សម័យកាលក្រដាស – សូម្បីតែយន្តហោះក៏អាចធ្វើពីក្រដាសបានដែរ

ថ្ងៃចន្ទ 25/08/2025 | 18:11 ល្ងាច

សម័យកាលក្រដាស – សូម្បីតែយន្តហោះក៏អាចធ្វើពីក្រដាសបានដែរ។

នៅពេលដែលយើងទាំងអស់គ្នាគិតដល់វត្ថុមួយចំនួនដូចជាសៀវភៅ កាសែត ក្រដាស់ជូតមាត់ ប្រអប់ក្រដាស។ល។ យ៉ាងណាមិញ ក្រៅពីវត្ថុទាំងនេះ នៅជប៉ុនមានវត្ថុជាច្រើនទៀតត្រូវបានធ្វើពីក្រដាស ហើយបើសិនជាគ្រប់គ្នាបានដឹងប្រាកដជាមានការភ្ញាក់ផ្អើលយ៉ាងខ្លាំង។ ក្នុងចំណោមនោះ ជប៉ុនបានប្រើបច្ចេកទេសពិសេសដើម្បីចម្រាញ់ក្រដាស ជាប្រភេទក្រដាសដែលមានប្រភពមកពីប្រទេសចិន។ ហើយនាពេលអនាគត ជប៉ុនមានបំណងឆ្ពោះទៅរកការបង្កើតយន្តហោះដែលធ្វើពីក្រដាស។

ក្នុងអត្តបទថ្ងៃនេះ យើងទាំងអស់គ្នានឹងស្វែងយល់អំពីរឿងរ៉ាវដែលចម្លែកនេះ។

យន្តហោះគ្មានមនុស្សបើកបរធ្វើពីក្រដាស

ក្នុងសង្គ្រាមរវាងអ៊ុយក្រែន និងរុស្ស៊ី អត្ថប្រយោជន៍របស់យន្តហោះគ្មានមនុស្សបើក (drone) ត្រូវបានទទួលស្គាល់យ៉ាងឆាប់រហ័ស។

ប្រសិនបើកាលពីមុន នៅប្រទេសជប៉ុនការវាយប្រហារធ្វើអត្តឃាត អ្នកបញ្ជាយន្តហោះនឹងហោះទៅបុកសត្រូវ សកម្មភាពវាយប្រហារបែបនេះស្មើនឹងការធ្វើអត្តឃាត ឥឡូវនេះ ប្រភេទយន្តហោះគ្មានមនុស្សបើកបរកំពុងត្រូវបានប្រើប្រាស់ក្នុងស្ថានភាពស្រដៀងគ្នា។

ប្រសិនបើប្រភេទយន្តហោះទាំងនេះត្រូវបានផលិតក្នុងទ្រង់ទ្រាយធំ ជាមួយនឹងបច្ចេកវិទ្យាបច្ចុប្បន្ន ភាគីសត្រូវប្រាកដជាពិបាកការពារនៅពេលដែលត្រូវវាយប្រហារ។

ជប៉ុនបានអភិវឌ្ឍប្រភេទយន្តហោះគ្មានមនុស្សបើកបរធ្វើពីក្រដាសកាតុង ដែលគេហៅថាយន្តហោះគ្មានមនុស្សបើកបរ Origami ។

ល្បឿនហោះហើររបស់យន្តហោះគឺ ៧០ គីឡូម៉ែត្រក្នុងមួយម៉ោង អាចហោះបានរយៈពេល ២ ម៉ោង ជាមួយនឹងចំណុះគ្រាប់បែក ១,៥ គីឡូក្រាម ដូច្នេះអាចបង្ហាញពីលក្ខណៈជាក់ស្តែងរបស់យន្តហោះ។

សំខាន់ជាងនេះទៅទៀត ការចំណាយលើការផលិតត្រឹមតែ ១/១០ បើប្រៀបនឹងយន្តហោះគ្មានមនុស្សបើកបរពីមុន ដូច្នេះការផលិតទ្រង់ទ្រាយធំក៏អាចធ្វើទៅបានដែរ។

គោលដៅដែលកំពុងឆ្ពោះទៅរកគឺដើម្បីបង្កើនល្បឿនដំឡើងផ្នែកនីមួយៗទៅជាយន្តហោះក្នុងរយៈពេល ៥ នាទី។

ដើម្បីបង្កើតបានយន្តហោះទាំងនេះ សម្ភារៈសំខាន់គឺក្រដាសកាតុង និងផ្លាស្ទិចដែលអាចរំលាយបាន។ ទោះបីជាផលិតអាវុធ ប៉ុន្តែជប៉ុនមិនភ្លេចគិតគូរពីបញ្ហាបរិស្ថាននោះទេ។ អាចនិយាយបានថា សម្រាប់ប្រជាជនជប៉ុន ការការពារបរិស្ថានជាលក្ខណៈវប្បធម៌ដែលបានជ្រាបចូលផ្នត់គំនិតទៅហើយ។

គ្រែក្រដាសកាតុង

គ្រែដែលប្រើសម្រាប់កីឡាករក្នុងព្រឹត្តិការណ៍កីឡាអូឡាំពិកទីក្រុង Tokyo ក៏ត្រូវបានផលិតពីក្រដាសរឹងផងដែរ (ឬគេហៅថាក្រដាសកាតុង) ។

បន្ទាប់ពីព្រឹត្តិការណ៍កីឡាអូឡាំពិកកន្លងផុត គ្រឿងបរិក្ខារទាំងអស់ដែលអត្តពលិកប្រើប្រាស់នឹងត្រូវបានចាត់ចែង និងបំផ្លាញចោល។ ចំណែកឯក្រដាសកាតុងដែលធ្វើពីក្រដាសជាប្រភេទវត្ថុធាតុដើមអាចបំផ្លាញបានយ៉ាងងាយស្រួល។

“គ្រែក្រដាសកាតុង” ស្តាប់ទៅដូចជាមិនធន់នោះទេ ប៉ុន្តែជាក់ស្តែងគឺអាចជឿទុកចិត្តទាំងស្រុងបាន។ លុះត្រាតែមានចេតនាបំផ្លាញ បើមិនដូច្នេះទេគ្រែប្រាកដជាមិនខូចឡើយ។

ជប៉ុនជាប្រទេសដែលងាយកើតមានគ្រោះមហន្តរាយធម្មជាតិ ហើយចំណុចនេះពិតជាមានប្រយោជន៍ណាស់ ប្រសិនបើគ្រែកាតុងទាំងនេះត្រូវបានប្រើប្រាស់នៅមជ្ឈមណ្ឌលជនភៀសខ្លួន។

ក្រដាសប្រាក់ជប៉ុន

ក្រដាសប្រាក់ខ្ពស់របស់ជប៉ុនត្រូវបានផលិតចេញពីក្រដាស ជាប្រភេទក្រដាសដែលផលិតឡើងដោយប្រើបច្ចេកទេសបុរាណរបស់ជប៉ុនហៅថា ក្រដាស washi ។

នៅប្រទេសជប៉ុន ដើម្បីផលិតក្រដាសប្រាក់ គេប្រើប្រាស់ “បច្ចេកទេសបោះពុម្ពមើលមិនឃើញ” ដែលជួយផ្លាស់ប្តូរកម្រាស់របស់ក្រដាស ហើយរូបភាពនឹងលេចឡើងនៅពេលដែលដាក់ចូលពន្លឺ។

ជាមួយនឹងគុណភាពរបស់ក្រដាស washi នៅពេលដែលភ្លេចលុយក្នុងហោប៉ៅ ឬអាវ ហើយយកទៅបោកគក់ក៏មិនចាំបាច់បារម្ភថាក្រដាសប្រាក់ទាំងនេះងាយនឹងរហែកនោះដែរ។

ក្នុងចំណោមប្រភេទក្រដាសប្រាក់ នេះជាប្រភេទដែលត្រូវបានគេចាត់ទុកថាធន់ និងមានគុណភាពល្អបំផុតនៅលើពិភពលោក។

ក្រៅពីនេះ នៅជប៉ុនករណីធ្វើក្រដាសប្រាស់ក្លែងក្លាយក៏មិនងាយកើតឡើងនោះដែរ ព្រោះក្រដាសប្រភេទនេះត្រូវបានផលិតឡើងដោយប្រើបច្ចេកវិទ្យាពិសេស ពិបាកនឹងចម្លងតាមណាស់។

វាំងនន Shoji ជួយឲ្យបរិយាកាសក្នុងផ្ទះមានផាសុកភាព

នៅប្រទេសជប៉ុន វាំងនន Shoji ត្រូវបានប្រើធ្វើជារបាំងក្នុងផ្ទះ។

ប្រភេទក្រដាសនេះផ្តល់ពន្លឺគ្រប់ល្មម ម្យ៉ាងវិញទៀត បិទបាំងមិនឲ្យភាគីម្ខាងទៀតមើលឃើញ។

នៅជប៉ុនរដូវក្តៅកម្រិតសំណើមខ្ពស់ខ្លាំងដែលបណ្តាលឲ្យសើម ហើយពិបាកទ្រាំ ប៉ុន្តែវាំងនន Shoji នេះបែរជាអាចស្រូបយកសំណើម។

ក្រៅពីនេះ មានក្រដាសជាច្រើនប្រភេទផ្សេងទៀតដែលមានមុខងារពិសេសដោយឡែក។

ឧទាហរណ៍ដូចជា “ប្រភេទក្រដាស” ដែលអាចបំបាត់ក្លិនមិនល្អ ពិតជាមានប្រយោជន៍ខ្លាំងណាស់ ប្រសិនបើប្រើធ្វើជាក្រដាសបិទជញ្ជាំង។

ថែមទាំងមានប្រភេទ “ក្រដាសការពារឆេះ” នៅពេលដែលឆេះ ឬពេលមានអគ្គីភ័យកើតឡើង ក្រដាសប្រភេទនេះគ្រាន់តែត្រូវដុតប៉ុណ្ណោះ ភ្លើងនឹងមិនរាលដាលឡើយ។

ឬប្រភេទ “ក្រដាសអាថ៌កំបាំង” នឹងបង្ហាញអក្សរ និងរូបភាពក្នុងករណីត្រូវថតចម្លង។

សម្រាប់ប្រជាជនជប៉ុន ក្រដាសប្រៀបបីដូចជាដៃគូតាំងពីបុរាណកាលមក។ យូរៗទៅ ដោយសារបច្ចេកទេសពិសេស ក្រដាសជាច្រើនប្រភេទត្រូវបានកែលម្អ និងអភិវឌ្ឍឲ្យស្របតាមសម័យកាល។

ដើម្បីសម្រេចបានលទ្ធផលដូចសព្វថ្ងៃ សិប្បករក្រដាសជាច្រើនជំនាន់បានឆ្លងកាត់ដំណើរការយូរអង្វែង បានលះបង់ និងខិតខំប្រឹងប្រែងបន្តបច្ចេកទេសផលិតក្រដាស ដែលនាំមកនូវបច្ចេកទេសកាន់តែជឿនលឿនសម្រាប់ប្រទេសជាតិ និងពិភពលោក។

សម្រាប់ខ្ញុំ ពួកគេជាសិល្បករដែលគួរឲ្យគោរពបំផុត។

Abe Kengo