ជនជាតិបារាំងមានអារម្មណ៍​ភ័យ​រន្ធត់​យ៉ាង​ខ្លាំង​ចំពោះ​ពិធី​វះ​ពោះ​ធ្វើ​អត្តឃាត​របស់​សាមូរ៉ៃ

ជនជាតិបារាំងមានអារម្មណ៍ភ័យរន្ធត់យ៉ាងខ្លាំងចំពោះពិធីវះ​ពោះ​ធ្វើ​អត្តឃាត​របស់​សាមូរ៉ៃ។

ពិធី “seppuku” (វះពោះធ្វើអត្តឃាត) ត្រូវបានចាត់ទុកដូចជានិមិត្តរូបនៃវប្បធម៌សាមូរ៉ៃដ៏ឆ្កួតលីលា និង​ជ្រុល​និយម។ 

ធ្លាប់មានហេតុការណ៍មួយ​ធ្វើឲ្យជនជាតិបារាំងដែលបានឃើញស្រែកឡើងថា “បញ្ឈប់ទៅ” យ៉ាង​ភ័យ​រន្ធត់។

នៅឆ្នាំ ១៨៦៨ នាវាចម្បាំង​របស់​កងទ័ពជើងទឹក​បារាំង​មួយ​គ្រឿង​បានចតនៅ​កំពង់ផែ​ Osaka ។ ទាហានបារាំងរាប់សិបនាក់ឡើងលើគោកដើរមើលទីក្រុង។ ទោះបីជាមិនចេះភាសាជប៉ុនក៏​ដោយ ពួកគេត្រូវគេប្រទះឃើញថា កំពុងព្យាយាមលួងលោម និងបង្ខំចាប់ស្ត្រីជប៉ុនម្នាក់។ អ្នកដែល​មើល​ឃើញ​ហេតុ​ការណ៍​នោះគឺជាសាមូរ៉ៃនៅ​តំបន់​ដែល​សព្វ​ថ្ងៃ​ជា​ខេត្ត Kochi ។

ក្រុមសាមូរ៉ៃបានព្យាយាមបញ្ចុះបញ្ចូលពួកគេឲ្យត្រឡប់ទៅ​នាវា​វិញ ប៉ុន្តែ​ដោយ​សារ​តែ​ឧបសគ្គភាសា​​ធ្វើ​​ឲ្យ​​គ្រប់​​យ៉ាង​​កាន់​​តែ​​ស្មុគ​​ស្មាញ​​ឡើង។

ដោយឃើញថាទាហានបារាំងគ្មានបំណងត្រឡប់ទៅវិញ សាមូរ៉ៃមានបំណងចាប់ពួកគេ ហើយការបាញ់ប្រហារក៏បានផ្ទុះឡើង ដែលបង្កឲ្យ​មាន​ភាព​ចលា​ចល​យ៉ាង​ខ្លាំង។

ភាគីបារាំងហាក់ដូចជាក្រអឺតក្រទម មិនព្រមទទួលស្គាល់កំហុសរបស់ខ្លួន ថែមទាំងទាមទារសំណងជាទឹកប្រាក់យ៉ាងច្រើន និងស្នើឲ្យប្រហារជីវិតសាមូរ៉ៃចំនួន ២០ នាក់ដែលពាក់ព័ន្ធនឹងហេតុ​​ការណ៍​​នេះ។ នៅពេលនោះរដ្ឋាភិបាលជប៉ុនមានភាពទន់ខ្សោយជាងបើប្រៀបទៅនឹងប្រទេសលោក​ខាង​លិច ដូច្នេះ​ទើប​ទទួល​យក​សំណើ​ទាំង​អស់​នេះ​ពី​ប្រទេស​បារាំង។

តស៊ូដើម្បីការពារស្ត្រីក្នុងប្រទេស លទ្ធផលបែរជាត្រូវប្រហារជីវិត ក្រុមសាមូរ៉ៃមិនសុខចិត្ត។ ប៉ុន្តែពួកគេនៅតែគោរពតាមការសម្រេចចិត្តរបស់រដ្ឋាភិបាល ហើយគ្រប់គ្នាប្រមូលផ្តុំនៅវត្តដែលត្រូវបាន​កំណត់​ជា​កន្លែង​ប្រហារ​ជីវិត។

នៅទីនោះ មនុស្សចំនួន ២០ នាក់អនុវត្តពិធី seppuku ម្នាក់ម្តងៗ។ ពួកគេបានវះពោះខ្លួនឯង ទាញយកសរីរាង្គខាងក្នុងចេញ ហើយគប់ទៅលើ​ទាហាន​បារាំង។

ជាទូទៅ ក្នុងពិធី seppuku ក្បាលរបស់សាមូរ៉ៃដែលធ្វើពិធីនេះនឹងត្រូវកាត់បន្ទាប់ពីវះពោះខ្លួន​ឯង ដើម្បីធានាបានថាអាចស្លាប់រហ័ស និងងាយស្រួល។ ទោះជាយ៉ាងណា លើកនេះមិនបញ្ចប់ជីវិតតាមរយៈការប្រហារមួយដងនោះទេ សាមូរ៉ៃដែលឈរនៅពីក្រោយចាំអនុវត្តតួនាទីកាត់ក្បាល​បែរ​ជា​មាន​ចេតនា​កាត់​ច្រើនដង ដើម្បីឲ្យទាហានបារាំងមើលឃើញពីភាពឈឺចាប់យ៉ាងខ្លាំង​របស់​សាមូរ៉ៃ​ដែល​ត្រូវ​បាន​ប្រហារ​ជីវិត។

ពួកគេចង់បានបង្ហាញពីខ្លឹមសារថា៖ “យើងមិនបានធ្វើខុសអ្វីនោះទេ” បន្ទាប់មកស្លាប់ដោយកិត្តិយស។

ប្រឈមនឹងហេតុការណ៍ដ៏រន្ធត់នោះ ទាហានបារាំងបានស្រែកយ៉ាងភ័យខ្លាច។ ពួកគេបានស្រែក​ថា “បញ្ឈប់ទៅ” ប៉ុន្តែភាគីជប៉ុននៅតែមិនបញ្ឈប់។

ទាហានបារាំងក៏មិនអាចគេចចេញបានដែរ ប៉ុន្តែត្រូវនៅមើលរហូតដល់ទីបញ្ចប់នូវអ្វីដែលពួក​គេ​បាន​ស្នើ​សុំ។

នៅទី​បំផុត រហូតដល់អ្នកទី ១១ ដែល​បារាំង​បាន​ស្នើ​ឲ្យ “បញ្ឈប់” ទើប​ទទួល​បានការយល់ព្រម ហើយ​​ពិធី​​ក៏​​បាន​​បញ្ចប់។

នៅពេលនោះ ជប៉ុន​មិន​មាន​សមត្ថភាព​​ប្រឈម​មុខនឹងយោធា​ខាងភាគីបារាំងនោះទេ។ ភាគច្រើនទាហានបារាំងសុទ្ធតែដឹងរឿងនេះ ទើបមើលងាយប្រជាជនជប៉ុន។

ប្រសិនបើការប្រហារជីវិតប្រព្រឹត្តទៅធម្មតា អារម្មណ៍មើលងាយទាំង​នោះប្រហែលជាមិនផ្លាស់ប្តូរឡើយ។ ប៉ុន្តែដោយសារពិធី seppuku ទោះបីជាក្នុងក្រសែភ្នែករបស់ជនជាតិបារាំងគ្រាន់តែជាទង្វើ​ឆ្កួត​លីលា​ក៏​ដោយ បែរជាអាចនិយាយថាបានការពារកិត្តិយសរបស់ប្រទេសជប៉ុន។

សព្វថ្ងៃនេះ ផ្នូររបស់សាមូរ៉ៃដែលបានវះពោះធ្វើអត្តឃាត ការពារកិត្តិយសប្រទេសជប៉ុននៅតែស្ថិតនៅវត្តជាកន្លែងដែលពួកគេបានធ្វើពិធីនោះ។ វត្ត​នេះ​មាន​ឈ្មោះ​ថា Myokoku-ji (妙國寺) នៅទីក្រុង Sakai, Osaka ។

ផ្នូរទាំងនោះគឺជានិមិត្តរូបនៃមោទនភាពរបស់ប្រជាជនជប៉ុន ជាមនុស្សដែលហ៊ានប្រើជីវិតរបស់ខ្លួនដើម្បីឆ្លើយតបទៅនឹងការមើលងាយរបស់ប្រទេសលោកខាងលិចចំពោះជនជាតិអាស៊ី។

ប្រសិនបើមានឳកាសទៅលេង Osaka អ្នកទាំងអស់គ្នាអាចទៅកាន់វត្តនេះបាន ដែលជាកន្លែងបញ្ចុះ​សព​របស់​សាមូរ៉ៃ​ដែល​បាន​ស្លាប់​ដើម្បី​ការ​ពារ​ភាព​ថ្លៃ​ថ្នូរ​របស់​ប្រទេស​ជាតិ។

Abe Kengo