“Otaku” ក្នុងព្រឹត្តិការណ៍កីឡាអត្តពលកម្មពិភពលោកឆ្នាំ ២០២៥

ថ្ងៃអង្គារ 07/10/2025 | 15:45 ល្ងាច

“Otaku” ក្នុងព្រឹត្តិការណ៍កីឡាអត្តពលកម្មពិភពលោកឆ្នាំ ២០២៥ ។

នៅឆ្នាំ ២០២៥ ការប្រកួតកីឡាអត្តពលកម្មពិភពលោកដែលប្រារព្ធឡើងនៅទីក្រុងតូក្យូ។ នេះជាការប្រកួតដើម្បីស្វែងរកអត្តពលិកដែលឈានមុខគេលើពិភពលោក។

ដោយត្រូវបានធ្វើឡើងនៅទីក្រុងតូក្យូ អត្តពលិក “otaku” ជាច្រើន (អ្នកដែលចូលចិត្តវប្បធម៌ anime, manga) មានអារម្មណ៍រំភើបយ៉ាងខ្លាំង។ មិនត្រឹមតែជាការប្រកួតប្រជែងល្បឿនប៉ុណ្ណោះទេ ប៉ុន្តែការប្រកួតនៅឆ្នាំនេះប្រៀបដូចជាការប្រកួតកម្រិត “otaku” ដោយបានក្លាយជាព្រឹត្តិការណ៍ដ៏គួរឲ្យចាប់អារម្មណ៍ និងមិនធម្មតា។

មុនពេលចាប់ផ្តើម ឬបន្ទាប់ពីការប្រកួតបញ្ចប់ កាមេរ៉ានឹងតម្រង់ឆ្ពោះទៅរកអត្តពលិកទាំងអស់។ នៅពេលដែលមើលឃើញកាមេរ៉ាបង្វែរមករកឃើញខ្លួន អត្តពលិកទាំងអស់ធ្វើស្ទីលថតរូប ដែលជាស្ទីលល្បីក្នុង anime ។ មិនដឹងថា ហេតុអ្វីបានជាការពេញនិយមនេះបែរជាល្បីក្នុងព្រឹត្តិការណ៍នៅឆ្នាំនេះឡើយ។

ក្នុងចំណោមនោះ ឈ្មោះដែលគួរឲ្យកត់សម្គាល់បំផុតគឺ Noah Lyles ជាអត្តពលិកជនជាតិអាមេរិក។ គាត់ជា otaku ពិតប្រាកដមួយរូប មិនត្រឹមតែខ្លួនគាត់ប៉ុណ្ណោះទេ សូម្បីតែអ្នកគាំទ្រក៏ទទួលស្គាល់ចំណុចនេះផងដែរ។ Noah Lyles ជាអ្នកដែលកំពុងជាប់ចំណាត់ថ្នាក់លេខ ១ លើពិភពលោកនៃវិញ្ញាសារត់ចម្ងាយ ១០០ ម៉ែត្រ។ អាចនិយាយម្យ៉ាងទៀតថា គាត់គឺជា “otaku លឿនបំផុតនៅលើពិភពលោក” ។

ចំពោះភាពលេចធ្លោរបស់ Lyles អត្តពលិកផ្សេងទៀតក៏មិនចាញ់ប៉ុន្មានដែរ។

អ្នកតំណាងម្ចាស់ផ្ទះជប៉ុន Murata Rashid បានបង្ហាញស្ទីលខុសៗគ្នាក្នុងវគ្គណែនាំខ្លួនទាំងបីជុំមុនពេលចូលដល់វគ្គផ្តាច់ព្រ័ត្រ។

អត្តពលិកស្រីដូចជា Nakajima Hitomi និង Yamamoto Yuma ក៏បានចូលរួមការនិយមនេះដែរ។

ក្នុងវិញ្ញាសាសម្រាប់បុរស អត្តពលិកដែលគេហៅថា “otaku លឿនជាងគេនៅជប៉ុន” – Uzawa Towa – ក៏បានចូលរួមក្នុង “ការប្រកួត otaku” នេះផងដែរ។

ថ្វីត្បិតតែ មានតែអ្នកដែលស្រលាញ់គាំទ្រយ៉ាងខ្លាំងចំពោះ anime ប៉ុណ្ណោះ ទើបយល់អំពីស្ទីលដែលអត្តពលិកបានបង្ហាញ ប៉ុន្តែបរិយាកាសនៅកន្លែងទស្សនាបែរជារំភើបយ៉ាងខ្លាំង។ ហាក់បីដូចជានៅកន្លែងទស្សនា មានអ្នកទស្សនាជាច្រើនគឺជា otaku ម្នាក់ដែលបានមកគាំទ្រ។

ត្រឡប់ទៅរកចំណាត់ថ្នាក់ “otaku លឿនបំផុតនៅលើពិភពលោក” – Noah Lyles នៃក្រុមរបស់អាមេរិក។ មិនត្រឹមតែពេលចូលរួមព្រឹត្តិការណ៍នេះប៉ុណ្ណោះទេ សូម្បីតែក្នុងជីវិតប្រចាំថ្ងៃ គាត់ជា otaku ពិតប្រាកដមួយរូប។

នៅពេលដែលវិចិត្រករ manga ល្បីឈ្មោះម្នាក់ជូនគាត់រូបគំនូរដែលគូរដោយដៃ គាត់ពិតជារំភើបយ៉ាងខ្លាំង។

ព្រឹត្តិការណ៍លើកនេះក៏មិនមែនជាលើកដំបូងដែលគាត់ធ្វើស្ទីលតាមបែប anime នោះដែរ។ ក្នុងការប្រកួតដែលធ្វើឡើងនៅប្រទេសផ្សេងទៀត គាត់តែងតែធ្វើស្ទីលបែបនេះ។ ជាសកម្មភាពដែលបង្ហាញពីការស្រឡាញ់ចូលចិត្តយ៉ាងខ្លាំងចំពោះវប្បធម៌ជប៉ុន។

នេះជារូបភាពមួយចំនួនដែលបង្ហាញពីស្ទីលរបស់អត្តពលិក។ ប្រសិនបើអាចសម្គាល់ថាស្ទីលនោះស្ថិតក្នុងរឿង anime មួយណា និងតួអង្គនីមួយៗ ប្រាកដណាស់ អ្នកក៏ជា otaku ម្នាក់ផងដែរ។

អត្តពលិកទាំងអស់មើលទៅពិតជារីករាយ និងពោរពេញទៅដោយថាមពល។ ហើយប្រសិនបើចំណុចនេះអាចបំផុសគំនិតជួយឲ្យបុគ្គលដែលមិនមើលអត្តពលកម្ម ចាប់ផ្តើមចាប់អារម្មណ៍ និងរីករាយជាមួយកីឡានេះ ប្រាកដណាស់ អ្នកដែលស្រលាញ់ចូលចិត្តកីឡា ជាពិសេសអត្តពលិកទាំងអស់នឹងសប្បាយចិត្ត ហើយទទួលបានការលើកចិត្តយ៉ាងខ្លាំង។

តើនេះគ្រាន់តែជាបាតុភូតពិសេសនៅទីក្រុងតូក្យូ ឬអាចនឹងក្លាយជាទម្លាប់ថ្មីសម្រាប់ការប្រកួតកីឡាអត្តពលកម្មពិភពលោក?

យើងទាំងអស់គ្នានឹងចាំមើលថា តើនឹងមានអ្វីកើតឡើងក្នុងការប្រកួតបន្ទាប់។

Abe Kengo