រឿង “Baki” ត្រូវបានបំផុសគំនិតដោយជីវិតពិតរបស់កងកម្លាំងស្វ័យការពារជប៉ុន

ថ្ងៃព្រហស្បតិ៍ 25/09/2025 | 17:53 ល្ងាច

រឿង “Baki” ត្រូវបានបំផុសគំនិតដោយជីវិតពិតរបស់កងកម្លាំងស្វ័យការពារជប៉ុន។

ប្រសិនបើយើងចូលចិត្តរឿងគំនូរជីវចល Anime អ្នកទាំងអស់គ្នាប្រហែលជាស្គាល់ “Baki” ឬ “Baki the Grappler” គឺជាឈ្មោះរឿង Anime និង Manga ដ៏ល្បីរបស់ជប៉ុន។ តួអង្គឯកក្នុងរឿង Anime នេះគឺ Baki Hanma ជាអ្នកប្រដាល់វ័យក្មេងម្នាក់ ហើយជាកូនប្រុសរបស់ Yujiro Hanma – ជាអ្នកដែលមានរហ័សនាមថា “សត្វដែលខ្លាំងបំផុតនៅលើផែនដី” ។

ខ្លឹមសាររឿងគំនូរជីវចលនិយាយពី Baki Hanma ដំណើរការយកឈ្នះ និងកាន់តែខ្លាំងឡើងតាមរយៈការប្រកួតក្បាច់គុនដែលមិនកំណត់ច្បាប់។

លក្ខណៈពិសេសត្រង់ថា Itagaki Keisuke – ដែលជាអ្នកនិពន្ធរឿងគំនូរជីវចល Anime ដ៏ល្បីនេះធ្លាប់បម្រើការនៅក្នុងកងពលតូចលោតឆ័ត្រយោងលេខ ១ នៃកងកម្លាំងស្វ័យការពារជប៉ុន។ ដូច្នេះហើយ ខ្លឹមសាររឿង Anime នេះត្រូវបានគេនិយាយថា ត្រូវបានបំផុសគំនិតដោយជីវិតពិត។

ក្នុងខ្លឹមសារអត្តបទថ្ងៃនេះ ចូរយើងក្រឡេកមកមើលរឿងរ៉ាវនិយាយពីកំពូលកងពលតូចលោតឆ័ត្រយោងលេខ ១ នេះទាំងអស់គ្នា។

ស្ពាយឧបករណ៍លោតឆ័ត្រយោង ៨០ គីឡូក្រាមចូលសមរភូមិ

នេះជាអង្គភាពដែលមានតួនាទីសម្រុកចូលតំបន់របស់សត្រូវតាមរយៈការលោតឆ័ត្រយោងពីលើអាកាស ជាមួយនឹងឧបករណ៍បំពាក់មានទម្ងន់រហូតដល់ ៨០ គីឡូក្រាម។

ដើម្បីទទួលយកភារកិច្ចដ៏លំបាកនេះ ពួកគេត្រូវការអ្នកចម្បាំងដែលមានកម្លាំងកាយមាំមួន និងស្មារតីរឹងមាំ។ ជាមនុស្សដែលមិនខុសអ្វីពីតួអង្គក្នុងរឿង Baki the Grappler ឡើយ។

ធ្លាក់ដល់ដីពីកម្ពស់ ៣៤០ ម៉ែត្រនៅតែមិនអី

លោតពីលើកម្ពស់ ៣៤០ ម៉ែត្រ ជាអកុសលទាហានលោតឆ័ត្រយោងម្នាក់ជួបឧបទ្ទវហេតុ ឆ័ត្រយោងរបស់គាត់មិនអាចបើកទាំងស្រុងបាន។

នៅប្រទេសកម្ពុជា អគារខ្ពស់ជាងគេគឺ Morgan Enmaison 2 ក្នុងទីក្រុងភ្នំពេញ ជាមួយនឹងកម្ពស់ ២៤៣ ម៉ែត្រ។ សាកស្រមៃមើល ហើយប្រៀបធៀបនឹងអគារនេះ យើងអាចដឹងថាកម្ពស់ ៣៤០ ម៉ែត្រខ្ពស់ប៉ុណ្ណា។ ទោះជាយ៉ាងណា គាត់នៅតែចុះចតដោយសុវត្ថិភាព និងបន្តការហ្វឹកហាត់។ ទោះបីជាមានបច្ចេកទេសចុះចតពិសេសក៏ដោយ ចំណុចនេះពិតជាមិនធម្មតានោះទេ។

ក្នុងហេតុការណ៍មួយផ្សេងទៀត ឧប្បត្តិហេតុស្រដៀងគ្នាបានកើតឡើង ទាហានលោតឆត្រយោងម្នាក់បានជួបឧបទ្ទវហេតុបាក់ឆ្អឹងភ្លៅ និងឆ្អឹងជំនី គ្រូពេទ្យបានធ្វើរោគវិនិច្ឆ័យថា ត្រូវចំណាយពេល ៣ ខែទើបជាសះស្បើយ ប៉ុន្តែគាត់បានត្រលប់មកអង្គភាពវិញត្រឹមរយៈពេល ១ សប្តាហ៍ប៉ុណ្ណោះ។

នៅពេលដែលប៊ូឡុងបាក់មុនឆ្អឹងទៅទៀត

ក្នុងការវះកាត់បាក់ឆ្អឹង ការដាក់ប៊ូឡុងក្នុងឆ្អឹងជាវិធីសាស្រ្តដែលពេញនិយម ប៉ុន្តែមានករណីមួយចំនួនប៊ូឡុងដែលដាក់ក្នុងខ្លួនរបស់ទាហានលោតឆ័ត្រយោងមិនអាចទ្រាំនឹងសម្ពាធ ហើយក៏បាក់។

ជាធម្មតា ឆ្អឹង ឬសាច់ដុំជុំវិញនឹងបាក់ ហើយរបួសជាមុនសិន។ ប៉ុន្តែក្នុងករណីនេះពិតជាមិនអាចពន្យល់បានឡើយ។

លោតចុះពីជាន់ទី ៣ ដើម្បីទទួលប្រាក់រង្វាន់

មានម្តងមេបញ្ជាការបានប្រាប់សមាជិកក្រុមរបស់ខ្លួនថា៖

“ប្រសិនបើនរណាម្នាក់អាចលោតចុះពីជាន់ទី ២ នឹងទទួលបានរង្វាន់ ១.០០០ យ៉េន” ។

ទាហានម្នាក់ពិតជាបានលោតចុះមែន ប៉ុន្តែមិនមែនលោតចុះពីជាន់ទី ២ នោះទេ គាត់បានឡើងដល់ជាន់ទី ៣ ហើយលោតចុះមកដោយសុវត្ថិភាព។

មេបញ្ជាការចាប់អារម្មណ៍យ៉ាងខ្លាំង ហើយភ្លាមៗនោះបានផ្តល់ប្រាក់រង្វាន់ដល់គាត់ចំនួន ៤.០០០ យ៉េន។

ញញឹមហើយទើបបាញ់

អង្គភាពនេះត្រូវប្រយុទ្ធដោយប្រើឧបករណ៍តិចតួចបំផុត មិនមានឧបករណ៍បម្រុងទុកនោះទេ ដូច្នេះមិនអាចបាញ់ខុសឡើយ។ ហេតុនេះ ទើបពួកគេមានច្បាប់មួយគឺ ចូលជិតដើម្បីមើលមុខសត្រូវឲ្យបានច្បាស់ ញញឹម រួចទើបបាញ់…

សូម្បីតែក្នុងសមយុទ្ធជាមួយនឹងរថក្រោះ ពួកគេក៏អនុវត្តស្រដៀងគ្នាដែរ។ រត់ទៅជិតរថក្រោះដែលកំពុងធ្វើដំណើរ ញញឹម រួចទើបបាញ់។

ទាហានរថក្រោះដែលបានឃើញទិដ្ឋភាពនេះលើកដំបូង មិនអាចទប់ទល់បានទាន់ពេលវេលា សុទ្ធតែរងរបួស។

Yakuza ក៏ត្រូវតែជៀសឆ្ងាយដែរ

ជាការពិតណាស់ ប្រិយមិត្តទាំងអស់គ្នាប្រាកដជាស្គាល់ហ្គេម Pokémon មែនទេ? ប្រសិនបើនៅក្នុង Pokémon អ្នកលេងត្រូវទៅគ្រប់ទីកន្លែងដើម្បីប្រមូលគ្រឿងសម្គាល់ “Gym” ។ ចំណែកឯក្នុងអង្គភាពនេះ ទាហានមួយចំនួនបែរជាដើរប្រមូលគ្រឿងសម្គាល់របស់ Yakuza ទៅវិញ។

មិនច្បាស់ទេថា ដើម្បីប្រមូលបានគ្រឿងសម្គាល់របស់ Yakuza តើពួកគេបានប្រព្រឹត្តអ្វីខុសច្បាប់ដែរអត់ទេ ប៉ុន្តែគ្រាន់តែស្តាប់ឮក៏យល់ថាចម្លែកណាស់ទៅហើយ។

នៅពេលដែលតាមដានរឿង Anime Baki the Grappler យើងនឹងឃើញថា មានតួអង្គជាច្រើនដែលហាក់បីដូចជា “លែងដូចមនុស្ស” ទៅហើយ។ ហើយនៅពេលដែលយើងក្រឡេកមើលកងពលតូចលោតឆ័ត្រយោងលេខ ១ យើងឃើញថា ចំណុចនោះអាចនឹងមានពិត។ អ្នកនិពន្ធរឿង Baki the Grappler នៅក្នុងអង្គភាពនេះរយៈពេល ៥ ឆ្នាំ។

ប្រហែលជាតួអង្គដែលលោកបានបង្ហាញតាមរយៈរឿងនេះត្រូវបានបំផុសគំនិតដោយមិត្តរួមក្រុមក្នុងអង្គភាពរបស់ខ្លួន។

បច្ចុប្បន្ននេះ យើងអាចមើលរឿង Baki the Grappler នៅលើ Netflix ។

កងកម្លាំងស្វ័យការពារជប៉ុនត្រូវបានចាត់ទុកថាជាកងទ័ពដែលមិនចូលរួមប្រយុទ្ធ ហើយប្រទេសមួយចំនួនថែមទាំងមើលងាយពួកគេទៀតផង។ ប៉ុន្តែប្រសិនបើយើងដឹងថា ពួកគេដូចជាអ្នកចម្បាំងដែលមកពី Baki ប្រហែលជាគ្មាននរណាម្នាក់ចង់រករឿងនោះទេ។

អាចនិយាយបានថា រឿង Baki បានរួមចំណែករក្សាសន្តិភាពដោយប្រយោល។ ហើយអាចនិយាយម្យ៉ាងទៀតថា កងពលតូចលោតឆ័ត្រយោងលេខ ១ ជាមូលដ្ឋានគ្រឹះបង្កើតបានជារឿង Baki – ជាកន្លែងដែលប្រមូលផ្តុំទៅដោយអ្នកចម្បាំងដ៏ខ្លាំងក្លាអស្ចារ្យ។

Abe Kengo