ទំនាក់ទំនងរវាងអាទិទេព និងពិភពលោកតាមទស្សនៈរបស់ប្រជាជនជប៉ុន

ថ្ងៃព្រហស្បតិ៍ 27/11/2025 | 17:48 ល្ងាច

ទំនាក់ទំនងរវាងអាទិទេព និងពិភពលោកតាមទស្សនៈរបស់ប្រជាជនជប៉ុន។

ដើមឡើយសាសនាត្រូវបានបង្កើតឡើងដើម្បីនាំមកនូវសន្តិភាព គួរឲ្យសោកស្តាយ មនុស្សជាតិនៅតែមិនទាន់អាចលុបបំបាត់ការប្រយុទ្ធគ្នាដែលផ្តើមចេញពីសាសនាបានទាំងស្រុងនោះទេ។

ក្នុងប្រវត្តិសាស្ត្រជប៉ុន ធ្លាប់មានសម័យកាលដែលព្រះសង្ឃប្រដាប់អាវុធប៉ះទង្គិចជាមួយវណ្ណៈសាមូរ៉ៃ ប៉ុន្តែប្រទេសជប៉ុនមិនធ្លាប់កើតមានសង្គ្រាមព្រោះតែសាសនានោះទេ។

ម្យ៉ាងវិញទៀត ការធ្វើទុក្ខបុកម្នេញទៅលើគ្រិស្តបរិស័ទពេលនោះគ្រាន់តែជាមធ្យោបាយទប់ទល់នឹងគោលនយោបាយអាណានិគមរបស់បណ្តាប្រទេសលោកខាងលិចប៉ុណ្ណោះ ដូច្នេះតាមពិតទៅ នោះមិនមែនជាជម្លោះសាសនាឡើយ។

ដូច្នេះហេតុអ្វីបានជាប្រទេសជប៉ុនមិនកើតមានសង្គ្រាមសាសនា?

និយាយពីចំណុចនេះ គេជឿថា មូលហេតុស្ថិតលើភាពខុសគ្នារវាងទស្សនៈដែលទាក់ទងនឹងអាទិទេព និងពិភពលោករបស់ប្រជាជនជប៉ុន។

តើអាទិទេព និងពិភពលោកមួយណាមានមុន?

ភាគច្រើនសាសនាសុទ្ធតែជឿថា ព្រះជាអ្នកបង្កើត ទ្រង់មានវត្តមានមុនទើបបង្កើតពិភពលោក។

ប៉ុន្តែក្នុងសៀវភៅប្រវត្តិសាស្ត្របុរាណ (Kojiki) សរសេររៀបរាប់និយាយពីទេវកថាជប៉ុន បែរជានិយាយថាសកលលោកមានមុន បន្ទាប់ពីមានសកលលោកទើបមានវត្តមានរបស់អាទិទេព។

មានឫទ្ធានុភាពគ្រប់បែបយ៉ាង?

ក្នុងសាសនាជាច្រើន អាទិទេពមានអំណោចបំផុត មានឫទ្ធានុភាពគ្រប់បែបយ៉ាង មិនដែលធ្វើខុសនោះទេ។ ប៉ុន្តែក្នុងទេវកថាជប៉ុន អាទិទេពបែរជាមានលក្ខណៈសាមញ្ញ មានអារម្មណ៍ទាំងអស់ និងចំណុចខ្វះខាត។ ក្នុងនោះមានរឿងរ៉ាវដូចជាបោះកូនចូលសមុទ្រ ព្រោះតែក្មេងកើតមកមិនមានរូបរាង ឬបន្ទាប់ពីប្រពន្ធចែកឋានព្រោះតែប្រសូត្រអាទិទេពភ្លើង អាទិទេពដែលជាស្វាមីខឹងសម្បារយ៉ាងខ្លាំងបានសម្លាប់កូនរបស់ខ្លួន ឬរឿងរ៉ាវនិយាយពីបុរសជាប្តីព្រោះតែនឹករលឹកប្រពន្ធរបស់ខ្លួនយ៉ាងខ្លាំង បានលួចចូលពិភពមួយផ្សេងទៀតដើម្បីស្វែងរក និងបង្កគ្រោះមហន្តរាយដ៏ធំ…។

អាទិទេពទាំងនេះមិនមែនជាព្រះដែលល្អឥតខ្ចោះនោះទេ ប៉ុន្តែមានអារម្មណ៍ និងកំហុសឆ្គងដូចជាមនុស្សដែរ។

តើមានទំនាក់ទំនងរវាងអាទិទេព និងមនុស្សដែរទេ?

ឧទាហរណ៍ព្រះចៅអធិរាជជប៉ុនត្រូវបានគេចាត់ទុកជាកូនចៅរបស់អាទិទេព។ ហើយគេថែមទាំងនិយាយថា មនុស្សលោកជាកូនចៅរបស់អាទិទេពផងដែរ។

ខណៈដែលគ្រិស្តសាសនាបែងចែកយ៉ាងច្បាស់រវាងព្រះ និងមនុស្ស យ៉ាងណាមិញ ក្នុងគំនិតរបស់ជនជាតិជប៉ុន ចំណុចទាំងពីរមានទំនាក់ទំនងគ្នា។

ម្យ៉ាងវិញទៀត មានតួអង្គប្រវត្តិសាស្ត្រដែលមានពិតជាច្រើនបានក្លាយជាអាទិទេព។

មិនអាចនិយាយថា អាទិទេព និងមនុស្សស្មើគ្នានោះទេ ប៉ុន្តែរវាងមនុស្ស និងអាទិទេពមិនមានព្រំដែនដាច់ខាតនោះទេ។

វត្តមានដ៏អស្ចារ្យគឺធម្មជាតិ

ក្នុងសាសនាជាច្រើនផ្សេងទៀត លំដាប់លំដោយដែលត្រូវបានមើលឃើញគឺអាទិទេព → មនុស្ស → ធម្មជាតិ។ ចំណែកឯក្នុងទេវកថាជប៉ុន លំដាប់លំដោយគឺធម្មជាតិ → អាទិទេព → មនុស្ស។

ដោយសារតែជនជាតិជប៉ុនជឿថា អាទិទេពកើតចេញពីធម្មជាតិ ដូច្នេះទើបភ្នំមានអាទិទេពភ្នំ សមុទ្រមានអាទិទេពសមុទ្រ។

ប្រទេសជប៉ុនបុរាណមានបរិស្ថានរស់នៅលំបាកបំផុត រដូវក្ដៅក្ដៅខ្លាំង ដូវរងាត្រជាក់ខ្លាំង។ ថែមទាំងមានរញ្ជួយដី រលកយក្សស៊ូណាមិ បន្ទុះភ្នំភ្លើង… គ្រោះមហន្តរាយធម្មជាតិកើតឡើងជាបន្តបន្ទាប់។

មនុស្សទន់ខ្សោយមិនអាចទប់ទល់នឹងធម្មជាតិបានទេ។ ដោយសារតែយល់ឃើញថា កម្លាំងដ៏អស្ចារ្យរបស់ធម្មជាតិបង្កើតបានជាទស្សនៈសាសនាដែលចាត់ទុកធម្មជាតិខ្ពស់បំផុត។

ជនជាតិជប៉ុនចូលចិត្តភាពស្រពេចស្រពិល

ប្រជាជនជប៉ុនច្រើនតែត្រូវគេនិយាយថា ឆ្លើយតបមិនច្បាស់លាស់នៅពេលដែលទំនាក់ទំនង ប៉ុន្តែមិនត្រឹមតែប៉ុណ្ណឹង ភាពស្រពេចស្រពិលនោះក៏មានក្នុងទស្សនៈសាសនាផងដែរ។ ជាពិសេស ព្រំដែនរវាងធម្មជាតិ និងអាទិទេពស្រពេចស្រពិលខ្លាំងណាស់ ព្រំដែនរវាងអាទិទេព និងមនុស្សក៏ស្រពេចស្រពិលផងដែរ។

ដោយសារតែភាពស្រពេចស្រពិលនេះទើបជប៉ុនមានអាទិទេពច្រើន ហើយដោយសារតែអាទិទេពមិនមែនមានតែមួយអង្គ ដូច្នេះពួកគេមិនយល់ថាពិបាកនឹងទទួលយកសាសនាផ្សេងទៀតឡើយ។

ក្នុងនាមជាមនុស្សធម្មតាម្នាក់ យើងមិនអាចវិនិច្ឆ័យថា ទស្សនៈមួយណាត្រឹមត្រូវ ឬល្អជាងនោះទេ ប៉ុន្តែអាចនិយាយបានថា មូលហេតុដែលប្រទេសជប៉ុនមិនមានសង្គ្រាមសាសនាគឺស្ថិតលើទស្សនៈស្រពេចស្រពិលនោះ។

ពេលខ្លះភាពស្រពេចស្រពិលទទួលបានការរិះគន់ ប៉ុន្តែប្រសិនបើពិចារណាទៅលើទស្សនៈជៀសវាងជម្លោះ ខ្ញុំគិតថា ចំណុចនេះមិនប្រាកដថាអាក្រក់នោះទេ។

Abe Kengo