របៀប​ស្អប់​មនុស្ស​ម្នាក់​ដែល​ពិភព​លោក​ទាំង​មូល​ស្រឡាញ់​ចូល​ចិត្ត

របៀបស្អប់មនុស្សម្នាក់ដែលពិភពលោកទាំងមូលស្រឡាញ់ចូលចិត្ត។

ប្រសិនបើអ្នកចូលចិត្តកីឡាបេស្បល ប្រហែលជាប្រិយមិត្តទាំងអស់គ្នាធ្លាប់លឺឈ្មោះ Otani Shohei ដែល​ជាកីឡាករបេស្បលអាជីពជនជាតិជប៉ុន។

Otani Shohei ជាកីឡាករអាជីពដ៏ល្បីឈ្មោះ ហើយបច្ចុប្បន្នកំពុងប្រកួតយ៉ាងជោគជ័យក្នុងការប្រកួត​កីឡា​បេស្បល​អាជីព​នៅ​សហរដ្ឋ​អាមេរិក។ មិនត្រឹមតែជាកីឡាករឆ្នើម​ម្នាក់​ប៉ុណ្ណោះ​ទេ ថែម​​ទាំង​ត្រូវ​បាន​គេ​ចាត់​ទុក​ថា​ជា​មនុស្សល្អ មានមនុស្សជាច្រើនស្រលាញ់ចូលចិត្ត។

យ៉ាង​ណា​មិញ ធ្លាប់មានជនជាតិជប៉ុនម្នាក់គិតរកមធ្យោបាយដើម្បី… ស្អប់កីឡាករម្នាក់នេះ។

ប្រសិនបើអ្នកទាំងអស់គ្នាចង់ដឹងថា បុគ្គលដ៏ចម្លែកម្នាក់នោះជានរណា ហើយ​ដំណើរ​រឿងនឹងទៅជាយ៉ាងណា ចូរយើងតាមដានខ្លឹមសារអត្តបទខាងក្រោមទាំងអស់គ្នា។

ជាដំបូង និយាយអំពីកីឡាករ Otani គាត់មិនត្រឹមតែធ្វើឲ្យកក្រើកពិភពកីឡាបេស្បលអាជីពនៅអាមេរិកប៉ុណ្ណោះទេ ថែមទាំងបានបង្វែរទស្សនៈទាំងអស់ដែលទាក់ទងនឹងកីឡាបេស្បលនៅជុំវិញពិភពលោក។

ក្នុងកីឡាបេស្បលតួនាទីបោះបាល់ (ហៅថា pitcher) គឺជាអ្នកលេងដែលសំខាន់មានតួនាទីការ​ពារ ហើយ​ច្រើន​តែ​មិនបានហាត់វាយបាល់ច្រើននោះទេ ដើម្បីសន្សំកម្លាំង និងផ្តោតសំខាន់លើ​ការ​បោះ​បាល់។

ប៉ុន្តែកីឡាករ Otani បែរជាមិនស្ថិតក្នុងចំណោមនេះទៅវិញ គាត់ជាកំពូលអ្នកបោះបាល់មួយរូប ហើយ​ក៏ជាអ្នកដែលមានសមត្ថភាពវាយបាល់ផងដែរ។ ចំណុចនេះមានន័យថា សមត្ថភាពប្រកួតរបស់​គាត់​ស្មើ​នឹង​មនុស្ស​ពីរ​នាក់ ហើយ​នេះជាសមិទ្ធផលដ៏គួរសរសើរ។

ក្រៅពីទេពកោសល្យដ៏ប៉ិនប្រសប់របស់ខ្លួន អ្វីដែលធ្វើឲ្យកីឡាករ Otani ទទួលបានការស្រលាញ់ចូលចិត្តពីអ្នកគាំទ្រជាច្រើននៅជុំវិញពិភពលោក​គឺ​ស្ថិត​លើ​បុគ្គលិក​លក្ខណៈ​របស់​គាត់។

Otani តែងតែដឹងពីរបៀបគ្រប់គ្រងអារម្មណ៍អវិជ្ជមានរបស់ខ្លួនមិនថាក្នុងស្ថានភាពបែបណា គេមិនដែលមើលឃើញទឹកមុខខឹងខ្លាំងរបស់គាត់នោះទេ។ ទោះបីជាត្រូវសមាជិកក្រុមម្ខាងទៀតបោះបាល់ចំខ្លួនក៏ដោយ Otani មិនដែលខឹងឡើយ។ មិនត្រឹមតែប៉ុណ្ណឹង សូម្បីតែករណីត្រូវអ្នក​បក​ប្រែ​បោក​ប្រាស់ និងកិបកេងប្រាក់ចំនួន ២៤០ លានដុល្លារអាមេរិក គាត់មិនបានបង្ហាញពីអារម្មណ៍​ខឹង​នោះទេ អ្វីដែលមហាជនបានឃើញនៅតែជាទឹកមុខស្ងប់ស្អាត់ និងស្នាមញញឹមស្រស់នៅ​លើ​មុខ។

មនុស្សម្នាក់បែបនេះ តើនរណាទៅដែលស្អប់គាត់បាន?

Iwata Yuta – ជាអ្នកបង្កើតមាតិកានៅលើ YouTube (ក្នុងភាសាអង់គ្លេសហៅថា YouTuber) ដើម​ឡើយ​ជា​អ្នកស្រលាញ់ចូលចិត្តកីឡាករ Otani ប៉ុន្តែបុគ្គលម្នាក់នេះបែរជាមានចេតនា​រកមធ្យោ​បាយ និង​អនុវត្ត​​វិធីសាស្រ្ត​​មួយ​ដើម្បី… ស្អប់​កីឡាករ Otani ។

ហើយនេះជាអ្វីដែលគ្មាននរណាក្រៅពី Iwata រកនឹកឃើញនោះទេ។

វិធីសាស្រ្តដែលបុរសម្នាក់នេះគិតឃើញគឺ រាល់ពេលដែល Otani វាយត្រូវ ហើយទទួលបានពិន្ទុ (ក្នុងកីឡា​បេស្បល​ហៅ​ថា homerun) ដូច្នេះ Iwata នឹងដាក់ពិន័យខ្លួនឯងរត់។

ការប្រកួតកីឡាបេស្បលអាជីពនៅសហរដ្ឋអាមេរិកប្រព្រឹត្តទៅតាមរដូវកាល ដែលមានរយៈពេលមួយ​ឆ្នាំ។

ការលេង homerun ម្តងៗរបស់ Otani ក្នុងរដូវកាលតែមួយសុទ្ធតែត្រូវបានរាប់តាមលំដាប់ដែលគាត់វាយបាន។

ហើយ Iwata បានប្តេជ្ញាថា រាល់ពេលដែល Otani វាយ homerun ត្រូវលើកទីប៉ុន្មាន នោះ Iwata នឹង​រត់​ប៉ុន្មាន​គីឡូម៉ែត្រ​នៅ​ថ្ងៃ​នោះ។

ឧទាហរណ៍៖ ប្រសិនបើវាយ homerun ទី ១០ នោះគាត់នឹងរត់ ១០ គីឡូម៉ែត្រ។

គិតត្រឹមថ្ងៃទី ១៦ ខែសីហា កីឡាករ Otani វាយ homerun សរុបចំនួន ៤៣ ដងក្នុងរដូវកាលឆ្នាំនេះ។ ប្រសិន​បើ​គាត់​ជោគជ័យថែមម្តងទៀត នោះជាការវាយ homerun លើកទី ៤៤ ដែល​មាន​ន័យ​​ថា Iwata ​ត្រូវ​​រត់ ៤៤ គីឡូម៉ែត្រ។

សម្រាប់ Iwata វាប្រៀបដូចជា “ឋាននរក” កំពុងតែលេចឡើងនៅចំពោះមុខ។

កាលពីមុន Otani ធ្លាប់វាយ homerun ទី ២១ និង ២២ ក្នុងការប្រកួតតែមួយ។ ចំណុចនេះមាន​ន័យ​ថា Iwata ត្រូវរត់ ២១ គីឡូម៉ែត្រ បើសិនជាវាយ homerun ទី ២១ ហើយរត់ថែម ២២ គីឡូម៉ែត្របើ​វាយ homerun ទី ២២ សរុបទៅគឺ ៤៣ គីឡូម៉ែត្រ ក្នុងរយៈពេលត្រឹមមួយថ្ងៃ។

ជាមួយនឹងចម្ងាយឆ្ងាយបែបនេះ ប្រាកដជាត្រូវចំណាយពេលច្រើន។ ប៉ុន្តែដោយសារតែបានកំណត់​ច្បាប់​ត្រូវ​រត់​ក្នុង​នោះ Iwata ត្រូវ​បង្ខំ​ចិត្ត​លុប​ចោល​គម្រោង​ផ្សេង​ទៀត​ដើម្បី​ទៅ​រត់។

ដូច្នេះហើយ រាល់​ពេលដែល Otani សម្រេច​បាន​លទ្ធផល​ល្អ Iwata បែរជាកាន់តែស្អប់គាត់។

ជាទូទៅពេលក្រឡេកមើលទៅមហាជននឹងគិតថា ហេតុអ្វីត្រូវធ្វើទារុណកម្មខ្លួនឯងបែបនេះ គ្រាន់​តែ​បោះបង់​ការ​រត់​ទៅ​បាន​ហើយ គ្មាននរណាបង្ខំនោះទេ។ ប៉ុន្តែ Iwata ប្តេជ្ញាចិត្តគោរពតាម​ច្បាប់​ដែលខ្លួនបាន​កំណត់ ដូច្នេះ​​គាត់ទទួលបានជោគជ័យក្នុងការ… ស្អប់ Otani ហើយ។

ទោះបីជារឿងនេះគ្មានប្រយោជន៍អ្វីក្រៅពីការស៊ូទ្រាំហ្វឹកហាត់ក៏ដោយយ៉ាងហោចណាស់យើងអាចឃើញការតស៊ូដ៏គួរឲ្យកោតសរសើររបស់ Iwata ។

សម្រាប់អ្នកលេងដ៏ឆ្នើមដូចជា Otani ការវាយ homerun ឲ្យបានជោគជ័យមិនមែនជារឿងចម្លែក​អ្វី​ឡើយ។ ដូច្នេះ​ផ្លូវ​នៅ​ពី​មុខ​របស់ Itawa ប្រាកដ​ជា​ពិបាក​ណាស់។

ក្រៅពីសរសើរទេពកោសល្យរបស់កីឡាករ Otami ខ្ញុំក៏កោតសរសើរចំពោះការតស៊ូ និងការប្តេជ្ញាចិត្ត​របស់ Itawa ផង​ដែរ។

ថ្វីត្បិតតែមិនដឹងច្បាស់ពីមូលហេតុ ហើយមើលទៅដូចជាកូនក្មេង ប៉ុន្តែបើគិតទៅសកម្មភាពរបស់ Itawa រហូតមកដល់ពេលនេះគ្រាន់តែជាការរត់ប៉ុណ្ណោះ ហើយមិនបានបង្កគ្រោះថ្នាក់ដល់ស្ថាប័ន ឬ​បុគ្គល​ណា​មួយ​ឡើយ។

Abe Kengo