ក្រឡេក​មក​មើល​សហគមន៍ Otaku ជប៉ុន​ក្នុង​ព្រឹត្តិ​ការណ៍ Comiket

ក្រឡេកមកមើលសហគមន៍ Otaku ជប៉ុនក្នុងព្រឹត្តិការណ៍ Comiket ។

តើអ្នកទាំងអស់គ្នាធ្លាប់ឮអំពីព្រឹត្តិការណ៍ Comiket ដែរទេ?

ឈ្មោះជាផ្លូវការរបស់ព្រឹតិ្តការណ៍នេះគឺ Comic Market ដែលជាពិធីបុណ្យ Otaku ដ៏ធំបំផុតនៅលើពិភពលោក។

នេះជាកន្លែងសម្រាប់អ្នកដែលស្រលាញ់ចូលចិត្តពិភពហ្គេមវីដេអូ និង anime ដែលបង្កើតការច្នៃប្រឌិតដោយផ្ទាល់ ហើយដាក់លក់នៅនឹងកន្លែង។

ព្រឹត្តិការណ៍ត្រូវបានប្រារព្ធធ្វើឡើងចំនួនពីរដងក្នុងមួយឆ្នាំនៅទីក្រុងតូក្យូ ហើយចំនួនអ្នកចូលរួម​អាច​នឹង​ឡើង​​ដល់​​ទៅ ៣០០.០០០ នាក់ ដែល​ជា​ចំនួន​ដ៏​គួរ​ឲ្យ​ភ្ញាក់​ផ្អើល​ណាស់។

នោះហើយក៏ជាមូលហេតុដែលកន្លែងនេះមានរឿងដ៏គួរឲ្យចាប់អារម្មណ៍ជាច្រើន។

អ្នកដែលយល់ច្បាស់ពី Otaku គឺ Otaku ដូច្នេះក្រុមអ្នកស្ម័គ្រចិត្តនៅទីនេះសុទ្ធតែជា “អ្នកមានជំនឿ” ដូច​គ្នា​ទាំង​អស់។

នៅពេលដែលច្រកទ្វារសាលទើបតែបើក ហ្វូងមនុស្សប្រញាប់ប្រញាល់ចូល មនុស្សគ្រប់គ្នានឹងឮសំឡេង​ស្រែក​ដែល​ធ្លាប់​ស្គាល់​ថា៖

• “សូមមេតាកុំរត់! ធម្មតាអ្នកទាំងអស់គ្នា​មិន​រត់​លឿនបែប​នេះ​ទេ!” ឬ៖
• “អ្នកដែលកំពុងឈរតម្រង់ជួរ សូម​មេតា​ខិត​ជិត​បន្តិច!

អ្នកទាំងអស់គ្នាជាមនុស្សដែលស្រឡាញ់ពិភព 2D ច្បាស់ជាមានសមត្ថភាពយល់​ពី​បរិយាកាស​ជុំវិញ” ។

អ្នកទស្សនាព្រឹត្តិការណ៍ក៏មកពីគ្រប់វិស័យ​ខុសៗ​គ្នា​ផង​ដែរ។

នៅពេលដែលមាននរណាម្នាក់ដួលសន្លប់ដោយ​សារ​ក្តៅ​ខ្លាំង បុគ្គលិកស្ម័គ្រចិត្តនឹង​ស្វែង​រក​គ្រូពេទ្យ​ក្នុង​ចំណោម​អ្នក​ទស្សនា ហើយ​ក្នុង​ចំណោម​ហ្វូង​មនុស្ស មានគ្រូ​ពេទ្យ​ជា​ច្រើន​បាន​លើក​ដៃដើម្បី​​ជួយ។

ឬនៅពេលដែលមានជនជាតិបារាំងម្នាក់មកទស្សនាព្រឹត្តិការណ៍លើកដំបូងជួបបញ្ហាដោយ​សារ​តែ​មិន​អាច​និយាយ​ភាសា​ជប៉ុន​បាន ភ្លាមៗនោះអ្នកចូលរួមដែលចេះភាសាបារាំងបាន​មក​ជួយ។

ប្រហែលជាប្រសិនបើស្វែងរក អាចនឹងរកឃើញអ្នកចេះ​ភាសា​ខ្មែរ ឬ​ភាសា​វៀត​ណាម​ក៏​ថា​បាន។

ពិធីបុណ្យ Comiket ត្រូវបានប្រារព្ធធ្វើឡើងនៅរដូវក្តៅ ថែមទាំងល្បីជាមួយនឹងបាតុភូត “រឿងព្រេង​និទាន” ដែល​ហៅ​ថា “ពពក Comiket” ។

មនុស្សប្រមូលផ្តុំច្រើន កម្តៅពីរាងកាយរបស់ Otaku បានធ្វើឲ្យសំណើមក្នុងបរិយាកាសកើនឡើងយ៉ាងឆាប់រហ័ស បន្ទាប់មកខ្យល់សើមក៏ត្រូវម៉ាស៊ីនត្រជាក់ធ្វើឲ្យត្រជាក់ភ្លាមៗ ដែលធ្វើឲ្យស្រទាប់​ពពក​ស្តើង​លេច​ឡើង​ក្នុង​សាល។

នៅក្នុងព្រឹត្តិការណ៍ផ្សេងទៀត មិនថាបរិយាកាសរំភើបយ៉ាងណានោះទេ ក៏មិនឃើញបាតុភូតនេះកើតឡើងដែរ ដូច្នេះអាចនិយាយបានថា នេះជាបាតុភូតចម្លែកដែលមានតែ Comiket ប៉ុណ្ណោះទើប​មាន។

សូម្បីតែអ្នកបើកឡានក្រុងដឹកភ្ញៀវទៅកាន់ទីកន្លែងក៏ដឹងពីរបៀបធ្វើឲ្យបរិយាកាសកាន់តែរំភើប​ផង​ដែរ។

• “ឡានក្រុងជិតដល់ស្ថានីយ៍តូក្យូហើយ សូមកុំភ្លេចយកកំណប់តាម!

ប្រសិនបើភ្លេច ខ្ញុំនឹងយកទៅដាក់ដេញថ្លៃ” ។

ពិធីបុណ្យ Comiket គឺជាព្រឹត្តិការណ៍ដ៏ល្បីល្បាញដែលមនុស្សគ្រប់គ្នាអាចរីករាយបាន មិនត្រឹមតែអ្នក​ទស្សនា​ប៉ុណ្ណោះ​ទេ សូម្បី​តែ​បុគ្គលិក អ្នក​ដែល​នៅ​តាម​ហាង​ជុំវិញ និងអ្នកបើកឡានក្រុងផង​ដែរ។

ជាមនុស្សម្នាក់ដែលចូលចិត្តនៅម្នាក់ឯង មិនចូលចិត្តកន្លែងមានមនុស្សច្រើន ប្រហែលជាភាពអ៊ូអរក្នុងព្រឹតិ្តការណ៍នេះមិនស័ក្តិសមសម្រាប់ខ្ញុំនោះទេ។ ប៉ុន្តែសម្រាប់អ្នកដែលស្រឡាញ់ចូលចិត្តវប្បធម៌ Otaku ការ​ដែល​ទៅ​លេង​ជប៉ុន​ក្នុង​រដូវ​ពិធីបុណ្យ Comiket អាច​ជាជម្រើសដែលគួរតែពិចារណា។

ប្រិយមិត្តដែលចង់បានរបស់ដែលមានតែមួយគត់នៅទីនេះ ឬ​ចង់​បង្កើត​មិត្ត​ភាព​ជា​មួយ Otaku ជប៉ុន ចូរ​​សាក​ល្បង​ចូល​រួម​ព្រឹត្តិ​ការណ៍ Comiket ទាំង​អស់​គ្នា។

Abe Kengo