ប្រជាជនជប៉ុនជួយគ្នាស្វែងរកចិញ្ចៀនដែលបានបាត់

ថ្ងៃសុក្រ 03/10/2025 | 17:56 ល្ងាច

ប្រជាជនជប៉ុនជួយគ្នាស្វែងរកចិញ្ចៀនដែលបានបាត់។

ប្រហែលជាអ្នកទាំងអស់គ្នាធ្លាប់បានឮ ក្នុងការប្រកួតកីឡាអត្តពលកម្មពិភពលោកដែលប្រារព្ធធ្វើឡើងនៅទីក្រុងតូក្យូកាលពីខែកញ្ញា ឆ្នាំ ២០២៥ មានហេតុការណ៍មួយបានកើតឡើងគឺ “បាត់ចិញ្ចៀនរៀបការ” ។ ករណីដ៏កម្រនេះបានធ្វើឲ្យពិភពលោកត្រូវទទួលស្គាល់ចំពោះចរិកលក្ខណៈរបស់ប្រជាជនជប៉ុន។ ចូរយើងតាមដានដំណើររឿងទាំងអស់គ្នា។

ការប្រកួតកីឡាអត្តពលកម្មពិភពលោកឆ្នាំ ២០២៥ Caio Bonfim – អត្តពលិកដើរផ្លូវឆ្ងាយជនជាតិប្រេស៊ីលម្នាក់បានចូលរួមវិញ្ញាសាដើរចម្ងាយ ២០ គីឡូម៉ែត្រសម្រាប់បុរស ហើយបានឈ្នះជើងឯកយ៉ាងល្អឥតខ្ចោះ។

យ៉ាងណាមិញ ក្រៅពីទទួលបានជ័យជំនះ មានហេតុការណ៍មួយបានកើតឡើង Caio បានធ្វើបាត់ចិញ្ចៀនរៀបការដែលពាក់លើដៃរបស់ខ្លួនក្នុងអំឡុងពេលប្រកួត។

ខណៈពេលដែលគាត់កំពុងព្រួយបារម្ភ Caio Bonfim ស្រាប់តែគិតឃើញថា ប្រសិនបើគាត់អាចទទួលបានជ័យជំនះ ប្រហែលជាប្រពន្ធរបស់គាត់មិនសូវជាខឹងប៉ុន្មានឡើយ។ ការគិតបែបនេះជួយឲ្យគាត់ឈ្នះការប្រកួត ហើយទៅដល់ទីដំបូងគេ។

ទោះជាយ៉ាងណា ប្រសិនបើអាចរកចិញ្ចៀនបានវិញប្រាកដជាល្អខ្លាំងណាស់។

Caio យល់់ឃើញថា គាត់ធ្វើបាត់ចិញ្ចៀនក្នុងរយៈចម្ងាយប្រហែល ៣ គីឡូម៉ែត្រ។

“សូមជួយខ្ញុំផង!”

ដើម្បីឆ្លើយតបទៅនឹងការអង្វររបស់គាត់ ដំណើរការស្វែងរកមួយបានចាប់ផ្តើមដោយមានជំនួយពីប្រជាជនជប៉ុនទាំងអស់។ មិនត្រឹមតែមានប៉ូលិសប៉ុណ្ណោះទេ សូម្បីតែប្រជាជនធម្មតា គ្រប់គ្នាដែលដឹងពីហេតុការណ៍នោះសុទ្ធតែចូលរួមស្វែងរក។

នៅលើបណ្តាញសង្គម មានសម្មតិកម្មជាច្រើនត្រូវបានដាក់ចេញ។ ឧទាហរណ៍ដូចជា៖

“ត្រង់កន្លែងមួយគាត់បានបោះកន្សែងជូតដៃ ហើយបន្ទាប់មកលែងឃើញចិញ្ចៀនទៀត តើចិញ្ចៀនអាចនឹងជ្រុះបាត់ពេលនោះដែរទេ?”

ការវិភាគដែលបានលើកឡើងបានបង្ហើបសម្រាប់ការស្វែងរកតាមទិសដៅថ្មី។

ទន្ទឹមនឹងនោះ ក៏ចាប់ផ្តើមមានពាក្យលើកទឹកចិត្តជាច្រើនផងដែរ មានដូចជា៖

– “យើងទាំងអស់គ្នានឹងរកឃើញវា។”

ឬដូចជាពាក្យ៖

“ដល់ពេលដែលត្រូវបង្ហាញពីស្មារតីរបស់ប្រជាជនជប៉ុនហើយ។”

ដូចនេះ ការស្វែងរកបានធ្វើឡើងក្រោមសំឡេងហ៊ោកញ្ចៀវ និងការលើកទឹកចិត្តជាច្រើន។

ការអំពាវនាវសុំជំនួយកាន់តែច្រើនឡើង ជាមួយនឹងការចែករំលែកជាង ១០.០០០ ដង។ ដោយមានការសង្ស័យថា កន្លែងដែល Caio បោះកន្សែងជូតញើស គឺជាទីតាំងដែលចិញ្ចៀនធ្លាក់នោះ មនុស្សជាច្រើនបានទៅដល់កន្លែងផ្ទាល់ដើម្បីស្វែងរក។

មិនត្រឹមតែប្រជាពលរដ្ឋប៉ុណ្ណោះទេ អត្តពលិកដែលចូលរួមក្នុងការប្រកួតក៏បានចូលរួមស្វែងរកផងដែរ ដោយបានពិនិត្យមើលផ្លូវប្រណាំងទាំងមូលអស់រយៈពេលជាងមួយម៉ោង ប៉ុន្តែនៅតែរកមិនឃើញ។

រឿងនេះត្រូវបានចែករំលែកកាន់តែច្រើនឡើង និងត្រូវបានចុះផ្សាយនៅលើសារព័ត៌មាន នៅទីបំផុត អ្នកដែលបានរកឃើញចិញ្ចៀននោះក៏ឃើញព័ត៌មាន។ បុគ្គលម្នាក់នោះបានទាក់ទងទៅកាន់ក្រុមប្រេស៊ីល ហើយចិញ្ចៀននៅ Osaka ត្រូវបានរៀបចំផ្ញើទៅកាន់សណ្ឋាគារដែលសមាជិកក្រុមកំពុងស្នាក់នៅ។

ទោះជាយ៉ាងណា យោងតាមកាលវិភាគធ្វើដំណើរ Caio នឹងឡើងយន្តហោះត្រឡប់ទៅផ្ទះវិញ មុនពេលដែលចិញ្ចៀនត្រូវបានបញ្ជូនមក។ ដើមឡើយ អាចពឹងមិត្តរួមក្រុម Caio យកចិញ្ចៀនទៅឲ្យគាត់ពេលជួបគ្នានៅស្រុកកំណើត ប៉ុន្តែដោយសារការយកចិត្តទុកដាក់យ៉ាងខ្លាំង អ្នកទុកចិញ្ចៀនបានយកទៅដល់កន្លែង ដោយប្រគល់ចិញ្ចៀនដល់ដៃរបស់ Caio មុនពេលដែលកីឡាករម្នាក់នេះឡើងយន្តហោះត្រឡប់ទៅប្រទេសវិញ។

នៅទីបំផុត ចិញ្ចៀនដ៏មានតម្លៃបានត្រឡប់ទៅរកម្ចាស់វិញ។ Caio រំភើបចិត្តយ៉ាងខ្លាំងនៅពេលទទួលបានចិញ្ចៀនដែលបាត់នោះមកវិញ ហើយបានអរគុណអ្នកទាំងអស់គ្នាដែលបានជួយគាត់មុនពេលត្រឡប់ទៅប្រទេសវិញ។

ប្រសិនបើជាចិញ្ចៀនធម្មតា ពិបាកនឹងរកឃើញម្ចាស់ខ្លាំងណាស់។ អ្នកដែលរើសបានអាចយកទៅលក់ដោយមិនមាននរណាដឹងនោះទេ។

ប៉ុន្តែចិញ្ចៀននេះមានតម្លៃយ៉ាងខ្លាំងសម្រាប់ Caio និងភរិយារបស់គាត់។ ពិតជាសំណាងណាស់ដែលអាចរកឃើញមកវិញ។

ឥឡូវនេះ ចិញ្ចៀនមិនត្រឹមតែជានិមិត្តរូបនៃក្តីស្រលាញ់ប៉ុណ្ណោះទេ ថែមទាំងបង្កប់នូវរឿងរ៉ាវដ៏អស្ចារ្យដែលបានកើតឡើងនៅក្នុងប្រទេសជប៉ុនផងដែរ ដែលធ្វើឲ្យវាកាន់តែពិសេស និងមានន័យជាងពេលណាៗទាំងអស់។

ជាការពិតណាស់ គ្មាននរណាម្នាក់ក្នុងចំណោមអ្នកចូលរួមស្វែងរកទទួលបានប្រាក់តាមរយៈរឿងនេះនោះទេ។ យ៉ាងណាមិញ មនុស្សជាច្រើនបានរួមចំណែកទើបទទួលបានលទ្ធផលល្អដូច្នេះ។ ប្រសិនបើទឹកចិត្តដ៏កក់ក្តៅនោះត្រូវបានផ្សព្វផ្សាយនៅទូទាំងពិភពលោក ខ្ញុំជឿថា ស្នាមញញឹមនឹងត្រូវបានចែករំលែកទៅកាន់មនុស្សគ្រប់គ្នា។

ថ្វីត្បិតតែ បច្ចុប្បន្នប្រទេសជប៉ុនមានការផ្លាស់ប្តូរច្រើន លែងរក្សាបាននូវវប្បធម៌ និងទំនៀមទម្លាប់ល្អទាំងអស់ដែលធ្លាប់មាន។ យ៉ាងណាមិញ នៅតែមានប្រជាជនជប៉ុនជាច្រើនមានទឹកចិត្តល្អ ដែលយើងអាចនឹងមើលឃើញ។

ដូច្នេះហើយ សង្ឃឹមថា អ្នកទាំងអស់គ្នាមិនបាត់បង់ជំនឿចិត្តចំពោះប្រទេសជប៉ុននោះទេ។

Abe Kengo