វិធីសាស្រ្តដែលអាចជួយឲ្យអ្នកក្លាយជា “សុភាពបុរស” ក្នុងក្រសែភ្នែកមនុស្សស្រី

ថ្ងៃសុក្រ 22/08/2025 | 18:28 ល្ងាច

វិធីសាស្រ្តដែលអាចជួយឲ្យអ្នកក្លាយជា “សុភាពបុរស” ក្នុងក្រសែភ្នែកមនុស្សស្រី។

នៅប្រទេសជប៉ុន បុរសៗនៅពេលដែលឈានចូលវ័យប្រហែលជា ៤០ ឆ្នាំឡើង ប្រាកដជាត្រូវមនុស្សដែលនៅក្មេងជុំវិញហៅថា “លោកពូ” ជាមិនខាន។

មនុស្សគ្រប់គ្នាអាចនឹងចាស់ទៅនៅថ្ងៃណាមួយ ដូច្នេះហើយ បុរសគ្រប់រូបនឹងក្លាយជាលោកពូម្នាក់ក្នុងក្រសែភ្នែករបស់មនុស្សវ័យក្មេង។ យ៉ាងណាមិញ សូមកុំបារម្ភ ព្រោះថាគ្រប់វ័យទាំងអស់សុទ្ធតែមានចំណុចដ៏គួរឲ្យភ្ញាក់ផ្អើលកំពុងរង់ចាំយើង។

នៅជប៉ុនមានបុរសមួយចំនួនត្រូវបានគេហៅថា “mote-ojisan” (លោកពូសម្បូរស្នេហ៍) ពោលគឺបុរសៗដែលមានមនុស្សជាច្រើនស្រលាញ់ចូលចិត្ត។

មនុស្សស្រីវ័យក្មេងជាច្រើនថែមទាំងចូលចិត្តបុរសវ័យកណ្តាលទាំងនោះជាងមនុស្សប្រុសវ័យក្មេងទៅទៀត។

ប្រហែលជាអានដល់ចំណុចនេះ ប្រិយមិត្តដែលមានវ័យកណ្តាលប្រាកដជាកំពុងញញឹមពេញចិត្ត និងមានកម្លាំងចិត្តឆ្ពោះទៅមុខហើយមែនទេ?

បើសិនជារំលងពីបញ្ហាហិរញ្ញវត្ថុ ក្នុងអត្តបទថ្ងៃនេះយើងនឹងក្រឡេកមើលពីកត្តាដែលធ្វើឲ្យបុរសៗកាន់តែមានភាពទាក់ទាញក្នុងក្រសែភ្នែករបស់មនុស្សស្រី។

ស្អាតបាតជាកត្តាដែលសំខាន់

នៅពេលដែលរំលឹកដល់ពាក្យថា “ស្អាតបាត” ជាដំបូងគ្រប់គ្នាប្រាកដជាគិតដល់រូបរាងខាងក្រៅរបស់មនុស្សម្នាក់ដូចជាសម្លៀកបំពាក់ សក់ក្បាល ស្បែក ក្លិនខ្លួនជាដើម។ ទាំងនោះជាចំណុចដំបូងដែលទាក់ទាញភាគី ដូច្នេះការដែលរក្សាឲ្យខ្លួនប្រាណស្អាតបាតពិតជាសំខាន់ណាស់។

ដូច្នេះគួរលុបបំបាត់គំនិតដែលថា ត្រូវតែស្អាតបាតពេលចេញទៅក្រៅ រីឯពេលដែលនៅផ្ទះយ៉ាងណាក៏បាន យើងគួរតែស្អាតបាតគ្រប់ពេលវេលា និងគ្រប់ទីកន្លែងដែលខ្លួនអាចធ្វើបាន។

កោរពុកមាត់ជាប្រចាំ សម្អាតមាត់ធ្មេញ ងូតទឹកទៀងទាត់ ស្លៀកពាក់ស្អាតបាត និងការពារក្លិនខ្លួនជាដើម។ ចំណុចទាំងនេះជាអ្វីដែលអាចជួយឲ្យសុភាពបុរសរក្សារូបរាងខាងក្រៅស្អាតបាត ហើយកាន់តែមានភាពជឿជាក់នៅពេលដែលបង្ហាញខ្លួនចំពោះមុខអ្នកដទៃ ដូច្នេះសូមអនុវត្តទម្លាប់ទាំងនេះ ប្រសិនបើខ្លួនអ្នកមិនទាន់ធ្វើបានល្អ។

ប្រសិនបើអាចរៀបចំកាលវិភាគ ចំណាយពេលខ្លះក្នុងការលេងកីឡាដើម្បីជួយឲ្យរាងកាយមានភាពរឹងមាំ ប្រាកដជាមើលទៅកាន់តែទាក់ទាញជាងមុន។

អាកប្បកិរិយាស្ងប់ស្ងាត់

ក្រៅពីរូបរាងខាងក្រៅ ចំណុចសំខាន់ដែលមិនអាចមើលរំលងបាន ប្រសិនបើអ្នកចង់ក្លាយជា “សុភាពបុរស” ដែលទទួលបានការស្រលាញ់ចូលចិត្តស្ថិតលើអាកប្បកិរិយា។ ក្នុងនោះរាប់ទាំងអាកប្បកិរិយាទូទៅដែលយើងតែងតែហៅថា “ភាពគួរសម” (ពាក្យដើមមកពីភាសាបារាំងគឺ galant) ។

ដូម្ត៉េចដែលហៅថា “ភាពគួរសម” មានន័យថាយើងជាអ្នកចាប់ផ្តើម និងការពារស្ត្រីច្រើនជាងមុន។ ឧទាហរណ៍ដូចជាបើកទ្វារឡាន ជួយលើកអីវ៉ាន់ ទាញកៅអីឲ្យនាងអង្គុយ ផ្តល់អាទិភាពដល់នាងគ្រប់ពេលវេលាជាដើម។ មានសកម្មភាពមួយចំនួនមើលទៅទោះបីជាតូចតាច ប៉ុន្តែអាចបង្ហាញថាយើងជាបុរសដែលមានភាពគួរសម និងធ្វើឲ្យភាគីចាប់អារម្មណ៍។

ក្នុងជីវិតប្រចាំថ្ងៃ ពេលខ្លះការយល់ច្រឡំអាចបណ្តាលឲ្យមានការឈ្លោះប្រកែកគ្នា ជារឿងដែលមិនអាចជៀសផុត អ្វីដែលសំខាន់បុរសត្រូវចេះគ្រប់គ្រងអារម្មណ៍ រក្សាចិត្តស្ងប់ស្ងាត់ ពិភាក្សាបញ្ហាម្តងមួយៗ កុំបាត់បង់ភាពម្ចាស់ការ ហើយស្រែកដាក់ភាគីម្ខាងទៀត។

ហើយនេះក៏ជាគុណសម្បត្តិមួយរបស់បុរសវ័យកណ្តាលផងដែរ។ ដោយសារតែយូរៗទៅ ពួកគេបានរៀនអំពីរឿងល្អៗជាច្រើន ដោយអាចដកយកបទពិសោធជីវិត និងទង្វើមានភាពគួរសម។

ម៉ូដសម្លៀកបំពាក់

កុំខំប្រឹងរត់តាមម៉ូដសម្លៀកបំពាក់របស់យុវវ័យទាំងដែលវ័យរបស់យើងលែងសមក៏ដោយ។

សម្លៀកបំពាក់ម៉ាកល្បីក៏បាន សម្លៀកបំពាក់តាមផ្សារក៏បាន ធ្វើយ៉ាងណាឲ្យសមនឹងអាយុ បរិយាកាស និងការងាររបស់ខ្លួនទៅបានហើយ។ ការជ្រើសរើសសម្លៀកបំពាក់ដែលស័ក្តិសមនឹងស្ថានភាព និងបរិយាកាសគឺសំខាន់ជាងតម្លៃសម្លៀកបំពាក់ទៅទៀត។ មិនថាសម្លៀកបំពាក់ថ្លៃយ៉ាងណាក៏ដោយ ប្រសិនបើមិនស័ក្តិសមនឹងស្ថានភាពក៏គ្មានតម្លៃអ្វីដែរ។

ត្រូវបោកសម្លៀកបំពាក់ឲ្យបានស្អាត ហើយកុំរំលងការអ៊ុតសម្លៀកបំពាក់ សម្លៀកបំពាក់ដែលត្រូវបានអ៊ុតស្អាតប្រាកដជាបង្ហាញថាយើងជាមនុស្សដែលមានរបៀបរស់នៅស្អាតបាត រៀបរយល្អ។

ប្រសិនបើមនុស្សស្រីច្រើនតែមានគ្រឿងអលង្ការច្រើន បុរសក៏មានគ្រឿងលម្អដែលសាកសមនឹងខ្លួនផងដែរ។ ក្នុងចំណោមនោះអ្វីដែលពេញនិយមបំផុតគឺនាឡិកា ពាក់នាឡិកាលើដៃនឹងធ្វើឲ្យយើងកាន់តែស្រស់សង្ហា។

ហើយប្រសិនបើអ្នករើសយកនាឡិកាដៃដើម្បីបង្កើនភាពទាក់ទាញ សូមរើសយកនាឡិកាដែលមានតម្លៃ។ ថ្វីត្បិតតែមានតម្លៃថ្លៃក៏ដោយ ប្រសិនបើថែរក្សាបានត្រឹមត្រូវ នាឡិកាល្អអាចប្រើបានយូរ ហើយនាឡិកាមួយចំនួនថែមទាំងរក្សាតម្លៃបានល្អផងដែរ។

ខ្ញុំជឿថា នេះជាការវិនិយោគដ៏ល្អបំផុតសម្រាប់រូបរាងខាងក្រៅ និងទ្រព្យសម្បត្តិ។

ចេះស្តាប់ និងមានការយោគយល់

ក្នុងជីវិតដ៏មមាញឹកមនុស្សគ្រប់រូបពោរពេញទៅដោយការព្រួយបារម្ភ និងសម្ពាធ។ យើងទាំងអស់គ្នាសុទ្ធតែមានតម្រូវការចែករំលែករឿងក្នុងចិត្ត។ ត្រូវការមនុស្សម្នាក់នៅចាំស្តាប់ ត្រឹមតែប៉ុណ្ណឹងក៏យល់ថាគ្រប់គ្រាន់ណាស់ទៅហើយ។

កុំនៅជិតគ្នាក្នុងពេលដែលអ្នកទាំងពីរកំពុងមានអារម្មណ៍ល្អប៉ុណ្ណោះ ត្រូវនៅជាមួយគ្នាក្នុងស្ថានភាពដែលអាក្រក់បំផុត។

ចាំស្តាប់រឿងរ៉ាវរបស់នាង មិនថាល្អ ឬអាក្រក់ អង្គុយស្តាប់ដោយអំណត់ កុំប្រញាប់តបត។ ហើយទោះបីជានាងខុសក៏ដោយ សូមកុំខឹង ផ្ទុយទៅវិញ សូមណែនាំដោយចិត្តអំណត់ថា៖ “ប្រសិនបើជាបង ក្នុងស្ថានភាពបែបនោះ ប្រហែលជាបងនឹងធ្វើបែបនឹង…” ។

តាមពិតទៅ មនុស្សស្រីមិនត្រូវការអ្វីច្រើនពេកទេ អ្វីដែលពួកគេចង់បានគ្រាន់តែជាអារម្មណ៍សុវត្តិភាព ទទួលបានការការពារពីមនុស្សប្រុសដែលនៅក្បែរខ្លួន។ មិនថាពេលណា ឬកន្លែងណា សូមកុំបណ្តោយឲ្យពួកគេមានអារម្មណ៍គ្មានសុវត្តិភាព និងបាត់បង់ទំនាក់ទំនងស្នេហា ហើយមានអារម្មណ៍ថាខ្លួនឯកោម្នាក់ឯង។

ក្នុងនាមជាបុរសវ័យកណ្តាលមានអាយុ ៥២ ឆ្នាំម្នាក់ ទោះបីជាខ្ញុំលែងនៅក្មេងក៏ដោយ ប៉ុន្តែខ្ញុំនៅតែខំប្រឹងកែលម្អខ្លួនឯងជារៀងរាល់ថ្ងៃ ដើម្បីក្លាយទៅជាមនុស្សដែលល្អបំផុតសម្រាប់ខ្លួនឯង ល្អជាងខ្លួនឯងកាលពីម្សិលមិញ។

សង្ឃឹមថា ខ្លឹមសារអត្តបទថ្ងៃនេះអាចជួយឲ្យប្រិយមិត្តអ្នកអានដែលជាសុភាពបុរសមានកម្លាំងចិត្តស្វែងរកអ្វីដែលល្អបំផុតសម្រាប់ខ្លួនឯង ហើយអាចក្លាយទៅជា “សុភាពបុរស” ក្នុងក្រសែភ្នែករបស់មនុស្សស្រី។

Abe Kengo