ទំនាក់ទំនងដ៏អាថ៌កំបាំងរវាងសាមូរ៉ៃ និងឧស្សាហកម្មគំរូប្លាស្ទិក

ទំនាក់ទំនងដ៏អាថ៌កំបាំងរវាងសាមូរ៉ៃ និងឧស្សាហកម្មគំរូប្លាស្ទិក។

សព្វថ្ងៃនេះ ម៉ូដែលប្លាស្ទិកជាច្រើនត្រូវបានផលិត និងលក់នៅលើទីផ្សារ ជាមួយនឹងការរចនាជាច្រើនប្រភេទ ដូច​ជា​រថក្រោះ យន្ត​ហោះ មនុស្ស​យន្ត​ជា​ដើម។

មានក្រុមហ៊ុនផលិតម៉ូដែលជាច្រើននៅលើពិភពលោក ទោះជាយ៉ាងណា ផលិតផលដែលផលិតនៅ​ប្រទេស​ជប៉ុន​នៅ​តែ​ល្បី​ដោយ​សារ​បច្ចេក​វិទ្យា និង​គុណ​ភាព​ខ្ពស់។

ប្រហែលជាអ្នកទាំងអស់គ្នាធ្លាប់ស្គាល់ក្រុមហ៊ុនល្បីៗដូចជា BANDAI, TAMIYA, Hasegawa, ឬ AOSHIMA ប៉ុន្តែមានចំណុចដ៏គួរឲ្យចាប់អារម្មណ៍មួយដែលខ្ញុំមិនប្រាកដថាអ្នកទាំងអស់គ្នាដឹងនោះ​ទេ ពោលគឺក្រុមហ៊ុនធំៗទាំងអស់នេះសុទ្ធតែប្រមូលផ្តុំនៅខេត្ត Shizuoka ។

អ្នកទាំងអស់គ្នាប្រហែលជាគិតថា៖ “គ្រាន់តែជាការកែច្នៃផ្លាស្ទិក ធ្វើនៅទីណាក៏បាន” ។

ទោះជាយ៉ាងណា ក្រុមហ៊ុនជាច្រើនបែរជាប្រមូលផ្តុំគ្នានៅ Shizuoka គឺជាចំណុចដែលចម្លែកណាស់។ ប្រហែលជាមូលហេតុដែលប្រមូលផ្តុំនៅទីនេះផ្តើមចេញពី​ទំនៀម​ទម្លាប់​ប្រពៃណី​ដ៏យូរអង្វែង​តាំង​​ពី​​សម័យ​សាមូរ៉ៃ និង​បាន​បង្កើត​ជា​រូប​រាង​ឧស្សាហកម្មគំរូ​ប្លាស្ទិក​បច្ចុប្បន្ន។

នោះគឺជាទំនាក់ទំនងដ៏អស្ចារ្យរវាងសាមូរ៉ៃ និងម៉ូដែលប្លាស្ទិក (plamodel) ។ ចូរយើងស្វែងយល់អំពី​រឿង​រ៉ាវ​អាថ៌កំបាំង​នៅ​ពីក្រោយក្នុងខ្លឹមសារអត្តបទខាងក្រោម។

មានប្រភពតាំងពីសម័យ Edo – សម័យកាលចុងក្រោយរបស់សាមូរ៉ៃ

នៅពេលនោះនាំមុខវណ្ណៈសាមូរ៉ៃគឺត្រកូល Tokugawa ។

ហើយគោលនយោបាយរបស់ Tokugawa Ieyasu – ដែលជាលោកមេទ័ពដំបូងនៃគ្រួសារ Tokugawa – បាន​ជះ​ឥទ្ធិពល​ដោយ​ផ្ទាល់ទៅលើឧស្សាហកម្មគំរូប្លាស្ទិកសព្វថ្ងៃនេះ។

បន្ទាប់ពីបង្រួបបង្រួមប្រទេសជប៉ុន និងបង្កើតសម័យកាលសន្តិភាព Ieyasu បានចាប់ផ្តើម​ជួស​​ជុលប្រាសាទ វត្ត​អារាម និង​ទីសក្ការៈ​បូជា​ឡើង​វិញ។ បើតាមភាសាសព្វថ្ងៃ នេះ​ជា​ដំណើរ​ការ​ជួស​​ជុល និង​អភិវឌ្ឍ​ហេដ្ឋា​រចនា​សម្ព័ន្ធ។

កាលពីក្មេង Ieyasu រស់នៅ Sunpu (សព្វថ្ងៃជាខេត្ត Shizuoka) ដូច្នេះលោកចូលចិត្តតំបន់នេះជាពិសេស ហើយបានជ្រើសយកកន្លែងនេះធ្វើចំណុចកណ្តាលសម្រាប់សាងសង់។

គាត់បានកោះហៅសិប្បករដែលពូកែបំផុតនៅទូទាំងប្រទេសជប៉ុនដើម្បីទៅកាន់ Sunpu អនុញ្ញាត​ឲ្យ​ពួក​គេ​រស់​នៅ​ទី​នេះ ហើយបន្ទាប់មកបញ្ជាឲ្យពួកគេទៅ​កាន់​តំបន់​នីមួយៗ​ដើម្បី​អភិវឌ្ឍ​​ហេដ្ឋារចនាសម្ព័ន្ធ។

ដោយផ្អែកលើគោលនយោបាយនោះ មានសិប្បករឈើជាច្រើន (ដែលមានជំនាញខាងផ្នែកឈើ) បាន​ប្រមូល​ផ្តុំ​គ្នា​នៅ Sunpu ធ្វើ​ឲ្យ​ទី​នេះ​ក្លាយ​ជា​មជ្ឈ​មណ្ឌល​បច្ចេកទេស​ឈាន​មុខ​គេ​នៅ​ជប៉ុន។

នៅទីនេះសិប្បកម្មឈើមានដូចជាប្រដាប់ក្មេងលេង និងគំរូឈើតូចៗក៏ធ្លាប់ល្បីឈ្មោះយ៉ាងខ្លាំងផង​ដែរ។

ពីគំរូឈើរហូតដល់គំរូផ្លាស្ទិក – បច្ចេកទេសត្រូវបានបន្តជាច្រើនសតវត្សមកហើយ

ដោយឆ្លងកាត់រយៈពេលរាប់រយឆ្នាំមកហើយ គុណសម្បត្តិនៃសិប្បកម្មនេះមិនបានបាត់បង់នោះទេ ប៉ុន្តែ​ផ្ទុយ​ទៅ​វិញ ថែម​ទាំងបាន​អភិវឌ្ឍ​យ៉ាង​ខ្លាំង​ទោះ​បី​ជា​វត្ថុ​ធាតុដើមបាន​ផ្លាស់​ប្តូរ​ក៏​ដោយ។

នៅពេលដែលវត្ថុធាតុដើមត្រូវបានផ្លាស់ប្តូរពីឈើទៅជាផ្លាស្ទិក យូរៗទៅគំរូឈើកាលពីមុនបានក្លាយ​ជា​គំរូ​ផ្លាស្ទិក (plamodel) ។

ក្រៅពីនេះ ទីតាំងភូមិសាស្ត្ររបស់ Shizuoka ស្ថិតនៅលើផ្លូវ Tokaido ដែលតភ្ជាប់ទីក្រុងតូក្យូ និងអូសាកា – ដែលជាទីក្រុងធំទាំងពីរនាពេលនោះ – ថែមទាំងដើរតួនាទីយ៉ាងសំខាន់ខាងផ្នែក​ដឹក​ជញ្ជូន និង​ចែក​ចាយ​ផលិត​ផល​ផង​ដែរ។

រឿងដ៏គួរឲ្យចាប់អារម្មណ៍មួយផ្សេងទៀតនៅតំបន់ Shizuoka

នៅពេលដែលនិយាយពីម្ហូបដ៏ពិសេសនៅ Shizuoka មនុស្សគ្រប់គ្នាសុទ្ធតែស្គាល់តែបៃតង។ ចំណុចដែលគួរឲ្យ​ចាប់​អារម្មណ៍ ឧស្សាហកម្ម​តែ​នៅ​ទី​នេះ​ត្រូវ​បានបង្កើតឡើងប្រៀបបីដូចជាដំណោះ​ស្រាយ​សម្រាប់​បញ្ហាគ្មានការងារ។

នៅពេលដែលសម័យកាលសាមូរ៉ៃបានបញ្ចប់ ហើយប្រទេសជប៉ុនឈានចូលសម័យកាលទំនើបកម្ម មនុស្ស​ជា​ច្រើន​នៃ​ត្រកូល Tokugawa ត្រឡប់ទៅរស់នៅ Sunpu វិញ ប៉ុន្តែ​បែរ​ជា​គ្មាន​ការ​ងារធ្វើ។

ដូច្នេះហើយ ដើម្បីបង្កើតការងារធ្វើ ពួកគេបានចាប់ផ្តើមដាំតែ ហើយនោះជាប្រភពដើមនៃតែ Shizuoka ដែល​ល្បី​នា​ពេល​បច្ចុប្បន្ន។

ទំនាក់ទំនងរវាងសាមូរ៉ៃ និងគំរូប្លាស្ទិកទំនើប

ប្រសិនបើគិតថា សិប្បករដែលត្រូវបានសាមូរ៉ៃប្រមូលផ្តុំនៅសម័យនោះបានបន្តពង្រឹងជំនាញ ហើយផ្ទេរទៅឲ្យ​មនុស្ស​ជំនាន់​ក្រោយ រហូតមកដល់សព្វថ្ងៃបង្កើត​បាន​ជា​គំរូ​ផ្លាស្ទិក​ជប៉ុន​ដែលមាន​​គុណ​​ភាព​ខ្ពស់​​នៅ​​លើ​​ពិភព​លោក ចំណុចនេះពិតជាគួរឲ្យចាប់អារម្មណ៍ណាស់ មែន​ទេ​អ្នកទាំង​អស់​គ្នា?

លើកក្រោយ នៅពេលដែលអ្នកផ្គុំគំរូម៉ូដែល Gundam ឬ​គំរូម៉ូដែល​ប្លាស្ទិក​ដែល​អ្នកចូលចិត្ត សង្ឃឹម​ថា​អ្នក​ទាំង​អស់​គ្នា​នឹង​ចង​ចាំសាមូរ៉ៃ និងសិប្បករបុរាណ។ ជាអ្នកដែលបានបង្កើតមូល​ដ្ឋាន​គ្រឹះ​សម្រាប់​ការ​ផលិត​គំរូ​ម៉ូដែល​បច្ចុប្បន្ន ដែលនាំមកនូវភាពរីករាយដល់អ្នកទាំងអស់គ្នានាពេល​នេះ។

Abe Kengo