ប្រភេទ “ប៉ោម​ទឹក​ឃ្មុំ” ដ៏​ល្បី​បំផុត​នៅ​ប្រទេស​ជប៉ុន

ប្រភេទ “ប៉ោម​ទឹក​ឃ្មុំ” ដ៏​ល្បី​បំផុត​នៅ​ប្រទេស​ជប៉ុន។

ដើមឡើយ ជប៉ុនមិនមែនជាកន្លែងដែលមានផ្លែប៉ោមដុះដោយធម្មជាតិនោះទេ រហូតដល់ឆ្នាំ ១៨៤១ ទើបមាន​កូន​ឈើ​តូចៗ​នាំ​យក​មក​ពី​សហរដ្ឋ​អាមេរិក ហើយ​ដាំ​សាក​ល្បង​នៅ Hokkaido ។ ចាប់​តាំង​ពី​ពេល​នោះ​មក ប្រជាជនជប៉ុនបានចាប់ផ្តើមបង្កាត់ពូជ កែលម្អ និងបង្កើតបាន​ជា​ផ្លែ​ប៉ោម​ជាច្រើន​ប្រភេទ​​ដែល​​ទទួល​បាន​ការ​វាយ​តម្លៃ​ខ្ពស់​នៅ​លើ​ពិភព​លោក។

ក្នុងចំណោមនោះ មានផ្លែប៉ោមមួយប្រភេទដែល “ចម្លែកពិសេស” មិនគួរឲ្យជឿនោះទេ។ ផ្លែប៉ោម​ប្រភេទ​នេះអាចមើលឃើញពន្លឺបាននៅពេលដែលលើកឡើងឆ្លុះពន្លឺព្រះអាទិត្យ ជាផលិត​ផល​ដែល​កើតចេញពីបច្ចេកទេសកសិកម្មដ៏ទំនើបរបស់ជប៉ុន។

ពូជផ្លែប៉ោមនេះមានឈ្មោះហៅថា “Sun Mitsu Koutoku” (サン蜜こうとく) ដែលត្រូវបានដាំនៅកសិដ្ឋាន Usui ក្នុងខេត្ត Kanagawa ។

ចូរយើងមកស្វែងយល់អំពីប្រភេទផ្លែប៉ោមដ៏ចម្លែកនេះ និងបច្ចេកទេសដាំដុះដែលអាចបង្កើតបានផ្លែប៉ោមប្រភេទនេះ។

ជាទូទៅ ដើម្បីធ្វើឲ្យផ្លែប៉ោមប្រែជាពណ៌ក្រហមស្រស់ អ្នកដាំត្រូវកាត់ស្លឹកនៅជុំវិញផ្លែប៉ោម ដើម្បីឲ្យ​ផ្លែ​ប៉ោម​ទទួល​បាន​ពន្លឺ​ព្រះ​អាទិត្យ​ដោយ​ផ្ទាល់។ ដោយ​ឡែក​ចំពោះ​ផ្លែ​ប៉ោម​ប្រភេទ​នេះ មិនអាច​​កាត់​​ស្លឹក​​របស់​​វា​​ចេញ​​នោះ​​ទេ រហូតដល់ពេលដែលប្រមូលផល។ ដូច្នេះហើយ ផ្លែប៉ោមមើលទៅមិន​ក្រហម និង​ទាក់​ទាញ​ភ្នែក​នោះ​ទេ។

ផ្ទុយទៅវិញ ចំនួនស្លឹកច្រើនជួយដល់ដំណើរការរស្មីសំយោគ ដោយបញ្ជូនសារធាតុចិញ្ចឹមជាច្រើនចូល​ទៅ​ក្នុង​ផ្លែ ដែលធ្វើឲ្យ “ទឹកឃ្មុំ” ខាងក្នុងផ្លែប៉ោមរីកធំឡើង។

មិនដឹងថាអ្នកទាំងអស់គ្នាធ្លាប់ឃើញដែរអត់ទេ ប៉ុន្តែនៅពេលដែលយើងកាត់ផ្លែប៉ោម ពេលខ្លះយើងនឹងឃើញសាច់ផ្លែប៉ោមរាងថ្លាបន្តិច ចំណែកនេះគឺជាទឹកឃ្មុំ។

ចំពោះផ្លែប៉ោមប្រភេទនេះ ចំណែកទឹកឃ្មុំស្ទើរតែមានពេញមួយផ្លែ។ ដូច្នេះហើយ នៅពេលដែលលើក​ផ្លែ​ប៉ោម​ដាក់​លើពន្លឺព្រះអាទិត្យ យើងអាចនឹងមើលឃើញពន្លឺបន្តិច។

ពិតជា “ពិសេស” ខ្លាំងណាស់ ដែលមានតែនៅ​ជប៉ុនប៉ុណ្ណោះ។

ដូចដែលអ្នកបានដឹងហើយថា កម្រិតជាតិផ្អែមរបស់ផ្លែឈើត្រូវបានវាស់ដោយសន្ទស្សន៍ Brix ហើយ​ពូជ​ផ្លែ​ប៉ោម​នេះមានកម្រិតជាតិផ្អែមប្រហែល 16° Brix ។

នៅប្រទេសជប៉ុន មានផ្លែប៉ោមជាច្រើនប្រភេទល្បីមានរសជាតិផ្អែមឆ្ងាញ់ ប៉ុន្តែកម្រិតជាតិផ្អែមជាមធ្យមចន្លោះពី 12° ទៅ 14° Brix ប៉ុណ្ណោះ។ ទន្ទឹមនឹងនោះ ផ្លែប៉ោមប្រភេទនេះមានរហូតដល់​ទៅ 16° Brix ដែល​ស្មើ​នឹង​កម្រិត​ជាតិ​ផ្អែម​របស់​អំពៅ។

គ្រាន់តែគិតមើល ផ្លែប៉ោមមួយផ្លែបែរជាផ្អែមស្មើនឹងអំពៅគឺ “មិនធម្មតា” ប៉ុណ្ណា?

បន្ទាប់ពីប្រមូលផល ផ្លែប៉ោមទឹកឃ្មុំស្រស់ទាំងនេះត្រូវបានលក់ដោយផ្ទាល់នៅកសិដ្ឋាន ហើយលក់​អស់​​ក្នុង​​មួយ​​ប៉ប្រិច​​ភ្នែក។

សាកល្បងស្វែងរកនៅលើអុីនធឺណេត តម្លៃប្រហែល ៧៥.០០០ យ៉េនសម្រាប់ផ្លែប៉ោម ៥ គីឡូក្រាម។

(មានតម្លៃជិត ២ លានរៀលខ្មែរអាស្រ័យលើពេលវេលា) ។

ដោយត្រូវបានចាត់ទុកជាពូជផ្លែប៉ោមជប៉ុនដែលថ្លៃបំផុតកំពុងលក់នៅលើទីផ្សារនាពេលបច្ចុប្បន្ន។

មនុស្សជាច្រើនគិតថា កសិកម្មជាវិស័យដែលពិបាកនឹងក្លាយជាអ្នកមានណាស់។ ប៉ុន្តែខ្ញុំគិតថា នោះ​ក៏​ព្រោះតែ​យើង​មិន​ទាន់​រក​ឃើញ​ដំណោះស្រាយ ឬវិធីសាស្រ្តដើម្បីបង្កើតប្រាក់ចំណេញពិតប្រាកដ។

ខ្ញុំជឿជាក់ថា មិនថាវិស័យអ្វីក៏ដោយ យើងត្រូវតែបន្តដោយការតាំងចិត្ត និងម៉ឺងម៉ាត់។ ជាពិសេស កសិកម្មជាវិស័យដែលចំណាយកម្លាំង និង​ទឹក​ចិត្ត​កាន់​តែ​ច្រើន កាន់​តែ​បង្កើត​បានផលិត​​ផល​​ដែល​​មាន​​គុណភាព។

អាចនិយាយបានថា ផលិតផលកសិកម្មរបស់ជប៉ុន គឺជាលទ្ធផលនៃការខិតខំប្រឹងប្រែង និងឧស្សាហ៍​ព្យាយាម​ឥត​ឈប់​ឈរ ដែល​មិន​មែន​គ្រប់​គ្នា​សុទ្ធ​តែ​អាច​ធ្វើ​បាន​នោះ​ទេ។

ប្រសិនបើអ្នកមិនទាន់ទទួលបានជោគជ័យក្នុងវិស័យកសិកម្មដែលខ្លួនកំពុងខិតខំប្រឹងប្រែង សូម​កុំ​បាក់​ទឹក​ចិត្ត បន្តតស៊ូ និង​ខិត​ខំ​ប្រឹង​ប្រែង​បន្ថែម​ទៀត។

Abe Kengo