តើជប៉ុនមានចំណុចអ្វីដែលបានទាក់ទាញថ្នាក់​ដឹក​នាំ​សហគ្រាស​ដ៏​អស្ចារ្យ​លោក Steve Jobs

តើជប៉ុនមានចំណុចអ្វីដែលបានទាក់ទាញថ្នាក់​​ដឹក​​នាំ​សហគ្រាស​ដ៏​អស្ចារ្យ​លោក Steve Jobs ?

លោក Steve Jobs – គឺជាពាណិជ្ជករ និងជាអតីតនាយកប្រតិបត្តិរបស់ក្រុមហ៊ុន Apple ហើយក៏ជាស្ថាបនិកក្រុមហ៊ុន Apple ផងដែរ។

លោកជាអ្នកដែលបានត្រលប់មក Apple វិញ នៅពេលដែលក្រុមហ៊ុនកំពុងស្ថិតក្នុងដំណាក់កាលជិតក្ស័យធន ហើយបានធ្វើឲ្យApple ក្លាយជាសហគ្រាសដែលមានមូលធនប័ត្រទីផ្សារខ្ពស់បំផុត​លើ​ពិភព​លោក​ក្នុង​រយៈ​ពេល​ត្រឹម​តែ ១៥ ឆ្នាំ​ប៉ុណ្ណោះ។

មនុស្សមិនច្រើនទេដែលដឹងថា លោក Jobs ស្រលាញ់ចូលចិត្តប្រទេសជប៉ុន។ ដូច្នេះហើយ តើជប៉ុនមានចំណុចអ្វីដែលបានទាក់ទាញមេដឹក​នាំ​​ពិភព​លោក​ដូច​ជា​លោក? ស្វែងយល់អំពីអាថ៌កំបាំង​ទាំង​នេះ​អាចនឹងជួយដល់អ្នកទាំងអស់គ្នារកឃើញគន្លឹះនៃភាពជោគជ័យសម្រាប់អាជីវកម្ម​របស់​ខ្លួន។

ស្វែងរកខ្លួនឯង

តាំងពីក្មេង លោក Jobs តែងតែសួរខ្លួនឯងថា “តើខ្ញុំជានរណា?” ។ លោកថែមទាំងធ្លាប់ទៅកាន់ប្រទេស​ឥណ្ឌា​ដើម្បី​បួស​កាល​នៅ​ក្មេង​ផង​ដែរ។

ហើយបន្ទាប់មក នៅប្រទេសជប៉ុនលោកមានឳកាសស្គាល់ និងយល់អំពី “សមាធិ” ។

សមាធិគឺជាវិធីសាស្រ្តដែលហ្វឹកហាត់ជួយឲ្យចិត្តស្ងប់ស្ងាត់ ក្រឡេក​មក​មើល​ខ្លួន​ឯង និងរកឃើញខ្លួន​ឯង។

បន្ទាប់មក លោក Jobs បានគិតពិចារណារឿងបួស ក្លាយជាព្រះសង្ឃមួយអង្គនៅវត្តមួយក្នុងប្រទេស​​ជប៉ុន។

ប៉ុន្តែលោកទទួលបានការណែនាំថា៖

• “លោកនៅមានការងារដែលត្រូវធ្វើ” ។

ហេតុ​នេះ​ហើយ​បាន​ជាលោកបោះបង់​គំនិតបួស ហើយ​ជា​លទ្ធផល iPhone ត្រូវបានបង្កើតឡើង។

ក្តីស្រលាញ់ចំពោះ SONY

លោក Jobs បានជួបជាមួយ Morita Akio ដែលជាសហស្ថាបនិករបស់ SONY ។

លោកពិតជាភ្ញាក់ផ្អើលណាស់នៅពេលដែលបានឃើញ Morita ស្លៀកប្រភេទឯកសណ្ឋានដូចកម្មករ​រោង​ចក្រ។ នៅពេលដែលសាកសួរពីមូលហេតុ Morita បាន​ពន្យល់​ថា៖

• “ក្រោយ​សង្គ្រាម ដោយមិន​អាច​ទិញ​សម្លៀក​បំពាក់​បាន ដូច្នេះហើយក្រុមហ៊ុនបានចែកឲ្យគ្រប់​គ្នា​ស្លៀក។ ទម្លាប់​នោះ​នៅ​តែ​បន្ត​រហូត​មក​ដល់​សព្វ​ថ្ងៃ។”

ចាប់ពីពេលនោះមក លោក Jobs បានជ្រើសរើសស្លៀកខោខូវប៊យ និងអាវយឺតអណ្តើកពណ៌ខ្មៅ ជាស្ទីលសម្លៀកបំពាក់ដែលយើងតែងតែនឹកឃើញនៅពេលដែលរំលឹកដល់លោក។ អាវ​យឺត​អណ្តើក​ពណ៌​ខ្មៅ​ដែល​លោក​ស្លៀក​ត្រូវ​បាន​រចនា​ដោយ​អ្នក​ច្នៃ​ម៉ូដ​ជន​ជាតិ​ជប៉ុន Issey Miyake ។

តាមពិតទៅ ស្ទីលម៉ូដសម្លៀកបំពាក់នេះត្រូវបានបំផុសគំនិតដោយឯកសណ្ឋានរបស់កម្មកររោងចក្រ SONY ។

មិនត្រឹមតែប៉ុណ្ណឹង នៅពេលសាងសង់រោងចក្រថ្មី លោក Jobs បានប្រើរោងចក្រ SONY ធ្វើជាគំរូរចនា។ ចំណុច​នេះ​បង្ហាញ​ថា លោកស្រលាញ់ចូលចិត្ត SONY ប៉ុណ្ណា។

ស្រលាញ់ចូលចិត្តសិប្បកម្មជប៉ុន

លោក Jobs ល្បីថាជាមនុស្សដែលជ្រើសរើស​គ្រឿង​សង្ហារិមម៉ត់ចត់បំផុត។ លោកចំណាយពេលដល់​ទៅ ៧ ឆ្នាំសម្រាប់ជ្រើសរើសសាឡុង ឬពិភាក្សារាប់ខែគ្រាន់តែដើម្បីទិញម៉ាស៊ីនបោកគក់។

មិនដឹងថាអ្នកទាំងអស់គ្នានៅចាំទេ ម៉ាសុីនស្តាប់ចម្រៀង iPod បានធ្វើបដិវត្តន៍ខាងវិស័យចម្រៀង? កំណែទម្រង់ដំបូង ផ្នែកខាងក្រោយម៉ាសុីនត្រូវបានផលិតពីដែកអុីណុក។ លោក Jobs ចង់​បានភាពល្អឥតខ្ចោះរហូតដល់ថ្នាក់ឲ្យសិប្បករជប៉ុនខាត់ដែកអុីណុកសម្រាប់ iPods ទាំងអស់ មុន​ពេល​ក្លាយ​ជា​ផលិត​ផល​សម្រេច។

Apple បានធ្វើបដិវត្តន៍វិស័យចម្រៀង ប៉ុន្តែភាគី Apple តែងតែនិយាយថា មូលដ្ឋានគ្រឹះសម្រាប់ផលិត iPod ផ្អែកលើផលិតផលមានឈ្មោះថា Walkman ដែលផលិតដោយ SONY ។

ក្នុងឆ្នាំ ២០០០ ក្រុមហ៊ុន Apple បានដាក់លក់ iMac ពណ៌ស ដែលជាការរចនាដ៏ពិសេសដែលមិនធ្លាប់មាន។ ដោយដឹងថា ពណ៌សនេះត្រូវបានបំផុសគំនិតដោយបរិយាកាសសាមញ្ញនៃបន្ទប់ទទួល​ភ្ញៀវ​បែប​ជប៉ុន  (washitsu) ដើម្បីបង្កើតបានជាពណ៌ និងការរចនានេះ។

លោក Jobs និងការស្រលាញ់ចូលចិត្តចំពោះមុខម្ហូបជប៉ុន

ថ្វីត្បិតតែ ជាអ្នកហូបបួសក៏ដោយ លោក Jobs បែរជាមានករណីលើកលែងសម្រាប់មុខម្ហូបជប៉ុន។ ជាពិសេសលោកចូលចិត្តស៊ូស៊ី និងសាស៊ីមី។ មានម្តងលោកថែមទាំងបានទៅកាន់ភោជនីយ​ដ្ឋាន​ជប៉ុនដ៏ល្បីមួយកន្លែង ជាកន្លែងដែលពិបាកកក់មុន ដើម្បីមកយកស៊ូស៊ីដោយទឹក​មុខ​សប្បាយ​រីក​រាយ។

នៅឆ្នាំ ២០១១ នៅពេលដែលជំងឺមហារីកវិវត្តន៍ លោក Jobs បានបាត់បង់ចំណង់អាហារបន្តិចម្តងៗ។ លោកបានព្យាយាមហូបស៊ូស៊ីនៅភោជនីយដ្ឋានជប៉ុនដែលខ្លួនចូលចិត្តនៅ Silicon Valley ប៉ុន្តែ​នៅ​ទីបំផុត​បាន​ត្រឹមក្រឡេកមើលម្ហូបដែលខ្លួនចូលចិត្តប៉ុណ្ណោះ។

នៅខែតុលា ឆ្នាំ ២០១១ លោក Steve Jobs បានទទួលមរណភាពដោយអារម្មណ៍សោក​ស្តាយ​​របស់​មនុស្ស​ជា​ច្រើន​នៅ​ទូទាំង​ពិភពលោក។

ដើម្បីរំលឹកដល់លោក ចុងភៅ Sakuma ដែលជាម្ចាស់ភោជនីយដ្ឋានជប៉ុននៅ Silicon Valley បាន​យល់ព្រមបន្តបម្រើម្ហូបជប៉ុនដែលលោក Jobs ចូលចិត្តនៅអាហារដ្ឋានរបស់ Apple ។ ហើយនោះ​ក៏​ជា​កាដូ​ចុង​ក្រោយ​ដែល​លោក Jobs បានបន្សល់ទុកសម្រាប់បុគ្គលិករបស់គាត់ផងដែរ។

បុគ្គលលំដាប់ពិភពលោកដូចលោក Jobs ក៏ស្រលាញ់ជប៉ុនដល់ថ្នាក់នេះ…។

ដើម្បីឲ្យមនុស្សកាន់តែច្រើនស្គាល់អំពីភាពស្រស់ស្អាតនៃប្រទេសជប៉ុន ​នេះ​ជា​មូល​ហេតុ​ដែល​ខ្ញុំ​បង្កើត និង​បន្ត JAPO ។

ខ្ញុំសូមថ្លែងអំណរគុណយ៉ាងជ្រាល​ជ្រៅ ហើយសង្ឃឹមថា ប្រិយមិត្តទាំងអស់គ្នានឹងតាមដានអត្តបទជា​​បន្ត​បន្ទាប់។

Abe Kengo