អ្នកបញ្ចូលសំឡេង – ជាការងារដែលបំផុសគំនិតដល់មនុស្សជាច្រើន

អ្នកបញ្ចូលសំឡេង – ជាការងារដែលបំផុសគំនិតដល់មនុស្សជាច្រើន។

ក្នុងនាមជាចូលចិត្តរឿងគំនូរជីវចលជប៉ុន ប្រិយមិត្តប្រហែលជាស្គាល់លោកស្រី Nozawa Masako (野沢雅子) ដែលជាអ្នកបញ្ចូលសំឡេងជើងចាស់ ហើយទទួលតួនាទីបញ្ចូលសំឡេងតួអង្គ Son Goku ដែល​ជា​តួអង្គ​ឯក​ក្នុងរឿងគំនូរជីវចល Dragon Ball ដ៏ល្បីនៅទូទាំងពិភពលោក​អស់​រយៈពេល​ជាង ៣០ ឆ្នាំ​មក​ហើយ។

ក្នុងខ្លឹមសារអត្តបទថ្ងៃនេះ JAPO សូមចែករំលែកដល់ប្រិយមិត្តនូវរឿងរ៉ាវមួយចំនួនដែលទាក់​ទង​នឹង​​អ្នក​បញ្ចូល​សំឡេង​ស្រី​រូប​នេះ ចូរ​យើង​តាម​ដាន​ទាំង​អស់​គ្នា!

នៅពេលដែលរឿងគំនូរជីវចល Dragon Ball កាន់តែល្បី អ្នកគាំទ្រជាច្រើនបានផ្ញើសំបុត្រមក។ ក្នុងចំណោមនោះមានសំបុត្រមួយច្បាប់ដែលមាន​ខ្លឹម​សារ​ដូច​ខាង​ក្រោម៖

“កូនប្រុសរបស់ខ្ញុំនៅរស់បានតែពីរខែទៀតប៉ុណ្ណោះ។

កូនខ្ញុំពិតជាគាំទ្រសំឡេងរបស់តួអង្គ Son Goku ដែលបញ្ចូលសំឡេងដោយលោកស្រី Nozawa ខ្លាំង​ណាស់ តើលោកស្រីអាចផ្ញើហត្ថលេខាជូនក្មួយប្រុសម្នាក់នេះបានទេ?”

សម្រាប់ប្រភេទសំបុត្របែបនេះ ភាគច្រើនគ្រាន់តែជាការប្រឌិត អ្នកផ្ញើគ្រាន់តែចង់សុំហត្ថលេខា​ប៉ុណ្ណោះ តាមពិតទៅ គ្មានរឿងដែលថាកូនពួកគេឈឺនោះទេ។ ដូច្នេះហើយ អ្នកដែលនៅ​ជុំវិញ​លោក​ស្រី Nozawa បានប្រាប់គាត់ថា កុំខ្វល់ពីរឿងនេះ។ ប៉ុន្តែលោកស្រី​បាន​ធ្វើ​ព្រងើយ​ចំពោះ​​ពាក្យ​​​សម្តី​​របស់​អ្នក​នៅ​ជុំវិញ​ លោកស្រីបានផ្ញើហត្ថលេខា ជាមួយនឹងការថតសំឡេង​របស់ Son Goku ។

ក្នុងការថតសំឡេង លោកស្រីហៅឈ្មោះក្មេងប្រុសម្នាក់នោះ ហើយ​និយាយ​ថា៖

“រឿងនឹងចេញផ្សាយនៅខែសីហានេះ សូមកុំភ្លេចមកមើល។

ខ្ញុំនឹងរង់ចាំ សន្យាណា!”

មិនមែនជាការប្រឌិតនោះទេ ក្មេងប្រុសក្នុងសំបុត្រពិតជាកំពុងឈឺធ្ងន់មែន ហើយរឿងដែលគ្រូពេទ្យ​និយាយ​ថា ក្មេងប្រុសនៅរស់បានតែពីរខែទៀតក៏ជាការពិតដែរ។

ទោះជាយ៉ាងណា ព្រោះតែចង់រក្សាពាក្យសន្យានឹង Son Goku ក្មេងប្រុសម្នាក់នោះបានព្យាយាម​រស់​នៅរហូត​ដល់​ខែ​សីហា ដោយ​បាន​​មើល​​រឿង និង​​ទទួល​​មរណ​​ភាព​​នៅ​​ថ្ងៃ​បន្ទាប់។

យោងតាមការវិនិច្ឆ័យ ក្មេងប្រុសម្នាក់នោះរស់បានថែម ៦ ខែទៀត ជារឿងដែលសូម្បីតែគ្រូពេទ្យក៏​ទទួល​ស្គាល់​ថា​ជា​អព្ភូត​ហេតុ​ដែរ។

មានម្តង ជាអកុសល​អគ្គិភ័យ​បាន​ឆាបឆេះ​ផ្ទះរបស់លោកស្រី Nozawa ទាំងស្រុង ត្រូវនឹងថ្ងៃដែលលោកស្រីថតសំឡេង។ លោកស្រីខ្ចីសម្លៀកបំពាក់ពីអ្នកជិតខាង ហើយទៅកាន់ស្ទូឌីយ៉ូតែម្តង មិនបានរំលឹកដល់រឿងភ្លើងឆេះនោះទេ ហើយក៏បានបញ្ចប់ការងារដូចសព្វមួយដង។

នៅថ្ងៃនោះ ជាថ្ងៃដែលអគ្គិភ័យកើតឡើង លោកស្រីទៅយឺតរយៈពេល ៥ នាទី ហើយហាក់បីដូចជានោះជាពេលដែលលោកស្រីយឺតម៉ោងធ្វើការម្តងក្នុងជីវិត។ ក្រោយ​ពេល​ដែល​អ្នក​ទាំង​អស់​​គ្នា​​ដឹង​រឿង គ្រប់​គ្នា​ពិត​ជា​ភ្ញាក់​ផ្អើល​ណាស់។

លោកស្រីជាមនុស្សដែលមានទំនួលខុសត្រូវ និងស្មារតីជំនាញវិជ្ជាជីវៈខ្ពស់។ ការងារ​គឺ​ជា​ការងារ​ មិន​បណ្តោយ​ឲ្យ​រឿង​ផ្ទាល់​ខ្លួន​ប៉ះ​ពាល់​ដល់​បរិយាកាស​ការ​ងារ​រួម​នោះ​ទេ។

ហើយក៏មានរឿងនិយាយពីសត្វស្វាមួយក្បាលនៅសួនសត្វមានជំងឺធ្លាក់ទឹកចិត្ត ទោះបីជាទទួលបានការព្យាបាលពីពេទ្យសត្វក៏ដោយ ប៉ុន្តែ​នៅ​តែ​មិន​ជា​សះ​ស្បើយ។ យ៉ាង​ណា​មិញ នៅ​ពេល​ដែលលោកស្រី Nozawa និយាយ​​ខ្លាំងៗ​​ទៅ​​កាន់​​សត្វ​​ស្វា​​មួយ​​ក្បាល​នោះ វា​​បាន​​ធូរ​​ស្បើយ​​យ៉ាង​​ឆាប់​រហ័ស។

នៅពេលដែលនិយាយជាមួយសត្វស្វា លោកស្រីមិនប្រើសំឡេងរបស់ Son Goku នោះទេ ប៉ុន្តែប្រើសំឡេង​របស់​តួអង្គ​មួយ​ផ្សេង​ទៀត។

ហាក់បីដូចជាជំនាញបញ្ចូលសំឡេងរបស់លោកស្រីមិនត្រឹមតែមានឥទ្ធិពលចំពោះមនុស្សប៉ុណ្ណោះទេ ថែម​ទាំង​មាន​ប្រសិទ្ធភាព​ចំពោះ​សត្វដូចជាស្វាហ្គោរីឡាផងដែរ។

ប្រហែលជាមានមនុស្សមួយចំនួនមើលងាយការងារជាអ្នកបញ្ចូលសំឡេង ដោយគិតថា នោះគ្រាន់​តែ​ជា​ការ​ងារ​បន្លំ​សំឡេង​ដើម្បី​រក​ប្រាក់​តាម​រយៈ​​ការ​​​បញ្ចូល​​សំឡេង​​ប៉ុណ្ណោះ។

ប៉ុន្តែជាមួយនឹងសមត្ថភាពបង្កើតបានអព្ភូតហេតុដែលសូម្បីតែគ្រូពេទ្យក៏មិនជឿ ឬសូម្បីតែរឿងដែល​ជួយ​ដល់​សត្វស្វាមួយក្បាលយកឈ្នះពីជំងឺ សំឡេងរបស់លោកស្រីហាក់បីដូចជាមានថាមពលពិសេស។ ប្រហែលនោះជាថាមពលដែលបានមកពីការខិតខំប្រឹងប្រែងឥតឈប់ឈរ តែងតែលះបង់អស់ពីលទ្ធភាព ហើយមិនដែលរំខានដល់អ្នកដទៃទាំងដែលខ្លួនមានបញ្ហាក៏ដោយ។

ប្រសិនបើអ្នកកំពុងតែមានអារម្មណ៍ថា នឿយហត់ និងបាក់ទឹកចិត្ត អ្នកទាំងអស់គ្នាអាចសាក​ល្បង​មើល ឬ​មើល​ឡើង​វិញ​រឿងគំនូរជីវចល Dragon Ball ប្រហែលជាអ្នកនឹងទទួលបានអារម្មណ៍អ្វី​ម្យ៉ាង ហើយ​បន្ថែម​កម្លាំង​ស្មារតី និង​ថាមពល​វិជ្ជមាន បន្ទាប់​ពី​ធ្វើ​ការ​ងារ​នឿយ​ហត់។

Abe Kengo