“ខណ្ឌសីមា” នៅទីក្រុងតូក្យូ – ហុងស៊ុយជប៉ុន

“ខណ្ឌសីមា” នៅទីក្រុងតូក្យូ – ហុងស៊ុយជប៉ុន។

ហុងស៊ុយជាទស្សនៈ​ដែល​មាន​ប្រភព​មក​ពី​ប្រទេស​ចិន។

ទស្សនៈហុងស៊ុយក៏មានវត្តមាននៅប្រទេសជប៉ុនផងដែរ ប៉ុន្តែបានវិវត្តន៍តាមរបៀបមួយផ្សេងទៀត។ 

ហើយប្រហែលជាហុងស៊ុយជប៉ុននៅតែត្រូវបានអនុវត្តក្នុងគម្រោងរៀបចំទីក្រុងទំនើប ចំណុចនេះ​​អាច​ជាកត្តាដែលបានរួមចំណែកធ្វើឲ្យទីក្រុង​តូក្យូ​ក្លាយ​​ជា​ទីក្រុង​ឈាន​មុខ​គេ​នៅ​លើ​ពិភព​លោក។

ហុងស៊ុយ “បែបជប៉ុន”

ថ្វីត្បិតតែ ផ្អែកលើមូលដ្ឋានហុងស៊ុយប្រទេសចិន ប៉ុន្តែទស្សនៈដែលទាក់ទងនឹងទិសដៅរបស់ជប៉ុន​បែរ​ជា​មាន​លក្ខណៈ​ពិសេស។

ក្រៅពីនេះ ខណៈពេលដែលហុងស៊ុយចិនផ្តោតទៅលើរឿងល្អ និងរឿងអាក្រក់ ចំណែកឯហុងស៊ុយជប៉ុន​បែរជា​សង្កត់​ធ្ងន់​លើ​ការ​ជៀស​វាង​សំណាង​អាក្រក់។

ដោយ​មិនរកវិធីសាស្រ្តទាក់ទាញសំណាងល្អ ជនជាតិជប៉ុនបែរជាផ្តោតសំខាន់លើការលុបបំបាត់សំណាងអាក្រក់។ ជាចំណុចដែលបង្ហាញយ៉ាងច្បាស់ពីអត្តចរិត​ប្រុង​ប្រយ័ត្ន និង​ល្អិតល្អន់​របស់ប្រជាជន​ជប៉ុន។

Edo – ជាទីក្រុងដែលមានខណ្ឌសីមាដ៏កម្រនៅលើពិភពលោក

នៅសម័យសាមូរ៉ៃ ទីក្រុងតូក្យសព្វថ្ងៃធ្លាប់ត្រូវបានគេហៅថា Edo ។

នៅពេលដែល Tokugawa Ieyasu សម្រេចចិត្តជ្រើសយក Edo ជារដ្ឋធានី លោកបានប្រើប្រាស់ចំណេះ​​ដឹង​​ហុង​​ស៊ុយ​​ដើម្បី​​សាង​សង់​​ទីក្រុង។

ប្រាសាទ Edo ត្រូវបានសាងសង់នៅកណ្តាលទីក្រុង Edo ដែលសព្វថ្ងៃនេះជាព្រះបរមរាជវាំងជប៉ុន។

ពីទីតាំងស្ថិតនៅកណ្តាលនោះ ប្លង់ទីក្រុងទាំងមូលត្រូវបានរៀបចំយ៉ាងពិសេសដូចខាងក្រោម៖

• នៅទិសឦសានហៅថា “ច្រកទ្វារបិសាច” ត្រូវបានចាត់ទុកជាទិសដៅគ្មានសំណាងបើតាមហុងស៊ុយជប៉ុន លោកបានបញ្ជាឲ្យសាងសង់វត្តប្រាសាទ Kaneiji ដ៏​ធំ​នៅ Ueno ដើម្បីបង្ក្រាប។
• នៅភាគនិរតីហៅថា “ទ្វារខាងក្រោយរបស់បិសាច” លោកបានដាក់ទីសក្ការបូជា Hie និងវត្តប្រាសាទ Zojoji ដើម្បី​​បញ្ចៀស​រឿង​អាក្រក់។

ក្រៅពីនេះ ទន្លេ Sumida ធម្មជាតិក៏ត្រូវបានបែងចែកជាពីរ ឬជាបីផ្លូវដើម្បីនាំយក “ខ្យល់បរិសុទ្ធ” សាយ​ភាយ​ទូទាំង​ទីក្រុង។

“ព័ទ្ធសីមា” ទ្រង់ទ្រាយធំ

មិនត្រឹមតែទ្រង់ទ្រាយទីក្រុងប៉ុណ្ណោះទេ Edo ថែមទាំងត្រូវបានគ្របដណ្តប់ដោយផ្កាយដ៏ធំ​មួយ – ជា​និមិត្ត​រូប​នៃ​ការ​បង្ក្រាប​អំពើ​អាក្រក់ គេ​អាច​មើល​ឃើញ​ថា ផ្កាយត្រូវ​បាន​បង្កើត​ឡើង​ដោយ​ការ​តភ្ជាប់​ទីតាំង​ប្រាសាទ ទីសក្ការៈ និង​​បឹង​​ពិសិដ្ឋ។

ខណ្ឌសីមាដែលមានរូបរាងផ្កាយនេះ​ផ្អែក​លើ​ទស្សនៈ Onmyoji ជាគ្រូសីលដែលធ្លាប់​មាន​កាល​ពី​ជាង ១០០០ ឆ្នាំ​​មុន។

អ្វី​ដែល​គួរ​ឲ្យ​ភ្ញាក់​ផ្អើល​នោះ​គឺគំរូខណ្ឌសីមា​នេះ​ត្រូវ​បាន​បង្កើត​ឡើង​មុន​ពេល​មាន​ផែនទី​លម្អិតរបស់​ជប៉ុនទៅទៀត ប៉ុន្តែរូបរាងផ្កាយបែរជាល្អឥតខ្ចោះយ៉ាងខ្លាំង។

មិនត្រឹមតែ Edo ប៉ុណ្ណោះទេ សូម្បីតែ Kyoto និង Osaka នៅតំបន់ Kansai ក៏មាន “ខណ្ឌសីមា​ភព​ទាំង​ប្រាំ” ស្រដៀង​គ្នា​នេះ។

ហុងស៊ុយក្នុងសំណង់អគារទំនើប

ទីក្រុងតូក្យូបន្តអនុវត្តហុងស៊ុយទៅលើសំណង់អគារថ្មី

ឧទាហរណ៍ដូចជា Tokyo Skytree – និមិត្តរូបថ្មីនៃរាជធានីដែលបានបញ្ចប់នៅឆ្នាំ ២០១២ ជា​មួយ​នឹង​កម្ពស់ ៦៣៤ ម៉ែត្រ។

ស្ថិតនៅប្រទេសដែល​ងាយ​នឹងកើតមានគ្រោះ​មហន្តរាយ​ធម្មជាតិ សំណង់​នេះ​ត្រូវ​បាន​សាងសង់​ឡើង​​ដោយ​​ប្រើ​​បច្ចេក​វិទ្យា​ទំនើប​ដើម្បីការពាររញ្ជួយ​ដី។ ក្រៅពីនេះ ទីតាំងសាងសង់ប៉មនេះក៏ត្រូវបាន​ចាត់​ទុក​ថាមាន​សារៈ​សំខាន់​ដែលទាក់ទងនឹងហុងស៊ុយផងដែរ ព្រោះវាបានតភ្ជាប់ភ្នំហ្វូជីជាមួយនឹងទីសក្ការៈ Meiji Jingu នៅលើបន្ទាត់ត្រង់តែមួយ។

ភ្នំហ្វូជីជាភ្នំដែលខ្ពស់ជាងគេ និងស្រស់ស្អាតបំផុតនៅប្រទេសជប៉ុន ដែលត្រូវបានគេហៅថាភ្នំដ៏​ពិសិដ្ឋ ជាកន្លែងដែលមានវិញ្ញាណគង់នៅ។ ប្រសិនបើគូរបន្ទាត់ត្រង់មួយពីភ្នំហ្វូជីដល់ប្រាសាទ Meiji Jingu ជា​កន្លែង​ដែលត្រូវបានចាត់ទុកថាមានថាមពលខ្លាំងបំផុតនៅទីក្រុងតូក្យូ យើងនឹង​មើល​ឃើញ​សំណង់ Skytree នៅលើបន្ទាត់ត្រង់នេះ។

ឧទាហរណ៍មួយទៀតគឺខ្សែរថភ្លើង Yamanote ខ្សែរថភ្លើងដែលរត់ជារង្វង់ជុំវិញទីប្រជុំជនទីក្រុង​តូក្យូ ហើយក៏ត្រូវបានចាត់​ទុក​ជា​ផ្នែក​មួយ​ដ៏​សំខាន់​នៃខណ្ឌសីមា​ហុងស៊ុយ​ផង​ដែរ។ ប្រសិនបើប្រៀប​ជប៉ុនទាំងមូលដូចជានាគមួយក្បាល នោះខ្សែរថភ្លើងដូចជាសរសៃឈាម បញ្ជូនថាមពលទៅ​ទូទាំង​ប្រទេស។

ក្រៅពីរថភ្លើងក្រោមដី ស្ទើរតែគ្មានខ្សែរថភ្លើងដែលនៅលើផ្ទៃដីរត់ចូលរង្វង់មូលនៃខ្សែរថភ្លើង Yamanote នោះទេ។ ខ្សែរថភ្លើង Chuo ក៏ជៀសវាងការធ្វើដំណើរឆ្លងកាត់ទីប្រជុំជនខណ្ឌសីមានេះផងដែរ។

អាចនិយាយបានថា តូក្យូជា​ទីក្រុង​មួយ​ក្នុង​ចំណោម “ទីក្រុង​ហុង​ស៊ុយ” ឈាន​មុខ​នៅ​លើ​ពិភភពលោក។ ម្យ៉ាងវិញទៀត មិនកំណត់ត្រឹមទីក្រុងប៉ុណ្ណោះទេ ថែម​ទាំង​ពង្រីក​​ឥទ្ធិពល​នៅ​ទូទាំងប្រទេស​ជប៉ុន​ផង​ដែរ។

ទោះបីជាសព្វថ្ងៃនៅតែមិនទាន់មានភស្តុតាងវិទ្យាសាស្រ្តដែលបង្ហាញពីទស្សនៈហុងស៊ុយក៏ដោយ យ៉ាងណាមិញ ទីក្រុងនេះនៅតែជាសមិទ្ធិផលនៃប្រាជ្ញា និងការគណនាយ៉ាងប្រុងប្រយ័ត្នរបស់បុព្វបុរសយើងខ្ញុំបន្សល់ទុក។ ទោះបីជាស្ថានភាពបច្ចុប្បន្នមិនល្អប៉ុន្មានក៏ដោយ ជនជាតិជប៉ុនយើងខ្ញុំ​នៅ​តែ​ជឿ​ជាក់​លើ​ការ​ស្តារ​ឡើង​វិញ​នៃ​ទីក្រុង​តូក្យូ​នា​ពេល​អនាគត។

Abe Kengo