និស្សិតស្រី​ជន​ជាតិ​ជប៉ុន​ម្នាក់​បាន​ជួយ​សង្គ្រោះ​ប្រជា​កសិករ Ghana

និស្សិតស្រី​ជន​ជាតិ​ជប៉ុន​ម្នាក់​បាន​ជួយ​សង្គ្រោះ​ប្រជា​កសិករ Ghana ។

តើប្រិយមិត្តទាំងអស់គ្នាធ្លាប់ឮឈ្មោះប្រទេសមួយមានឈ្មោះថា Ghana ដែរទេ?

Ghana គឺជាប្រទេសក្រីក្រមួយក្នុងចំណោមប្រទេសដែលស្ថិតនៅតំបន់ខាងលិចអាហ្វ្រិក។

ក្នុងខ្លឹមសារអត្តបទថ្ងៃនេះ ខ្ញុំចង់ចែករំលែករឿងរ៉ាវនិយាយពីនិស្សិតស្រីជនជាតិជប៉ុនម្នាក់ដែលបាន​ជួយ​ដល់​កសិករ​ក្រីក្រ​ក្នុង​ប្រទេស​នេះ។

ដូចដែលអ្នកបានដឹងហើយថា កាកាវគឺជាគ្រឿងផ្សំដែលប្រើសម្រាប់ធ្វើសូកូឡា (chocolate) ។

ទោះជាយ៉ាងណា ប្រជាកសិករ Ghana ដែលជាអ្នកដាំកាកាវដោយផ្ទាល់ បែរជាមិនដឹងថាកាកាវនឹង​ក្លាយ​ទៅ​ជា​អ្វី​នោះ​ទេ។ ពី​ព្រោះ​ពួក​គេ​មិន​ដែល​បាន​ឃើញ ឬ​ភ្លក់​សូកូឡា​ពី​មុន​មក​នោះ​ទេ។

ពួកគេគ្រាន់តែដឹងពីរបៀបដាំផ្លែដែលខ្លួនមិនដឹងពីតម្លៃ ហើយត្រូវបានរដ្ឋាភិបាលប្រមូលទិញក្នុងតម្លៃថោក។ ដូច្នេះហើយ ពួកគេត្រូវបង្ខំចិត្ត​រស់​នៅ​ក្នុង​ស្ថានភាព​ក្រីក្រ​ជា​រៀង​រហូត។

បន្ទាប់មក Taguchi Ai – ដែលជានិស្សិតស្រីជនជាតិជប៉ុនម្នាក់បានដឹងអំពីរឿងនេះ។

នាងបានទៅកាន់ប្រទេស Ghana ហើយប្រាប់កសិករថា ខ្លួនចង់ទិញកាកាវរបស់ពួកគេក្នុងតម្លៃខ្ពស់​ជាងតម្លៃរដ្ឋាភិបាល។ ប៉ុន្តែពួកគេគ្រាន់តែសើចចំអក ហើយនិយាយថា៖

• “ប្រហែលជានារីជប៉ុនម្នាក់នេះមិនចេះគិតគូរនោះទេ។” 

នៅពេលនោះ Taguchi បានយកសូកូឡាចេញពីហោប៉ៅ ហើយចែកទៅឲ្យពួកគេ។ នេះជាលើកដំបូងហើយដែលពួកគេបានឃើញសូកូឡា។

បន្ទាប់ពីដាក់ចូលមាត់ រសជាតិផ្អែមលាយឡំជាមួយនឹងក្លិនកាកាវធ្វើឲ្យពួកគេភ្ញាក់ផ្អើលយ៉ាងខ្លាំង។ នេះ​ជាលើកដំបូង​ដែល​ពួក​គេ​​បាន​ភ្លក់​រស​ជាតិ​ដែល​ផលិត​ចេញ​ពី​កាកាវ​ដែល​ពួក​គេ​ដាំ។

ក្រោយមក បន្ទាប់ពីសហការជាមួយមិត្តភក្តិនៅប្រទេសជប៉ុន Taguchi បានចាប់ផ្តើមរៃអង្គាសថវិកា​ដើម្បី​សាង​សង់​រោង​ចក្រ​កែច្នៃ​កាកាវ​មួយ​នៅ​ក្នុង​ប្រទេស Ghana ។

អ្វីដែលគួរឲ្យសរសើរត្រង់ថា នាងមិនត្រឹមតែនិយាយ ឬបរិច្ចាគប្រាក់ប៉ុណ្ណោះទេ ថែមទាំងបានទៅកាន់ភូមិដែលស្ថិតនៅ Ghana ហើយចាប់ផ្តើមដាំកាកាវជាមួយនឹងប្រជាជនម្តងទៀត។

ដោយសារតែភាពស្មោះត្រង់របស់នាងបានធ្វើឲ្យបេះដូងរបស់ប្រជាជនផ្លាស់ប្តូរបន្តិចម្តងៗ។

នៅថ្ងៃមួយ Taguchi បានឆ្លងជំងឺគ្រុនចាញ់ ហើយត្រូវបានបញ្ជូនទៅកាន់មន្ទីរពេទ្យ។ នាងឡើងកម្តៅ​រហូត​ដល់​ទៅ ៤០ អង្សាសេ អាចនិយាយបានថា ស្ថានភាពនៅពេលនោះនាងអាចនឹងស្លាប់។

បន្ទាប់ពីជាសះស្បើយពីជំងឺ ហើយត្រឡប់ទៅភូមិវិញ នាងមានការភ្ញាក់ផ្អើលយ៉ាងខ្លាំងនៅពេលដែល​​ឃើញ​ថា ប្រជាជនជាច្រើនបានស្លាប់ដោយសារជំងឺនេះ។ កសិករក្រីក្រស្លាប់ដោយសារតែពួក​គេ​មិនមាន​លទ្ធភាព​ទិញ​ថ្នាំ ប្រភេទ​ថ្នាំ​ដែល​មាន​តម្លៃ​ត្រឹម​តែ ២ ដុល្លារ​ប៉ុណ្ណោះ។

Taguchi បានសម្រេចចិត្តថាចង់បញ្ចប់ភាពក្រីក្រទាំងនេះ។ នាងបានត្រឡប់ទៅជប៉ុនវិញ ស្វែង​រក​អ្នក​ឧបត្ថម្ភ និង​អាជីវកម្ម​ដែលព្រមប្រមូលទិញ​កាកាវ​របស់​ប្រទេស Ghana ។

ក្នុងអំឡុងពេលដែល Taguchi នៅប្រទេសជប៉ុន កសិករ Ghana ក៏មិននៅស្ងៀមដូចមុនទៀតដែរ។

ដោយមើលឃើញសកម្មភាពម៉ឺងម៉ាត់របស់ Taguchi និងដឹងថាកាកាវអាចលក់បានក្នុងតម្លៃខ្ពស់​ជាង ហើយការងាររបស់ពួកគេពិតជាមានតម្លៃណាស់ ពួកគេចាប់ផ្តើមកែលម្អវិធីសាស្ត្រដាំដុះ ដើម្បី​ផលិត​​កាកាវ​​ដែល​មាន​គុណភាព​កាន់​តែ​ប្រសើរ​ឡើង។

យូរៗទៅ ការយល់ឃើញរបស់ពួកគេបានផ្លាស់ប្តូរ ហើយភូមិទាំងមូលក៏បានផ្លាស់ប្តូរបន្តិចម្តងៗ​ផង​ដែរ។

Taguchi បានបង្កើតក្រុមហ៊ុន MAAHA CHOCOLATE ទន្ទឹមនឹងនោះបង្កើតម៉ាកសូកូឡាដែលមាន​ឈ្មោះ​ដូច​គ្នា ដោយមានគោលដៅធ្វើឲ្យយវាក្លាយជាម៉ាកឈានមុខគេនៅប្រទេសជប៉ុន។

រហូតដល់ខែតុលា ឆ្នាំ ២០២២ នៅទីបំផុតរោងចក្រផលិតកាកាវ និងសូកូឡាត្រូវបានបញ្ចប់ការ​សាង​សង់​នៅ Ghana ដូច​ដែល​បាន​រំពឹង​ទុក។

កសិករដែលធ្លាប់តែដាំកាកាវដោយគ្មានគោលដៅ បានចាប់ផ្តើមយល់ពីសារៈសំខាន់របស់កាកាវ ចាប់អារម្មណ៍នឹងដំណើរការរបស់អាជីវកម្ម និងចូលរួមក្នុងវិស័យជាច្រើន។

ក្នុងសង្គមសព្វថ្ងៃនេះ នៅមានមនុស្សល្អជាច្រើនទៀត តែងតែជួយ និងគាំទ្រដល់មនុស្សដែលមាន​ស្ថានភាព​លំបាកជាងខ្លួន។ ទោះជាយ៉ាងណា អ្វីដែលនារីម្នាក់នេះធ្វើមិនត្រឹមតែបានជួយប៉ុណ្ណោះទេ ប៉ុន្តែជាសកម្មភាពបដិវត្តន៍។ យុទ្ធនាការកាត់បន្ថយភាពក្រីក្រដែលផ្តួចផ្តើមឡើងដោយ​និស្សិត​ស្រី​ម្នាក់។

ខ្ញុំពិតជាសង្ឃឹមថា នៅថ្ងៃណាមួយ ម៉ាក MAAHA CHOCOLATE របស់នាងអាចឆ្ពោះទៅកាន់ពិភព​លោក និង​ក្លាយ​ជា​មោទនភាព​របស់​ប្រទេស Ghana និង​ជប៉ុន។

Abe Kengo