“ឈុតអាហារ​សម្រាប់​កុមារ” – ក្ដី​ស្រឡាញ់​ដែល​បង្កប់​ក្នុង​ឈុត​អាហារ​សម្រាប់​កុមារ

“ឈុតអាហារសម្រាប់កុមារ” – ក្ដីស្រឡាញ់ដែលបង្កប់ក្នុងឈុតអាហារសម្រាប់កុមារ។

មិនដឹងថានៅប្រទេសរបស់ប្រិយមិត្តទាំងអស់គ្នាមានភោជនីយដ្ឋាន ឬហាងលក់អាហារណាមួយដែលបម្រើម៉ឺនុយអាហារដោយឡែកសម្រាប់កុមារដែរទេ?

នៅប្រទេសជប៉ុន ភោជនីយដ្ឋានមួយចំនួនមានម៉ឺនុយអាហារសម្រាប់កុមារ។ នោះមិនត្រឹមតែជាឈុតអាហារដែលមានបរិមាណតិចជាងមនុស្សធំប៉ុណ្ណោះទេ ប៉ុន្តែមុខម្ហូបទាំងនេះមានលក្ខណៈពិសេសដោយឡែក។ យើងខ្ញុំហៅថា “Okosama lunch” – ឈុតអាហារសម្រាប់កុមារ។

ដើម្បីយល់កាន់តែច្បាស់អំពីគោលគំនិតនេះ ចូរយើងក្រឡេកមកមើលរូបភាពខាងក្រោម។

ឈុតអាហារតូចៗត្រូវបានរៀបចំដាក់នៅលើថាសដែលមានការរចនាគួរឲ្យស្រលាញ់ និងទាក់​ទាញ​ភ្នែក ដែល​ប្រមូល​ផ្តុំ​ទៅ​ដោយ​មុខ​ម្ហូប​ដែល​កុមារ​ចូល​ចិត្ត។

Hamburger និងមុខម្ហូបស្រដៀងគ្នានេះ ត្រូវបានធ្វើឡើងដោយឡែកសម្រាប់កុមារ មិន​មែន​​កាត់​​ចេញ​ពី​​ចំណែក​អាហារ​របស់​មនុស្ស​ធំ​នោះ​ទេ។

ថាសប្រើសម្រាប់ដាក់អាហារក៏មានការរចនាច្រើនប្រភេទផងដែរ ឧទាហរណ៍ក្មេងប្រុសច្រើនតែចូលចិត្តថាសដែលមានរាងរថភ្លើង យន្តហោះ ចំណែកឯ​ថាស​អាហារ​ដែល​មាន​ពណ៌​ផ្កា​ឈូក និងសត្វដែលគួរឲ្យស្រលាញ់គឺសម្រាប់ក្មេងស្រី។ អាស្រ័យលើភោជនីយដ្ឋាន ថែម​ទាំង​មាន​ជម្រើសផ្សេងៗ​គ្នា​ជា​ច្រើន។

ហើយកាន់តែគួរឲ្យចាប់អារម្មណ៍ជាងនេះទៅទៀតគឺថាស​អាហារដែលមានរូបរាងរថភ្លើង ថែមទាំង​មាន​ផ្សែង​ពណ៌​ស​​ភាយ​ចេញ​មើល​ទៅ​រស់​រវើក​ដូច​ពិត។

តាមពិតទៅ នោះជាផ្សែងដែលចេញមកពីថ្មស្ងួត មិនមានគ្រោះថ្នាក់នោះទេ គ្រាន់តែដើម្បីធ្វើឲ្យកុមារចាប់អារម្មណ៍ចូលចិត្តប៉ុណ្ណោះ។

ជាទូទៅ នៅលើឈុតអាហារសម្រាប់កុមារនឹងដោតទង់ជាតិតូចមួយ ក្នុងករណីភ្ញៀវជាជនបរទេស ប្រសិនបើដឹងថាភ្ញៀវមកពីប្រទេសណា កន្លែងខ្លះថែមទាំងដាក់ទង់ជាតិស្របតាមប្រទេសរបស់ភ្ញៀវផងដែរ។

ត្រូវបានបង្កើតឡើងក្នុងសម័យកាលដែលលំបាកបំផុត

ឈុតអាហារសម្រាប់កុមារត្រូវ​បាន​បង្កើត​ឡើង​ដំបូង​នៅ​ឆ្នាំ ១៩៣០ នៅ​ភោជនីយដ្ឋាន​មួយ​ក្នុងផ្សារទំនើប Mitsukoshi នៅ Nihonbashi ទីក្រុង​តូក្យូ។

គំនិតនេះត្រូវបានស្នើឡើងដោយលោក Ando Taro ដែលជាអ្នកគ្រប់គ្រងភោជនីយដ្ឋាននៅ​ពេល​នោះ។

នោះជាអំឡុងពេលមានវិបត្តិសេដ្ឋកិច្ចពិភពលោក នៅពេលដែលប្រទេសជប៉ុន និងពិភពលោកកំពុង​ស្ថិត​នៅ​ក្នុង​បរិយាកាស​អាប់​អួរ។

ក្នុងស្ថានភាពនោះ លោក Ando មានបំណងប្រាថ្នាយ៉ាងសាមញ្ញមួយ ប៉ុន្តែល្អមានន័យ ដោយសង្ឃឹមថាកុមារអាចញញឹមជានិច្ច មិនថាពិភពលោកខាងក្រៅលំបាកយ៉ាងណានោះទេ។ ដូច្នេះហើយ ឈុត​អាហារ​សម្រាប់​កុមារ​ត្រូវ​បាន​បង្កើត​ឡើង​ដោយ​ផ្អែក​លើ​គំនិត​នោះ។

ប្រហែលជានៅពេលនោះ មានកុមារជាច្រើនមានអារម្មណ៍សប្បាយរីករាយ និងរំភើបយ៉ាងខ្លាំងដែលបានទៅកាន់ភោជនីយដ្ឋានដើម្បីបរិភោគឈុតអាហារដ៏ពិសេសនោះ។

សព្វថ្ងៃនេះ ឈុតអាហារទាំងនេះបានក្លាយជាទម្លាប់សម្រាប់កុមារជប៉ុនទៅហើយ ប៉ុន្តែនៅប្រទេស​ជា​ច្រើន​ផ្សេង​ទៀត ចំណុចនេះនៅ​តែ​បង្កើត​បាន​ជា​អារម្មណ៍​រំភើប​សម្រាប់​កុមារ។

តារាសម្តែងប្រុស Chris Hemsworth (Thor ក្នុងរឿង Avengers) បានប្រទះឃើញឈុតអាហារសម្រាប់​កុមារ​ក្នុង​អំឡុង​ពេល​ធ្វើ​ដំណើរ​ទៅ​កាន់​ប្រទេស​ជប៉ុន​ជា​មួយ​កូនៗ​របស់​គាត់។

នៅពេលដែលអាហារត្រូវបានលើកឡើង ក្មេងៗមានអារម្មណ៍រំភើបយ៉ាងខ្លាំង។

បន្ទាប់ពីត្រឡប់ទៅប្រទេសវិញ កូនៗរបស់គាត់នៅតែបន្តសុំហូបឈុតអាហារទាំងនោះ។ ឃើញដូច្នោះ លោក Chris Hemsworth បានចូលផ្ទះបាយដើម្បីធ្វើដោយខ្លួនឯង… ប៉ុន្តែក្មេងៗមានអារម្មណ៍ខកចិត្ត ហើយនិយាយថាមិនដូចនឹងអ្វីដែលពួកគេបានបរិភោគនៅជប៉ុននោះទេ។

មិនត្រឹមតែជាអាហារមួយពេលប៉ុណ្ណោះទេ ឈុតអាហារសម្រាប់កុមារថែមទាំងបង្ហាញពីសារដ៏មាន​អត្ថន័យ និងជ្រាលជ្រៅផងដែរ៖ “មិន​មែន​ព្រោះ​តែ​ឈុត​អាហារ​សម្រាប់​កុមារ ហើយអាចធ្វើតាម​ចិត្ត​នោះ​ទេ ចូរចម្អិនដោយក្តីស្រលាញ់ និងបំណងប្រាថ្នាចង់ឃើញស្នាមញញឹមរបស់កុមារ!” ។

អត្តន័យទាំងនោះមិនត្រឹមតែស្ថិតក្នុងបេះដូងរបស់ប្រជាជនជប៉ុនប៉ុណ្ណោះទេ ថែមទាំងត្រូវបានផ្សព្វ​ផ្សាយ​នៅ​ទូទាំង​ពិភព​លោក។

កុមារមិនអាចចេញទៅក្រៅបរិភោគម្នាក់ឯងដោយគ្មានមនុស្សធំទៅជាមួយនោះទេ។ ទៅជាមួយ​ប្អូនៗ​ភាគ​ច្រើន​ជា​ឪពុក​ម្តាយ ឬសាច់ញាតិ។ ភាគ​ច្រើន​កន្លែង​ទៅ​សម្រេច​លើ​មនុស្ស​ធំ ប៉ុន្តែ​ប្រសិន​បើ​កុមារ​និយាយ​ពី​មុខ​ម្ហូប ឬកន្លែងដែលប្អូនៗចង់ទៅ មនុស្សធំប្រាកដជាផ្តល់អាទិភាព​ដល់​ប្អូនៗ។

កុមារប្រហែលជាមិនបរិភោគច្រើននោះទេ ប៉ុន្តែនៅពេលដែលមនុស្សធំកុម្ម៉ង់ម្ហូប ប្រាក់ចំណូលនឹងកើនឡើងតាមនោះ។ ដូច្នេះ ទោះបីជាត្រូវចំណាយកម្លាំងយ៉ាងច្រើនដើម្បីចម្អិនឈុតអាហារទាំងនោះសម្រាប់កុមារ តម្លៃលក់នៅតែរក្សាដដែល សមស្របនឹងបរិមាណអាហារ។

អាចនិយាយបានថា ឈុតអាហារសម្រាប់កុមារមិនត្រឹមតែជាក្តីស្រមៃសម្រាប់កុមារប៉ុណ្ណោះទេ ថែម​ទាំងជាយុទ្ធសាស្ត្រអាជីវកម្មដ៏ប៉ិនប្រសប់ និងមានប្រសិទ្ធភាពផងដែរ។

ទោះបីជាមិនមែនគ្រប់ភោជនីយដ្ឋាន ឬហាងលក់អាហារទាំងអស់មានលក់ឈុតអាហារសមស្របនោះទេ ភាគច្រើនធ្វើឲ្យតែមានប៉ុណ្ណោះ។ ប៉ុន្តែនៅកន្លែងមួយចំនួន យើងនៅតែអាចរកឃើញ​ឈុត​អាហារ​ដែលបង្កប់ទៅ​ដោយ​ទឹក​ចិត្ត និង​ក្តី​ស្រលាញ់​ចំពោះ​កុមារ។

សូមនាំកូនៗរបស់លោកអ្នកទៅលេងកម្សាន្តនៅប្រទេសជប៉ុន ដើម្បី​ឲ្យ​ពួក​គេ​អាច​ទទួល​បាន​បទ​​ពិសោធន៍​ ​ក្តី​​ស្រលាញ់​ និង​​មាន​​សុភមង្គល​កាន់​​តែ​ច្រើន។

Abe Kengo