នាយករដ្ឋមន្ត្រី​ជប៉ុន​ធ្លាប់​មាន​អតីត​កាល​ជា​ទាសករ

នាយករដ្ឋមន្ត្រី​ជប៉ុន​ធ្លាប់​មាន​អតីត​កាល​ជា​ទាសករ។

មានបុរសម្នាក់ធ្លាប់ឆ្លងកាត់ជីវិតដែល​ពោរពេញទៅដោយ​រឿងអភ័ព្វជាច្រើន ប៉ុន្តែនៅទីបំផុតបាន​ឡើង​ធ្វើជា​នាយករដ្ឋមន្ត្រី​ជប៉ុន។ នោះគឺជាអតីតនាយករដ្ឋមន្ត្រីលោក Takahashi Korekiyo (高橋是清) ។

ជីវិតរបស់លោកឆ្លងកាត់រឿងខ្លោចផ្សាជាច្រើន ដែល​ហាក់​បី​ដូច​ជា​មាន​តែ​ក្នុង​ខ្សែ​ភាព​យន្តប៉ុណ្ណោះ។

ប្រសិនបើយើងទាំងអស់គ្នាធ្លាប់គិតថា ជីវិតរបស់ខ្លួនពិតជាអភ័ព្វខ្លាំងណាស់ ប្រហែលជាគ្រប់គ្នា​​មាន​​អារម្មណ៍​ថា “យ៉ាងហោចណាស់អ្នកនៅតែមានសំណាងជាង” នៅ​ពេល​ដែល​អ្នក​បាន​ស្តាប់រឿង​រ៉ាវ​និយាយ​ពី​ជីវិតរបស់អតីតនាយករដ្ឋមន្ត្រីរូប​នេះ។

ក្លាយជាទាសករដោយចៃដន្យ

កាលនៅក្មេង លោក Takahashi ធ្លាប់ទៅសិក្សានៅសហរដ្ឋអាមេរិក។ ទោះជាយ៉ាងណា លោកត្រូវជនជាតិអាមេរិកឆបោក យកថ្លៃសិក្សាទាំងអស់។

នៅពេលនោះ ព្រោះតែមិនពូកែភាសាអង់គ្លេស លោកបានចុះហត្ថលេខាលើឯកសារដែលគេប្រគល់​ឲ្យ ដោយគិតថានោះជាឯកសារមាន​ប្រយោជន៍​សម្រាប់​ខ្លួន ប៉ុន្តែ​មិន​ដឹង​ថា តាមពិតទៅ​នោះ​ជា​កិច្ច​សន្យា​ទាសករ​នោះ​ទេ។

ចាប់តាំងពីពេលនោះ លោកត្រូវបានគេលក់ទៅគ្រប់ទីកន្លែង និងត្រូវធ្វើការងារលំបាកជារៀងរាល់ថ្ងៃ។ ក្នុង​អំឡុង​ពេល​នោះ លោក​បាន​រៀន​ភាសា​អង់គ្លេស​ដោយ​ប្រើ​គ្រប់​មធ្យោបាយ។ នៅទីបំផុត លោកអាច​រួច​ផុត​ពីជីវិតជាទាសករ ហើយត្រឡប់ទៅប្រទេសជប៉ុនវិញ។

អ្វីដែលគួរឲ្យចាប់អារម្មណ៍នោះគឺថា លោកមិនដែលគិតថាខ្លួនបានក្លាយជាទាសករនោះទេ លោកគ្រាន់តែគិតថា ខ្លួនកំពុងខិតខំប្រឹងប្រែង និងរៀនសូត្រឥតឈប់ឈរប៉ុណ្ណោះ។

ត្រឡប់ទៅប្រទេសវិញ និងទទួលការមើលងាយ

មិនច្បាស់ពីមូលហេតុនោះទេ ប៉ុន្តែនៅពេលដែលត្រឡប់មកវិញ លោក Takahashi ត្រូវបានគេចាត់ទុកជា “ជនក្បត់” ហើយមិនអាចរកបានការងារធ្វើ។

បន្ទាប់ពីការខិតខំប្រឹងប្រែងជាច្រើន នៅទីបំផុតគាត់បានក្លាយជាគ្រូបង្រៀនភាសាអង់គ្លេស។

នៅពេលដែលទទួលបានប្រាក់ចំណូលតាមរយៈការងារធ្វើ លោកបែរជាបណ្តោយខ្លួនរីករាយជាមួយនឹង geisha ហើយនៅពេលដែលរឿងត្រូវលាតត្រដាង លោកត្រូវបណ្តេញចេញ។

ក្លាយជាជនរងគ្រោះនៃករណីឆបោក

លោក Takahashi តាំងចិត្តចាប់ផ្តើមជីវិតជាថ្មី ធ្វើជាមន្ត្រីរដ្ឋាភិបាល។ យ៉ាងណាមិញ លើកនេះលោក​បាន​ក្លាយ​ជា​ជន​រង​គ្រោះ​នៃ​ករណី​វិនិយោគ​ប្រាក់ ហើយ​បាត់​បង់ទ្រព្យសម្បត្តិទាំងអស់។

កើតមានកំហុសឆ្គងជាបន្តបន្ទាប់…។

ត្រូវបោកបញ្ឆោតកម្រិតអន្តរជាតិម្តងទៀត

ដោយមិនបោះបង់ លោកបន្តធ្វើការងារ បង្កើតទ្រព្យសម្បត្តិឡើងវិញ។ បន្ទាប់មក បុគ្គលដែលគាត់គោរពបាន​អញ្ជើញ​គាត់​វិនិយោគ ទិញអណ្តូងរ៉ែប្រាក់នៅប្រទេសប៉េរូ។ ប៉ុន្តែនៅពេលដែលទៅដល់កន្លែង ទើបលោកប្រទះឃើញថា អណ្តូងរ៉ែត្រូវបោះបង់ចោលជាយូរមកហើយ មិនអាចរ៉ុករកបានទៀតឡើយ។

លើកនេះ លោកបានធ្លាក់ក្នុងសំណាងអាក្រក់ដោយមិនមានផ្លូវចេញ។

នៅតែមិនបោះបង់ចោល និងស្វែងរកឱកាសថ្មី

តាមដំបូន្មានរបស់មិត្តភ័ក្តិ លោកបានដាក់ពាក្យចូលធ្វើការនៅធនាគារកណ្តាលជប៉ុន – ជាកន្លែងដែលបោះពុម្ពរូបិយប័ណ្ណជាតិ។ នៅ​ទី​នោះ សមត្ថភាពរបស់លោកត្រូវបានទទួលស្គាល់ ហើយ​​លោក​​បាន​​ឡើង​​កាន់​តំណែង​ជា​ទេសាភិបាល​ធនាគារ​ជប៉ុន។

ចាប់តាំងពីពេលនោះ​ សំណាងរបស់គាត់បានចាប់ផ្តើម។

ការរួមចំណែកយ៉ាងសំខាន់ក្នុងសង្គ្រាម

នៅ​ពេល​នោះ ជប៉ុនកំពុងត្រូវការប្រាក់យ៉ាងច្រើនដើម្បីបម្រើដល់សង្គ្រាម​ជាមួយ​រុស្ស៊ី។ មិនអាចបង្កើនដើមទុនក្នុងស្រុកបាន លោក​បាន​ទៅ​កាន់​សហរដ្ឋ​អាមេរិក​​ដើម្បី​​ខ្ចី​​ប្រាក់។

នៅទីនេះ លោកបានជួបអ្នកវិនិយោគជនជាតិជ្វីហ្វម្នាក់ដោយចៃដន្យ ហើយដោយសារទំនាក់ទំនង​នេះ លោកប្រមូលបានប្រាក់​មួយ​ចំនួន​ដែល​ស្មើនឹង​ថវិកា​ជាតិ ជា​អ្វី​ដែល​មិន​ធ្លាប់​មាន​ពី​មុន​មក។

ពីទាសករក្លាយជានាយករដ្ឋមន្ត្រីជប៉ុន

បន្ទាប់ពីទទួលបានជោគជ័យទាំងនោះ លោកបន្តឡើងកាន់តំណេងខ្ពស់ជាងនេះ ហើយបានក្លាយ​ជា​នាយករដ្ឋមន្ត្រីជប៉ុន​នៅ​ឆ្នាំ ១៩២១ ។

ដោយផ្តើមចេញពីទាសករ លោកបានឈានទៅដល់ចំណុចកំពូលនៃអំណាច។

ដោយសារលោកតែងតែដឹងពីរបៀបក្រោកឈរបន្ទាប់ពីទទួល​យក​បរាជ័យម្តងៗ មនុស្សម្នាបានដាក់រហស្សនាមគាត់ថា “Daruma” ។

** Daruma ជាឈ្មោះនៃប្រភេទតុក្កតាជប៉ុនបុរាណដែលមានរាងមូល ទោះបីជាដួលក៏នៅតែក្រោក​ឈរ​​ជា​និច្ច។

ត្រូវធ្វើឃាតក្នុងរដ្ឋប្រហារ

ក្រោយ​ពេល​កាន់​តំណេង​ជា​​នាយក​រដ្ឋ​មន្ត្រី​បាន ១ ឆ្នាំ ៨ ខែ នៅ​ថ្ងៃ​ទី​ ២៦ ខែ​កុម្ភៈ ឆ្នាំ ​១៩៣៦ រដ្ឋប្រហារ​​យោធា​មួយ​បាន​​កើត​​ឡើង។ នៅទីនេះ លោក Takahashi ត្រូវ​បាន​ធ្វើ​ឃាត​ដោយ​មន្ត្រីយោធា។

ប្រជាជនជប៉ុនមានពាក្យមួយឃ្លាថា “ជីវិតពេលខ្លះឡើងភ្នំ ពេលខ្លះចុះដល់បាត” ។

ជាការពិតណាស់ ជីវិតគឺពោរពេញទៅដោយរឿងល្អ និងរឿងអាក្រក់។ ប្រហែលជាយើងទាំងអស់គ្នាធ្លាប់ឆ្លងកាត់គ្រាដ៏រុងរឿង និងថ្ងៃដែលសំណាងអាក្រក់បំផុត ប៉ុន្តែប្រហែលជាកម្រមានអ្នកឆ្លង​កាត់​ខ្សែ​ជីវិត​ឡើង​ចុះ​ដូច​ជា​ជីវិតរបស់អតីតនាយករដ្ឋមន្ត្រីរូបនេះ​ខ្លាំង​ណាស់។

ដោយចាប់ផ្តើមពីមនុស្សដែលមិនមានអ្វីទាំងអស់ លោកក្រោកឈរខ្លួនឯងដោយមិនចុះចាញ់។ ហើយនោះជាអ្វីដែលខ្ញុំកោតសរសើរបំផុត។

នៅពេលដែលក្រឡេកមើលមុខរបស់អ្នកនយោបាយម្នាក់នេះ តើអ្នកទាំងអស់គ្នាមាន​អារម្មណ៍​ដូច​​ខ្ញុំ​​ដែរ​ទេ?

“ទម្រង់មុខជាមនុស្សដែលមានបទពិសោធន៍” ។

ភាពស្រស់ស្អាតរបស់មនុស្សមិនត្រឹមតែស្ថិតលើរូបរាងខាងក្រៅប៉ុណ្ណោះទេ ប៉ុន្តែស្ថិតលើរឿងរ៉ាវជីវិត​ដែល​បង្ហាញ​យ៉ាង​ច្បាស់​នៅ​លើ​ទឹក​មុខ​របស់​ពួកគេ។

ហើយខ្ញុំមើលឃើញទម្រង់មុខរបស់បុរសម្នាក់នេះស្រស់ស្អាតតាមបែបនោះ។

Abe Kengo