តើអ្វីជាសត្រូវនៃការអភិវឌ្ឍទីក្រុង? សម្រង់​ពាក្យ​សម្តី​របស់​បុគ្គល​​​ដែល​​បាន​ជួយ​ឲ្យ Tokyo ស្តារ​ឡើង​វិញ។

តើអ្វីជាសត្រូវនៃការអភិវឌ្ឍទីក្រុង?

សម្រង់ពាក្យសម្តីរបស់បុគ្គលដែលបានជួយឲ្យ Tokyo ស្តារ​ឡើងវិញ។

Tokyo – ជាទីក្រុងមួយក្នុងចំណោមទីក្រុងដែលធំឈានមុខគេលើពិភពលោក ដែលធ្លាប់បាន​ដួលរលំនៅវេលាម៉ោង ១១:៥៨ ព្រឹក ថ្ងៃទី ១ ខែកញ្ញា ឆ្នាំ ១៩២៣ ។ មូល​ហេតុ​ដោយ​​សារ​​រញ្ជួយដី​ខ្លាំង​នៅ Kanto ជាការរញ្ជួយដីដ៏គួរឲ្យភ័យខ្លាច​បំផុត ហើយចំណុចកណ្តាលនៃរញ្ជួយដីនេះស្ថិតនៅខេត្ត Kanagawa ។ គ្រោះ​​មហន្តរាយ​នេះ​បាន​បណ្តាល​ឲ្យ​មាន​អ្នក​ស្លាប់ ​និង​​របួស​​យ៉ាង​​ច្រើន​​នាក់ ជា​​មួយ​​​នឹង​​​មនុស្ស ១០៥.០០០ នាក់​​បាន​​រង​​របួស និង​​ស្លាប់។

គ្រោះ​រញ្ជួយ​ដី​បាន​កើត​ឡើង​នៅពេលថ្ងៃត្រង់ រំញ័រយ៉ាងខ្លាំងបានបណ្តាលឲ្យមាន​ភ្លើង​ឆាបឆេះ​ចង្ក្រាន​​​បាយ​ក្នុង​ផ្ទះ​បង្ក​ទៅ​ជា​អគ្គីភ័យ។ អគ្គីភ័យក្នុងពេលដំណាលគ្នាជាង ១០០ ករណីបានផ្ទុះឡើង​​នៅ​​ទូទាំង​​ទីក្រុង​​តូក្យូ ដែល​បណ្តាល​ឲ្យ​មនុស្ស​ស្លាប់​យ៉ាង​ច្រើន និង​​ឆេះ​​ទីក្រុង​​ទាំង​​មូល។

ក្នុងខ្លឹមសារអត្តបទថ្ងៃនេះ យើងខ្ញុំសូមណែនាំដល់ប្រិយមិត្តអ្នកអាននូវសម្រង់សម្ដីដ៏ល្បីមួយចំនួន​​របស់​​លោក Goto Shinpei – ជាបុរសដែលបានអនុវត្តដំណើរការស្តារប្រទេសជប៉ុនឡើងវិញ បន្ទាប់​​ពី​​គ្រោះ​មហន្តរាយ​បាន​ដុត​បំផ្លាញ​ប្រទេស​នេះ។

ក្នុងនោះមានពាក្យសម្តីផ្តាំផ្ញើសំខាន់ៗជាច្រើន ដែលប្រហែលជាទីក្រុងកំពុងអភិវឌ្ឍនៅប្រទេស​កម្ពុជា​​អាច​​អនុវត្ត​ដើម្បី​បន្ត​រីក​ចម្រើន​នា​ពេល​អនាគត។

លោក Goto Shinpei ជាមនុស្សម្នាក់ដែលមានជំនាញច្រើនដូចជា៖ ជាវេជ្ជបណ្ឌិត មន្ត្រី និងជាអ្នកនយោបាយម្នាក់ផងដែរ។

លោកធ្លាប់ជាមន្ត្រីជាន់ខ្ពស់ម្នាក់នៅពេលដែលតៃវ៉ាន់ជាផ្នែកមួយនៃប្រទេសជប៉ុន និងជាប្រធាន​នៃ​ប្រព័ន្ធ​ផ្លូវដែកដែលជប៉ុនបានសាងសង់នៅម៉ាន់ជូរី ជាប្រទេសដែលធ្លាប់ត្រូវបានបង្កើតឡើងនៅ​ភាគ​ឦសាន​ប្រទេស​ចិន។

ក្រៅពីនេះ លោកថែមទាំងធ្លាប់កាន់តំណែង​ជា​រដ្ឋមន្ត្រី​ចំនួន​បី និង​ជា​ប្រមុខ​ក្រុង​តូក្យូ​នៅ​ពេល​នោះ។

សត្រូវទាំងបួននៃទីក្រុង

នេះជាសេចក្តីថ្លែងការណ៍មួយក្នុងចំណោមនោះរបស់លោក Goto Shinpei នៅពេលដែលគាត់នៅកាន់​តំណែង​ជាប្រ​មុខ​ទីក្រុង​តូក្យូ៖

“ទីក្រុងមានសត្រូវចំនួនបួន។ សង្គម និងប្រទេសជាតិត្រូវលុបបំបាត់ចំណុចទាំងនេះ។

សត្រូវទាំងបួននោះគឺ៖ ភាពក្រីក្រ ជំងឺ ភាពល្ងង់ខ្លៅ និងភាពព្រងើយកន្តើយ។”

សណ្តាប់​ធ្នាប់​សាធារណៈ​ក្នុង​ទីក្រុង​មិន​អាច​រក្សា​បាន​ទេ ប្រសិនបើមានអ្នកក្រច្រើនរហូតដល់ថ្នាក់​​មិន​អាច​ជួយ​ពួក​គេ​បាន។

ទីក្រុង​ដែលមាន​ជំងឺ​រាតត្បាត​នឹងមិនអាចកើន​ចំនួន​ប្រជាជន​បាន​ទេ។

ទីក្រុងដែលគ្មានការអប់រំជាសកលនឹងមិនអាចអភិវឌ្ឍសេដ្ឋកិច្ចបានទេ។

ហើយជាការពិតណាស់ ទីក្រុងដែលពោរពេញដោយមនុស្សឃោរឃៅ គ្មានបេះដូង មិនគិតពីអ្នកដទៃ​ក៏មិន​អាច​អភិវឌ្ឍ​បាន​ដែរ។

ចំណុចទាំងនេះស្តាប់ទៅដូចជាធម្មតា ប៉ុន្តែប្រហែលជានៅលើលោកនេះមានមនុស្សតិចណាស់ដែល​អាច​ប្រកាសយ៉ាងក្លាហាន និង​ពិត​ជា​បាន​អនុវត្ត​ដូច​ជា​លោក។

លោកជឿជាក់ថា ការជម្រុញមនុស្សគឺជាគន្លឹះដើម្បីអភិវឌ្ឍទីក្រុង ហើយបានបន្តអនុវត្តយ៉ាងខ្ជាប់​ខ្ជួន។

ហេតុនេះហើយ ទើបទីក្រុងតូក្យូត្រូវបានស្តារឡើងវិញក្លាយជាទីក្រុងឈានមុខគេនៅលើពិភព​លោក។

គួរឲ្យស្តាយ ទីក្រុងតូក្យូសព្វថ្ងៃនេះ មិនមែនជាទីក្រុងដែលលោកធ្លាប់ប្រាថ្នាចង់ឆ្ពោះទៅរកទៀត​ឡើយ។

ហើយ​ឥឡូវ​នេះ ទីក្រុង​តូក្យូ​កំពុង​ស្ថិត​ក្នុង​ស្ថានភាព​នៅ​ទ្រឹង។

ខាង​ក្រោម​នេះជាសម្រង់ពាក្យសម្តីល្បីៗមួយចំនួនដែលលោកបានបន្សល់ទុក៖

“វិធានការសេដ្ឋកិច្ចដ៏អស្ចារ្យបំផុតគឺអភិវឌ្ឍមនុស្ស។”

ដោយសារមនុស្សជាកត្តានៃការអភិវឌ្ឍសេដ្ឋកិច្ច ដូច្នេះការជម្រុញចំណេះដឹង និងការអភិវឌ្ឍមនុស្ស​គឺ​ជា​រឿង​ដែល​ងាយ​យល់។

លោក Goto Shinpei ជាមនុស្សដែលតែងតែផ្តោតសំខាន់លើអភិវឌ្ឍមនុស្ស ថែមទាំងបន្សល់ទុកពាក្យដូចខាងក្រោម៖

“​អ្នក​រាល់​គ្នា​ស្តាប់​ដោយប្រុងប្រយ័ត្ន និង​ចាំឲ្យច្បាស់!

មនុស្ស​ដែលស្លាប់ទៅហើយបន្សល់ទុកទ្រព្យសម្បត្តិមានឋានទាប។

មនុស្សដែលស្លាប់ទៅហើយបន្សល់ទុកការងារមានឋានមធ្យម។

មនុស្សដែលស្លាប់ទៅហើយបន្សល់ទុក​មនុស្ស​មានឋាន​ខ្ពង់ខ្ពស់។”

ទ្រព្យសម្បត្តិមិនមែនជាអ្វីដែលចិញ្ចឹម និងអភិវឌ្ឍមនុស្សនោះទេ។

ផ្ទុយ​ទៅ​វិញ ទ្រព្យសម្បត្តិដែល​បន្សល់​ទុកអាចនឹងធ្វើឲ្យអ្នកដទៃក្លាយជាមនុស្សដែលពឹងលើគេ លែង​​មាន​​​ការ​​​ខិត​​​ខំ​​ប្រឹង​​ប្រែង។

ការងារដែលត្រូវទុកចោល នឹងមានអ្នកផ្សេងបន្ត ដោយមិនបង្កើតអ្វីថ្មីនោះទេ។

មធ្យោបាយដែលត្រឹមត្រូវគឺជម្រុញមនុស្សដែលមានសមត្ថភាពបង្កើតការងារថ្មី និងអភិវឌ្ឍការ​ងារ​នោះ ហើយ​នោះគឺ​ជា​គន្លឹះ​នៃ​ការ​អភិវឌ្ឍ​ទីក្រុង និង​ប្រទេស​ជាតិ។

បច្ចុប្បន្ននេះ ទីក្រុងនៅប្រទេសកម្ពុជាកំពុងអភិវឌ្ឍក្នុងល្បឿនយ៉ាងលឿន។

ដូច្នេះ តើចំណុចអ្វីដែលចំបាច់​សម្រាប់​ការ​អភិវឌ្ឍ​យូរអង្វែង?

នេះ​មិន​ត្រឹម​តែ​ជា​ចម្ងល់​សម្រាប់​រដ្ឋាភិបាល និង​ថ្នាក់​ដឹកនាំ​ប្រទេស​ប៉ុណ្ណោះ​ទេ ប៉ុន្តែ​​យើង​ម្នាក់ៗ​ក៏​​ត្រូវ​​គិត​​ពិចារណា​ផង​ដែរ។ បើ​មិន​ដូច្នេះ​ទេ យើង​អាច​បាត់បង់ទិសដៅ​ដ៏​ត្រឹម​ត្រូវ​នា​ពេលអនាគត។

Abe Kengo