថ្ងៃមួយ ក្នុងរដ្ឋធានី Kyoto ក្មេងស្រីអភិជនជាច្រើនបានបាត់ខ្លួន។

Abe no Seimei ដែលជាគ្រូសីលដ៏ល្បីឈ្មោះម្នាក់នៅសម័យនោះ បានដឹងថា Shuten Doji គឺជាជនបង្កដែលរស់នៅភ្នំ Oe ។ គេនិយាយថា Shuten Doji បានចាប់ខ្លួនក្មេងស្រីទាំងនោះ សម្លាប់ពួកគេទាំងរស់ ហើយសុីសាច់ពួកគេ។

ដោយសារតែហេតុការណ៍នេះឃោរឃៅខ្លាំងពេក នៅពេលនោះព្រះចៅអធិរាជបានបង្កើតក្រុមកងទ័ពពិសេសដើម្បីកម្ចាត់ជននោះ។ ប្រសិនបើប្រៀបធៀបទៅនឹងរឿង Demon Slayer ក្រុមកងទ័ពនេះគឺជា “ក្រុមប្រហារបិសាច” ក្នុងរឿង។

ដើម្បីចូលទៅជិតពួកបិសាច អ្នកចម្បាំងទាំងនេះបានក្លែងខ្លួនជាអ្នកបួសនៅលើភ្នំ។ ពួកគេយកស្រាតាមដើម្បីធ្វើជាមិត្តនឹងពួកបិសាច ព្រោះ Shuten Doji ជាអ្នកដែលចូលចិត្តផឹកស្រាម្នាក់។ ចំពោះចំណុចនេះខុសគ្នាបើប្រៀបទៅនឹងតួអង្គ Muzan Kibutsuji ក្នុងរឿង anime ។

ដើម្បីទទួលបានការទុកចិត្តពីពួកបិសាច ពួកគេថែមទាំងផឹកឈាម និងស៊ីសាច់ជនរងគ្រោះដែលពួកបិសាចបានសម្លាប់។ បន្ទាប់មក ពួកគេបានដាក់ថ្នាំពុលក្នុងស្រា ហើយអញ្ជើញ Shuten Doji និងពួកបិសាចផឹក។ នៅពេលដែលថ្នាំពុលមានប្រសិទ្ធភាព បន្ទាប់ពីពួកបិសាចទាំងអស់ធ្លាក់ក្នុងស្ថានភាពមិនអាចធ្វើចលនាបាន ពួកគេបានវាយប្រហារ និងសម្លាប់ពួកបិសាច។ ទោះបីជាក្បាលដាច់ចេញពីខ្លួនក៏ដោយ ក្បាលរបស់ Shuten Doji នៅតែឆ្ពោះទៅវាយប្រហារក្រុមអ្នកចម្បាំង។

អ្នកដែលបានសម្លាប់ Shuten Doji គឺ Watanabe no Tsuna ដែលជាអ្នកចម្បាំងដ៏ឆ្នើមម្នាក់។ ពួកបិសាចដែលរត់គេចខ្លួនបាននិយាយតៗគ្នាពីភាពក្លាហាននោះ ហើយចាប់ពីពេលនោះមក គ្រួសាររបស់ Watanabe បានក្លាយជាកន្លែងដែលពួកបិសាចតែងតែខ្លាច មិនហ៊ានចូលទៅជិត។

ក្នុង anime តួអង្គ Muzan មានអ្នកក្រោមបង្គាប់ចំនួន ១២ នាក់។ ចំណែកឯក្នុងរឿងព្រេង Shuten Doji មានអ្នកក្រោមបង្គាប់តែ ៤ នាក់ប៉ុណ្ណោះ។ ទោះបីជាចំនួនមានភាពខុសគ្នា ប៉ុន្តែហាក់បីដូចជាមានភាពទាក់ទងគ្នា។

រឿង Demon Slayer មានទាំង anime និង manga ក្នុងនោះរឿង anime ត្រូវបានចាក់ផ្សាយដល់ភាគទី ២៦ ហើយនៅតែមិនទាន់ដល់ភាគបញ្ចប់នោះទេ ខណៈដែល manga ត្រូវបានបញ្ចប់ទៅហើយ។ តើចុងបញ្ចប់អាចនឹងដូចជាការប្រយុទ្ធរវាង Shuten Doji និង Watanabe no Tsuna ដែរទេ?

ប្រសិនបើអ្នកមិនទាន់បានមើល manga សូមបន្តតាមដានរឿង anime ដើម្បីមើលថាចុងបញ្ចប់នឹងទៅជាយ៉ាងណា។

Abe Kengo