អាថ៌កំបាំងទាក់ទងនឹង “ព្រៃធ្វើអត្តឃាត” ក្រោមជើងភ្នំហ្វូជី

អាថ៌កំបាំង​ទាក់​ទង​នឹង “ព្រៃ​ធ្វើ​អត្តឃាត” ក្រោម​ជើង​ភ្នំ​ហ្វូជី។

ភ្នំហ្វូជី – ជាកន្លែងដែលប្រហែលជាយើងទាំងអស់គ្នាស្គាល់។ នេះជាភ្នំដែលខ្ពស់ជាងគេ ហើយក៏ជាភ្នំដែល​ស្រស់ស្អាតបំផុតនៅប្រទេសជប៉ុនផង​ដែរ។

ក្រោមជើងភ្នំជាតំបន់ព្រៃធំទូលាយ ព្រៃនេះមានឈ្មោះហៅថា Aokigahara ឬគេហៅម្យ៉ាងទៀត​ថា Jukai (សមុទ្រដើមឈើ) ដែលល្បីនឹង​ទេស​ភាព​ស្ងប់​ស្ងាត់នៅ​ខាង​ក្រោមភ្នំភ្លើង។ ឈ្មោះហៅថា “Jukai” មាន​ប្រភព​មក​ពី​សំឡេង​ស្លឹក​ឈើ​ដែល​ប្រៀប​ដូច​ជា​រលក​សមុទ្រ និងឫសដើមឈើនៅ​លើ​ផ្ទៃ​ដី។ ហើយកាន់តែពិសេសជាងនេះគឺ​ មានពាក្យចចាមអារ៉ាមអាថ៌កំបាំងជាច្រើននិយាយពីព្រៃ​នេះ។

ឧទាហរណ៍ដូចជា៖

• ត្រីវិស័យមិនដំណើរការនៅទីនេះទេ
• សាកសពមាននៅគ្រប់ទីកន្លែង
• មានសត្វព្រៃវាយប្រហារមនុស្ស
• មានភូមិមួយត្រូវបានសាងសង់ឡើងដោយអ្នកដែលមកកាន់ទីនេះដើម្បីធ្វើអត្តឃាត
• ជាទីតាំងនៃសាសនាអាថ៌កំបាំង…

ត្រឹមចំណុចទាំងនេះ ​ប្រហែល​ជា​អ្នកនឹងចាប់ផ្តើមស្រមៃ​គិតឃើញទិដ្ឋភាព​ដ៏​គួរ​ឲ្យ​ខ្លាចរបស់ភ្នំហ្វូជី។ ដើម្បីបញ្ជាក់​អំពី​ពាក្យ​ចចាម​អារ៉ាម​ទាំង​នេះ ចូរ​យើង​តាម​ដាន​ខ្លឹម​សារ​អត្តបទ​ខាងក្រោម​ទាំង​អស់​គ្នា។

ត្រីវិស័យមិនដំណើរការ

មនុស្សជាច្រើនធ្លាប់បានពិសោធន៍ជាក់ស្តែង ហើយអាចប្រើត្រីវិស័យដើម្បីចេញពីព្រៃនេះ។ ដូច្នេះហើយ ពាក្យ​ចចាម​​អារ៉ាម​​នេះ​​មិន​​ពិត​ឡើយ។

ទោះជាយ៉ាងណា មានរបាយការណ៍និយាយថា កម្មវិធីត្រីវិស័យនៅលើស្មាតហ្វូនមិនដំណើរការធម្មតានោះទេ។ ប៉ុន្តែ​ក្រោយ​មក គេបែរជារកឃើញថា ចំណុចនេះមកពីនៅខាងក្នុងស្រោមទូរសព្ទ​មាន​មេដែក ទើប​ធ្វើ​ឲ្យ​ប៉ះ​ពាល់​ដល់​សញ្ញា។

ដូច្នេះប្រសិនបើអ្នកឃើញថា កម្មវិធីផែនទី ឬត្រីវិស័យរបស់ខ្លួនដំណើរការមិនត្រឹមត្រូវ ទាំងដែលនៅ​ក្នុងទីក្រុងក៏ដោយ សូម​សាក​ល្បង​ពិនិត្យ​មើល​ស្រោម​ទូរស័ព្ទ​ឡើង​វិញ។

សាកសពមាននៅគ្រប់ទីកន្លែង

នៅក្រៅប្រទេស ព្រៃនេះត្រូវបានគេហៅថា Suicide Forest ដែលមានន័យថា “ព្រៃធ្វើអត្តឃាត” ។ ពាក្យ “Aokigahara” ថែមទាំងត្រូវបានគេប្រើប្រៀបដូចជាវាក្យស័ព្ទសម្រាប់បំភ័យ។

ដូចដែលអ្នកបានដឹងហើយថា ជប៉ុនជាប្រទេសមួយក្នុងចំណោមប្រទេសដែលមានអត្រាធ្វើអត្តឃាត​ខ្ពស់។

ទោះជាយ៉ាងនេះក្តី មនុស្សមួយចំនួនមិនធ្វើអត្តឃាតនៅកន្លែងសាធារណៈនោះទេ ព្រោះមិនចង់បង្កបញ្ហាដល់អ្នកដទៃ ដូច្នេះ​​ទើប​ពួក​គេ​មក​កាន់​ព្រៃ​នេះ បញ្ចប់​ជីវិត​ខ្លួន​ឯង​ដោយ​គ្មាន​នរណាម្នាក់​មើល​ឃើញ។

ហេតុដូច្នេះ ប៉ូលិស​ត្រូវ​ដើរ​ល្បាត​ជា​ប្រចាំ​ដើម្បី​ប្រមូល​សាកសព ហើយជារៀងរាល់ឆ្នាំ​រក​ឃើញ​សាក​សព​​ប្រហែល ៣០ ទៅ ៤០​ សាកសព។ ប្រសិនបើរាប់ទាំងសាកសពដែលមិនត្រូវបានរកឃើញ ចំនួន​អាច​នឹង​ច្រើន​ជាង​នេះ។

ហើយជាចុងក្រោយ បើគិតពិចារណាលើចំណុច ប៉ូលិសត្រូវល្បាតជាប្រចាំ ដូច្នេះច្បាស់ណាស់ដែល​ថា “ការស្លាប់ដែលមិនរំខាននរណាម្នាក់” ក៏មិនត្រូវទាំងស្រុងនោះដែរ។

កាលពីពេលថ្មីៗនេះ ការល្បាតក៏ត្រូវបានពង្រឹងបន្ថែមផងដែរ ដោយប្រើប្រាស់យន្តហោះគ្មានមនុស្ស​បើក ដូច្នេះ​​ឳកាស​មើល​ឃើញ​សាក​សព​នៅ​ពេល​ដែល​ចូលព្រៃ​គឺ​កម្រ​ណាស់។

ហើយបើទោះបីជាសំណាងអាក្រក់មើលឃើញក៏ដោយ នៅទីនេះ ក្រោយរយៈពេលប្រហែល ២ ខែ សាក​សព​របស់អ្នកស្លាប់​សល់​ត្រឹម​គ្រោង​ឆ្អឹង​ប៉ុណ្ណោះ។

មានសត្វព្រៃវាយប្រហារមនុស្ស

ប្រហែលជាសត្វក្តាន់ជាប្រភេទសត្វព្រៃដែលមានច្រើនក្នុងព្រៃនេះ ពួកវាមិនមែនជាប្រភេទសត្វគ្រោះថ្នាក់នោះទេ ប៉ុន្តែប្រសិនបើក្នុងករណីសត្វក្តាន់ដ៏ធំរត់ចេញមួយរំពេច អាចបណ្តាលឲ្យមានការ​ភ្ញាក់​ផ្អើល និង​ភ័យ​ស្លន់​ស្លោ។

ខ្លាឃ្មុំត្រូវបានគេចាត់ទុកថាអាចនឹងបង្ហាញខ្លួននៅទីនេះ។ យ៉ាងណាមិញ ​មិន​មាន​សត្វ​ដែលអាថ៌កំបាំង ឬ​​ចម្លែក​​​នោះ​ទេ ដូច្នេះ​អ្នក​ទាំង​អស់​គ្នា​កុំ​សង្ឃឹម​ខ្លាំង​ពេក។

ភូមិរបស់អ្នកដែលចង់ធ្វើអត្តឃាត

មិនមានភូមិបែបនេះនោះទេ អាចនិយាយបានថា រហូតមកដល់ពេលនេះមិនទាន់មាននរណា​រក​ឃើញ​ភូមិ​បែប​នេះ​ឡើយ។

ទោះជាយ៉ាងណា ហាក់បីដូចជាមានការតាំងទីលំនៅជាផ្លូវការ ដែលស្ថិតនៅជិតព្រៃ។

ជាទីតាំងនៃសាសនាអាថ៌កំបាំង

តាំងពីយូរយារណាស់មកហើយធ្លាប់មានកន្លែងបែបនេះមែន ប៉ុន្តែនោះជារឿងកាលពីអតីតកាល​ទៅ​ហើយ។ សព្វ​ថ្ងៃ​នេះ នៅ​មាន​សាសនា​ជា​ច្រើន​គោរព​បូជា​ភ្នំ​ហ្វូជី ប៉ុន្តែភាគច្រើនកន្លែង​គោរព​​បូជា​សុទ្ធ​តែ​ស្ថិត​នៅ​ខាង​ក្រៅ​ព្រៃ។

មូលហេតុដោយសារតែគ្មានផ្លូវងាយស្រួលសម្រាប់ចូលទៅក្នុងព្រៃជ្រៅ ហើយអ្វីដែលសំខាន់ជាងនេះគឺ នៅពេលដែលចូលទៅក្នុងព្រៃគឺលែងឃើញភ្នំហ្វូជីទៀតហើយ ព្រោះតែព្រៃឈើក្រាស់ធ្វើឲ្យមើល​មិន​ឃើញ។ ដើមឈើ​ក្នុង​ព្រៃដុះ​លូតលាស់យ៉ាងលឿន រហូតដល់ថ្នាក់ពេលងើយទៅលើមិនឃើញ​អ្វី​ក្រៅ​ពី​ពណ៌​បៃ​តង​នោះ​ទេ។

ហើយប្រសិនបើមើលមិនឃើញ “វត្ថុគោរពបូជា” ដូច្នេះការសាងសង់ទីសក្ការៈគ្មានន័យអ្វីឡើយ។

ភ្នំហ្វូជី ជាទេសភាពដ៏ស្រស់ស្អាតដែលទាក់ទាញចិត្តរបស់មនុស្ស។ ហើយព្រៃឈើដែលនៅខាងក្រោម​ជើង​ភ្នំជាជម្រកដ៏សំខាន់សម្រាប់សត្វធម្មជាតិជាច្រើនផងដែរ។ ដើម្បីការរស់រានមានជីវិត ប្រហែល​ជា​មនុស្ស​មិន​គួរ​ចូល​ជ្រៅ​ពេក​នោះ​ទេ។

ម្យ៉ាងវិញទៀត តើកន្លែងនេះអាចជាទឹកដីដែលមានព្រលឹងវិញ្ញាណច្រើនរស់នៅដែរទេ… ព្រលឹងរបស់​អ្នក​ដែល​មក​កាន់​ទីនេះ ហើយ​ជ្រើស​យក​ព្រៃ​ធ្វើ​ជា​កន្លែង​សម្រាប់​បញ្ចប់​ជីវិត…។

Abe Kengo