“សត្វសុីស្រមោចសម្លាប់មនុស្ស…” និងខ្លឹមសារអុីម៉ែលដែលធ្វើឲ្យយើងឆ្ងល់ ហើយ​​បង្កប់​​ទៅ​ដោយ​​គ្រោះ​​ថ្នាក់

“សត្វសុីស្រមោចសម្លាប់មនុស្ស…” និងខ្លឹមសារអុីម៉ែលដែលធ្វើឲ្យយើងឆ្ងល់ ហើយ​បង្កប់​ទៅដោយ​គ្រោះ​ថ្នាក់។

នៅសម័យកាលដែលបច្ចេកវិទ្យាព័ត៌មានកាន់តែរីកចម្រើន ការប្រើប្រាស់ប្រព័ន្ធអុីនធឺណេតនាំ​មក​នូវ​ភាព​ងាយ​ស្រួល​ជា​ច្រើន ប៉ុន្តែ​ក៏​មាន​ហានិភ័យ​មិន​តិច​នោះ​ដែរ។

ក្នុងនោះ email (អុីម៉ែល) គឺជាមធ្យោបាយផ្ញើសារ និងផ្លាស់ប្តូរព័ត៌មាននៅលើប្រព័ន្ធអុីនធឺណេត ហើយ​ជា​ទូទៅ​គ្រោះ​ថ្នាក់​ដែល​យើង​តែង​តែជួបប្រទះបំផុតគឺអុីម៉ែលសំរាម ឬយើងហៅថា “spam” ។ សារ​ទាំង​នោះ​អាច​នឹង​មាន​​តំណ​ភ្ជាប់​ដែល​ឆ្លង​មេរោគ ឬ​នាំ​ទៅ​កាន់​គេហទំព័រ​ដែល​មានចេតនា​អាក្រក់។

ថ្វីត្បិតតែ យើងមិនចង់បើកសារទាំងនោះ ប៉ុន្តែអុីម៉ែលមួយចំនួនបែរជាមានចំណុចដែលមិននឹកស្មាន​ដល់ ដែល​ធ្វើ​ឲ្យ​អ្នក​ទទួល​​មាន​ការ​ងឿង​ឆ្ងល់។

ចូរយើងក្រឡេកមកមើលអុីម៉ែលដ៏អាក្រក់ទាំងនេះ ដើម្បីដឹងពីខ្លឹមសារអុីម៉ែលទាំងអស់គ្នា។

“រយៈពេលមួយឆ្នាំបានកន្លងផុតទៅហើយ ចាប់តាំងពីពេលដែលប្តីរបស់ខ្ញុំត្រូវសត្វសុីស្រមោចសម្លាប់។”

គ្រាន់តែចំណងជើងអុីម៉ែលបែបនេះក៏អាចធ្វើឲ្យខ្ញុំឆ្ងល់រហូតដល់ថ្នាក់ទ្រាំមិនបានទៅហើយ។ 

អុីម៉ែលនេះត្រូវបានផ្ញើចេញពីស្រ្តីមេម៉ាយម្នាក់​អាយុ ២៩ ឆ្នាំ​ ដែលមានឈ្មោះថា Sayaka ។ នាងបាន​សរសេរ​ថា ប្តី​របស់​នាង​បានចែកឋានរយៈពេលមួយឆ្នាំទៅហើយ ដោយបន្សល់ទុកឲ្យនាងនូវទ្រព្យសម្បត្តិយ៉ាងច្រើនសន្ធឹកសន្ធាប់ ហើយនាងកំពុងស្វែងរកអ្នកដែលអាចបំពេញតម្រូវការ​ផ្លូវ​ភេទ​​របស់​​ខ្លួន​​បាន ដែល​ជា​ខ្លឹម​សារ​ដ៏​គួរ​ឲ្យ​ភ្ញាក់​ផ្អើល។

ប៉ុន្តែជាងនេះទៅទៀត អ្វីដែលធ្វើឲ្យខ្ញុំចាប់អារម្មណ៍ត្រង់ថា៖ តើសត្វសុីស្រមោចអាចសម្លាប់មនុស្ស​ដែរ​ទេ? មាត់របស់សត្វសុីស្រមោចតូចយ៉ាងនេះ តើវាអាចធ្វើអ្វីបាន? ខ្ញុំចាំថា ខ្លួនមិនអាច​ទ្រាំ​នឹង​ចម្ងល់​ក៏​ឡើង​អុីនធឺណេត​រក​មើល។

តាមពិតទៅ មាត់តូចរបស់វាគឺមិនអាចសុីសាច់មនុស្សបានទេ ប៉ុន្តែក្រញ៉ាំរបស់វាពិតជាខ្លាំងណាស់។

ដូច្នេះហើយ ខ្ញុំ​ទទួល​បាន​ចំណេះ​ដឹង​មួយ​ផ្សេង​ទៀត ដែលមិនដឹងថាពេលណាទើបអាច​យក​មក​ប្រើ​នោះ​ទេ។

“អ្នក​ប្រហែល​ជា​មិន​ជឿ​នោះទេ ប៉ុន្តែ​ខ្ញុំ​ជា​សត្វ​ស្វាមួយក្បាល។”

ចំណងជើងអុីម៉ែលនេះពិតជាពិសេសខ្លាំងណាស់។

ទោះបីជាខ្ញុំលាន់មាត់និយាយថា៖ “មិនអាចទៅរួចនោះទេ” ប៉ុន្តែខ្ញុំនៅតែមិនអាចទប់នឹងអារម្មណ៍​ចង់របស់ខ្លួនបានឡើយ ដោយចង់ដឹងថា “សត្វស្វាមួយក្បាលនោះ” មានបំណងអ្វី។ ហើយ​នៅ​ទី​បំផុត​ខ្ញុំ​បាន​បើក​មើល។

យោងតាមខ្លឹមសារក្នុងអុីម៉ែល ហាក់បីដូចជាសត្វស្វាមួយក្បាលនេះបានឆ្លងកាត់ការបណ្តុះបណ្តាល​យ៉ាង​តឹង​រ៉ឹង​រយៈពេលពីរឆ្នាំទើបចេះអានចេះសរសេរ។ បើសិនជារឿងនេះជាការពិត នេះប្រាកដជាព័ត៌មានដ៏​គួរ​ឲ្យ​ភ្ញាក់​ផ្អើល​ទូទាំង​ពិភពលោក។

ប៉ុន្តែចំណុច “ដ៏អស្ចារ្យ” បំផុតស្ថិតលើប្រយោគនេះ៖

“ទោះបីជាអ្នកជាមនុស្សដែលមានមុខមាត់អាក្រក់ ហើយ​នៅ​ក្នុង​​ពិភព​របស់​មនុស្ស​គ្មាននរណាម្នាក់ចាប់អារម្មណ៍​ក៏​ដោយ យ៉ាង​ហោច​ណាស់ ក្នុងពិភពរបស់ស្វា អ្នកនៅតែជាបុរសសង្ហាម្នាក់” ។

ព្រោះតែខ្លួនជាបុរសម្នាក់ដែលមិនសូវមានភាពទាក់ទាញក្នុងក្រសែភ្នែករបស់មនុស្សស្រី ប្រយោគ​​នេះ​​ពិត​ជា​បាន​ទាក់​ទាញ​ចិត្ត​របស់​ខ្ញុំ។ ប៉ុន្តែប្រសិនបើទទួលបានការស្រលាញ់របស់សត្វ​ស្វា​ច្រើន​​យ៉ាង​នេះ… ក៏​ពិបាក​នឹង​សប្បាយ​ចិត្ត​បាន​ដែរ។

“Re: និយាយពីដំណើរកម្សាន្តជ្រោះទឹកក្តៅដែលបុរសស្រ្តីងូតទឹកជាមួយគ្នានាពេលខាងមុខ” 

ចំណងជើងនេះក៏គួរឲ្យចាប់អារម្មណ៍ណាស់ដែរ។

ក្នុងអុីម៉ែល “Re” គឺជាអក្សរកាត់ដែលមកពីពាក្យ Reply ដែលមានន័យថាឆ្លើយតប។

ទោះបីជាខ្ញុំមិនដែលផ្ញើអ្វីក៏ដោយ ប៉ុន្តែអុីម៉ែលដែលបានទទួលបែរជាមានពាក្យ “Re” ដូចជាកំពុង​ឆ្លើយ​តប​អុីម៉ែល​របស់​ខ្ញុំ។

“គ្មានផ្លូវនោះទេ ដែលខ្ញុំកក់ដំណើរកម្សាន្តដ៏គួរឲ្យអស់សំណើចបែបនេះ។” – ដោយគិតដូច្នេះ ខ្ញុំក៏បានបើកមើល ហើយខ្លឹមសារអុីម៉ែលមានត្រឹមប្រយោគមួយគត់ប៉ុណ្ណោះគឺ៖

“បញ្ជីឈ្មោះអ្នកចូលរួមត្រូវបានកំណត់។ សូមពិនិត្យមើលបញ្ជីឈ្មោះតាមរយៈតំណភ្ជាប់។”

ជាការពិតណាស់ ខ្ញុំពិតជាចង់ដឹងថា អ្នកដែលចូលរួមជានរណា ហើយឯកសាររបស់ពួកគេយ៉ាង​ណា ប៉ុន្តែ​ឯកសារ Excel ដែលភ្ជាប់មកជាមួយនោះទំនងជាឆ្លងមេរោគ ដូច្នេះខ្ញុំមិនបានបើកមើល​នោះ​ទេ។

ទាំងនេះប្រៀបដូចជាកំពុង “ខ្ជះខ្ជាយបុគ្គលដែលមានទេពកោសល្យ” ។

គំនិតពិសេសប្លែក ពាក្យពេចន៍ដែលសរសេរល្អឥតខ្ចោះ ប៉ុន្តែយ៉ាងហោចណាស់គួរតែប្រើទៅលើរឿងដែលល្អជាងនេះមែនទេ?

តាមរយៈខ្លឹមសារអត្តបទនេះ យើងសង្ឃឹមថា ប្រិយមិត្តទាំងអស់គ្នាដែលប្រើប្រាស់ប្រព័ន្ធ​អុីនធឺណេត និង​ទំនាក់​ទំនង​គ្នា​តាម​រយៈ​អុីម៉ែល​បង្កើន​ការប្រុងប្រយ័ត្នចំពោះសារសំរាម ដើម្បី​ជៀស​វាង​កុំ​ឲ្យ​ធ្លាក់​ក្នុង​អន្ទាក់​របស់ “ជន​ឆបោក” ដ៏​មាន​ទេពកោសល្យទាំង​នេះ។

Abe Kengo