ស្មារតីដ៏អស្ចារ្យដែលបង្កប់នៅពីក្រោយរូបរាងកាយសាច់ដុំ

ថ្ងៃអង្គារ 14/10/2025 | 17:34 ល្ងាច

ស្មារតីដ៏អស្ចារ្យដែលបង្កប់នៅពីក្រោយរូបរាងកាយសាច់ដុំ។

នៅថ្ងៃទី ១១ ខែមីនា ឆ្នាំ ២០១១ រញ្ជួយដីដ៏ធំមួយបានកើតឡើងនៅតំបន់ Tohoku ប្រទេសជប៉ុន។ បន្ទាប់ពីរញ្ជួយដីកើតឡើង រលកយក្សស៊ូណាមិបានវាយប្រហារ។

ជប៉ុនជាប្រទេសដែលកើតមានរញ្ជួយដីញឹកញាប់ ហើយក៏ជាកន្លែងដែលមានការស្រាវជ្រាវឈានមុខគេលើពិភពលោកខាងផ្នែកនេះផងដែរ។ ទោះជាយ៉ាងណា រលកយក្សស៊ូណាមិកើតឡើងជាអ្វីដែលមិនអាចព្យាករណ៍បានទេ ហើយបានឆក់យកជីវិតរបស់មនុស្សជាច្រើន។ ក្នុងចំណោមជនរងគ្រោះទាំងអស់ សាច់ញាតិរបស់ខ្ញុំចំនួន ៣ នាក់ក៏ត្រូវរលកបក់ទៅ និងបាត់បង់ជីវិតផងដែរ។

អំឡុងពេលដែលកើតមានគ្រោះមហន្តរាយ សមាជិកម្នាក់នៃកងកម្លាំងស្វ័យការពារជប៉ុនបានប្រញាប់ប្រញាល់ចូលរួមការជួយសង្គ្រោះ គាត់មានឈ្មោះថា Arima Katsuhiko ។

នៅពេលនោះ Arima កំពុងឈប់សម្រាកវិស្សមកាល ហើយគាត់ក៏ជាជនរងគ្រោះម្នាក់ក្នុងចំណោមជនរងគ្រោះនៃគ្រោះមហន្តរាយរលកយក្សស៊ូណាមិផងដែរ។

ក្នុងស្ថានភាពទឹកបោកបក់យ៉ាងខ្លាំងរហូតដល់ថ្នាក់អាចបោកបក់ផ្ទះ និងរថយន្ត គាត់បានព្យាយាមដើរដើម្បីចេញទៅក្រៅ។

នៅតាមផ្លូវ គាត់បានឃើញស្ត្រីម្នាក់ត្រូវចរន្តទឹកហូរបោកបក់ ហើយបានប្រើដៃម្ខាងលើកនាងឡើង។ ដៃម្ខាងទៀត គាត់បានជួយសមាជិកកងកម្លាំងស្វ័យការពារម្នាក់ដែលត្រូវចរន្តទឹកហូរបោកបក់ បន្ទាប់មកឱបពួកគេទាំងពីរនាក់ដើរជាង ៣០០ ម៉ែត្រ ដើម្បីនាំពួកគេឡើងដំបូលផ្ទះដោយសុវត្ថិភាព។

អំឡុងពេលដែលចរន្តទឹកហូរយ៉ាងខ្លាំង ដែលសូម្បីតែដើរម្នាក់ឯងក៏ពិបាក គាត់បានធ្វើរឿងដែលហាក់បីដូចជាមិនអាចទៅរួច ដោយបាននាំមនុស្សពីរនាក់តាម និងបន្តជម្លៀសចេញ។

ដោយមើលឃើញការលំបាកនោះ ស្រ្តីដែលត្រូវបានជួយសង្គ្រោះបាននិយាយថា៖

“ប្រសិនបើនាំខ្ញុំតាមប្រាកដជាពិបាកណាស់។ សូមបងទុកខ្ញុំនៅទីនេះ ហើយសង្គ្រោះខ្លួនឯងទៅចុះ។”
“សូមកុំនិយាយដូច្នេះ! កុំចុះចាញ់រហូតដល់នាទីចុងក្រោយ!”

ថ្វីត្បិតតែ ពួកគេទាំងបីនាក់បានជ្រកកោននៅលើដំបូលផ្ទះដោយសុវត្ថិភាព នៅមានមនុស្សជាច្រើនទៀតកំពុងត្រូវទឹកបោកបក់។ Arima បានប្រើឈើដែលរសាត់ដើម្បីធ្វើជាក្បូនយ៉ាងសាមញ្ញមួយ ហើយត្រឡប់ទៅកាន់កន្លែងដែលមានចរន្តទឹកហូរម្នាក់ឯង ដើម្បីជួយសង្រ្គោះមនុស្ស។

រាងកាយទាំងមូលទទឹកជោក គាត់មិនបានដេក ឬសម្រាករហូតដល់ព្រឹកបន្ទាប់ និងបានជួយសង្គ្រោះជីវិតមនុស្ស ១៨ នាក់។

ជាធម្មតា Arima ចូលចិត្តហ្វឹកហាត់សាច់ដុំ ហើយដោយសារតែរាងកាយទទួលបានការហ្វឹកហាត់យ៉ាងឧស្សាហ៍ព្យាយាម ទើបអាចបង្ហាញពីកម្លាំងរឹងមាំក្នុងគ្រាស្លាប់រស់បែបនេះ។

កាលពីសម័យបុរាណ សាមូរ៉ៃក៏មិនដែលមើលរំលងការហ្វឹកហាត់កាយសម្បទាឡើយ។

ទោះបីជារស់នៅក្នុងសម័យកាលដែលគ្មានសង្គ្រាមក៏ដោយ ពួកគេនៅតែហ្វឹកហាត់ជានិច្ច។

មូលហេតុដោយសារពួកគេតែងតែទទួលបានការបង្រៀនថា៖

“ក្នុងរាងកាយដែលទទួលបានការបណ្តុះបណ្តាលល្អ តែងតែមានដួងព្រលឹងដែលសុចរិត។”

Arima មិនខុសអ្វីពីសាមូរ៉ៃនៅសម័យថ្មីមួយរូបនោះទេ មិនត្រឹមតែរូបរាងខាងក្រៅរឹងមាំប៉ុណ្ណោះទេ ថែមទាំងមានភាពក្លាហាន គ្រប់យ៉ាងពិតជាគួរឲ្យសរសើរណាស់។

សព្វថ្ងៃនេះ ការហាត់ប្រាណក៏កំពុងពេញនិយមនៅប្រទេសកម្ពុជាផងដែរ។ ប្រហែលជាយើងទាំងអស់គ្នាក៏មានអ្នកចូលចិត្តហាត់ប្រាណ ហើយទៅកាន់កន្លែងហាត់ប្រាណជាប្រចាំ។ ដើម្បីហាត់ប្រាណជារៀងរាល់ថ្ងៃ យើងម្នាក់ៗមានហេតុផលផ្សេងគ្នា។ ពេលខ្លះដើម្បីសុខភាពល្អជាងមុន ពេលខ្លះទៀតដើម្បីរាងកាយដែលខ្លួនប្រាថ្នាចង់បាន។ មិនថាព្រោះតែមូលហេតុអ្វីក៏ដោយ ការធ្វើលំហាត់ប្រាណជាប់លាប់នឹងជួយឲ្យរាងកាយរបស់យើងមានសុខភាពល្អ អាចការពារមនុស្សជាទីស្រឡាញ់ក្នុងស្ថានភាពគ្រោះថ្នាក់ដូចជាពេលដែលត្រូវការកម្លាំងកាយ។

ចូរយើងរៀបចំផែនការ និងហ្វឹកហាត់ជារៀងរាល់ថ្ងៃទាំងអស់គ្នា!

Abe Kengo