សាមូរ៉ៃស្បែកខ្មៅដំបូងគេក្នុងប្រវត្តិសាស្ត្រ

សាមូរ៉ៃ​ស្បែក​ខ្មៅ​ដំបូង​គេ​ក្នុង​ប្រវត្តិសាស្ត្រ។

ប្រសិនបើអ្នកទាំងអស់គ្នាតែងតែគិតថា សាមូរ៉ៃសម្រាប់តែប្រជាជនជប៉ុន និងអ្នកចម្បាំងជប៉ុន ចំណុច​នេះ​មិន​ត្រូវ​ទាំង​ស្រុង​នោះ​ទេ។

អ្នកដែលបានបំបែកទស្សនៈនេះគឺ Yasuke ជា​សាមូរ៉ៃ​ស្បែក​ខ្មៅ​ដំបូងគេ​ក្នុង​ប្រវត្តិសាស្ត្រ។

ទោះបីជាកើតនៅក្នុងទឹកដីមួយផ្សេងទៀត ស្ថិតក្នុងពូជសាសន៍ផ្សេង លោកនៅតែត្រូវបានទទួល​ស្គាល់ និង​លះ​បង់​ប្រៀប​បី​ដូច​ជា​សាមូរ៉ៃ​ពិត​មួយ​រូប។

ក្នុងបរិបទសម័យកាលសង្គ្រាមវឹកវរ នៅពេលដែលមហាអំណាចផ្សេងទៀតដណ្តើមគ្នាបង្រួបបង្រួម​ប្រទេស​ជប៉ុន។ ហើយអ្នកដែលជិតសម្រេចបានគោលដៅបង្រួបបង្រួមបំផុតនោះគឺ Oda Nobunaga (織田信長) ។ លោកជាអ្នកដែលបានបង្កើតចលនាសាមូរ៉ៃស្បែកខ្មៅ។

Yasuke កើត​នៅ Mozambique នៃអាហ្វ្រិក ដែលត្រូវបានបញ្ជូនទៅប្រទេសជប៉ុនដើម្បី​បម្រើ​អ្នក​​ផ្សព្វ​ផ្សាយ​​សាសនា​អុីតាលី។ ប្រសិនបើគិតពីស្ថានភាពពិភពលោកនាពេលនោះ ប្រហែលជាគាត់​ធ្លាប់​ធ្វើជាទាសកររបស់ជនជាតិអុីតាលី។ ទោះជាយ៉ាងណា កំណត់ត្រាបង្ហាញថា Yasuke អាច​និយាយ​ភាសា​ជប៉ុន​បាន​ខ្លះ ចំណុចនេះ​បង្ហាញ​ថា​ឋានៈ​របស់​គាត់​ខុស​ពី​ទាសករ​ធម្មតា។

សម្រាប់ប្រជាជនជប៉ុនភាគច្រើននាសម័យនោះ នេះជាលើកដំបូងដែលពួកគេបានឃើញបុរសស្បែកខ្មៅ។ មាឌធំខ្ពស់ មានសាច់ដុំ និងអ្វីដែលពិសេសគឺសម្បុរ​ស្បែក​ខុស​ពី​គេ។ ដោយគិតថា ស្បែក​ខ្មៅ​ដោយ​សារ​លាប​អ្វី​ម្យ៉ាង Nobunaga បានស្នើឲ្យ Yasuke លាងសម្អាតជាច្រើនដង ប៉ុន្តែជាការពិតណាស់ មិនអាចធ្វើឲ្យស្បែកសនោះទេ ផ្ទុយទៅវិញ បែរជាធ្វើឲ្យពណ៌ខ្មៅកាន់តែភ្លឺចែង​ចាំង។ ក្រៅ​ពី​នេះ  Nobunaga ក៏មានការចាប់អារម្មណ៍យ៉ាងខ្លាំងចំពោះរូប​រាង​កាយរបស់ Yasuke ផង​ដែរ លោកបានគិតថា បុរស​ស្បែក​ខ្មៅ​ម្នាក់​នេះ​អាច​យកឈ្នះបុរស​ដប់​នាក់​បានយ៉ាង​ងាយ។

Nobunaga បាន​ដាក់​ឈ្មោះឲ្យបុរសម្នាក់នេះថា Yasuke (弥助) ថែមទាំងបែងចែកផ្ទះ និងទទួល Yasuke ជាអ្នកក្រោមបង្កាប់។ បើប្រៀប​ទៅ​នឹង​ជីវិត​ត្រូវ​គេ​រើសអើងនៅអឺរ៉ុប ឋានៈដែល Yasuke ទទួលបាននៅជប៉ុនច្បាស់ណាស់គឺប្រសើរជាងមុន។ ជាការតបស្នងមកវិញ Yasuke ក៏បានបម្រើ Nobunaga ស្មោះ​អស់​ពី​ចិត្ត​ផង​ដែរ។

អ្វីដែលខ្ញុំទើបតែរៀបរាប់គឺ​ជារឿងពិតដែលត្រូវបានកត់ត្រា​ក្នុង​សៀវភៅ​ប្រវត្តិសាស្ត្រ​ ដែលនិយាយ​ពី​សាមូរ៉ៃ​ស្បែក​ខ្មៅ​មាន​វត្តមាន​ក្នុង​ប្រវត្តិ​សាស្ត្រ​​ជប៉ុន។

ប៉ុន្តែបន្ទាប់មក Nobunaga បានទទួលមរណភាពភ្លាមៗនោះ។

ក្នុងអំឡុងពេលនាំកងទ័ពចេញដំណើរ Nobunaga បានស្នាក់នៅប្រាសាទ Honnoji (本能寺) ស្ថិត​នៅ Kyoto ។

ដោយដឹងថា នេះជាពេលដែលមានកងកម្លាំងការពារមិនច្រើន អ្នកក្រោមបង្គាប់របស់លោកមានឈ្មោះថា Akechi Mitsuhide (明智光秀) ស្រាប់តែបះបោរ វាយប្រហារ និងដុតបំផ្លាញប្រា​សាទ។ Nobunaga ត្រូវបានគេចាត់ទុកថា បានទទួលមរណភាពក្នុងស្ថានភាពនោះ។ ចំណែក​ឯ Yasuke ត្រូវ​បាន​គេនិយាយ​ថា បានប្រយុទ្ធដើម្បីការពារម្ចាស់រហូតដល់ចុងបញ្ចប់។

ទោះជាយ៉ាងណា មានរឿងអាថ៌កំបាំងមួយបានកើតឡើង មិនថាពួកគេខំប្រឹងស្វែងរកយ៉ាងណានៅតែរកមិនឃើញសាកសពរបស់  Nobunaga ។

បើតាមទស្សនៈរបស់ប្រជាជនជប៉ុននៅសម័យនោះ ប្រសិនបើរកមិនឃើញសាកសព​មិន​អាច​ចាត់​ទុក​ថា​ត្រូវគេសម្លាប់នោះទេ។ គ្រាន់​តែ​បន្ទាប់​ពី​ព្រឹត្តិ​ការណ៍​ទាំង​នេះ Nobunaga និង Yasuke រលាយ​បាត់​ចេញ​ពី​ប្រវត្តិ​សាស្ត្រ​ជប៉ុន។

ចាប់តាំងពីពេលនោះមក សម្មតិកម្មជាច្រើនដែលនិយាយពី Nobunaga នៅមានជីវិតត្រូវបានលើក​ឡើង។ 

សម្មតិកម្មមួយក្នុងចំណោមចាត់ទុកថា Nobunaga និង Yasuke បានរត់ចេញពី Honoji ហើយឆ្លង​សមុទ្រ​ទៅ​កាន់​អឺរ៉ុប។ ប្រសិនបើមាន Yasuke ទៅជាមួយ ចំណុចនេះក៏អាចនឹងកើតឡើងដែរ។

ជាការពិតណាស់ មិនមានភ័ស្តុតាងដែលបញ្ជាក់អំពីរឿងនេះនោះទេ ដូច្នេះសម្មតិកម្មនេះមិនត្រូវបាន​ចាត់​ទុក​ជា​ទិន្នន័យ​ប្រវត្តិ​សាស្ត្រ​ផ្លូវ​ការ​ឡើយ។

ប៉ុន្តែជាមួយនឹងប្រាជ្ញារបស់ Nobunaga ជាអ្នកដែលបានធ្វើឲ្យទឹកដីតូចមួយឆ្ពោះទៅរកការបង្រួប​បង្រួម​ប្រទេស​ជប៉ុន​ទាំង​មូល ប្រសិនបើពិតជាបានទៅកាន់អឺរ៉ុបមែននោះ ប្រាកដជាទទួលបានការគោរព។ ហើយបើសិនជាមាន Yasuke នៅក្បែរ រឿង​នេះ​កាន់​តែ​មាន​ភាព​ទាក់​ទាញ។

ថ្វីត្បិតតែ មិនមែនជាជនជាតិជប៉ុន ប៉ុន្តែដោយសារភាពស្មោះត្រង់ ហ៊ានលះបង់ខ្លួនឯងដើម្បីការពារ Nobunaga រហូត​ដល់​វិនាទី​ចុង​ក្រោយ Yasuke សមនឹងទទួលបានងារជាសាមូរ៉ៃជាងនរណាៗ​ទាំង​អស់។ ទោះ​បី​ជា​មាន​សម្បុរ​​ស្បែក​​​ខុស​​​គ្នា ប៉ុន្តែ​​​សម្រាប់​​ខ្ញុំ Yasuke គឺ​​ជា​​សាមូរ៉ៃ​​ពិត​មួយរូប។

Abe Kengo