រឿងរ៉ាវ​ដ៏​កំសត់​ដែល​បង្កប់​នៅ​ពី​ក្រោយ​ពិធីបុណ្យ​បាញ់កាំជ្រួច​

រឿងរ៉ាវដ៏កំសត់ដែលបង្កប់នៅពីក្រោយពិធីបុណ្យបាញ់កាំជ្រួច។

នៅពេលដែលរំលឹកដល់រដូវក្តៅនៅជប៉ុន មនុស្សគ្រប់គ្នា​នឹង​គិត​ភ្លាម​ដល់​ពិធីបុណ្យ​កាំជ្រួចដ៏អស្ចារ្យ ដែល​មានចំនួនកាំជ្រួចរាប់ពាន់គ្រាប់បាញ់ទៅលើមេឃ ធ្វើឲ្យអ្នកទស្សនាបំភ្លេចអារម្មណ៍ក្តៅ​ស្អុះ​ស្អាប់​ក្នុង​រដូវ​ក្តៅ។

ក្នុងចំណោមនោះ ប្រហែលជាគ្មានកន្លែងណាអាចប្រៀបនឹងពិធីបុណ្យកាំជ្រួច Nagaoka នៅខេត្ត Niigata នោះទេ។

ទោះជាយ៉ាងណា នៅពីក្រោយទិដ្ឋភាពដ៏អស្ចារ្យនោះគឺជារឿងរ៉ាវដ៏កំសត់មួយ ដែលត្រូវបានផ្សារភ្ជាប់​ជាមួយ​នឹង​ជីវិត​របស់​កំពូល​សិល្បករ​កាំជ្រួច​ដ៏​ល្បី​ឈ្មោះ​ម្នាក់​គឺ Kase Seiji ។

ជីវិតដ៏កំសត់របស់ Kase

Kase បានក្លាយជាសិល្បករកាំជ្រួចចាប់ពីអាយុ ១៤ ឆ្នាំ។ 

សិល្បករកាំជ្រួចគឺជាអ្នកដែល​ផលិត​កាំជ្រួច។ នៅខាងក្នុងកាំជ្រួច គ្រឿងផ្ទុះត្រូវបាន​រៀប​​ចំយ៉ាង​ប្រុង​ប្រយ័ត្ន​ខាង​​ក្នុង​​សំបក​​ក្រដាស ដូច្នេះ​​នៅ​​ពេល​​ដែល​​ផ្ទុះ​​លើ​​មេឃ នឹង​​មើល​​ទៅ​​រីក​ស្រស់​​ស្អាត​បំផុត។

ការងារនេះតម្រូវឲ្យសិប្បករត្រូវមានការស្រមើស្រមៃ ជាមួយនឹងការគណនាច្បាស់លាស់ ព្រោះភាពស្រស់​ស្អាត​របស់​កាំជ្រួច​អាស្រ័យ​ទៅ​លើ​ការ​រៀបចំ​គ្រឿង​ផ្ទុះ​ខាង​ក្នុង។

នៅពេលដែលកំពុងខិតខំប្រឹងប្រែងពង្រឹងជំនាញបន្ថែម Kase ទទួលបានបញ្ជាចូលបម្រើកង​ទ័ព និង​ត្រូវ​ចេញ​ទៅ​សមរភូមិ។

ក្នុងអំឡុងពេលគាត់នៅជួរមុខ ស្រុកកំណើត Nagaoka ត្រូវកងទ័ពអាមេរិកទម្លាក់គ្រាប់បែកយ៉ាង​ខ្លាំង ដែល​ភាគ​ច្រើន​ទីក្រុង​ត្រូវ​ដុត​បំផ្លាញ​ទាំង​ស្រុង។

បន្ទាប់ពីសង្រ្គាមបានបញ្ចប់ គាត់គិតថា នៅទីបំផុតអាចត្រឡប់ទៅផ្ទះវិញ ប៉ុន្តែបែរជាត្រូវកង​ទ័ព​ក្រហម​សូវៀត​ចាប់​ខ្លួន ហើយ​បញ្ជូន​ទៅ​តំបន់ Siberia ដែល​ត្រជាក់​​យ៉ាង​​ខ្លាំង។

ក្រោមអាកាសធាតុត្រជាក់​ដក​រាប់​សិប​អង្សា លោក និងមនុស្សជាច្រើនទៀតត្រូវបង្ខំឲ្យធ្វើការ​ងារ​យ៉ាង​​លំបាក ការ​​​ងារ​ទាំង​នោះ​​​មាន​​ដូច​​ជា​​កាប់​​ឈើ ឬ​​សាង​​សង់​​ផ្លូវ​​ដែក​​ជា​​ដើម។

អ្នកដែលធ្វើការជាមួយគ្នាស្លាប់ម្នាក់ម្តងៗដោយសារភាពអត់ឃ្លាន ត្រជាក់ និងជំងឺ។ ឈរនៅពី​មុខ​ផ្នូរ​ដែល​ត្រូវ​បានរៀបចំយ៉ាងសាមញ្ញ Kase លើក​​​ដៃ​បួង​សួង ហើយ​​​បាន​​​និយាយ​​​ទាំង​​ទឹក​​ភ្នែក​​ថា៖

• “មិនយូរនោះទេ ខ្ញុំនឹងទៅជួបអ្នកទាំងអស់គ្នានៅពិភពមួយផ្សេងទៀត។”

ជីវិតបន្ទាប់ពីត្រឡប់មកវិញ

បន្ទាប់ពីធ្វើការយ៉ាងលំបាកអស់រយៈពេលបីឆ្នាំ Kase បានត្រលប់ទៅប្រទេសជប៉ុនវិញ។ លោក​បាន​​ស្ដារ​ការ​ងារ​ធ្វើ​កាំជ្រួច និង​ទទួល​បាន​ជោគជ័យជាច្រើនទាំង​ក្នុង​ប្រទេស និង​ក្រៅ​ប្រទេស។ ប៉ុន្មាន​ឆ្នាំ​ក្រោយ​មក​លោកថែមទាំងត្រូវបានជ្រើសរើសឲ្យធ្វើជាអ្នកទទួលខុសត្រូវក្នុងព្រឹត្តិការណ៍កីឡា​អូឡាំពិក​តូក្យូ​ផង​ដែរ។

ទោះជាយ៉ាងណា Kase នៅតែមិនបំភ្លេចមិត្តភក្តិដែលបានស្លាប់នៅ Siberia នោះទេ។ ដោយអារម្មណ៍​នឹក​រលឹក លោកបានសម្រេចចិត្តនាំយកកាំជ្រួចទៅកាន់ប្រទេសរុស្ស៊ីសម្រាប់បាញ់​រំលឹកដល់​​ពួក​​គេ។

ក្រោយសង្គ្រាម ទោះបីជាទំនាក់ទំនងរវាងជប៉ុន និងរុស្ស៊ីមិនល្អក៏ដោយ ហើយការរៀបចំពិធីបាញ់កាំជ្រួចនៅទីនោះក៏ពិបាកណាស់ដែរ ប៉ុន្តែ​គាត់​នៅ​តែ​តស៊ូ​ធ្វើ​ឲ្យ​បាន។

ប្រភេទកាំជ្រួចដែលលោកយកតាមមានឈ្មោះថា Shiragiku មើលទៅដូចជាផ្កាស្បៃរឿងពណ៌ស ដែល​​ជា​​និមិត្ត​រូប​នៃ​ភាព​បរិសុទ្ធ និង​​​ព្រលឹង​​​​​ទៅ​​​កាន់​​​សុគតិភព។

នៅពេលដែលកាំជ្រួចបានផ្ទុះឡើងលើមេឃ Siberia គាត់​បា​នស្រក់​ទឹក​ភ្នែក ដោយ​នឹក​​ដល់​មិត្ត​ភក្តិ​​នៅ​​ឆ្នាំ​​នោះ។

កាំជ្រួចរំលឹកដល់វិញ្ញាណក្ខន្ធអ្នកដែលបានចែកឋាន

មួយថ្ងៃមុនពិធីបុណ្យកាំជ្រួច Nagaoka គឺជាថ្ងៃដែលតំបន់នេះត្រូវបានដុតបំផ្លាញដោយសារការវាយឆ្មក់តាមអាកាស។ ដូច្នេះហើយ ជារៀងរាល់ឆ្នាំ ចំពេលដែលការវាយឆ្មក់តាមអាកាសកើតឡើង កាំជ្រួច “Shiragiku” ពណ៌ស​ចំនួន​បី​ត្រូវបាន​បាញ់​ទៅ​លើ​មេឃ ដើម្បីរំលឹកដល់ប្រជាជនចំនួន ១.៥០០ នាក់​ដែល​បាន​ស្លាប់ និង​បួង​សួង​សុំ​សន្តិភាព។

នៅទីបំផុត សិល្បករកាំជ្រួច Seiji Kase បានទទួលមរណភាពនៅឆ្នាំ ២០២៣ ។

គេជឿថា ជារៀងរាល់ឆ្នាំ លោកជាមួយនឹងសមមិត្តចាស់ៗមើលពិធីបុណ្យកាំជ្រួច Nagaoka នៅកន្លែង​សែន​ឆ្ងាយ។

បុគ្គលដែលបានតស៊ូដើម្បីការពារប្រទេសជាតិ បុគ្គល​ដែល​ត្រូវជាប់ឃុំនៅ​ក្រៅ​ប្រទេស ជន​រងគ្រោះ​នៃ​ការ​វាយ​ប្រហារ​តាម​អាកាស រួម​ទាំង​គាត់ ជា​​សិប្បករ​​ដែល​​បាន​​ចំណាយ​​ពេល​​បង្កើតកាំជ្រួច​យ៉ាង​ស្រស់​ស្អាត។

សូម​ឲ្យ​ព្រលឹង​របស់​ពួកគេ​ទាំងអស់​គ្នាបានទៅកាន់សុគតិភព និង​​មាន​​ពន្លឺ​​​ដ៏​​​អស់​​កល្ប​​ជា​និច្ច។

Abe Kengo