ការសង្ស័យពីទំនាក់ទំនងអាថ៌កំបាំងរវាងពីរ៉ាមីត និងជប៉ុន

ថ្ងៃព្រហស្បតិ៍ 16/10/2025 | 17:39 ល្ងាច

ការសង្ស័យពីទំនាក់ទំនងអាថ៌កំបាំងរវាងពីរ៉ាមីត និងជប៉ុន។

បើនិយាយពីចម្ងាយភូមិសាស្ត្រ ពីរ៉ាមីតរបស់អេហ្ស៊ីបស្ថិតនៅឆ្ងាយពីប្រទេសជប៉ុនប្រមាណ ១០.០០០ គីឡូម៉ែត្រ។

មិនថាមើលយ៉ាងណាក៏ដោយ ហាក់បីដូចជាស្ថាបត្យកម្មទាំងនេះមិនទាក់ទងនឹងវប្បធម៌ជប៉ុននោះទេ។ ទោះជាយ៉ាងណា យូរៗទៅគេបានប្រទះឃើញពីចំណុចស្រដៀងគ្នាយ៉ាងអាថ៌កំបាំងជាច្រើន ដែលបណ្តាលឲ្យអ្នកស្រាវជ្រាវចោទជាសំណួរ។ ក្នុងចំណោមនោះមានសំណួរសួរថា តើពីរ៉ាមីតអាចនឹងត្រូវបានសាងសង់ឡើងដោយជនជាតិជប៉ុនដែរទេ?

សរុបទៅចំណុចស្រដៀងគ្នាទាំងនេះជាអ្វី បែរជាធ្វើឲ្យគេបង្កើតបានជាសម្មតិកម្មដែលមិនគួរឲ្យជឿបែបនេះ?

មានចម្ងល់ជាច្រើនទាក់ទងនឹងស្ថាបត្យកម្មដ៏អស្ចារ្យទាំងនេះ។ កាលពីមុន ពីរ៉ាមីតត្រូវបានគេចាត់ទុកថាជាផ្នូររបស់ស្តេចផារ៉ោន ប៉ុន្តែជាក់ស្តែង បន្ទាប់ពីសិក្សាផ្នែកបុរាណវិទ្យា និងស្រាវជ្រាវជាច្រើនមក រហូតមកដល់ពេលនេះនៅតែមិនទាន់រកឃើញអដ្ឋិធាតុរបស់ព្រះចៅផារ៉ោនឡើយ ដែលធ្វើឲ្យមានការសង្ស័យថាស្ថាបត្យកម្មទាំងនេះមិនមែនជាផ្នូរនោះទេ។

ទន្ទឹមនឹងនោះ គេថែមទាំងចោទជាសំណួរជាច្រើនដែលទាក់ទងនឹងរបៀបសាងសង់ពីរ៉ាមីត។ តើធ្វើយ៉ាងណាអាចដឹកជញ្ជូនដុំថ្មដ៏ធំបែបនេះទៅកាន់ទីខ្ពស់ និងដាក់ជង់យ៉ាងល្អឥតខ្ចោះដោយគ្រាន់តែប្រើកម្លាំងមនុស្ស?

ទោះបីជាមានសម្មតិកម្មជាច្រើនត្រូវបានលើកឡើង ប៉ុន្តែពីរ៉ាមីតនៅតែជាស្ថាបត្យកម្មដែលពោរពេញទៅដោយអាថ៌កំបាំង ហើយមិនទាន់អាចពន្យល់បានច្បាស់ឡើយ។

គេនិយាយថា ពីរ៉ាមីតត្រូវបានសាងសង់ឡើងតាមរបៀបដូចគ្នានឹងទីសក្ការបូជាមួយដែលមានឈ្មោះថា Izumo Taisha ដែលស្ថិតនៅប្រទេសជប៉ុនតាំងពីបុរាណកាលមកម្ល៉េះ។ ទោះបីជាមើលទៅខុសគ្នាទាំងស្រុងក៏ដោយ ប៉ុន្តែរចនាសម្ព័ន្ធខាងក្នុងបែរជាដូចគ្នា។

កម្ពស់នៃទីសក្ការៈបូជា Izumo Taisha គឺ ៤៨ ម៉ែត្រ កម្ពស់នេះស្របនឹងកម្ពស់ “បន្ទប់ស្តេច” ដែលត្រូវបានចាត់គេទុកថាជាកន្លែងសំខាន់បំផុតនៅខាងក្នុងពីរ៉ាមីត។

ប្រវែងជណ្តើរទាំងពីរកន្លែងដែលទៅកាន់បន្ទប់របស់ស្តេចក៏ដូចគ្នាដែរ គឺ ១០៩ មែត្រ។

ជ្រុងរបស់ជណ្តើរ និងជំហានជណ្តើរក៏ស្របគ្នាទាំងស្រុងផងដែរ។

ចំណុចដូចគ្នាយ៉ាងច្រើនរហូតដល់ថ្នាក់អ្នកប្រវត្តិសាស្ត្រនិយាយថា នេះមិនមែនជារឿងចៃដន្យនោះទេ។

ម្យ៉ាងវិញទៀត ថែមទាំងមានភាពស្រដៀងគ្នាដែលទាក់ទងនឹងអាទិទេព។ នៅពេលដែលរំលឹកដល់អាទិទេពរបស់អេហ្ស៊ីប គេនឹងគិតភ្លាមដល់អាទិទេពព្រះអាទិត្យ “Ra” ។ នៅប្រទេសអេហ្ស៊ីប អាទិទេពព្រះអាទិត្យគឺជាអាទិទេពមួយក្នុងចំណោមអាទិទេពដែលសំខាន់បំផុត ដែលត្រូវបានគេចាត់ទុកថាជាអ្នកបង្កើតអាទិទេពផ្សេងទៀត និងមនុស្សទាំងអស់ ហើយជាតំណាងនៃព្រះអាទិត្យនៅពេលថ្ងៃត្រង់។

Amaterasu Omikami ជាកំពូលអាទិទេពរបស់ជប៉ុន ហើយក៏ជាអាទិទេពព្រះអាទិត្យស្រីផងដែរ។

ក្នុងសម័យបុរាណ នៅពេលដែលថាមពលនៃធម្មជាតិត្រូវបានគេចាត់ទុកថាធំធេង មនុស្សតែងតែប្រៀបធៀបព្រះអាទិត្យទៅនឹងអាទិទេព ហើយមានរឿងរ៉ាវស្រដៀងគ្នាជាច្រើនក្នុងទេវកថា។

គេនិយាយថា ពិបាកនឹងពន្យល់ពីចំណុចស្រដៀងគ្នានេះណាស់ ប្រសិនបើបដិសេធគំនិតដែលថាមានការផ្លាស់ប្តូរវប្បធម៌។

ក្រៅពីនេះ ក្នុងកំណត់ត្រាប្រវត្តិសាស្ត្ររបស់អេហ្ស៊ីបដែលនៅតែមានរហូតមកដល់សព្វថ្ងៃនេះមានឃ្លាសរសេរថា៖ “ពួកអភិជនបូព៌ាបានសាងសង់ពីរ៉ាមីតដោយប្រើវិធីសាស្រ្តស្ថាបត្យកម្មចម្លែក។”

ជាងនេះទៅទៀត រូបសំណាក Sphinx ដែលយាមនៅជាប់ប្រាសាទពីរ៉ាមីតត្រូវបានគេចាត់ទុកថាឆ្ពោះទៅរកទិសដៅរបស់ជប៉ុន។

ប្រសិនបើយើងក្រឡេកមើលករណីនីមួយៗ អាចនិយាយបានថាជាការចៃដន្យ ប៉ុន្តែជាក់ស្តែងបែរជាមានភាពស្រដៀងគ្នាយ៉ាងច្រើន។

ទោះជាយ៉ាងណា ដូចដែលខ្ញុំបានចែករំលែកតាំងពីដើមមក ពីរ៉ាមីតរបស់អេហ្ស៊ីបមានចម្ងាយភូមិសាស្ត្រឆ្ងាយពីជប៉ុនប្រមាណ ១០.០០០ គីឡូម៉ែត្រ។ ប្រសិនបើនិយាយថា ពីរ៉ាមីតត្រូវបានសាងសង់ឡើងដោយជនជាតិជប៉ុន ដូច្នេះកាលពី ៥.០០០ ឆ្នាំមុន តើមនុស្សប្រើមធ្យោបាយអ្វីដើម្បីធ្វើដំណើរចម្ងាយ ១០.០០០ គីឡូម៉ែត្រទៅដល់អេហ្ស៊ីប? ហើយបើទោះបីជាមានមធ្យោបាយធ្វើដំណើរនៅសម័យបុរេប្រវត្តិក៏ដោយ ដូច្នេះហេតុអ្វីបានជាគេសាងសង់ស្ថាបត្យកម្មអាថ៌កំបាំងនេះនៅកន្លែងយ៉ាងឆ្ងាយបែបនេះ បែរជាមិនសាងសង់នៅប្រទេសជប៉ុន ជាកន្លែងដែលមិនមានពីរ៉ាមីតទាល់តែសោះ?

សំណួរដែលត្រូវបានលើកឡើងទាំងនេះគ្រប់ល្មមនឹងច្រានចោលសម្មតិកម្មដែលថាជនជាតិជប៉ុនបានសាងសង់ពីរ៉ាមីត។

ដូច្នេះហេតុអ្វីបានជាមានភាពស្រដៀងគ្នាច្រើនយ៉ាងនេះ?

ក្នុងនាមជាជនជាតិជប៉ុន ខ្ញុំមានអារម្មណ៍រំភើបយ៉ាងខ្លាំងនៅពេលដែលបានដឹងអំពីសម្មតិកម្មដែលថាពីរ៉ាមីតជាស្ថាបត្យកម្មរបស់ជប៉ុន ប៉ុន្តែជាក់ស្តែង ខ្ញុំផ្ទាល់ក៏យល់ឃើញថាសម្មតិកម្មនេះគឺមិនគួរឲ្យជឿនោះទេ។

ដោយផ្ទាល់ខ្ញុំគិតថា អាចនឹងគួរឲ្យជឿជាងនេះប្រសិនបើនិយាយថា ពីរ៉ាមីត និងទីសក្ការៈបូជា Izumo Taisha ត្រូវបានសាងសង់ឡើងដោយកម្លាំងអាថ៌កំបាំងណាមួយកាលពីអតីតកាល ហើយពួកគេត្រូវបានគោរពបូជាដូចជាអាទិទេពព្រះអាទិត្យ។ យ៉ាងណាមិញ នេះគ្រាន់តែជាយោបល់ផ្ទាល់របស់ខ្ញុំប៉ុណ្ណោះ។

រហូតមកដល់ពេលនេះ នៅមិនទាន់មានការសន្និដ្ឋានច្បាស់លាស់ទាក់ទងនឹងគោលបំណងនៃការសាងសង់ពីរ៉ាមីតឡើយ ហើយនៅតែមានសំណួរជាច្រើនទាក់ទងនឹងចម្ងល់ដែលថា តើពីរ៉ាមីតត្រូវបានសាងសង់ឡើងដោយនរណា? មានអរិយធម៌អ្វី…?

តើអ្នកយល់យ៉ាងណាចំពោះស្ថាបត្យកម្មដ៏អស្ចារ្យនេះ និងចំណុចស្រដៀងគ្នាដែលទាក់ទងនឹងទីសក្ការបូជាជប៉ុន?

Abe Kengo